¹ Eviɛ ɖee, enyɔ ci yí mì a nu hɔnnɔ ɔ? Kpɔ mì a kpɔtɔ yí a wawa enuvɔn yí xomɛvunu Mawu tɔ a kpɔtɔ a susu egbɔ do jí nɔ́ mì kaka yí a gban ago a? ² Gbeɖe, a jɔ kpɔ go! Mìwo ciwo yí nyí amɛkukuwo le enuvɔn 'nyɔ mɛ ɖee, lé mì a wɛɛ yí a gbe va nɔnɔ agbe le mɛ do ɔ? ³ Ŋlɔ mí ŋlɔbe be mìwo pleŋ ciwo yí wo le Mawushi nɔ yí Mawu sɔ́ mì wa ɖeka kodo Yesu Kliso ɔ, bɔ mî bɔ yí kú kodoi hɛnnɛ a? ⁴ Sɔ to jinjindotɔmɛ Mawu tɔ lɔ mɛ ɔ, wo dyi mì kodo Kliso lɔ. Nɛnɛ ɔ, Shigbe lehanci yí Kliso lɔ fɔ́n so amɛkukuwo domɛ sɔ́ to Eda ŋsɛn gangan lɔ mɛ do nɛnɛ ɔ, nɛnɛke yí miwo can mì nɔnɔ agbe yoyu dó nɛ. ⁵ Nyao ɔ, ci yí Mawu sɔ́ mì wa ɖeka kodoi blebu le eku ci yí é ku mɛ ɔ, a gbe sɔ mì wa ɖeka kodoi hɛnnɛ le fɔnfɔnsosokuwodi ci yí ɖyí yitɔ han mɛ nɛ. ⁶ Mì nya be wo kán mìwo jɔjɔmɛ xoxwitɔ dó acisaga ji kodo Kliso lɔ nɔ enuvɔn jɔjɔmɛ ci yí le mì ŋgbe gbe nyi hwashiwo nɔ enuvɔn go. ⁷ Ɖó amɛ ci yí kú kodo Kliso lɔ ehwɛjɔjɔɛ nɔ. Eyi nɛnɛ han ɔ, enuvɔn de gbe ɖo acɛ do nɛnɛ 'mɛ ji go. ⁸ Ci yí mì kú kodo Kliso lɔ ɔ, mì kandoji be mì a gbe va nɔ agbe kodoi hɛnnɛ. Mì ⁹ nyá nyao be Kliso lɔ ci yí fɔn so amɛkukuwo domɛ d'a gbe ku ké go. ¹⁰ Ci yí Kliso lɔ kú ɔ, é kú le enuvɔn 'nyɔ gbɔ zeɖeka yí é nyí é vɔ. Vɔ ecɛviɛ ci yí é le agbe ɔ, é le agbe nɔ Mawu. ¹¹ nɛnɛ hanke ɔ, míwo cán, mí sɔ míwoɖekiwo dó amɛkukuwo jí le enuvɔn 'nyɔ mɛ yí a gbe sɔ míwoɖekiwo dó amɛ ciwo yí le agbe nɔ Mawu jí le Yesu Kliso mɛ. ¹² Ci yí é le nɛnɛ han ɔ, enuvɔn ŋgbe gbe ɖuɖuɔ efiɔ do mìwo ŋcilan ci yí nyí enukuku jí yí a ná yí mí a wawa do míwo ŋcilan lɔ 'drowo jí go. ¹³ Mí ŋgbe gbe sɔ míwo ŋcinu ɖé doashi nɔ́ enuvɔn nɔ́ a nyi ahwawanu nɔ́ enu majɔmajɔwo wawa go. Vɔ ɔ, mí sɔ míɖekiwo wa edɔwaviwo nɔ́ Mawu blebu shigbe amɛleagbe ciwo yí gbɔ so amɛkukuwo domɛ nɛnɛ. Nɛnɛ ɔ, mí zanzan míwo ŋcilan blebu