¹ Nɔvinyɛwo, ci yí Mawu dansin yi dɔmɛnyɔnyɔ nɔ́ mì nɛnɛ ɔ ŋ dodoɔ ŋsɛn lanmɛ nɔ mí bé míwo lé sɔ́ míwo lankpuwo jó shigbe avɔsa 'nú agbeagbe, ci yí wo cán dó akpo nɔ Mawu yí yi 'nu jenɔ ji nii nɛnɛ. Enu ci yí mí a wa yí a nyi mí siinsiinɛgɔ yí sɛnsɛn lɔ a sɔ kodo Mawu 'nyɔ lɔ nɛ. ² Míwo 'gbenɔnɔwo ŋgbe sɔ kodo xexecɛmɛtɔwo go. vɔ ɔ, Mawu lé trɔ́ a wa mí yoyu to ŋɖɛnanya yiyu ci yí & na mí mɛ. gahɔn mɛ ɔ, mí a donɔ jeshi enu ci yí nyí Mawu 'dró: enu ci yí nyɔ́, enu ci yí jɔnɔ eji nii yí gbe sɔ mɛ́ vɛ le yi ŋmɛ. ³ ɖó xomɛvunu ci yí mawu wa nɔ ŋ ŋci ɔ, ŋ nunuɔ nɔ míwo domɛtɔ ɖeka ɖeka b& amɛɖe ŋgbe va kpɔnɔ yiɖɛki dó enuɖe jí sɔwu lehanci yí e le do go. Vɔ ɔ, amɛɖeka amɛɖeka lé kpɔ́ kpɛnkpɛn mɛ ci yí le shi do xṣe ci yí Mawu nii nú yí a nyá lehanci yí yiŋtɔ a nɔ agbe do dó dredrenu. ⁴ Nyao ɔ, lankpu kuɖeka yí mí pleŋ bɔ ɖo. Vɔ ɔ, lankpu kuɖeka hɔn ɖó ŋcinu sugbɔ yí ŋci nu lɔwo pleŋ de wanɔ edɔ ŋmɛɖɛkawo go. ⁵ Nɛnɛ han ke yi e nyi nɔ́ mìwo can hɛnnɛ nɛ. mì su egbɔ gan,kegan yí le eju kodo Kliso lɔ le lankpɔ kuɖeka mɛ. M̀ gbe ca dó nɔnɔ nu shigbe lankpu kuɖeka ŋcinuwo nɛnɛ. ⁶ Xomɛvunu 'nunana vovovo yí mì a zán shigbe lehanci yí Mawu ná amɛɖeka ɖɛka afenu tɔ nɛnɛ. nɔ́ è nyí kpɔ́ bé amɛɖe xɔ mawu 'ŋɛdodo ɔ,lé doini nɔ́ á je kodo xṣe lɔ. ⁷ Nɔ́ é nyí kpɔ́ bé amɛɖe xɔ amɛnukpekpedo ɔ, le sɔ́ yiɖeki cu nɔ amɛnukpekpedo 'dɔ́ lɔ. Nɔ́ è nyí kpɔ́ bé enukplanmɛ 'nyɔ yí amɛɖe xɔ ɔ, lé sɔ́ yiɖeki cu nɔ enukplanmɛ 'dɔ lɔ. ⁸ Nɔ́ é nyí ŋsɛndodo lanmɛnɔamɛ yí amɛɖe xɔ ɔ, lé donɔ ŋsɛn lanmɛnɔamɛwo . Nɔ́ é nyí enunanamɛ yí amɛɖe xɔ ɔ, lé nanɔ enu amɛ kodo eji faa. Nɔ́ é nyí bé amɛkplɔkplɔ 'dɔ yí amɛɖe xɔ, lé kplɔnɔ amɛwo kodo ezosɔsɔ donu. Nɔ́ e nyí kpɔ́ bé ŋshishikuku nɔ́ amɛ yí amɛɖe xɔ ɔ, lé wɛɛni kodo jijɔ. ⁹ Mí lɔn míwo nɔnɔwo ayemɛ nuwawa manɔmɛ. Mí shi nɔ́ enuvɔnwawa yí a dó enunyuiwawa nu. ¹⁰ So nɔvilɔnlɔn nu ɔ, mí xɔ míwonɔnɔwo kodo ecufafa blebu. Míwo domɛtɔ ɖeka ɖeka lé doŋkɔ yí bunɔ amɛ kpɛtɛwo. ¹¹ Mí ŋgbe wo ɖyiɖɔ go. Vɔ ɔ, mí sɔ ezo do edɔ nu. Susumɛ le nɔ ezanŋté nɔ mí. Mí wa edɔ nɔ Mawu kodo ezo. ¹² Mí kpɔ nɔ jijɔ le emɔkpɔkpɔ mɛ. mí xɔnɔ jigbɔnɖɛ le efunkpekpe mɛ. Mí sɔ míwoɖekiwo cu nɔ gbedoɖa wawa nɔ mawu gashagamɛ. ¹³ Mí donɔ alɔ míwo kpena Klisotɔ ciwo yí a le eʒian ɖe mɛ. mí kpɔtɔ yí a xɔnɔ mɛdru nyuiɖɛ. ¹⁴ Mí cu eshi nɔ amɛ ciwo yí ciciɛ yumɛ nɔ mí. Mí cu eshi nɔ amɛ . Mí ŋgbe sɛn ekpɛn nɔ amɛ go. ¹⁵ Mí kpɔ jijɔ kodo amɛ ciwo yí le jiɔ kpɔgɔ yí a fán avin kodo amɛ ciwo yí le avin fángɔ. ¹⁶ Mí senɔ egbe nɔ míwonɔnɔwo. Mí ŋgbe nyi egoyitɔwo go, vɔ ɔ, enu hwɛhwɛwo le dronɔ mí. Mí ŋgbe kpɔnɔ bé yewo nyí ŋununyatɔwo ɖoɖu go. ¹⁷ Mí ŋgbe wanɔ evɔn do evɔn tɔxu go. Mí tekpɔ yí a wanɔ enyui le amɛshamɛ ŋmɛ. ¹⁸ Nɔ́ à sɛ́n eŋ jɔ dru ɔ, mí tekpɔ to alɔkpawo pleŋ jí shigbe ci ji mí a kpe nɛnɛ yí a nɔ fafamɛ kodo amɛshamɛ. ¹⁹ Nɔvi veviwo, mí ŋgbe wanɔ wadonu go. Mí tashi texwe ɖɛ́ nɔ́ Mawu dɔmɛzi a wa edɔ. Ɖó wo ŋwlii ɖɛ bé: «Mawu nú be: "Enyɛ yí ɖenɔ ehlɔn; enyɛ yí a cú enu ci yí amɛ ɖeka ɖeka wa wa 'fɛn nii."» ²⁰ É gbe nu hɛnnɛ be: «Nɔ́ shive ciciɛ ao ketɔ ɔ, ná enu yi nɔ́ a ɖu. Ɖó nɔ́ é wɛɛwɛ nɛnɛ han ɔ, akan 'zo yí è lɔlɔ do eta nii.» ²¹ Ŋgbé lɔn nɔ́ enuvɔnwawa a ɖu eo ji go. Vɔ ɔ, ɖu enuvɔnwawa ji to enunyuiwawa mɛ