¹ Eyi ŋ va biɔ se be: Ɖee Mawu gbe yi jukɔn Israyɛli yɔ a? Gbeɖe nɛnɛ yɔ́ nɛ go! Ɖo enyɛŋtɔ ɔ, Israyɛlivi yí ŋ nyi Ablahamu jiji mɛvi yí so Bɛnʒamɛ 'kɔta mɛ. ² Mawu de gbe yi jukɔn. Jukɔn ci yí é doŋkɔ yí cán yiɖeki go. Mí de kpɔ enu ci yí wo ŋwlɛn do Mawu 'nyɔ wemawo mɛ so Eli nu ba? Eli dodoɔ ehwɛ nɔ Israyɛliviwo le Mawu gbɔ́ be: ³ « Mawu, Israyɛliviwo wu ao 'ŋɛdotɔwo yí gban ao vɔsakpewo. Enyɛ ɖekɛ yí vá kpɔtɔ yí wo gbe jijiɛ be yewo a wu ŋ.» ⁴ Vɔ le yí Mawu ɖoŋci nii dó ɔ? É ɖoŋci nii be «Ŋ na yí agbetɔ hlɛnhlɛn mɛ kotokum amadrɛ (7000) de vayi sɛn voju balu go.» ⁵ Nɛnɛ lɔ ké le egbɛ mɛ viɛ ɔ, amɛ kankin ɖewo kpɔtɔ li yi Mawu cán daɖɛ nɔ́ yiɖeki to xomɛvunu yitɔ nɛ. ⁶ Ci yí é nyi xomɛvunu yí éwa yí cán wo ɔ, d'é gbe nyi amɛ lɔwo 'nuwawawo yí é kpɔ yí sɔ wɛɛ go. Nɔ d'é nyi nɛnɛ yɔ́ nɛ go ɔ, a nyi xomɛvunu go. ⁷ Enyɔ lɔ gɔnmɛ ɖe? I gɔnmɛ yí nyí kpɔ be Israyɛli jukɔn de kpɔ́ enu ci jiɛ yí e le go. Amɛ ɖewo ciwo yí Mawu cán daɖɛ le xomɛvunu yitɔ mɛ ɖekɛwo yí kpɔ́ enu yí xɔ. Amɛ kpɛtɛ wowo ɔ, Mawu n'á yí wo tri eto. ⁸ Shigbe Lehanci yí wo ŋwlɛ ɖɛ do Mawu nyɔ we mawo mɛ vayi do nɛnɛ be: «Mawu ná yí wowo susuwo de gbe wawa edɔ go. É sɔ́ enu cɔn ŋkuviwo nɔ́ yí sɔ́ enu cu etowo nɔ wo kaka sɔdonɔ egbɛ yɛ.» ⁹ Davidi can nú hɛnnɛ be: «Agɔ ciwo yí wo ɖuɖuɔ le nyi fɛca alo eɖɔ nɛnɛ nɔ wo, lé nyi afɔklɛnnu ci yí wo a klɛn yí a jan anyi; nɛnɛ ɔ, wo a xɔ etodɔndɔn ci yí je! ¹⁰ Wowo ŋkuviwo lé dó vivici nɔ́ wo a mi enu kpɔkpɔ ná nɔ́ wo kpekpe efun tɛgbɛɛ kaka yí a ci alinji alinji» ¹¹ Eyí ŋ va biɔ se be: Ci yí Yuɖatɔ lɔwo klɛn afɔ ɖee, wo je anyi yí é nyi é vɔ yɔ a? Gbeɖe, nɛnɛ yɔ́ nɛ go! Vɔ ɔ, wowo 'gɔjeje lɔ dɔ́ be wo va sɔ́ hwlɛngan ná amɛmanyi yuɖatɔwo. ¹² Nɔ́ nɛnɛ ɔ, a dɔ yí yuɖatɔwo a tɔ́ eŋuhwanhan kodo jukɔn lɔwo. Nɔ́ é nyi kpɔ be yuɖatɔwo 'gɔjeje do dɔku nɔ xexe lɔ le gbɔngbɔnmɛ yi wowo gangan do dɔku axwe nɔ́ amɛmanyi yuɖatɔwo ɔ, á nyi kpɔ be nɔ́ yuɖatɔ lɔwo plɛŋ trɔ́ yí fɔnjeete