dó Mawu 'dɔwawa mɛ shigbe jɔjɔɛnyinyi 'hwawanu ɖe nɛnɛ. ¹⁴ Nyao ɔ, enuvɔn d'a gbe kpakpa acɛ do mí ji go. Ɖó ɔ, mí d'é gbe le ese gɔnmɛ go. Vɔ ɔ, xomɛvunu Mawu enuvɔn nɔ́ ci yí mí va le . ¹⁵ Le mì a nui ɔ? Mì a gbe wawa enuvɔn nɔ́ ci yí mì de gbe le ese 'cɛkpakpa gɔnmɛ go yí é nyi xomɛvunu Mawu tɔ gɔnmɛ yí mí vá le taɖo a? Gbeɖe, nɛnɛ yɔ nɛ go! ¹⁶ Mí de nya nyuiɖe bá ? Nɔ mí sɔ míwoɖekiwo dó alɔmɛ nɔ amɛɖe yí a senɔ etonu nii ɔ a nyi mí trɔ́ hwashiwo nɔ́ axwetɔ ci mí seseɛ etonu nɔ́. Nɛnɛ nɔ́ é nyi enuvɔn yí nyí axwetɔ nɔ mí ɔ, yɛ kplɔnɔ amɛ sɔyi eku mɛ. Vɔ nɔ́ é nyi mawu yí nyi axwetɔ nɔ mí ɔ, yɛ a kplɔ mí sɔyi jɔjɔɛnyinyi mɛ. ¹⁷ V ɔ, akpe nɔ Mawu! Ɖo sasa ɔ, mí nyi enuvɔn hwashiwo. vɔ eviɛ ɔ, mí se etonu nɔ́ enukplakpla hata ci yí wo sɔ́ mí cu nɔ. ¹⁸ Ci yí Mawu jo mí so enuwɔn shi mɛ ɔ, mí va trɔyi jɔjɔɛnyinyi hwashiwo. ¹⁹ Ŋ xoxoɔ nuxu nɔ́ mí shigbe lehanci agbetɔ a xoi nɔ yi kpenawo dó nɛnɛ, dó ci yí mí nyí agbetɔ gbɔjɔgbɔjɔtɔnɔ ŋci. Sasa ɔ, mí sɔ míwo ŋcilanwo blebu wa hwashiwo le alɔmɛ nɔ heteliwawa kodo enuvɔn ciwo yí sɔ́ mí sɔ wa etogbetɔwo nɔ mawu. Nɛnɛ hanke ecɛviɛ ɔ mí gbe sɔ míwo ŋcilan blebu do alɔmɛ nɔ jɔjɔɛnyinyi shigbe hwashiwo nenɛ nɔ́ a kplɔ mí sɔyí amɛɖeki ɖeɖedo akpo nɔ Mawu mɛ. ²⁰ Ɖó sasa ci yí mí kpɔtɔ nyi enuvɔn hwashiwo ɔ, jɔjɔɛnyinyi 'nyɔ de xanɔ mí go. ²¹ Ɖee, ekusɛnsɛn ciwo sɛɛn yí mí le gahɔnmɛ? Enuwana ciwo yí gbe nyinyí Npɛn 'nuwo nɔ́ mí le egbɛ mɛ yí yɔ́. Ɖó ɔ, ekumɛ yí enuwana hɔnwo vayi vɔnɔ do. ²² Ecɛviɛ ci yí Mawu jó mí so enuvɔn 'lɔmɛ yí mí va trɔ Mawu hwashiwo ɔ, amɛɖeki ɖeɖedoakpo nɔ Mawu yí vá nyi ekusɛnsɛn ci mí sɛɛn yi agbemavɔ nyi fini ci yí mí a vayi le vɔvɔnu. ²³ Ɖó eho ci yí enuvɔn wawa cunɔ nɔ́ amɛ yí nyí eku. Vɔ ɔ, xomɛvunu 'nunana, Mawu 'nunana lɔ yɛ ɔ, eyɛ yí nyí agbemavɔ le Yesu Kliso, mìwo 'xwetɔ mɛ.