¹ míwo ciwo yí nyi ŋsɛntɔwo le xɔse mɛ ɔ, mí ɖo a kpedo amɛ gbɔjɔgbɔjɔ le xɔse mɛ nu . D'é nyi enu ci yí a do mìwotɔwo ji yí mì a wanɔ go. ² Míwo domɛtɔ ɖeka ɖeka lé wanɔ enu ci yí a dó nɔviɛ jí nɔ a hen enunyui vɛ nii yí a ná yí mí a shin do eju. ³ D'é nyí enu ci yí do Kliso lɔ ji yí Kliso va wa go. É le shigbe lehanci yí wo ŋwlii do Mawu 'nyɔ wemawo mɛ dadɛ nenɛ be: «zuzu ci yí amɛwo eueuɔ eo Mawu ɔ, enyɛ ŋ xɔ wowo zugbui lɔwo.» ⁴ Ɖo Mawu 'nyɔ ciwo pleŋ wo ŋwlɛ daɖɛ vayi ɔ, wo ŋwlɛ wo yi a sɔ kplan enu mì. Nɔ́ nɛnɛ ɔ, vevidonu kodo ŋsɛndo lanmɛ nɔ amɛ ciwo yí a nana mì a dɔ yí mì a ɖo emɔkpɔkpɔ. ⁵ Mawu ci yí nyi jɔxu nɔ vevidonu kodo ŋsɛn do lanmɛ nɔ amɛ lé ná nɔ mí a ɖenɔ egbe eju lé míwonɔnɔwo mɛ. Shigbe lehanci yí Yesu Kliso kplan mì do nenɛ. ⁶ Gahɔnmɛ ɔ, le egbeɖojumɛ, le egbekuɖekadodomɛ ɔ, mì a kannɔfu mawu, mìwo 'xwetɔ Yesu Kliso Edalɔ. ⁷ Mí ke alɔ yi a xɔ mìwo nɔnɔwo shigbe lehanci yí Kliso lɔ ŋtɔ ke alɔ yi xɔ mí do nɛnɛ nɔ́ mí a sɔ́ kannɔfu mawu. ⁸ Ɖo ɔ, ŋ nunuɔ nɔ mí be Kliso lɔ va le edɔ waa nɔ yuɖatɔwo yí sɔ́ dansin be Mawu nunɔ nyɔnɔnui. É wɛɛ nɛnɛ yí wa do egbe ci yí Mawu ɖó nɔ́ wowo tɔgbiwo jí. ⁹ To alɔ ɖeka lɔ jí ɔ, é vá hɛnnɛ nɔ́ amɛmanyi yuɖatɔwo a kanfu Mawu do ŋshishi ci yí é ku nɔ wo ŋci shigbe lehanci yí wo ŋwlii daɖɛ dó nɛnɛ be: «É yi na taɖo na kankanfu eo le akɔtawo mɛ, eyí na ji eha a ka,fu ao nyikɔ. ¹⁰ Wo gbe ŋwlɛ daɖɛ hɛnnɛ be: «Akɔtawo, mí kpɔ jijɔ kodo yi jukɔn!» ¹¹ Wo gbe nu hɛnnɛ ke be: «Míwo akɔtawo pleŋ, mí kanfu Mawu, jukɔnwo pleŋ le kanfui!» ¹² Ezayi nu hɛnnɛ be: «Ʒese jijimɛvi a vá vá, eyɛ yí nyio amɛ ci yí a vá shi ete yí a kpe acɛ do akɔta kpɛtɛwo jí. Akɔta lɔwo a vá sɔ wowo 'mɔ kpɔkpɔ dado jí. ¹³ Mawu ci yí nanɔ emɔ kpɔkpɔ amɛ, lé ná nɔ́ jijɔkpɔkpɔ kodo fafa a ɖɔ́ mí le xɔse mɛ, gahɔnmɛ ɔ, Gbɔngbɔn kɔkɔɛ ŋsɛn a nà yí emɔkpɔkpɔ nɔ́ mawu a ɖɔ́ mí kaka yí a gbando ago. ¹⁴ Nɔvinyɛwo, míwo yɛ ɖɛ, enyɛŋtɔ ŋ kandoji be dɔmɛnyɔnyɔ ɖɔ mí mɛ yí enu nyanya cán ɖɔ́ mí. ŋ nya hɛnnɛ be mí a sɛ́n eŋ ɖo afɔ afɔta nɔ míwo nɔnɔwo hɛnne. ¹⁵ Vɔ le akpa 'ɖewo 'xwe ɔ ŋ sɔ edɔn gbegbe ŋwlɛ enu lɔ ɖɖa mí. Ɖo ɔ Mawu wa afenu nɔ́ ŋ. ¹⁶ Yí cán ŋ be ma nyi Yesu Kliso 'dɔwavi le amɛmanyi yuɖatɔwo domɛ. ŋ le Mawu 'ŋɛnyui lɔ dodo 'dɔ ji nɔ amɛmanyi yuɖatɔ lɔwo nɔ́ wo a nyí enunana ciwo 'nu yí jɔnɔ eji nɔ́ Mawu, nɔ́ wo a nyi amɛɖe do akpowo nii to Gbɔngbon kɔkɔɛ ŋsɛn mɛ. ¹⁷ Ci yí é le nɛnɛ ɔ, ŋ yinɔ ego le Yesu Kliso mɛ do mawu 'dɔ 'ta. ¹⁸ Le mɛ ɔ, ŋ d'a gbe edɔn yí a xo nuxu so enu bú ɖe nú sɔ zeto enu ciwo yí Kliso lɔ wa to ŋ ji go. É wa edɔ to ŋ ji yí sɔ kplɔ amɛmanyi yuɖatɔwo va etonusese nii gbɔ́ le nuxu kodo le edɔwawa mɛ. ¹⁹ É gbe wa jeshido 'nuwo kodo enukpacamɛwo sɔ to Mawu Gbɔngbɔn hɛnne. Nɛnɛ han yí ŋ do Kliso 'ŋɛyui lɔ le afishafi dó nɛ. ŋ tɔɛ ji so Ʒeluzalɛmu kaka yí kɔdo Yilili 'kan mɛ. ²⁰ Ŋ jinɔ dandan be na yi dó Eŋɛnyui lɔ le fini ciwo yí amɛwo de se yó wo de xo nuxu so Kliso lɔ nú le hɔɖe go. ŋ wɛɛ nɛnɛ nɔ ŋgbé va nyí amɛ bu ' nyiɖuwo jí yí ŋ va cu exɔ do go. ²¹ Ŋ kpɔ enyɔ ci yí wo ŋwlɛ daɖɛ be: «Amɛ ciwo yí wo de nuxu so nu nɔ go a va kpɔɛ. Amɛ ciwo yí de se yí wo xo nuxu so nu hɔeɖ go a vá mɔŋje yi mɛ.» ²² Enu ci yí na taɖo ŋ de sɛ́n eŋ yí vá mí gbɔ nɛ. ²³ Vɔ ecɛviɛ ɔ, ŋ ɖe egbɔ edɔ lɔ le nutui hɔnwo mɛ. Exwe sugbɔ wo ge yí míwo gbɔ vava drodroɔ ŋ veviɖe. ²⁴ Ŋ ji be nɔ ŋ vayigɔ Esipanyi 'ju mɛ ɔ, na vá yɔ mí kpɔ. na to mí gbɔ yí anɔ mó gbɔ kaka a sun ŋ hwɛɖeka. Le i godu ɔ, mí a do alɔ ŋ nɔ́ ma yi Espanyi 'fu lɔ mɛ. ²⁵ Vɔ eviɛ trololo ɔ, na yi Ʒeluzalɛmu yí a yí wa edɔ kodo xɔsetɔ ciwo yí le e hɔn gbɔxwe. ²⁶ Ɖó ɔ, xɔsetɔ ciwo yí le Maseduwanu kodo Akayi kanwo mɛ sɔ gbeta be yewo a jɔ enu yí sɔ do alɔ wamɛnɔwo le Ʒeluzalɛmu jugan mɛ. ²⁷ Wowoŋtɔwo yí sɔ gbeta be yewo a wɛɛ. Vɔnɔ́ wo a nu nyɔnɔnui ɔ, efɛn han yí é nyi yí wo ɖu do Yuɖatɔwo xɔṣetɔwo. Ɖo nɔ amɛmanyi Yuɖatɔ lɔwo kpɔ wowotɔ yí xɔ le gbɔngbɔnmɛ 'nu ci wo 'gbe yi Mawu ɖó nɔ́ tyɖatɔwo mɛ ɔ, amɛmanyi yuɖatɔwo cán ɖoa sɔ xexemɛ dɔkunu ciwo yí le wo shí zán dó Yuɖatɔwo nú. ²⁸ Nɔ ŋ wa edɔ hɔnwo ɖegbɔ yí wa kɔnŋta nɔ enujɔjɔ ciwo pleŋ yí amɛwo wa yí sɔ́ jó nɔ ŋ wo ɔ, na va to mí gbɔ yí a yi ɛsipanyi. ²⁹ Ŋ nya be nɔ ŋ va mí gbɔ ɔ, na hen Kliso lɔ shicu gɔɖɔɔ ɖeka. ³⁰ Nɔvinyɛwo, ŋ dodoɔ ŋsɛn lanmɛ nɔ mí to Axwetɔ Yesu Kliso kodo lɔnlɔn ci yí Gbɔngbɔn kɔkɔɛ na nɔ amɛ ji be míwo le wa ahwa ŋ yi a donɔ egbe ɖaɖa nɔ Mawu do eta nɔ ŋ. ³¹ Mí do egbe cɛ ɖaɖa nɔ a xɔ nɔ ŋ le amɛ ciwo yí kpɔtɔ yí gbegbeɛ eto nɔ Mawu 'ŋɛnyui lɔ le Ʒyde 'kan mɛ shi. Mí do egbe ɖaɖa nɔ Mawu hɛnnɛ do nyaŋ 'ta nɔ xɔsetɔ lɔwo a ke alɔ a xɔ enu ci yí ŋ hɛn yí gɔ nyuiɖe le Ʒeluzalɛmu jugan mɛ kuso enujɔjɔ 'dɔ lɔ ci yí ŋ wa ŋci. ³² Gahɔnmɛ nɔ mawu dro ɔ, ma va mí gbɔ kodo jijɔ yí a gbɔndomɛ hwɛɖeka. ³³ Mawu ci yi nana fafa amɛ le nɔ kodo míwo pleŋ! Xoaɖyi!