¹ Eo, amɛ ci yí le ehwɛ doɔ nɔ amɛ, amɛɖekpokpoi ci yí á nyi ɔ enyɔ d'a jɔ nɔ eo le Mawu gbɔ́ o. Ɖó, ci yí é le ewɛ doɔ nɔ amɛwo gankagan yí le enu cihan yí amɛ lɔwo wanɔ, wagɔ ɔ, eoɖeki yí è le ehwɛ doɔ nɔ. ² Mì trɔ́ nyá be kojo ci yí Mawu ɖonɔ kodo amɛ ciwo yí wanɔ nɛnɛ 'nuwo nyí kojo ci yí sɔ egbe kodo nyɔnɔnui lɔ. ³ Eo ci yí dodoɔ ehwɛ nɔ amɛ ciwo yí wawa enu hɔnhan lɔwo gankegan yí wawa wo eoŋtɔ ɖee, bu é bubuɔ be kojo ci yí Mawu a vá ɖó kodo amɛwo a gli eye doa? ⁴ Alo ci yí Mawu nyɔnɔ dɔmɛ sugbɔ, tanɔshi enyɔ kaba yí donɔ ʒinʒinxo nyuiɖe ŋci yí d'è sɔsɔ eɖe le yi 'nyɔ mɛ o a? D'é nya be dɔmɛnyɔnyɔ Mawu tɔ a kpedo eo nu nɔ́ ná xɔ jimɛtrɔtrɔ nlebu yɔ́ bá? ⁵ Vɔ ɔ, è le ŋtashingɔ yí gbé ao 'ji madrado nɔ jimɛtrɔtrɔ blebu. Nɛnɛ ɔ è na yí eto ci yí Mawu jijiɛ a vá dɔn nɔ eo sɛnsɛn eŋ ji daɖɛ nɔ́ gbecigbe yí a dansin yi dɔmɛzi nɔ amɛwo yi a ɖó kojo kodo amɛshamɛ jɔjɔɛɖe. ⁶ Á cú edɔ ci yí amɛɖeka ɖeka wa 'fɛn nii. ⁷ Mawu a ná agbemavɔ amɛ ciwo yí dó vevi enunyui amɛ ciwo yí dó vevi enunyui yí wawa yí jijiɛ kanfukanfu, kɔkɔ kodo agbe magblemagble. ⁸ Vɔ amɛ ciwo yí fɔnfɔn egu do mawu jí yí gbé nyɔnɔnui 'mɔ́ lɔ ji mato yí le enumajɔmajɔɛwo waa ɔ, Mawu a do dɔmɛzi do wo yí a je axɔ dó wo jí. ⁹ Nɛnɛ ɔ, Mawu a ná vevesese kodo gbazavi a vá amɛ ciwo plɛŋ yí wwa enuvɔ ji. Á tɔ́ɛ jí só yuɖatɔwo jí yí a vá je amɛmanyi yuɖatɔwo jí. ¹⁰ Vɔ ɔ, Mawu a ná kɔkɔ, kanfukanfu kodo fafa amɛ ciwo pleŋ yí wanɔ enunyui. A ́ tɔ́ɛ jí só yuɖatɔwo jí yí a vá je amɛmanyi yyɖatɔwo jí. ¹¹ Ɖo ɔ, mawu de nɔnɔ amɛ ji go. ¹² Amɛ ciwo pleŋ yí wa enuvɔn esemanya ɔ, wo a gbe yi trɔntrɔnmɛ le esemanya mɛ. Vɔ amɛ ciwo pleŋ yí nyá ese lɔ gbɔxwe yí gbe le enuvɔn wagɔ ɔ, Mawu a sɔ́ ese lɔ ɖó kojo kodo wo. ^{13 14} Ɖó d'é nyí amɛ ciwo yí seseɛ ese lɔ kpoŋ yí nyí amɛjɔjɔɛwo le Mawu ŋmɛ o. Vɔ ɔ amɛ ciwo yí wawa do jí yí a nyí amɛjɔjɔɛwo le yi ŋmɛ. nɔ́ amɛmanyi yuɖatɔwo, amɛ ciwo yí de jeshi ese ƒɛ́ o, va wawa enu ciwo yí ese biɔ be wo le wa manyamanyatɔ ɔ, yi gɔnmɛ yí nyí kpɔ́ be lanmɛ yí é le nɔ wo nɛnɛ han yí wo wɛwɛɛ. ¹⁵ Wo dandansin be enu ciwo yí ese dɔ́ be wo lé wa le ŋwlɛŋwlɛ le yewo mɛ. wowo susuwo cán gbe donɔ e hwɛ nɔ wo yí gbe sonɔ enyɔ nɔ wo hweɖewonu. ¹⁶ Enyɔ cɛwo ci yí ŋ nunuɔ nɔ mí a vá zé petii hwecinu yí Mawu a to Yesu