ɔ, dɔku lɔ a gbe kpɛn haan. ¹³ Ŋ nuinuiɛ nɔ mí, míwo amɛmanyi yuɖatɔwo. nɔ́ ci yí ŋ nyi Mawu 'mɛdɔdɔ ci yí wo dɔ ɖaɖa amɛmanyi yuɖatɔwo gbɔ́ ŋci ɔ, ŋ kanfunɔ edɔ lɔ ci yí ŋ xɔ. ¹⁴ Nɔ́ á sɛn eŋ nyi nɛnɛ ɔ, ŋ jijiɛ be mìwotɔ yuɖatɔwo lé kpɔ́ ŋ yí á ɖo ŋhwan mɛ nɔ wo nɔ Mawu a tó mɛ yí a wlɛn eɖewo gan. ¹⁵ Nɔ́ ci yí wo te yuɖatɔwo dó akpa ná yí gblamɛ va nyɔ́ nɔ Mawu kodo xexe lɔ ɔ, lé yí á va nyi dó, nɔ́ Mawu gbe va trɔxɔ yuɖatɔ lɔwo ɔ? A le shigbe Amekukuwo yí wo fɔ́n dó agbe mɛ nɛnɛ. ¹⁶ Keŋ ɔ nɔ́ kpɔnnɔ lɔ 'taɖeɖe nyí Mawu tɔ ɔ, a nyi kpɔnnɔ kpɛtɛ lɔ pleŋ nyi yitɔ hɛnnɛ. Nɔ aci ɖe 'kewo nyi Mawu tɔ ɔ, alɔvi lɔwo cán nyí yitɔwo hɛnnɛ. ¹⁷ Israyɛli nyi olivuci han nɛnɛ yi wo dó. Alɔvi ɖekawo fɛ́n le aci lɔ nú. Wo vayi so Olivuci egbemɛtɔ bu 'lɔviwo yí vá sɔ́ cá dó aci lɔ nú míwo am€manyi yuɖatɔwo yí nyí alɔvi ciwo yí wo so yí sɔ cá dó acikpu lɔ nú. ¹⁸ Nɛnɛ ɔ, miasɛn eŋ ɖuɖu eshi 'gbe to olivu 'cinokpu mɛ Nɛnɛ ɖe, mí ŋgbe va gbaligbali acilɔvi ciwo yí wo so go. Lé mí a wɛɛ yí a gegezeɛ ɔ? Míwo yí hɛn acikpu lɔ do ete ba. Vɔ ɔ, acikpu lɔ yí hɛn mí do ete . ¹⁹ Á vá nú nɔ ŋ be: «Ɛɛ Mawu so alɔvi ɖewo soi nɔ wo a sɔ enyɛ ca dó wowo 'dumɛ» ²⁰ Nyɔnɔnui teŋ yɔ, Ɖe wo ɖe wo soi dó wowo jimaxɔse ŋci. Vɔ eo yɛ ɔ, Kliso lɔ jixsɔe ŋci yí wo ná texwe hɔn eo do. Ŋgbe sɔ gegeze go. Vɔ ɔ, Mawu 'nu le ɖyi vɔnvɔn nɔ́ eo. ²¹ Ɖó nɔ́ Mawu de xlá yuɖatɔ ciwo yí nyi alɔvi ciwo yí jɔ kodo aci lɔ ɖɛ goɔ kpɔ́ eoɖekiji nyuiɖe nɔ́ Ŋgbé va gbé eo can maxle dó hɛnnɛ go. ²² Sɔ́ɛ be Mawu nyí dɔmɛnyɔtɔ yí gbe dɔnnɔ eto nɔ́ amɛ. É nyi etodɔnnnɔamɛttɔ nɔ́ amɛ ciwo yí je anyi vɔ yí nyii dɔmɛnyɔtɔ eo amɛmanyi yuɖatɔ kaka sɔje hwecinu yí a kpɔtɔ yí a ɖoɖoɔ eŋu do yí dɔmɛnyɔnyɔ nú. Nɔ d'é nyi nɛnɛ goɔ, Mawu a ɖe eo can soi le acinɔkpu lɔ nú. ²³ Yuɖatɔ wowo ɔ, nɔ de ci Kliso lɔ jimaxɔse wowotɔ mɛ goɔ, Mawu a gbe trɔ́xɔ wo yí a cá wo dó wowow tɔxuwo. Ɖo ɔ, ŋsɛn le Mawu shi yí a gbe trɔcawo dó acinɔkpu lɔ nú ké. ²⁴ Nyao