¹ Enyɛ, Pɔlu ci yí nyí Yesu kliso 'dɔwavi, ŋwlɛŋwlɛ wema cɛ ɖaɖa mí. Mawu yɔ́ ŋ nɔ́ ma ,yí Yesu kliso 'mɛdɔdɔ yí cán ŋ do akpo nɔ́ ma dó yi 'ŋɛnyui lɔ nɔ́ amɛwo. ² Eŋɛnyui cɛ ɔ, Mawu ɖó yi 'gbe sasa to yi 'ŋɛdotɔwo jí yí wo ŋwlii ɖɛ dó Mawu 'nyɔ xemawo mɛ. ³ Eŋɛnyui lɔ xo nuxu so Mawu Eviɛ nu. Ci yí wo sɔ jii agbetɔ ɔ, é nyí Davidi jijimɛvì ⁴ Vɔ ci yí Mawu fɔ́n Yesu Kliso, mìwo 'xwetɔ so ekuwodi to gbɔngbɔn kɔkɔɛ ji ɔ, é dansin kodo ŋsɛn be yi nyí yeviye ⁵ sɔ to Yesu Kliso lɔ ji ɔ, Mawu wa xomɛvunu nɔ́ mì yí sɔ́ mì ɖó Yesu 'mɛdɔdɔ nɔ́ mì a yi nu yi 'nyɔ nɔ akɔtawo pleŋ nɔ́ wo a xɔɛ ji se yí a wa do yi 'nyɔwo ji a sɔ́ do nunu yi nyukɔ nú. ⁶ Míwo cán mí le akɔta hɔnwo mɛ. Ɖó ɔ, Mawu yɔ mí nɔ́ mí a nyí Yesu Kliso 'mɛwo. ⁷ Ŋ ŋwlɛŋwlɛ wema cɛ ɖaɖa míwo nɔvi vevi ciwo yí le Hlɔmu jugan mɛ nɔ mawu. mawuyɔ́ mí yí mí nyi xɔsetɔwo. Mawu mìwo 'da kodo Axwetɔ Yesu Kliso lé wa xomɛvunu nɔ́ mí yí a ná fafa mí. ⁸ Doŋkɔ ɔ, ŋ to Yesu kliso ji yí dó akpe nɔ́ nyaŋ Mawu dó eta nɔ mí pleŋ. Ɖó le xexe lɔ pleŋ mɛ ɔ, amɛwo kankan seŋ so míwo xɔse nu. ⁹ Ŋ wawa edɔ nɔ Mawu kodo eji blebu sɔ́ to yi 'ŋɛnyui ci yí ŋ nunuɔ nɔ amɛwo mɛ. Eŋɛnyui lɔ xoxoɔ nuxu so Eviɛ nu. Mawu a ɖe kunu nɔ ŋ be: ŋ le gbedoɖa waa nii hweɖekpokpoinu ɔ, ŋ ɖonɔ eŋui mí . ¹⁰ Ŋ biɔnɔ tɛgbɛɛ le nyaŋ gbedoɖa lɔwo mɛ be nɔ́ Mawu dró ɔ, na vá kpɔ́ emɔnu ɖ̀ yí avá yɔ́ mí kpɔ. ¹¹ Ɖó ɔ, míwo gbɔ́ vava yí a vá kpɔ mí drodroɔ ŋ sugbɔ. Nɔ́ ŋ va ɔ, na hɛn xomɛvunu 'nunana, gbɔngbɔn kɔkɔɛ 'nunana lɔ vá nɔ́ mí a lodo le xɔse lɔ mɛ. ¹² I gɔnmɛ yí nyi kpɔ́ bé nɔ́ ŋ va mí gbɔ ɔ; eji a le exo nɔ mì pleŋ sɔ́ to amɛɖeka amɛɖeka kpena xɔse ji. Xɔse ci yí le enyɛ shi a dó eji exo nɔ míwo yí míwotɔ a dó eji exo nɔ enyɛ.odu ¹³ Nɔvinyɛwo, ŋ ji be mí a nyá be zenɛniɖe yí ŋ ɖoi be na va mí gbɔ, nɔ́ edɔ lɔ a ɖó ele nɔ mí shigbe lehanci yí é ɖoi le akɔta kpɛtɛwo mɛ do nɛnɛ. Vɔ kaka vá ɖó hwexɛnu viɛ ɔ, enu buwo xexe emɔ nɔ́ n. ¹⁴ Efɛn yí é nyi yi le ekɔ nɔ ŋ be ŋ ɖo a dó eŋɛnyui lɔ nɔ́ amɛshamɛ nɔ Glɛkitɔwo kodo amɛ kpaawo, nɔ́ wemanyatɔwo kodo wemamanyatɔwo. ¹⁵ É yí ná taɖo yí é drodroɔ ŋ sugbɔ be na va dó eŋɛnyui lɔ nɔ́ míwo Hlɔmu juganmɛtɔwo hɛnnɛ. ¹⁶ Nɔ́ ŋ le eŋɛnyui lɔ doɔ, eŋ de kpɛnnɔ ŋ go. Ɖó é yí nyi ŋsɛn ci yí Mawu sɔ́ hwlɛnnɔ amɛɖekpokpoi ci yí xɔɛ ji se gan. Hwlɛngan ŋsɛn lɔ vá nɔ́ yuatɔwo doŋkɔ gbxwe vá vá nɔ́ amɛmanyi yuɖatɔwo. ¹⁷ Eŋɛnyui lɔ yí dansin Mawu jɔjɔɛnyinyi sɔ to Kliso lɔ jixɔse mɛ. Kliso lɔ jixɔse lɔ ɖekɛ kpánŋ nú yí Mawu kpɔnɔ dó yí wɛɛni