¹ Le i godu ɔ ŋ kpɔ yí Mawu dɔla ŋsɛntɔnɔ bu ɖeka ɖyiɖyiɛ so jiŋkushimɛ . É sɔ jiŋkushimɛzɔ wa avɔ sɔ́ c cɔ́n yí anyiɖohwɛɖo trɔdo eta nii. Ŋmɛ klɛnklɛn ezo nii shigbe ewe nɛnɛ yí yi 'fɔwo nɔnɔmɛ le shigbe exɔdomɛci ciwo yí nyí ezo ɖeɖe nɛnɛ. ² Wema hwɛvi ɖeka ci yí le hunhun le alɔmɛ nii. É sɔ́ yi ɖushimɛ 'fɔ dado axu ji yí sɔ́ yi 'miɔmɛ 'fɔ ɖo nygban jí. ³ Eyi ŋ se yí Mawu dɔla lɔ do axwa shigbe lehanci yí jaŋtan gbonɔ dó nenɛ. Le i 'xwadodo lɔ godu ɔ, ejiɖegbe amadrɛ dó egbe yí sɔ́ xɔ egbe nii. ⁴ Ci yí ŋ sé ejiɖegbe lɔwo 'gbedodo ɔ, ŋ ji be na ŋwlɛ enyɔ ci yí wo nu ɖɛ́ . Vɔ ɔ, egbe ɖeka ɖyí so jiŋkushimɛ yí nú nɔ́ ŋ be: «ŋgbe ŋwlɛ enyɔ vi yí ejiɖegbe amadrɛ lɔwo nu go. Lè wo ɖɛ do enyɔwlawla jí. ⁵ Eyi ŋ kpɔ yi Mawu dɔla ci yí le ete le axu kodo nyigban jí kɔ́ yi ɖushi 'lɔ ɖaɖa jiŋkushimɛ. ⁶ É tá enu do Mawu ci yí li tɛgbɛɛ, yí wa jiŋkushi, nyigban, axu kodo enu ciwo pleŋ yí le wo mɛ, nyikɔ mɛ yí nú be: «Azan ɖe gbe li yí wo a ɖó nɔ́ enu lɔ jɔjɔ go! ⁷ Vɔ ɔ, gacimɛ yí Mawu dɔla amadrɛtɔ lɔ a vá xú yi 'kpɛn ɔ, hwlɛngan totomɛ wlawla ci yí Mawu ɖo a jɔ. Á jɔ shigbe lehanci yí é nui dó nɔ́ yí 'dɔwavi, Eŋɛdotɔwo le eŋɛnyui ci yí é do ɖɛ́ nɔ́ wo mɛ nɛnɛ.» ⁸ Eyi egbe ci yí ci yí ŋ se sasa vayi so jiŋkushimɛ gbe xo nuxu nɔ ŋ yí nú be: « sèyixɔ wema hwevi ci yí le hunhun ɖɛ le alɔmɛ nɔ Mawu dɔla ci yí le ete le axuu kodo nyigban jí lɔ.» ⁹ Ci yí ŋ yi Mawu dɔla lɔ gbɔ́ ɔ, ŋ nu nii be yí le sɔ wema hwɛvi lɔ jó nɔ́ n. Eyi é nu nɔ ŋ be : «cɔ́ɛ yí a ɖui: Á vé kpákpá le xodu mɛ nɔ eo vɔ yí a trɔ́ a vivi shigbe enyishi nɛnɛ le aglan mɛ nɔ eo. ¹⁰ Ŋ xɔ wema hwɛvi lɔ le alɔmɛ nɔ Mawu dɔla lɔ yi ɖui. É vivi le aglan mɛ nɔ ŋ nyao shigbe enyishi nɛnɛ, vɔ ci yí ŋ mi ɔ, é vé kpákpákpá le xodu mɛ nɔ ŋ. ¹¹ Eyi wo gbe nu nɔ ŋ be: «È ɖo yí a gbe xo nuxu shigbe Mawu 'ŋɛdotɔ nɛnɛ so jukɔn sugbɔ, ejuwo, egbewo kodo efiɔwo nú.»