¹ Enyɛ yɛ ɖe, nɔvinyɛwo, ŋ de sɛn eŋ yixo nuxu nɔ́ mì shigbe amɛ ciwo yi Gbɔngbɔn Kɔkɔɛ kplɔkplɔ nɛnɛ o. Vɔ ɔ, ŋ xoi nɔ mi shigbe amɛ, xexe cɛ mɛtɔwo nɛnɛ. Ŋ xo nuxu nɔ́ mí shigbe lehan yi wo a xoi do nɔ ɖevihwɛwo le Kliso lɔ mɛ nɛnɛ. ² Anɔshi yi ŋ na mi. Ɖ'é nyi enuɖuɖu sɛnŋsɛnŋ ɖé yi ŋ na mí o. Ɖò ɔ, mí d'a sɛ́n eŋ ɖui sasa o. Egbɛ cán ɔ, mi d'a sɛ́n eŋ ɖui o. ³ Ɖó ɔ, agbetɔ jɔjɔmɛ gbe kpɔtɔ kplɔkplɔ mi. Ɖó nɔ́ mí le ŋhwan dɔndɔntɔwo waa koɖo emiwonɔnɔwo yi gbe le evu waa koɖo emiwonɔnɔwo ɖee, mi de le agbetɔ jɔjɔmɛ mɛ ba ? Agbenɔnɔ cɛwo de doasɛ mɔ́ agbetɔ nuwawawo kpoŋ yi mi wawa ba ? ⁴ Ci yi amɛ ɖewo le mi mɛ yi nunu mɔ "Pɔlu ji yi ŋ le", yi mɛbuwo nunu mɔ "Apolosu ji yi ŋ le" ; ɖe nyi agbetɔwo kpoŋ yi mi nyi nɛnɛ ba ? ⁵ Mɛ yi nyi Apolosu ɔ ? Vɔ, mɛ yi nyi Pɔlu ɔ ? Mawu dowatɔ ciwo ji yi to yi trɔ́ xɔsetɔwo, eyi mi nyi. Edɔ ci yi Axwetɔ ɖó nɔ́ amɛ ɖeka-ɖeka yi é wawa. ⁶ Enyɛ ɔ, ŋ cu aci yi Apolosu va wu eshi nii. Vɔ ɔ, Mawu yi ná yi aci lɔ shinshin. ⁷ Eyi taɖo ɔ, d'é nyi amɛ ci yi cu aci alo amɛ ci ná eshi aci lɔ yi le veviɖe o. Vɔ ɔ, Mawu ci yi ná yi aci lɔ shinnɔ ɖekɛ yi le vevide. ⁸ Amɛ ci yi cu aci koɖo amɛ ci yi na eshi aci ɔ, ɖekɛ wo nyi. Mawu a cú efɛn nɔ wowo domɛtɔ ɖeka ɖeka dó edɔ ci yi é wa nu. ⁹ Ɖó ɔ, bɔ mì bɔ yi wawa edɔ nɔ Mawu. Míwo yi nyi Mawu gble. Míwo yi gbe nyi Mawu xɔ. ¹⁰ Enyɛ yɛ ɔ, Mawu wa xomɛvunu nɔ́ ŋ yi sɔ ŋ sɔ wa exɔdɔwatɔ gangantɔ ŋununyatɔ, yi ŋ ɖo gɔnmɛ do kpe nɔ exɔ lɔ. Amɛ bu vá ɖoɖoɔ egli do ji. Vɔ ɔ, amɛɖeka amɛɖeka ɖó a wa blɛwu nɔ lehan yi é cucu ɔ exɔ lɔ dó. ¹¹ Nyao ɔ, amɛɖe d'a sɛ́n eŋ gbe ɖo gɔnmɛ ɖokpe bu tó akpo nɔ ci yi li sa o. Yesu Kliso yi nyi gɔnmɛɖokpe lɔ. ¹² Wo a sɛ́n eŋ sɔ́ shika, ehokɔ, ekpe veviwo, aci, ebe alo egbejɔɛ sɔ́ cu gɔnmɛɖokpe lɔ. ¹³ Edɔ ci yi amɛɖeka amɛɖeka wa a vá doasɛ yiɖeki le kojoɖogbe. Nyao le gbenɔgbe ɔ, ezo a li. Ezo hunnɔ yi a dó amɛɖeka amɛɖeka dɔ́ kpɔ́ yi a doasɛ lehan yi edɔ lɔwo nyɔ́ dó. ^{14 15} Nɔ́ ezo de wa enuɖe nɔ́ edɔ ci yi amɛɖeka wa le exɔ lɔ gɔnmɛɖokpe nú o ɔ, amɛ lɔ yɛ a xɔ efɛncu. Vɔ nɔ́ amɛɖe dɔ́ bi ezo ɔ, wo a te efɛncu yi. Gankegan ɔ, wo a xɔ amɛ lɔ gán gbɔnnugbɔnnuɖe shigbe lehan yi wo hwlɛnnɔ amɛ ti le axwe ci yi le ezo yi bibiɛ nɛ. ¹⁶ Mí de nyá mɔ́ Mawu gbedoɖaxu yi mí nyi, yi Mawu gbɔngbɔn nɔnɔ mí mɛ ba ? ¹⁷ Nɔ́ amɛɖe gban Mawu gbedoɖaxu ɖe, Mawu a gban eyɛ hɛnɛ. Ɖó ɔ, Mawu gbedoɖaxu nyi enu kɔkɔɛ. Enu ci yi miwo can, mi nyi. ¹⁸ Amɛɖe ŋgbe ble yiɖeki o. Nɔ́ amɛɖe bubu ɔ le miwo domɛ mɔ ye nya ŋunu shigbe lehan yi xexe cɛ mɛtɔwo kpɔɛni dó ɛnɛ ɔ, lé trɔ sukunɔ keŋ yi a vá nyi ŋununyatɔ. ¹⁹ Nyao ɔ, xexe cɛ mɛ ŋununyanya nyi sukujeje le Mawu ŋmɛ. Ɖó ɔ, wo ŋwlɛ dó Mawu nyɔ wema ɖeka mɛ ahan mɔ : "Mawu lenɔ ŋununyatɔwo sɔto ayemɛnu ciwo yi wo wanɔ mɛ." ²⁰ Wo gbe ŋwlɛ do ebu mɛ hɛnnɛ mɔ : "Tɔhonɔ nya susu ci yi ŋununyatɔwo ɖenɔ. É nyá mɔ́ susu lɔwo de ɖó eta ɖe o". ²¹ É le nɛnɛ ɖe, amɛɖe de ɖó yi a gezenɔ dó agbetɔwo nú o. Ɖó ɔ, míwotɔ yi nyi enuwo pleŋ. ²² Pɔlu yɔ a, Apolosu yɔ a, Kefasi yɔ a, xexe lɔ mɛ yɔ a, agbe yɔ a, eku yɔ a, egbɛ yɔ a, esɔ ci yi gbɔgbɔ yɔ . Wo pleŋ míwotɔ yi wo nyi. ²³ Vɔ ɔ, míwo nyi Klisotɔ yi Kliso nyi Mawutɔ.