Kliso ji yí a ɖó kojo kodo agbetɔwo. Á ɖó kojo kodo wo nɔ́ enu ciwo yí wo wa kaka je enu ciwo le bebemɛ le wowo 'gbewo mɛ ji. Nɛnɛ han yí é le do le Mawu 'ŋɛnyui cí yí ŋ dodoɔ nɔ mí mɛ nɛ. ¹⁷ Vɔ eo ci yí yɔnɔ eoɖeki be yuɖatɔ yí gonɔ dó ese lɔ nú yí sɔ́ Mawu gegezeɛ ɔ, ¹⁸ è jeshi enu ciwo yí Mawu 'dró be agbetɔwo lé wa. Mawu kplán enyu eo to yi 'se mɛ yí è nya lehancì yí á dó jeshi enu ci yí nyi enuvevi. ¹⁹ É kandoji bé ye nyi emɔjɔtɔ nɔ ŋkuvitɔntɔntɔnɔwo; ye nyi klɛnklɛn nɔ́ amɛ ciwo yí le vivicimɛ. ²⁰ Eo amɛ ci yí nyì enukplanmɛtɔ yí & dɛn eŋ ka aɖyi enyɔ do amɛ ciwo yí tagbɔ de sɔ egbe nɔ o yí a kplán enu ɖevihwɛwo. Ɖó ɔ, è bunɔ be ye ɖo enuwonyanya kodo nyɔnɔnui lɔ le ese lɔ mɛ. ²¹ Eo ci yí kplankplan enuwo amɛwo ɖee, d'é kplankplan enu lɔwo eoɖeki bá! Eo ci yí dó axwa yí nunuɔ nɔ amɛwo be wo de finɔ efin o ɖee, ɔ́ gbe va le efin fiɛ! ²² Eo ci yí dodoɔ ese be wo de wanɔ hashi o ɖee, nyi yí ná taɖo yí eo gbe va wawa hashi ɔ? Eo ci yí vojuwo wanɔ kufiɛ nɔ́ ɖee, nyi yí ná taɖo yí è gbe vayi finfin vojuxɔmă 'nuwo ɔ? ²³ Eo ci yí sɔ́ ese lɔ gezenɔ ɔ, ɔ́ gbe va dodoɔ ŋkpɛn Mawu to ese lɔ ci ji yí è dada le mɛ. ²⁴ Nɛnɛ han ke yí wo ŋwlɛ do Mawu 'nyɔ wemawo mɛ daɖɛ nɛ be «Míwo 'nuwanawo dɔ́ yí amɛwo nunuɔ enyɔvɔnwo dó Mawu nyikɔ nú le akɔtawo mɛ.» ²⁵ Nyɔnɔnyui yɔ́ ele a le evososo mɛ sasa nɔ́ è wawa do Mawu 'sé ji. Vɔ nɔ́ é danɔ le ese lɔ jí ɔ ao 'vososo lɔ a trɔ́ tɔtɔnɔ nɔ eo. ²⁶ Ci yí é le nɛnɛ han n tɔtɔnɔ wawa do Mawu 'sé ɖoɖo jɔjɔɛ lɔwo ji nyuì ɖee, Mawu d'a sɔ́ɛ nii shigbe evososo nɛnɛ ba? ²⁷ Eo yuɖatɔ ɔ, Mawu ná yí wo ŋwlɛ ese lɔ nɔ́ eo yí è gbe nyi vosoi. Gankagan ɔ, d'é wawa do ese lɔ jí o. Vɔ amɛmanyi yuɖatɔ ɔ, yɛ nyi tɔtɔnɔ gankegan wawa do Mawu 'sé lɔ jí. Nɔ́ é le nɛnɛ han ɔ, eyɛ yí a vá ɖó kojo kodo eo. ²⁸ Ɖó ɔ yuɖatɔ nyɔnɔnuitɔ, d'é amɛ ci yí wo kpɔkpɔ le ŋkuvi nú nɛnɛ han be yí nyí yuɖatɔ yɔ́ o. Eyi evososo ŋtɔŋtɔ lɔ d'é nyi ci yí wo so le gbazamɛ yí mì kpɔkpɔ le ŋkuvi nú nɛnɛ han yɔ́ ɔ. ²⁹ Vɔ amɛ ci yí nyí yuɖatɔ nyɔnɔnuitɔ ɔ, é yí nyí amɛ ci yí nyí yuɖatɔ le eji mɛ. Yuɖatɔ hɔn ɔ, é yí nyí amɛ ci nu yí Mawu gbɔngbɔn sɔ jeshi hɔn dado. Ɖ'é nyi enu ci yí wo ŋwlɛ do ese wema mɛ 'nyɔ ɖe yɔ́ o. Amɛ ci yí nyí yuɖatɔ nyɔnɔnuitɔ hɔn ɔ, d'é nyí agbetɔwo yí kannɔfui o. Mawu yí kannɔfui.