¹ Nyɔnɔnui yí ŋ nunuɔ le Kliso lɔ mɛ. Ŋ de kankan ŋsu go. Nyaŋ 'yexa can gbe ɖeɖee kunu nɔ ŋ sɔ́ to gbɔngbɔn kɔkɔɛ jí. ² Ŋ le ŋshishi gangan ɖeka mɛ yí nyaŋ 'ji le vevi seɛ gbɛmɛ. ³ Ɖó é drodro ŋ be ma nyí klán so Kliso lɔ nú dó tamɛ nɔ nɔvinyɛwo, ciwo yí yí nyí nyaŋ xomu!ɛtɔwo le ŋcilan mɛ. ⁴ Wowo yí nyi Israyɛliviwo. Wowo yí Mawu sɔ́ wa eviɛwo. Wowo yí é dansin yi klɛnklɛn gangan lɔ nɔ́, Wowo yí é ɖu egu kodo wowo yí é do ese nɔ́ to Mɔyizi ji, wowo yí é ɖo sɛnsɛn 'dɔ nɔ́, wowo yí é ɖo egbewo nɔ́. ⁵ Wowo yí wa tɔgbui gangantɔ lɔwo ciwo hihimɛviwo mɛ yí Kliso lɔ vá jɔ so le agbe jɔjɔmɛ. Kliso lɔ trɔ́ nyí Mawu yí le eta nɔ enuwo pleŋ kanfukanfu lé nyí yitɔ sɔyi tɛgbɛɛ. Xoaɖyi! ⁶ D'é nyi kpɔ be Mawu de wa do egbe ci yí yí é ɖo nɔ́ wo jí yɔ́ go. E wa do ji. Ɖó ɔ, d'é nyi Israyɛli jijimɛviwo pleŋ yí nyi Israyɛli jukɔn ŋtɔŋtɔ lɔ go. ⁷ D'é nyi amɛ ciwo pleŋ yí nyí Ablahamu eviɛwo yí nyi Ablahamu eviɛ jiji ŋtɔwo go. Ɖó sasa ɔ, Mawu nu nɔ́ Ablahamu be «Izaki ji yí na tó yí a ná eo ao jijimɛvi ŋtɔŋtɔwo» ⁸ Ci gɔnmɛ yí nyi kpɔ be, d'é nyí evi ciwo yí Ablahamu ji le ŋcilan mɛ yí nyi Mawu go. Vɔ ɔ, evi ciwo yí é ji sɔ́ zɔndo egbe ci yí Mawu do nii yí wo hlɛnnɔ do jijimɛ ji. ⁹ Le mɛ ɔ, egbe ci yí Mawu ɖó nii vayi lɔ ke : «Nɔ́ ŋ trɔwa eo gbɔ exwemɛ hecɛhannu ɔ, ashio sala a ji evi ŋsuvi ɖeka.» ¹⁰ D'é vɔ lo. É nyi nɛnɛ nɔ Hlebeca can. Mìwo tɔgbi Izaki ɖeke yí é ji evi eve nɔ ¹¹ Mawu nu ɖevi lɔwo 'nyɔ nɔ Hlebeka . Hwecinu yí Mawu nunuɔ nɔ́ Hlebeka ɔ, d'é ji wo hɔde go kaka ɖevi lɔwo a nyá evototo ci yí le enyui kodo enuvɔn mɛ go. Mawu wɛɛ nɛnɛ yí sɔ́ dansin be toto mɛ ci yí le eye shi ɔ, é yí ye wanɔ. É cannɔ yi 'mɛ le amɛwo mɛyí a yɔɛ kpoŋ shigbe lehanci yí é wa totomɛ lɔ dó nɛnɛ yí d'a nyí amɛ lɔ 'nuwawawo nú yí é kpɔdó go. ¹² Mawu nú nɔ Hlebeka be: «Mɛgan a va nyi hwashi nɔ ɖevi» ¹³ É le shigbe lehanci yí wo ŋwlii ɖɛ dó Mawu 'nyɔ wemawo mɛ do nɛnɛ be: « ŋ lɔn Ʒakɔbu yí gbe Eso.» ¹⁴ Ecɛyɛ ɖee enyɔ ci yí mì a nu viɛ ɔ? Wo a sɛ́n eŋ nú be enumajɔmajɔɛ wawa le lanmɛ nɔ Mawu a? Gbeɖe, nɛnɛ yɔ́ nɛ go! ¹⁵ Mawu nú nɔ́ Mɔyizi be «Na kú ŋshishi nɔ́ amɛ ci yí ŋ ji be na kú ŋshishi nɔ́ yí a wa xomɛvu nɔ amɛ ci yí ŋ ji be na wa xomɛvu nɔ» ¹⁶ Ci yí é le nɛnɛ ɔ, d'é nyi amɛ ci yí jijiɛ anu gbɔ́ yí é so go alo amɛ ci yí le eju ji nɔ́ enu gbɔ yí é so go. Vɔ ɔ, é so Mawu ci yí kunɔ ŋshishi nɔ́ amɛ gbɔ. ¹⁷ Ɖo le Mawu 'nyɔ wemawo mɛ ɔ, Mawu nú nɔ́ Falawɔn, Eʒiputu 'fiɔ be «Ŋ na yí é nyí efiɔ kodo susu be na to eo ji yí a dansin nyaŋ ŋsɛn nɔ amɛwo keŋ nɔ́ nyaŋ nyikɔ a yi eji le nyigban lɔ pleŋ ji» ¹⁸ Nɛnɛ ɔ, Mawu kunɔ ŋshishi