¹ Mí xɔ amɛ ciwo yí de shin le xɔse mɛ odo míwo domɛ. Mí ŋgbe donɔ ɖyikawo so enu ci yí wowo kpɔ be yinyɔ alo d'é nyɔ nu go. ² Le kpɔwɛ mɛ ɔ, amɛde sɛ́n eŋ kpɔ be ye ɖo xsɔe yi ɖu enuwo pleŋ drú. Amɛ bu ci yi de shin le xɔse mɛ go kpɔ be xɔkpagble mɛ 'gbewo ɖekɛ yi ye a ɖuɖuɔ. ³ Amɛ á yi ɖunɔ enuwo ŋgbe gbaliamɛ ci yí de le enuwo ɖuxɔ go yi amɛ ci yi de le enuwo ɖuɔ go ŋgbe dodo ehwɛ nɔ amɛ ci yí le enuwo ɖuɔ go. Ɖo ɔ, Mawu xɔ eyɛ can faa. ⁴ Mì eɔ nyi yi a dodo ehwɛ nɔ amɛ bu 'dɔwavi ɔ? Nɔ edɔwavi lɔ le ete sɛnsin alo e juin ɔ, yi 'xwetɔ 'nyɔ yí e nyi. Edɔwavi lɔ a nɔ ete sɛnsin taŋ. Ɖo ɔ Axwetɔ ɖo ŋsɛn yi a lii do ete sɛnsin. ⁵ Amɛ kpɔnɔ be ŋkeke dewo le ŋkɔ nɔ eɖewo yí amɛ bu gbe kpɔnɔ be ŋkekewo pleŋ yi bɔ sɔ. Amɛ ɖeka ɖeka ɖó a ɖo kankandoji blebu le yi susu mɛ. ⁶ Amɛ ci yí sɔnɔ eɖe le ŋkeke 'nyɔ ji ɔ, wɛɛwɛ nɛnɛ nɔ Mawu. Amɛ ci yí le enuwo pleŋ ɖuɔ ɔ, wɛɛwɛ nɛnɛ nɔ Mawu hɛnnɛ. Ɖo ɔ, e donɔ akpe nɔ Mawu. Amɛ ci yí gbe be ye d'a ɖu enuwo pleŋ go ɔ, wɛɛwɛ nɛnɛ a sɔ do bubu mawu lɔ nu hɛnnɛ yi a gbe sɔ do akpe nɔ Mawu. ⁷ Nyao ɔ amɛɖe de le mìmɛ le xexe cɛ mɛ yi le agbe nɔ yiɖeki go yí amɛɖe de kunɔnɔ yiɖeki go. ⁸ Ɖo nɔ mi le agbe ɔ, mi le agbe nɔ Mawu yi nɔ mi ku ɔ, mi gbe ku nɔ Mawu hɛnnɛ. Nɔ mi le agbe can, mi ku can ɔ, Mawu tɔ yi mi nyi. ⁹ Ɖo nɔ Kliso lɔ ku yì gbe trɔfɔn ɔ, é wɛɛ nɛnɛ keŋ yi a nyi axwetɔ nɔ amɛkukuwo kodo amɛleagbewo yɔ. ¹⁰ Ci yí e le nɛnɛ ɖee, nyi yi na taɖo yi eɔ va dodo ɔ ehwɛ nɔ nɔvio o? Alo nyi yi na taɖo yi eɔ gbaligbali nɔvio ɔ? Le mɛ ɔ, Mawu a va ɖo kojo kodo mi pleŋ le yi 'hwɛxɔnu. ¹¹ Ɖo ɔ,wo ŋwlɛ daɖɛ be : Aɛshamɛ a va je ekloji doŋkɔ nɔ ŋ yi aɖewo pleŋ a hunmɛ be enyɛ , Axwetɔ yi nyi Mawu.» ¹² Nɛnɛ ɔ, miwo domɛtɔ ɖekaɖeka a va jo kɔnŋta nɔ Mawu so yiɖeki nu. ¹³ Ci yí e le nɛnɛ ɔ, mi na nɔ mi a mi ehwɛ dodo mìwonɔnɔwo. mìwo susuwo le nyi be mì ŋgbe nyi afɔklɛnnu nɔ amɛɖe go alo mi ŋgbe na nɔ wiwo nɔvi a tra so xɔse 'mɔ lɔji go. ¹⁴ To Axwetɔ Yesu jiɔ, ŋ nya nyuie yi kankandoji gbe le ŋ shi be enuɖɛ de li yi nyi enu makɔmakɔ le yiɖeki mɛ go. vɔ nɔ amɛɖe nu be enuɖe nyi enu makɔmakɔ ɔ, enu lɔ a trɔ enu makɔmakɔ nɔ eyɛ. ¹⁵ Nɔ e nyi kpɔ be ao 'nuɖuɖu ŋci yi nɔvio a ci ŋshishi mɛ doɔ, a nyi de gbe ɖeɖe lɔnlɔn 'fɔ go. ŋgbe nanɔ 'ta yi Kliso lɔ ku a na yi amɛ ciwo 'ta yi Kliso lɔ ku do ɖe a trɔn go. ¹⁶ Enu ci yí nyɔ nɔ mí de ɖo agbe nyi ɖyikadodo 'nu nɔ amɛɖe go. ¹⁷ Ɖo ɔ Mawu 'fiɔɖuɖu lɔ de nyi enuɖuɖu alo enununu 'nyɔ ɖe go. Vɔ ɔ jɔjɔɛnyinyi fafa kodo jijɔ ciwo yí gbɔngbɔn kɔkɔɛ nanɔ 'nyɔ yi e nyi. ¹⁸ Amɛ ci yiă le edɔ wagɔ nɔ Kliso lɔ sɔto alɔkpa hɔnwo ji 'nu a jɔnɔ eji nɔ Mawu yi agbetɔwo can a gbe xɔnɔ yí 'nyɔwo. ¹⁹ Ci yí é le nɛnɛ ɔ, mi na nɔ mi a shinɔ eju nɔ enu ci yí a hɛn fafa va yi a gbe na yí mì a shin do eju le xɔse mɛ. ²⁰ Ŋgbe vayi gble Mawu 'dɔ lɔ kodo enuɖuɖu 'nyɔ ɖe go. Le nyɔnɔnui mɛ ɔ, enuɖuduwo pleŋ nyi enu mɛmi yi wo a ɖu. Gankegan nɔ enuɖe ɖuɖu a nyi afɔklɛnnu nɔ nɔvio ɔ, d'é nyɔ be a ɖui go. ²¹ Ao 'lanɖuɖu yi a nyi afɔklɛnnu nɔ nɔvio a? E nyɔ be na mi ɖudu. Aó 'hanunu yí a nyi a alo enu bu de wawa yi a nyi ɔ, tashiwo pleŋ. ²² Xɔse ci yí le eo shi ɔ le ebu nii nɔ eoɖeki le Mawu ŋmɛ. Enu yi nyɔnɔ amɛ ci yí nɔ e wa enuɖe ɔ, yí 'yexa de gbe va kpɔ enuɖe so nu yi donɔ ehwɛ nii go. ²³ Nɔ amɛɖe le enuɖe ɖuɔ gankegan yi xoxoiɛ kpɔle yiɖeki mɛ ɔ, Mawu a do ehwɛ nii. Ɖo d'é o kankandoji teŋ be enu lɔ ci yí ye wawa to xɔse 'mɔ jo go. Enushanu cí amɛɖe a wawa gankegan yi xsɔe d'ana kankandoji yi go be enu lɔ nyɔ ɔ, enuvɔn yi é nyi.