¹ Nɔvinyɛwo, enyɔ ci yí ŋ jijiɛ a nu nɔ́ mí ɔ, ŋ nuinuiɛ nɔ mí shigbe nɔ́ amɛ ciwo yí jeshi ese lɔ vɔ nɛnɛ. Mí de nya nyuiɖe be hwecinu yí agbetɔ le agbe ɖekɛ yí ese ɖó acɛ dó ji bá? ² Le kpɔwɛ mɛ nɔ́ nyɔnu ɖe ɖe asu ɔ, ese bla yí kodo asuɔ lɔ dó ɖeka le ŋkeke ciwo pleŋ mɛ yi asuɔ lɔ a kpɔtɔ le agbe. Vɔ nɔ́ auɔ kú ɔ, é tó le ese ci yí blɛɛ do asuɔ nú 'nyɔ mɛ. ³ Ci yí é le nɛnɛ ɔ nɔ nyɔnu lɔ vayi ɖe ŋsu bu gankegan asuɔ kpɔtɔ le agbeɔ wo a yɔɛ be nyɔnu hashiwatɔ. Vɔ nɔ́ asuɔ kú ɔ, ese lɔ de gbe kui ɖɛ go. Gahɔnmɛ nɔ́ é va ɖe asu búɔ, d'é gbe nyi nyɔnu hashitɔwo go. ⁴ Nɔvinyɛwo, nɛnɛke yí míwo can ɔ, mí ku vayisasa le ese 'nyɔ mɛ to Kliso lɔ ŋcilan lɔ mɛ nɛ. Eyí nɛnɛ ɔ, mí nyi amɛbu tɔ, amɛ lɔ yí nyi

ci yí fɔ́n so amɛkukuwo domɛ nɔ́ mì a sɛ́n eku nɔ́ Mawu.

⁵ Ɖo sasa hwecinu yí mì nɔnɔ gbe le ŋcilan lɔ 'cɛkpakpa gɔnmɛ ɔ, ese lɔ ná yí enuvɔnwawa kpakpawo sɔnɔ mì yí nɔnɔ edɔ ji le mìwo ŋcilan blebu lɔ mɛ keŋ yí ná yí mì le ekusɛnsɛn ci yí a kplɔ mì yí ekumɛ sɛɛn. ⁶ Eviɛ ɔ,wo ɖe mì so ese 'cɛkpakpa gɔnmɛ. Ɖó le enu ci yí sɔ́ wa gakpamɛnɔtɔwo sasa gbɔ́ ɔ, mì nyí amɛkukuwo. Lehanci yí nɔnɔmɛ lɔ vá le do viɛ ɔ, nɔ mì va nyi hwashiwo viɛ ɔ, mì de gbe nyii to alɔkpa xoxwitɔ ci yí nɔ anyinɔnɔ do ese ŋwlɛŋwlɛɖɛ ji go. Vɔ ɔ, mì va nyii viɛ to alɔkpa yoyutɔ ci yí nɔ anyinɔnɔ do gbɔngbɔn kɔkpɔɛ ji mɛ. ⁷ Ecɛyɛ ɖee, ényɔ hin mì a nú viɛ ɔ? Ese lɔ ɖee enuvɔn yí enyi a ? gbede nɛnɛ yɔ́ nɛ go! ese lɔ yí ná yí ŋ jeshi enu ci yí nyí enuvɔn. Le mɛ ɔ, nɔ ese de nú sasa go be: «Amɛ bu 'nú ŋgbe ci ŋmɛ nɔ eo go.» Ŋ dá nyá enu ci yí enuciŋmɛnɔ amɛ ɖɛo. ⁸ Nɛnɛ ɔ, ese tó enunukpɔkpɔ hɔn ji yí hɛn enuciŋnɔamɛ vovovovwo vá ŋ mɛ to Mawu 'gbeɖeɖe lɔ ji. Nyao ɔ, nɔ ese de li oɔ, enuvn nyi enukuku. ⁹ Enyɛ ɔ, sasa hwecinu yí ŋ dé nyá ese 'nyɔ ɖe go ɔ, ŋ le agbe. Vɔ so gacimɛ yí Mawu 'gbeɖeɖe lɔ vá va ɔ, é yí enuvɔn vá trɔ́ enu agbeagbe. ¹⁰ Eyi enyɛ yɛ ɔ, ŋ ku. Nɛnɛ ɔ, Mawu 'gbeɖeɖe lɔ ci yí a kplɔ agbetɔwo vá agbemɛ va nyi enu ci yí kplɔ amɛ yí ekumɛ nɔ enyɛ. ¹¹ Ɖó enuvɔn to emɔnukpɔkpɔ hɔn mɛ yí ble ŋ to egbeɖeɖe lɔ ji. Eyí to egbeɖeɖe lɔ ji ɔ, é na yí ŋ ku. ¹² Nyɔnɔnuitɔ ɔ, enukɔkɔɛ yí ese nyí yí egbeɖeɖe lɔ cán nyí enukɔkɔɛ, enujɔjɔɛ yí gbe nyɔ. ^{13 14} Vɔ nɛnɛ ɖee, enu ci yí nyɔ́ lɔ yí vá trɔ́ eku nɔ́ enyɛ a? Gbee, nɛnɛ yɔ nɛ go! Ci yí enuvɔn a dansin yiɖeki shigbe enuvɔn nɛnɛ ɔ, é hɛn eku va nɔ́ enyɛ to anyui lɔ mɛ. Nɛnɛ sɔ to Mawu gbeɖeɖe lɔ ji ɔ, enuvɔn a tó vɛ blebu le ŋsɛn ci yí le enuvɔnwawa shi mɛ. Ci yí é wɛɛ nɛnɛ ɔ, é dansin be enuvɔn yí ye nyi nyao. Nyao ɔ, mì nyá be ese ɔ, Mawu gbɔngbɔnmɛ 'nu yí é nyi. Vɔ enyɛ yɛ ɔ, agbetɔ, gbɔjɔgbɔjɔtɔwu yí ŋ nyi yí wo sɔ́ ŋsa shigbe hwashi nɛnɛ dó enuvɔnwawa. ¹⁵ Ɖó ɔ, ŋ de mɔnɔŋje enu ciwo yí ŋ wanɔ mɛ go. Enu ci yí ŋ jinɔ be na wa ɔ, ŋ de sɛ́n eŋ wɛɛni go. Vɔ enu ci yí yí ŋ gbe kóŋ ɔ, é yí ŋ gbe va wanɔ. ¹⁶ Nɔ é nyí be enu ci cucucu yí ŋ de jinɔ be na wa go yí ŋ vanɔ ɔ, ŋ xɔ egbe be ese nyi enunyɔnyɔ. ¹⁷ Ci yí é le nɛnɛ ɔ, d'é gbe nyi enyɛŋtɔ yí le enu hɔnwo wagɔ go. Vɔ ɔ, enuvɔn ci yí le ŋ mɛ yí le wo wagɔ. ¹⁸ Ŋ nya be enunyui ɖe de le lanmɛ nɔ ŋ go, i gɔnmɛ yí nyi kpɔ be enunyui ɖé de le nyaŋ ŋcilan gbɔjɔgbɔjɔtɔnɔ cɛ mɛ go. Ɖó ɔ, enunyuiwawa dronɔ ŋ. Vɔ ɔ, wo a wa enunyui yɛ gló ŋ. ¹⁹ Enuyui ci yí ŋ jinɔ be na wa ɔ, ŋ de wɛɛni go. Vɔ enuvɔn ci yí ŋ de jinɔ be na wa go ɔ, é yí ŋ va wanɔ. ²⁰ Nɔ́ nyi be enu ci koŋ yí enyɛ ŋ de jinɔ go yí ŋ va wanɔ ɔ, d'é gbe nyi enyɛŋtɔ yí le enu lɔ wagɔ go. Vɔ ɔ, enuvɔn ci yí le ŋ mɛ yí wɛwɛ. ²¹ Nɛnɛ ɔ, enu ci nu yí ŋ va le ŋkuvi dó le enyɛɖeki mɛ ge: Nɔ ŋ ŋ ɖo be na wa enunyuiɔ, enuvɔn jí ŋ va sun yí wanɔ . ²² Ɖó le enyɛ agbetɔ ci yí ŋ nyí jimɛ ɔ, Mawu 'sé lɔ jɔnɔ eji nɔ ŋ. ²³ Vɔ ɔ ŋ kpɔkpɔ ese bú le nyaŋ ŋcilan lɔ pleŋ mɛ yí é le ahwa wagɔ kodo ese ci yí nyaŋ susu xɔegbe do lɔ. Eyi ese hɔn sɔ ŋ sɔ wa gakpamɛnɔtɔ nɔ enuvɔnwawa ci yí le nyaŋ ŋcilan lɔ pleŋ mɛ. ²⁴ Oxóo, nyaŋ 'nu wa ŋshishi ke! Mí yí a hwlɛn ŋ gan so ŋcilan cɛ ci yí kplɔ yigɔ ekumɛ shi mɛ ɔ? ²⁵ Akpe nɔ́ Mawu kakaka to mìwo 'xwetɔ Yesu Kliso ji! Nɛnɛ ɔ, enyɛŋɛ le nyaŋ ŋɖenyanya mɛ ɔ, ŋ nyí hwashi nɔ Mawu 'sé lɔ gankegan le nyaŋ ŋcilan gbɔjɔgbɔjɔtɔnɔ lɔ mɛ ɔ, ŋ nyi hwashi nɔ enuvɔnwawa 'se lɔ