^{1 2} Nɛnɛ, ci yí Mawu so ehwɛjɔjɔɛ nɔ mì dó xɔse ŋci ɔ, fafa le mìwo kodo yi gblamɛ ɖɛ sɔ́ to mìwo 'xwetɔ Yesu Kliso jì. Eyɛ ji yí kpɔ́ emɔ to yí xɔ xɔmɛvunu ci mɛ mì le góŋgóŋ cɛ sɔ to xɔse mɛ. Le nɔnɔmɛ hɔn mɛ ɔ, mì gegezeɛ be emɔkpɔkpɔ li nɔ mì be mì a vá nɔ Mawu klɛnklɛn gangan lɔ mɛ. ³ Sɔwu egan hɔnwo ɔ, mì gbe gezenɔ nɔ́ mì le efunwo kpeɛ. Ɖó ɔ, mì nyá be efunkpekpe hɛnnɔ vevidonu vá. ⁴ Yí vevidonu ná be wo linɔ eke le egbejinɔnɔ mɛ yí egbejinɔnɔ hɛnnɔ emɔkpɔkpɔ vá. ⁵ Keŋ ɔ, kpɔ́ emɔkpɔkpɔ de ná yí wo ɖunɔ ŋkpɛn go. Ɖo Mawu wuwu yi lɔnlɔn do mìwo 'jiwo mɛ to gbɔngbɔn kɔkɔɛ ci yí é na mì ji. ⁶ Nyao ɔ, sasa ci yí ŋsɛn ɖé de le mì shi o ɔ, Kliso lɔ vá kú dó enuvɔnwatɔwo tawɛ do gacimɛ yí Mawu ɖó dó ete ji. ⁷ A gɔn enu gbɔxwe yí amɛ a lɔn yí a kú dó amɛjɔjɔɛ ɖe tamɛ. Taŋfɔin ɔ, amɛ a gbé edɔn yí a kú dó amɛnyui ɖé tamɛ dru fɛɛ. ⁸ Vɔ ɔ, mí kpɔ lehanci yí Mawu yɛ wɛɛ do yí sɔ dansin lehanci yí é lɔn mì sugbɔ do ɖá: Kliso lɔ va kú dó mìwo tamɛ hwecinu yí mì kpɔtɔ nyi enuvɔnwatɔwo. ⁹ Ecɛ viɛ ɔ, Mawu so ehwɛjɔjɔɛ nɔ mì sɔ́ to Yesu Kliso 'hun mɛ sɔwu nɛnɛ han ɔ, nɛnɛke yí Kliso lɔ a gbe va hwlɛn mì gán le dɔmɛzi ci yí Mawu a vá wa do enuvɔnwatɔwo mɛ nɛ! ¹⁰ Sasa ci yí mì nyí Mawu ketɔwo ɔ, é dra mìwo kodo yi gblamɛ do to Eviɛ lɔ 'kú mɛ. Ecɛ ci yí mì va wa ɖeka kodoi hɔnnɔ ɔ, á gbe hwlɛn mì gán sɔwusɔ́ tóagbe ci yí Eviɛ lɔ le mɛ. ¹¹ D'é vɔ lo! Mì gbe gezenɔ le Mawu mɛ do jí sɔ́ to mìwo 'xwetɔ Yesu Kliso, ci ji yí Mawu tó yí dra mìwo kodo yiŋtɔ gblamɛ do jí. ¹² Amɛ kuɖeka jí yí enuvɔn to yí va xexe lɔ mɛ. Amɛ lɔ yí nyí Adamu. Eyi ci yí enuvɔn vá ɔ, é sɔ eku nɔ́ agbetɔwo pleŋ yí amɛshamɛ kukuɔ. Ɖo ɔ, amɛshamɛ. ¹³ Ɖó gbɔxwe yí Mawu a vá dó ese to Mɔyizi ji ɔ, enuvɔn le xexe lɔ mɛ xoxoxo. Vɔ ci yí ese de li hɔɖe ɔ, Mawu de hlɛnnɔ enuvɔn nɔ́ amɛɖe go. ¹⁴ gankegan so Adamu hwenu kaka vá je Mɔyizi hwenu ɔ, eku wuwuɔ amɛwo. kaka amɛ ciwo yí de wa enuvɔn ɖé shigbe Adamu nɛnɛ o can kukuɔ. Adamu yí nyí kpɔwɛ nɔ amɛ ci yí ɖó a vá lɔ. ¹⁵ Vɔ ɔ, xomɛvunu 'nunana lɔ yɛ de le shigbe agɔjeje tɔ han nɛnɛ o. Ɖó, nɔ́ enuvɔn ci yí amɛ kuɖeka wa na yí amɛ sugbɔ ku ɔ, xomɛvunu Mawu tɔ kodo xomɛvunu 'nunana agbetɔ kuɖeka ci yí nyí Yesu Kliso lɔ tɔ gbe gangan sɔwu nɛnɛ han dó agbetɔ sugbɔ tamɛ hɛnnɛ. ¹⁶ Enu ci yí Mawu 'nunana lɔ hɛnva tó akpo nɔ ci yí amɛ kuɖeka 'nuvɔ lɔ hɛnva. Nyao ɔ, kojo ci yí wo ɖó kodo amɛ kuɖeka kplɔ amɛ yí ekuhwɛsoso mɛ. Vɔ ɔ, xomɛvunu 'nunana lɔ kuso agbetɔ sugbɔ 'gɔjeje nu yɛ kplɔ amɛ yí jɔjɔɛnyinyi blebu mɛ. ¹⁷ Ɖó nɔ́ é nyi kpɔ́ be sɔ́ tó amɛ kuɖeka 'gɔjeje mɛ, ekuɖeka lɔ ci yí nyi Yesu Kliso ji ɔ, amɛ ciwo yí xɔ xomɛvunu lɔ gɔdɔɔ yí gbe xɔ jɔjɔɛnyinyi 'nunana lɔ a nɔ agbe do 'ji sɔwu yí a ɖu efiɔ kodoi. ¹⁸ Nɛnɛ ɔ, shigbe lehanci yí amɛ kuɖeka 'gɔjeje hɛn ekuhwɛsoso va nɔ́ agbetɔwo plɛŋ dó nɛnɛ ɔ, nɛnɛ lɔ ké yí amɛ kuɖeka jɔjɔɛnyinyi hɛn ehwɛjɔjɔsoso ci yí nanɔ agbe amɛ va nɔ́ agbetɔwo pleŋ dó nɛ. ¹⁹ Nyao ɔ, shigbe lehanci yí sɔ́ to amɛ kuɖeka 'togbegbe mɛ agbetɔ sugbɔ trɔ enuvɔnwatɔwo nɛnɛ ɔ, nɛnɛ hanke yí sɔ́ to amɛ kuɖeka 'tonusese mɛ ɔ, Mawu a sɔ́ agbetɔ sugbɔ wa amɛjɔjɔɛwo le yiɖeki ŋmɛ do nɛ. ²⁰ Keŋ ese lɔ vá nɔ́ agɔjeje a gbankpe eto. Vɔ fini ci yí enuvɔnwawa Mawu tɔ gbe su egbɔ kaka yí gban ago sɔwu dó jí. ²¹ Nɛnɛ ɔ, shigbe lehanci yí enuvɔn ɖu efiɔ do vayi to eku ji nɛnɛ ɔ, eviɛ ɔ, xomɛvunu Mawu tɔ lɔ a ɖu efi to jɔjɔɛnyinyi ji yí a kpɔ mì yi agbemavɔ lɔ mɛ to mìwo 'xwetɔ Yesu Kliso ji