nɛnɛ han. Nɛnɛ han yí wo ŋwlii dansin dó mawu 'nyɔ wemawo mɛ nɛ be: «Amɛ ci yí nyi amɛjɔjɔɛ to xɔse ŋsɛn mɛɔ, amɛ lɔ a nɔ agbe» ¹⁸ So kaka jiŋkushi ɖaa, Mawu ɖenɔ yi dɔmɛzi dansin dó enuvɔn kodo majɔmajɔnyinyi ciwo pleŋ mɛ yí agbetɔwo le ji. Enuvɔn lɔwo xé emɔ nɔ́ nyɔnɔnuitoto. ¹⁹ Enu ci yí wo & sɛ́n eŋ nyá so Mawu nu ɔ, wo nyii nyuiɖe. Ɖ Mawu ŋtɔ yí dansin i nɔ wo. ²⁰ So hwecinu yí Mawu wa xexe lɔ ɔ, nɔnɔmɛ makpɔmakɔwo le shi. wowo yí nyi yí ŋsɛn mavɔmavɔ kodo Mawunyinyijɔjɔmɛ ci yí le shi. wo trɔ́ zé petii nɔ́ agbetɔwo to yi 'nuɖoɖowo mɛ. Ci yí é le nɛnɛ han ɔ, wo d'a gbe sɛn eŋ sɔ Mawu maṣɛnmsɛn ke agbetɔwo o. ²¹ Ɖó ɔ, wo jeshi mawu. Vɔ kpɔ́ wo de kannɔfui o. Wo de donɔ akpe nii shigbe lehanci yí é je do nɛnɛ o. Vɔ ɔ, wowo 'ji bu emɔ kaka vá ci enugbaliwo jí. Ejimɛ do vivici nɔ́ wo yí wo de gbe seseɛ enuɖe gɔnmɛ o. ²² Wo nunuɔ be yewo nyi ŋununyatɔwo. Vɔ sukunɔwo yí wo nyí ŋununyatɔwo. Vɔ sukunɔwo yí wo nyi ²³ Kanfukanfu ci yí wo ɖó a sɔ́ ná Mawu magblemagble lɔ ɔ, wo sɔ́ɛ nana nɔnɔmɛtata ciwo yí nyi agbetɔ enukuku xeviwo, a lan afɔnɛnɔwo kod elanzɔnxodujiwo dó yi 'dumɛ. ²⁴ É yí ná taɖo yí Mawu tashi wo yí wo tɔ́ laganu ciwo yí drodroɔ wowo 'ji wawa kaka vá sɔ́ wowo lankpuwo tɔ́ ŋkpɛn 'nuwo wawa le wowoɖeɖewo mɛ. ²⁵ Wo sɔsɔ Mawu nyɔnɔnui lɔ sɔ́ ɖɔɖɔ eli kodo ŋsukankan. Wo sɛnsɛn enuɖoɖowo yí gbé Enuwoɖotɔ lɔ ɖɛ́ eyɛ ci yí wo ɖó a kanfu sɔyi tɛgbɛɛ! Xoaɖyi! ²⁶ É yí ná taɖo yí Mawu tashi wo yí wo tɔ́ ŋkpɛn 'nu cìwo yí drodro wo wawa. wowo 'shiwo gbé lehanci yí enu ɖó a nyi do ɖɛ́ yí vayi mlɔmlɔ anyi kodo wowo kpena nyɔnuwo. ²⁷ Nɛnɛke ɔ, ŋsuwo tashi ekacaca su kodo nyɔnutɔ yí va zije ekacaca xoɖyixoɖyiwo mɛ kodo ŋsuwo ɖeɖe. Nyao ɔ wowo nyɔnuwo wawa nyui ciwo yí Mawu ɖó ɖɛ́ yí wo a wanɔ kodo ŋsuwo yí vá sɔ́ trɔ́ wawa ciwo yí nyi ekɔ ²⁸ Ci yí wo gbé be yewo d'a jeshi Mawu o. ɔ, Mawu tashi wo dó wowo ŋununyanya dɔndɔn lɔ mɛ yí wo tɔ́ enu ciwo yí wo de ɖó yí a wa o wawa. ²⁹ Wo ɖɔ́ kodo enumajɔmajɔ hamɛhamɛwo xomɛveve, enumasun amɛ, evɔnjinɔamɛ ŋhwan, amɛwuwu, evuwawa, ayemɛnuwawa, ekunyinanyina, eshivɔnlenɔamɛ. ³⁰ Wo nyi eshivɔnlenɔamɛtɔwo, ekedomawutɔwo, enuɖemabutɔwo agbajetɔwo, egoyitɔwo nuvɔnsusuɖetɔwo, egufɔfɔn dó wowo 'dawo ji tɔwo ³¹ ŋunumanyatɔwo, egbejimanɔtɔwo, eɖemasɔle enujitɔwo, ŋshishimaku nɔamɛtɔwo. ³² Amɛ lɔwo nyá be Mawu sɔ́ gbeta jɔjɔɛ ɖeka daɖɛ be amɛ ciwo yí wawa enudɔndɔn hɔnhanwo jenɔ eku. Gankegan ɔ, wo kpɔtɔ yí le wo wagɔ yí gbe donɔ amɛ ciwo yí le nɛnɛ 'nuwo wagɔ ji.