¹ Dɔla amatɔntɔ lɔ xú yi 'kpɛ. Eyi ŋ kpɔ yí wlecivi ɖeka juin so jiŋkushi yí je nyigban. Wo sɔ́ edu gangan citocito lɔ safli jó nii. ² Wlecivi lɔ hun edu gangan citocito lɔ yí azɔ gangan ɖeka tó le mɛ shigbe ekpu 'zo gangan ɖé 'zɔ nɛnɛ. Azɔ lɔ ci yí totoɔ so dotɔ mɛ na yí ewe kodo ayaxoxo do vivici. ³ Eklejewo tó le azɔ lɔ mɛ yí gban kpedo nyigban lɔ ji, wo ná ŋsɛn ɖeka wo yí ŋsɛn lɔ le shigbe klekliwo ŋsɛn nɛnɛ. ⁴ Wo nú nɔ́ wo bé wo ŋgbe wa enubaɖabaɖa ɖe kodo egbe ci wo yí le nyigban ji, acimawo kodo aciwo go. Vɔ ɔ, wo lé wa enubaɖabaɖa kodo agbetɔ ciwo yí de xɔ mawu jeshidoi dó ŋgonu go. ⁵ Wo de ɖe emɔ nɔ́ gbadajin lɔwo bé wo lé wu agbetɔwo go. Vɔ ɔ, wo a sɛ́n eŋ do agbeya nɔ wo kaka sɔnanɔ wleci amatɔn. Veve lɔ a le shigbe veve ci han yí wo senɔ nɔ klekli te amɛ nɛne. ⁶ Le ŋkeke hɔnwogbe ɔ, agbetɔwo a jijiɛ eku. Vɔ kpɔ́ wo d'a kpɔ́ eku go. Eku a shí yi azɔge nɔ́ wo. ⁷ Ekleja hɔn lɔwo nɔnɔmɛ le shigbe esɔ ciwo yí drado ɖɛ nɔ́ ahwawawa han nɛnɛ. Enuɖeka le eta nɔ wo shigbe shika 'fiɔkukuwo nɛnɛ yí wo ɖó ŋmɛ shigbe agbetɔ ŋmɛ nɛnɛ. ⁸ Wowo 'ɖawo le shigbe nyɔnuwo 'ɖawo nenɛ yí wowo 'ɖuwo le shigbe janŋtan ɖú nɛnɛ. ⁹ Wo dó enuɖekawo dó akɔnnu shigbe akɔncɔnnuga nɛnɛ. Wowo dodoɔ axwa shigbe lehanci yí ahwahun ciwo yí ecɔ sugbɔwo dɔnnɔ donɔ axwa dó nɛnɛ. ¹⁰ Wowo shikewo ɖó etewo shigbe klekliwotɔ nɛnɛ. shike lɔwo mɛ yí ŋsɛn le nɔ wo yí wo a sɛ́n eŋ wanɔ enu kodo agbetɔwo le wleci amatɔn gblamɛ. ¹¹ Ekleja lɔwo 'fiɔ yí nyí dɔla ci yí kpa ace do edu gangan citocito lɔ ji. Wo yɔɛni le eblegbe mă be «Abadɔnu». Glɛkitɔwo yɔɛni bé «Apoliyɔnu», ci gɔnmɛ yí nyi bé «Enugblétɔ». ¹² Jɔgbevɔin ŋkɔtɔ lɔ jɔ vayi vɔ. Amɛve buwo gbe gbɔgbɔ a jɔ a kplɔɛ do. ¹³ Ɖɔla amadɛntɔ lɔ xú yí 'kpɛn. Eyi ŋ se yí egbe ɖeka ɖyi so zogo amɛnɛ lɔwo ciwo yí le shika 'vɔsakpe ci yí le ŋkɔ nɔ Mawu gbɔ́. ¹⁴ Egbe lɔ nunuɔ nɔ dɔla amadɛntɔ lɔ ci yí hɛn ekpɛn lɔ dó alɔmɛ be: «Cu eka nɔ dɔla amɛnɛ ciwo yí wo blá ɖɛ̀ dó etɔsasa gangan, Eflati lɔ tú» ¹⁵ Nɛnɛ ɔ, wo cú eka nɔ dɔla amɛnɛ lɔwo. Wo dra dó daɖɛ dó egaxoxo, ŋkeke , wleci kodo exwe ci mɛ yí wo a wu nyigbanjitɔwo 'kpá mamadotɔn ɖeka soi le ji. ¹⁶ Wo yɔ́ nɛni ci yí yí sɔja esɔkutɔ lɔwo nyí agbetɔ linlɔn sanŋdive (200000000). ¹⁷ Nɛnɛke yí wo gbe dansi esɔ kodo esɔkutɔ lɔwo nɔ́ ŋ le ŋtegan mɛ do nɛ. Wo dó akɔncɔnnuga lɔwo bia xɛ́xɛ́xɛ́ shigbe zokan nɛnɛ yí gbe ɖo eblɔ shiŋmɛ shigbe ehovevi 'kpé safi nɛnɛ. Wo gbe ɖo kokloʒincu shiŋmɛ shigbe wemi nɛnɛ. Esɔ lɔwo 'tawo le shigbe janŋtan 'tawo nɛnɛ yí ezo kodo azɔ kodo wemí toto le aglan mɛ nɔ wo. ¹⁸ Ezo kodo azɔ kodo wemi ciwo yí totoɔ le aglan mɛ nɔ esɔ lɔwo yí nyí enujɔjɔbaɖa amɛtɔn lɔwo ciwo yí wu agbetɔwo 'kpá mamadotɔ. ¹⁹ Ɖó ɔ aglanmɛ kodo shikemɛ yí ŋsɛn le nɔ esɔ lɔwo. Nyɔnnɔnui ɔ wowo shikewo le shigbe edanwo nɛnɛ. Shike lɔwo ɖó etawo; wowo yi wo sɔ́ wanɔ enu kodo agbetɔwo. ²⁰ Amɛ ciwo yí kpɔtɔ yí enujɔjɔbaɖă amɛtɔn hɔn lɔwo de wu o gbe bé yewo d'a trɔgbe yewo 'nuvɔnwo ɖɛ́ go. Wo kpɔtɔ yí gbe dodoɔ ŋdo nɔ gbɔngbɔnvɔnwo kodo vojutogbovi ciwo yí d'a sɛ́n eŋ a kpɔ́ enu alo a se etonu alo yí a zɔn zɔnlin kpetii go ci ciwo yí wowoŋtɔwo sɔ́ shika, ehokɔ, egajun, ekpe kodo aci sɔ́ wa yí sɛnnɔ. ²¹ Amɛ lɔwo de mí amɛ wuwu go; wo kpɔtɔ le maɛiki kodo saka waa yí le efi fiɛ