¹ Ŋ dredrɛ mìwo nɔvi nyɔnu Foyebe shigbe amɛ ci yí xɔ kunuɖeɖe nyui nɛnɛ. É le Mawu 'dɔ́ lɔ wawa le Sankle 'hamɛ ɖaɖa mí. ² Nɔ́ é ke alɔ ɖó mí gbɔ ɔ, mí a ke alɔ yí a xɔɛ le Axwetɔ mɛ shigbe lehanci yí xɔsetɔwo xɔnɔ amɛ do nɛnɛ. Nɔ́ é ʒian mí le enyɔ ɖekpokpoi mɛ ɔ, mí a sɔ. ete kodi. Ɖó ɔ, é kpedo amɛ sugbɔ nu vayi kaka kpedo enyɛŋtɔ cán nú hɛnnɛ. ³ Mí do egbe nɔ Pliskika kodo Akilasi; nyaŋ bɔdonutɔwo yí wo nyí le Yesu Kliso 'dɔ lɔ wawa mɛ. ⁴ Wo sɔ́ wowo 'gbewo ke eku yí hwlɛn nyaŋ 'gbe gan. D'é nyi enyɛ ɖekɛ yi dodoɔ akpe nɔ́ wo go. Amɛmanyi Yuɖatɔwo 'hamɛwo pleŋ yí dodoɔ akpe lɔ. nɔ́ wo. ⁵ Mí do egbe nɔ Mawu 'há. ci yí vá bɔnɔ do wowo xwe mɛ. Mí do egbe nɔ nyaŋ 'xlɔ vevi Epenɛti nɔ ŋ. Eyɛ yí nyí amɛ ŋkɔtɔ ci yí xɔ kliso lɔ ji se le Azi 'kan mɛ. ⁶ MÍ do egbe nɔ Mli, ci yí je cukaɖa sugbɔ do eta nɔ mí. ⁷ Mí do egbe nɔ nyaŋ xomumɛtɔ Andronikusu kodo Ʒuniyasi nɔ ŋ hɛnnɛ. wowo yí wo cú dó gakpamɛ kodo ŋ. Mawu 'mɛdɔdɔ bubumɛwo yí wo nyí. Wo xɔYesu Kliso ji se doŋkɔ nɔ ŋ hɛnnɛ. ⁸ Mí do egbe nɔ Anŋpliyatusu, nyaŋ 'xlɔ́ vevi le Axwetɔ lɔ mɛ. ⁹ Mí do egbe nɔ Yulubɛn, amɛ ci yí nyí nyaŋ bɔ donutɔ le Kliso lɔ 'dɔ lɔ wawa mɛ . Mí do egbe nɔ nyaŋ 'xlɔ vevei sitakisi nɔ ŋ hɛnnɛ. ¹⁰ Mí do egbe nɔ Apelɛsi ci yí to enuwo mɛ do Kliso lɔ tamɛ mɛ do Kliso lɔ tamɛ nɔ ŋ. Mí do egbe nɔ Alishitobulu 'xwemɛtɔwo nɔ́ ŋ hɛnnɛ. ¹¹ Mí do egbe nɔ nyaŋ xomumɛtɔ Elodiyɔn nɔ ŋ. Mí do egbe nɔ Naasisi 'xwemɛtɔ ciwo yí xɔ Axwetɔ ji se nɔ ŋ hɛnnɛ. ¹² Mí do egbe nɔ tri fɛnu kodo Trifozu, míwo nɔvi nyɔnu ciwo yí je cukaɖa sugbɔ do Axwetɔ tamɛ, nɔ ŋ. Mí do egbe nɔ nyaŋ 'xlɔ vevi nyɔnu Pɛshishi nɔ ŋ. Eyɛ cán je cukaɖa sɛnŋsɛnŋ ɖe dó Axwetɔ tamɛ hɛnnɛ. ¹³ Mí do egbe nɔ Hlufusu nɔ ŋ. Amɛcancan yí é nyi le Axwetɔ 'dɔ́ lɔ mɛ. Mí gbe do egbe nɔ enɔlɔ ci yí nyí enɔ han nɔ́ ŋ hɛnnɛ. ¹⁴ Mí do egbe nɔ Asɛnkliti, Fleyɔn, Hɛmɛsi, Patrobasu, Hɛmazi kodo nɔvi ciwo yí le wo gbɔ́ nɔ́ ŋ. ¹⁵ MÍ do egbe nɔ Filolɔgi kodo Ʒuli, Nɛle kodo nɔviɛ nyɔnu, Olɛnpasi kodo xɔsetɔ ciwo pleŋ yí le wo gbɔ́ nɔ́ ŋ. ¹⁶ Mí kpla ashi ekɔ nɔ míwonɔnɔwo yí a sɔ́ dó egbe nɔ nɔnɔ kodo lɔnlɔn le Kliso mɛ. Kliso hamɛ lɔwo pleŋ dó egbe ɖaɖa mí. ¹⁷ Nɔvinyɛwo, ŋ dodoɔ ŋsɛn lanmɛ nɔ mí be míwo lé kpɔ́ nyuiɖe le amɛ ciwo yí fɔnfɔn egu do enu ciwo yí wo klán mí nu. Wo dodoɔ mama amɛwo mɛ yí dɔndɔn amɛ do afɔklɛnnu mɛ. Mí shi nɔ́ wo. ¹⁸ Ɖó ɔ, nɛnɛ 'mɛwo de nyí Kliso, mìwo 'xwtɔ lɔ 'dɔwaviwo go. Vɔ ɔ wowoŋtɔwo xodu yí wo nyi edɔwaviwo nɔ́. Wo le amɛwo bleɛ yí le enumɛviviɛ yí sɔ́ le xomɛvunɔwo 'ji dɔɔn do enugblaliwo mɛ ¹⁹ Míwo yɛ ɔ, amɛshamɛ nya bé míwo senɔ etonu nɔ́ Axwetɔ. Eji jɔnɔ ŋ do mí nu. Vɔ ɔ, ŋ ji be míwo lé nyá ŋunu yí a wanɔ enyui. ŋ ji hɛnnɛ bé míwo lé nyí amɛ mɛmiwo yí a ze nɔ enuvɔn. ²⁰ Sabaɖe viɛ ɔ, Mawu fafanamɛtɔ a cuku legba gujuguju dó míwo 'fɔwo gɔnmɛ. Mìwo 'xwetɔ Yesu Kliso xomɛvunu lé nɔ kodo mí. ²¹ Nyaŋ bɔdonutɔ Timɔte do egbe ɖaɖa mí. Luisiwusu Ʒasɔn kodo Sosipatrɔsi ciwo yí nyi nyaŋ xomumɛtɔwo dó egbe ɖaɖa mí hennɛ. ²² Enyɛ Tɛshiwusu ci yí Pɔlu dɔ yí ŋ ŋwlɛ wema cɛ nii nɔ́ á sɔ ɖaɖa mí can do egbe ɖaɖa mí hɛnnɛ le Axwetɔ lɔ mɛ. ²³ Gayiyusi, amɛ ci gbɔ yí ŋ ze can do egbe ɖaɖa mí. Eyɛ yí xɔ ŋ yí Mawu 'há lɔ pleŋ vá sɛnnɔ mawu le yí 'xwemɛ. Elasi amɛ ci yí nyí jugan lɔ 'hojikpɔtɔ dó egbe ɖaɖa mí yí mìwo nɔvi kaatusi can dó egbe ɖaɖa mí. ²⁴ Mìwo 'xwetɔ Yesu Kliso lé wa xomɛvunuwo nɔ́ mí pleŋ. Xoaɖyi. ²⁵ Mì a kanfu Mawu! Acɛ le shi yí a le mí do ete sɛnsin nɔ́ mí a nɔ egbeji nii sɔto Eŋɛnyui ci yí ŋ nunuɔ nɔ amɛwo so Yesu Kliso nu ji. Sasa ɔ, Mawu de ná yí amɛwo nyá Eŋɛnyui hɔn go. É sɔ́ wlá dó wo so tɛgbɛɛ. ²⁶ Vɔ eviɛ ɔ, Mawu vá ná yí wo ɖii dansin sɔto yí 'ŋɛdotɔwo 'nuŋwlɛŋwlɛdaɖɛwo ji. Nɛnɛ ɔ, jukɔwo pleŋ se eŋɛ lɔ. Shigbe lehanci yí Mawu Mavɔmavɔtɔ sɔ́ gbeta lɔ dó bé yi le jeshii do nɛnɛ. É wɛɛ nɛnɛ nɔ́ amɛwo axɔ Mavɔmavɔtɔ lɔ ji se yí a se etonu nii sɔto xɔse mɛ. ²⁷ Mawu ci ɖekɛ yí nyí kanfukanfu tɛgbɛɛ sɔto Yesu Kliso ji! Xoaɖyi!