nɔ amɛ ci yí é dro yí gbe nanɔ yí amɛ ci yí é dro be yi a shin ŋta gbe shinnɔ ŋta . ¹⁹ Nɛnɛ ɔ, a biɔ ŋ se dru be: « Ɖee Mawu yɛ a gbe kpɔnɔ enyɔ ɖe yí a gbenɔ nɔ amɛ yɛ a? Nyao ɔ, mi yí a sɛn eŋ dó ɖyika Mawu gbeta ɔ?» ²⁰ Vɔ eo agbetɔ, mi é nyi yí a dɔn enyɔ kodo Mawu ɔ? Enu ci yí ezemɛtɔ sɔ́ esu mɛ a sɛ́n eŋ nú nɔ ezemɛtɔ lɔ be «Nyi yí ná taɖo yí è sɔ ŋ mɛ enu cɛ nɛnɛ ɔ» a? ²¹ Ezemɛtɔ de ɖó acɛ yí a sɔ́ esu wa enu ci yí droi ba? d'á sɛn ɛŋ nya esu yí a mă mɛ do eve yí a sɔ́ akpa ɖeka mɛ enuɖe ci yí wo a zannɔ nɔ́ enu veviwo veviwo yí a sɔ́ akpa evetɔ mɛ enu kpoŋ drú ba? ²² Mawu ji be ye a dansin ye domɛzi kodo ye ŋsɛn nɔ́ amɛ ciwo yí je nɔ trɔntrɔnmɛ yíyí. Gankegan ɔ, é gbe gbɔn eji ɖɛ yí gbé wo ɖɛ fɛɛ. Ɖó é ji be ye a dansin ye ŋsɛn kodo lehanci yí enu vé eye nu sugbɔ do nɔ́ wo ²³ É ji be ye a dansin ye gangangan manumanu lɔ nɔ́ amɛ buwo hɛnnɛ. Nɛnɛ 'mɛwo ɔ, é ku ŋshishi nɔ́ wo yí doŋkɔ yí can wo dadɛ nɔ́ wa a vayi nɔ klɛklɛ gangan lɔmɛ kodoi. ²⁴ Mìwo yí nyí nɛnɛ 'mɛ lɔwo. D'é nyi yuɖatɔwo mɛ ɖekɛ yi é can mì le go. É can mí le jukɔn manyi yuɖatɔwo mɛ hɛnnɛ. ²⁵ Enyɔ ci yí é nu yí wo ŋwlɛ do Oze wema mɛ nɛ be «Jukɔn ciwo yí de nyi nyaŋ jukɔn sasa go ɔ, na yɔ́ wo be nyaŋ jukɔn. Eyí akɔta ci yí ŋ de lɔnnɔ veviɖe sasa go ɔ, na yɔ́ɛ be nyaŋ 'kɔta vevi. ²⁶ Fini ci yí Mawu nu nɔ wo le sasa be: "Mí de nyi nyaŋ jukɔn go" le ɔ, ehɔn lɔ ké yí wo a gbe yɔ wo le b Mawu Agbeagbe lɔ eviɛwo le nɛ» ²⁷ Ezayi can dó axwa yí nú so Israyɛliviwo nu be: «Nɔ́ Isray€liviwo gbe su egbɔ shigbe axuta 'ke nɛnɛ can ɔ, amɛ kankin yí Mawu a hwlɛn gan le wo mɛ. ²⁸ Ɖó ɔ, Axwetɔ a vá wa do enyɔ ci yí é nu ji vɛ kpataa le nyigban ji» ²⁹ É le shigbe lehanci yí Ezayi lɔ ké doŋkɔ yí nui daɖɛ dó sasa nɛnɛ be: «Nɔ́ Mavɔmavɔtɔ Ahwa 'fiɔ de gbé jijimɛ ɖe dó agbe nɔ mì sasa go ɔ, mì a gu shigbe Sodomu nɛnɛ, yí a bu vɛ le nyigban ji shigbe gomo nɛnɛ.» ³⁰ Ecɛyɛ ɖee enyɔ ci yí mì a nu viɛ ɔ? Amɛmanyi yuɖatɔ ciwo yí de donɔ vevi jɔjɔɛnyinyi wawa ɖe sasa go ɔ, Mawu ná wo xɔ jɔjɔɛnyinyi lɔ, ɛɛ jɔjɔɛnyinyi ci yí xɔse nanɔ amɛ. ³¹ Gankegan ɔ, Israyɛlivi ciwo yí jijiɛ jɔjɔɛnyinyi sɔ to esejiwado mɛ de sun ji yí nyí ese lɔ go. ³² Nyi yí jɔ yí wo de sun ji go ɔ? Wo de sun ji go ɖó wo de jijiɛ yí gó dó xɔse nu go. Vɔ ɔ, wo gó dó edɔwawawo nú. Nɛnɛ ɔ, wo klɛn afɔ do afɔjklɛnnu lɔ ci yí amɛwo klɛn yí janjan anyi nu. ³³ Wo ŋwlɛ daɖɛ do Mawu 'nyɔ wemawo mɛ be : «Agoo nɔ mí. Ŋ afɔklɛnnu ɖeka dado siyɔn jugan mɛ. Amɛwo a vá klinklin. Ekpegbaja ɖeka yí é nyí yí sɔ́ amɛ ciwo yí klinklin xwinxwin. Vɔ amɛɖekpokpoi ci yí a xɔɛ ji se, d'à ɖu ŋkpɛn go.»