¹ Hwecinu yi lɛngbɔvi lɔ sɔ wema lɔ yi fo enutrenu amadrɛtɔ lɔ le nu ɔ, eɖa ɖo le jiŋkushimɛ tototo kaka sɔnanɔ egaxoxo mamamɛ han. ² Eyi ŋ kpɔ dɔla amadrɛ ciwo yi nɔnɔ ete le ŋmɛ nɔ Mawu yi wo sɔ ekpɛn amadrɛ sɔ jojoɔ nɔ wo. ³ Dɔla bu ɖeka va je ete do avɔsakpe lɔ ji yi hɛn lifi 'gban ɖeka ci yi wo sɔ shika wa do alɔmɛ. Wo lɔ lifi sugbɔ nii nɔ a sɔ wo kodo xɔsetɔwo gbedodoɖaɖawo wo enunana do shika 'vɔsakpe lɔ ji le efiɔʒinkpin lɔ ŋkɔ. ⁴ Lifi 'zɔ lɔ tɔ eji kpekpe le alɔmɛ nɔ dɔla lɔ yi xɔsetɔwo 'gbedodoɖaɖawo can zɔn koɖii yi kpe Mawu gbɔ. ⁵ Le i godu ɔ, dɔla lɔ sɔ lifi 'gban lɔ yi ɖe zokan do mɛ le avɔsakpe lɔ ji kaka yi e ɖɔ keŋ yi sɔ danŋkpɛn ɖaɖa nyigban lɔ ji. Eyi eji do egbe gluɖuɖuɖu, eʒinwo ɖyi, jeŋkushi e ezo miamiamia yi nyigban hunhun. ⁶ Eyi dɔla amadrɛ ciwo yi hɛn ekpɛn amadrɛ lɔwo do alɔmɛ drado yi a tɔ wo xuxu. ⁷ Dɔla ŋkɔtɔ xu yi 'kpɛn. Eshike caka kodo ezo kodo ehun yi ja kɔdo nyigban lɔ ji. Eyi nyigban lɔ 'kpa mamadotɔn bi ezo, aciwo 'kpa mamadotɔn can bi ezo yi egbe mumuwo pleŋ can bi ezo. ⁸ Dɔla a mɛvetɔ lɔ xu yi 'kpɛn. Eyi wo sɔ enuɖeka ci yi le shigbe eto gangan ɖeka ci yi le ezo biɛ han nɛnɛ dɔ ɖaɖa axu me. Axu lɔ 'kpa mamadotɔn trɔ ehun. ⁹ Enuleagbe ciwo pleŋ yi nɔnɔ agbe le axu mɛ sasa 'kpa mamadotɔn ku yi etɔjihu gangan ciwo yi le axu lɔ ji 'kpa mamadotɔn trɔn. ¹⁰ Dɔla amɛtɔntɔ lɔ xu yi 'kpɛn. Wlecivi gangan ɖeka juin so jikushimɛ yi je nyigban; e jejeɛ ezo shigbe efuzo nɛnɛ. E je etɔwo 'kpa mamadotɔn kodo eshijɔxuwo ji . ¹¹ Wo yɔnɔ wlecivi lɔ nyikɔ be Abusɛnti. Nɛnɛ ɔ eshiwo 'kpa mamado tɔn trɔ enuwamɛ veve yi amɛ sugbɔ ku do eshi lɔwo ciwo yi trɔ enuwuamɛ veve han ŋci. ¹² Dɔla amɛnɛtɔ lɔ xu yi 'kpɛn. Wo xo ewe 'kpa mamadotɔn, wleci 'kpa mamadotɔn yi gbe xo wleciviwo 'kpa mamadotɔn kaka yi wowo 'kpaxwe hɔnwo ci vinvin mɛ. Ŋ keke klɛnklɛn 'kpa mamadotɔn ci vinvin mɛ yi ezan 'kpa mamadotɔn ci. vinvinmɛ ¹³ Ŋ kpɔ yi gbe se yi kuku ɖeka zozo ɔ to ejixomɛ. E le axwa doɔ sɛnŋsɛnŋɖe yi nunuɔ be : «Etavɔin! Etavɔin! Etavɔin ci yi nyi ecɛ nɔ nyigbanjitɔwo ɔ! Etavɔin ci yi nyi ecɛ nɔ wo hwecinu yi dɔla amɛtɔn kpɛtɛwo a va xu wowo 'kpɛnwo ɔ!»