¹ Enyɔ ci yí mì a nú so Ablahamu, mìwo tɔgbui gbazamɛtɔ nu ɔ? nyi yí é kpɔ yí xɔ ɔ? ² Nɔ́ é nyi kpɔ bé edɔ ciwo yí Ablahamu wanɔ nu yí Mawu kpɔ́ dó yí sɔ wa amɛjɔjɔɛ le yíɖeki ŋmɛ sasa ɔ, Ablahamu a sɔ́ɛ dó yí sɔ yí ego. Vɔ ecɛyɛ ɔ d'à sɛn eŋ yí ego le Mawu ŋmɛ o. ³ Nyao ɔ, wo ŋwlɛ daɖɛ dó Mawu 'nyɔ wemawo mɛ be « Ablahamu xɔ Mawu ji se yí mawu hliin nii dó jɔjɔɛnyinyi ji» ⁴ Mì trɔ́ nyá bé ń amɛɖe wa edɔ ɖe ɔ wo cunɔ eho nii. Edɔ 'ho hɔn de nyí enu yí é nyí yí wo sɔ́ nii xomɛvutɔ go. Vɔ ɔ, efɛn yí é nyí wo ɖu doi. ⁵ Gankegan nɔ amɛɖe de wawa edɔ be nɔ́ Mawu a kpɔ́ dómɛ nɔ eye go. Vɔ yí xɔ Mawu ci yí sɔnɔ enuvɔnwatɔ wanɔ amɛjɔjɔɛ ji se ɔ, Mawu a hlɛn yi xɔse lɔ nii dó jɔjɔɛnyinyi jí. ⁶ Nɛnɛke ɔ, Davidi nu nyɔna ci yí nyí amɛ ci yí Mawu kpɔ́ dó amɛjɔjɔɛ jí tɔ́ amɛ lɔ́ 'dɔwanawo wanɔ mɛ do be: ⁷ «Enu yí nyɔ́ nɔ́ amɛ ciwo yí Mawu sɔ́ wowo 'gɔjejewo ke; amɛ ciwo 'nuvɔnwo jí yí é sɔ enu cɔ́n. ⁸ Enu yí nyɔ nɔ́ amɛ ci yí Yehawa de sɔnɔ eɖe le enuvɔnwo mɛ nɔ go!» ⁹ Evosoiwo ɖekɛ yí nyɔna hɔn li ɖɛ nɔ́ a? D'é li ɖɛ nɔ́ tɔtɔnɔwo hɛnnɛ ba? Nyao ɔ, mì nú be: «Ablahamu xɔ Mawu jí se yí Mawu hliin nii dó jɔjɔɛnyinyi ji» ¹⁰ Le Ablahamu le do gacimɛ yí Mawu sɔ wa amɛjɔjɔɛ ɔ? Evosoï é nyí a alo tɔtɔnɔ yɔ? D'é so evo gahɔnmɛ go; tɔtɔnɔ yí é nyi. ¹¹ Ablahamu xɔ evosoi jeshidu shigbe jɔjɔɛnyinyi ci yí é xɔ to xɔse ci yí é ɖo mɛ kpeɖojinu nɛnɛ gacimɛ yí é kpɔtɔ nyi tɔtɔnɔ. Nɛnɛ ɔ Ablahamu nyi eda nɔ amɛ ciwo pleŋ yí nyí tɔtɔnɔ gankegan yí xɔ Mawu ji se. Gahɔnmɛ ɔ, Mawu a gbe hlɛn xɔse lɔ ci yí wo ɖó dó jɔjɔɛnyinyi jí nɔ wowo can. ¹² É gbe nyi eda nɔ evosoiwo hɛnnɛ. D'é nyíi nɔ amɛ ciwo so evo ɖekɛ go. Vɔ ɔ,é gbe nyíi amɛ ciwo yí totoɔ xɔse ci yí mìwo tɔgbui Ablahamu ɖo gacimɛ yí é nyi tɔtɔnɔ 'm'mɔ ji. ¹³ Nyao de nyí kpɔ́ bé ese mɛ yí Mawu tó ɖó egbe nɔ Ablahamu kodo yi jijimɛviwo be ye a sɔ́ xexe lɔ na wo go. Vɔ ɔ, jɔjɔɛnyinyi ci yí é xɔ to xɔse ɖoɖo mɛ jí yí é to. ¹⁴ Nɔ́ é nyí be amɛ ciwo yí wawa do ese ji yí a xɔ enunana lɔ sasa ɔ, a nyí ké xɔse de gbe nyí nyí enuɖe wanu yí egbeɖu lɔ cán trɔ́ enugbali. ¹⁵ Nyao esejidadale na yí Mawu wanɔ dɔmɛzi do agbetɔwo. Vɔ nɔ́ ese de li do ɔ, kpɔ́ esejidadale can d'a li go. ¹⁶ Ci yí é le nɛnɛ han ɔ, Mawujixɔtɔwo yí é wa egbeɖu lɔ nɔ́ nɔ́ á sɛn eŋ a nyí xomɛvunu 'nyɔ nɔ Ablahamu pleŋ. D'é nyi amɛ ciwo yí wa do ese ji ɖekɛ yí a xɔ enunana ciwo pleŋ yí xɔ Mawu ji se shigbe Ablahamu nɛnɛ cán a xɔ wo. Dó ɔ Ablahamu ɔ, eda yí é nyi nɔ́ mì pleŋ. ¹⁷ Shigbe lehanci yí wo ŋwlii ɖɛ dó Mawu 'nyɔ wema mɛ le fini ci yí Mawu nunuɔ nɔ Ablahamu le nɛnɛ be: «Ŋ sɔ́ eo sɔɖó tɔgbui nɔ́ akɔta sugbɔ ɖekawo.» É nyi mìwo 'da le Mawu ci yí é xɔse ŋmɛ. É xɔ Mawu ci yí gbe nanɔ enu ciwo yí de li sasa o va nini ji se. ¹⁸ Ablahamu xɔ Mawu ji se kaka ci yí emɔkpɔkpɔ ɖé de gbe va li go can, é gbe kpɔtɔ xɔɛxɔɛ ji se. Nɛnɛke ɔ, Mawu na é trɔ tɔgbui nɔ akɔta sugbɔ shigbe lehanci yí é nui nii vayi do nɛnɛ be: «Nɛnɛ yí ao jijimɛviwo a vá su egbɔ do nɛ.» ¹⁹ Va ɖo gaɖekamɛ ɔ, Ablahamu ɖoɖoɔ exwe kave hawi han nɛnɛ. É nyá nyuiɖe be ye lenmɛ kpo bɔlibɔli shigbe enukuku nɛnɛ yí yeshiye sala can ci eko. Vɔ ɔ, yi xɔse de gbɔjɔ go. ²⁰ D'é xo enu kpɔ́, dó xɔse maɖo ŋci, le yiɖeki mɛ be mawu 'gbeɖu lɔ a vá mɛ be Mawu 'gbeɖu lɔ a vá mɛ viɛ mɛ go. Vɔ ɔ, yi xɔse do ŋsɛn yi yi é kanfunɔ Mawu. ²¹ É kandoji kóŋ be acɛ le Mawu shi yí yi a wa do egbe ci yí yi ɖó ji . ²² Enu hɔn ké yí na taɖo yí wo nunuɔ so Ablahamu nu be Mawu hliin nii dó jɔjɔɛnyinyi ji dó nɛ . ²³ Vɔ ɔ, d'é nyí Ablahamu ɖekɛ ŋci yí wo ŋwlɛ enu so daɖɛ be: «Mawu hlɛn xɔse lɔ nii do jɔjɔɛnyinyi ji» go. ²⁴ Mìwo can ŋci yí wo ŋwlii daɖɛ dó mìwo ciwo yí mawu a gbe hlɛn xɔse nɔ do jɔjɔɛnyinyi ji. Ɖó ɔ, mì xɔ Mawu ci yí fɔ́n mìwo 'xwetɔ Yesu so ekuwodi ji se. ²⁵ Wo sɔ́ yesu lɔ doashi nɔ́ amɛwo dó mìwo 'gɔjejewo ŋci yí é ku. Eyi Mawu fɔin so ekuwodi nɔ a va so ehwɛjɔjɔɛ nɔ mì.