¹ Ci yí é le nɛnɛ ɖee, ele hin yí le yuɖatɔwonyinyi mɛ ɔ? Nyɔna hin yí le evosoo mɛ ɔ? ² Nyɔna lɔwo gangan le alɔkpawo plɛŋ mɛ. Doŋkɔ ɔ, wowo yyɖatɔwo pleŋ yí Mawu sɔ́ yí 'nyɔwo ná. ³ Nnyɔnɔnui yɔ́, amɛɖekawo vá gbé egbejimanɔ nɔ Mawu le yuɖatɔ lɔwo domɛ. Eyi é nyi kpɔ be wowo 'gbejimanɔ yí a dɔ́ yí Mawu cán a gbé egbejimanɔ nɔ wo a? ⁴ Gbeɖe, á jɔ kpɔ go! Mawu nyi nyɔnɔnuitotɔ yí agbetɔ ɖekpokpoi nyí ŋsukantɔ. Nɛnɛ yí wo ŋwlii daɖɛ dó Mawu 'nyɔ wemawo mɛ be: «Mawu, nɔ́ è xoxoɔ nuxu ɔ, amɛshamɛ ɖo a donɔ jeshii be amɛjɔjɔɛ yí eo nyi yi nɔ wo yɔ́ ehwɛ eo can ɔ è ɖo ɖu kojo lɔ jí» ⁵ Vɔ nɔ́ é nyí kpɔ́ be mìwo 'numajɔmajɔɛwawa ɖee, enyɔ ci yí mì a sɛn eŋ nú so enyɔ hɔn nú ɔ? Ŋ jijiɛ a biɔ́ enyɔ ɖeka se, ci yí nɔ́ amɛɖekpokpoi hɛn ɔ, á biɔ se. Nu yí mì a nú be nɔ Mawu dɔn eto nɔ́ mì ɔ, enumajɔmajɔ yí é wa a? ⁶ Gbeɖe á jɔ kpɔ go! Ɖónɔ́ é nyí enu majɔmajɔ yí Mawu wanɔ ɖee, lé a wɛɛ yí a vá ɖó kojo kodo xexe lɔ dó ɔ? ⁷ Vɔ nɔ́ é nyí nyaŋ ŋsukankan dɔ́ be yi mɛ kɔ nɔ amɛwo be Mawu nyi nyɔnɔ,uitotɔ yí sɔsɔ kɔkɔ nɔ́ yí nyikɔ nɛnɛ han ɖee nyi yí na taɖo yí Mawu a gbe so kojo nɔ́ ŋ be enyɛ, ŋ nyi enuvɔnwatɔ ɔ. ⁸ Nɔ́ é le nɛnɛ, nyi yí ná taɖo yí mì d'a nú shigbe eshivɔnlenɔamɛtɔ ɖewo nɛnɛ be: «Mí ná nɔ́ mì a wa enuvɔn nɔ́ enunyui a tó so mɛ. D'é wa enuɖe o.» É je be Mawu a so ekuhwɛ nɔ nɛnɛ 'mɛwo. ⁹ Enyɔ lɔ gɔnmɛ ɖe? Mìwo yuɖatɔwo 'nyɔ le eta nɔ amɛmanyi yuɖatɔwo yɔ́ a? gbeɖe, é le nɛnɛ go. ɖó ŋ dre enuɖeka mɛ vɔ be yuɖatɔwo fin, amɛmanyi yuɖatɔwo fin ɔ, mì pleŋ bɔ yí le enuvɔn 'cɛkpakâ gɔnmɛ. ¹⁰ Nɛnɛ yí wo ŋwli daɖɛ dó Mawu 'nyɔ wemawo mɛ do nɛ be: «Amɛɖe de li yí nyí amɛjɔjɔɛ o, kuɖeka kpetii de li go. ¹¹ Amɛɖe de li yí nyí ŋɖɛnyatɔ o; amɛɖekpkpoi de li yí jijiɛ Mawu o. ¹² Agbetɔwo pleŋ só le emɔ enyuitɔ lɔ jí, wo bɔ trɔ enugbaliwo. Amɛɖe de le wo mɛ yí wanɔ enunyui o, kuɖeka kpeti de li go. ¹³ Wowo 'hlokui le shigbe yɔdu ci le nuvo nɛnɛ; wo sɔ́ wowo 'ɖé blenɔ amɛ. Nuxu ci yí wo xonɔ ve ete j&kpu 'ɖyi yí le aɖe gɔnmɛ nɔ wo. ¹⁴ Wowo 'glan ɖɔ kodo kpɛnsɛn kodo enyɔvetewo kankan nɔ́ amɛ. ¹⁵ Afɔ binɔ nɔ́ wa dó amɛwuwu ji. ¹⁶ Afiɖekpokpoi ci yí wo tó yí vayi ɔ, enugblegble kodo jɔgbevɔin nɔnɔ hɔntɔxu. ¹⁷ Wo de jenɔshi fafa 'mɔ́ gbeɖe go. ¹⁸ Wo de ɖonɔ shishieɖeeɖe nɔ Mawu le wowo xexe mɛ go.» ¹⁹ Mì trɔgbɔ nya bé enyɔ ciwo pleŋ yí le ese nunuɔ ɔ, amɛ ciwo yí le esekplɔkplɔ gɔnmɛ yí é nunuɔ wo nɔ́. Nɛnɛ ɔ amɛshamɛ a bɔ enu yí xexe lɔ pleŋ a nyí ehɛwutɔ le Mawu ŋmɛ. ²⁰ É le nɛnɛ han. Ɖó amɛɖekpokpoi de li yí a nyí amɛjɔjɔɛ le Mawu ŋmɛ nɔ́ cì yí amɛ lɔ wa do ese ji ŋci o. Nyao ɔ, ese kpenɔ dó agbetɔwo nú nɔ́ wo a nyá kpoŋ be yewo nyì enuvɔnwatɔwo. ²¹ Vɔ eviɛ ɔ, Mawu dansin lehanci yí é sɔ mì wanɔ amɛjɔjɔɛwo le yiɖeki ŋmɛ do nɔ́ mì ese manɔ mɛ. Ese wemawo ɖó ekpe i ji vayi be. ²² Mawu sɔnɔ agbetɔwo sɔ́ wa amɛjɔjɔɛwo le yiɖeki ŋmɛ sɔ́ to Yesu Kliso ci ji yi wo xɔse mɛ. nɛnɛ yí é wɛɛni do nɔ́ amɛ ciwo pleŋ yí xɔ Kliso lɔ jí se nɛ. Dó le eyɛ Mawu gbɔ́ ɔ, evatoto ɖé de le agbetɔwo mɛ o. ²³ Ɖó ɔ amɛshamɛ wa enuvɔn yí enuvɔn lɔ má wowo kodo Mawu klɛnklɛn gangan lɔ domɛ. ²⁴ Vɔ le yi xomɛvunuwawa mɛ ɔ, Mawu sɔ́ wo wa amɛjɔjɔɛwo le yiɖeki ŋmɛ xomɛvutɔ sɔ to Yesu Kliso ci yí xɔ wo gan so enuvɔn shi mɛ ji. ²⁵ Mawu doŋkɔ yí sɔ́ Kliso lɔ daɖɛ yí vá sɔ́ sá avɔ. Gahɔnmɛ to yí 'hun ci yí kɔdo nyigban ji mɛ ɔ, Mawu sɔ́ enuvɔwo ke amɛ ciwo yí xɔ Kliso lɔ jí se. Nɛnɛ ɔ, Mawu dansin bé ye nyi amɛjɔjɔɛ tɛgbɛɛ. Sasa ɔ, d'é dɔnnɔ eto nɔ́ amɛ nɔ amɛ nɔ enuvɔn ciwo yí amɛ lɔ wa o. ²⁶ É xɔ gbɔngbɔn yí wɛɛ nɛnɛ yí a sɔ́ dansin le egbɛ yɛ́ mɛ be ye le jɔjɔɛɖe yí ye gbe sɔnɔ amɛ ciwo yi xɔ Yesu ji se wanɔ amɛjɔjɔɛwo le yiɖeki ŋmɛ. ²⁷ Ci yí é le nɛnɛ han ɖee, enuɖe yí amɛɖe a sɛ́n eŋ sɔ́ yí ego le nɔviɛ nú a ? Oo, eṣe li go. Lé é nyi nɛnɛ dó ɔ? D'é gbe nyi kpɔ́ be wo a wa do ese ji yɔ́ o, vɔ ɔ wo a xɔ Kliso lɔ ji se yɔ. ²⁸ Ɖó ɔ, mì kpɔ be mawu sɔ agbetɔwo wanɔ amɛjɔjɔɛwo le yiɖeki ŋmɛ nɔ́ wo xɔ Yesu ji se. D'é nyi kpɔ be nɔ́ wowo wawa do ese ji ŋci yɔ o. ²⁹ Alo Mawu ɖee, yuɖatɔwo ɖekɛ Mawu yí é nyi a? Oo, é nyí amɛmanyi yuɖatɔwo Mawu hɛnnɛ. ³⁰ Nɔ́ é nyi kpɔ be Mawu kuɖeka kpaŋ yí li nyao ɔ, é yí a sɔ́ evosoiwo wa amɛjɔjɔɛwo le yiɖeki ŋmɛ nɔ klisojixɔxɔse ŋci. Nɛnɛke yí á gbe sɔ tɔtɔnɔwo cán wa amɛjɔjɔɛwo le yiɖeki ŋmɛ nɔ Klisojixɔxɔse lɔ ŋci nɛ. ³¹ Ci yí nɔ mì xɔ kliso lɔ jí se Mawu a sɔ mì wa amɛjɔjɔɛwo le yiɖeki ŋmɛ ɖee, eyi é nyi kpɔ́ be ese lɔ enugbali a? Gbeɖe nɛnɛ yɔ nɛ go! Kpɛnkpɛnmɛ ci yí le ese lɔ shi yí mì ɖeɖeɛ toi.