ɔ, Olivuci lɔvi yí eo amɛ manyi yuɖatɔ nyi egbɛmɛ yí Mawu so eo le ao tɔxu yí vá sɔ́ cá dó olivuci ci yí wo cu yí leleɛ ebu nɔ nú. Nɔ́ é le nɛnɛ á kpɔ́ be Mawu a gbe sɛn eŋ trɔ́ yuɖatɔwo ciwo yí nyí olivuci ci yí wo cu yí le ebu nɔ gbɛva wowow cinokpu lɔ nú bleŋ. ²⁵ Ɖo ɔ, nɔvinyɛwo, ŋ de ji be míwo a dán enyɔwlawla cɛ keŋ yí a va bubu be yewo nyi ŋnunyatɔwo ɖaɖu go. Enyɔ lɔ yí nyi kpɔ be Israyɛliviwo 'kpá ɖé tri eto nɛnɛ kaka a sɔnanɔ hwecinu yí amɛmanyi yuɖatɔwo pleŋ a xɔɛ ji se yí a kpɔ hwlɛngan. ²⁶ Nɛnɛ yi Mawu a vá hwlen Israyɛli jukɔn pleŋ gan do nɛ shigbe lehanci yí wo ŋwlii daɖɛ do nɛnɛ be: «Hwlɛngantɔ lɔ a só siyɔn jugan mɛ. A vá ɖe Ʒakɔbu jijimɛviwo 'nuvɔnwo so ekɔ nɔ wo. ²⁷ Ezo hɔn yí a nyi ezo ci yí na ɖu kodo wo hwecinu yí na ɖe wowo 'nuvɔnwo só ekɔ nɔ wo nɛ». ²⁸ Le Eŋɛnyui lɔ 'kpaxwe ɔ Mawu ketɔwo yí yuɖatɔwo nyi dó míwo, amɛmanyi yuɖatɔwo nyɔnyɔ ŋci. Vɔ le amɛcancan kpaxwe ɔ, amɛwo yí wo nyi yí Mawu gbe lɔn do wowo tɔgbiwo ŋci. ²⁹ Ɖo xomɛvunu 'nunanu ciwo yí Mawu na amɛ kodo yɔyɔ ci yí é yɔ amɛ nyi enu matrɔmatrɔwo. ³⁰ Sasa ɔ, míwo amɛmanyi yuɖatɔwo gbé etonu mase nɔ Mawu. Vɔ ci yí yuɖatɔwo vá gbé etonumase nii viɛ ɔ, é va ku ŋshishi nɔ́ míwo sɔ́ to wowo 'tonumase mɛ. ³¹ Nɛnɛke é nyí nɔ wowow hɛnnɛ nɛ. Egbɛ viɛ ɔ, wo gbe etinumase nɔ ŋshishikuku Mawu tɔ ci mɛ mí le cɛ a sɛ́n eŋ vá nɔ mí ŋci. Nɛnɛ ɔ, Mawu a vá kú ŋshishi nɔ wowo cán . ³² Ɖo mawu cu agbetɔwo pleŋ dó wowo 'tonumase mɛ. Gahɔnmɛ ɔ, á kpɔ emɔ yí a vá kú ŋshishi nɔ amɛshamɛ. ³³ Mawu dɔkunuwo gangan ge a! yi ŋununyanya kodo yí 'nunyanya cito ge a! Amɛeɖe a sɛ́n eŋ ke je yi kojososowo mɛ ba! Amɛɖe a sɛ́n eŋ mɔje yi totomɛwo mɛ ba! ³⁴ Nyao ɖee, «Mi yí nyá susu ci yí le Mawu shi ɔ? Mì yi nyi aɖaŋ ɖetɔ nii ɔ ? ³⁵ Mi yi ná enu Mawu doŋkɔ yí é nyi Mawu ɖó a cu efɛn nɔ eyɛ cán dó nú ɔ?» ³⁶ Eyɛ gbɔ yi enushanu sonɔ eyɛ ji yí enushanu li to yí yitɔ yi nyi enushanu. Kanfukanfu le nyi yitɔ sɔyi mavɔmavɔ! Xoaɖyi!