¹ Le i gogu ɔ,ŋ kpɔ Mawu dɔla amɛnɛ yi wo le ete le nyigban zogo amɛnɛ lɔwo ji wo le nyigbanji jehɔn amɛnɛ lɔwo nɔ wo ŋgbexo le nyigban lɔ ji, axu ji alo aciwo mɛ go. ² Ŋ gbe kpɔ yí Mawu dɔla bu tó so ewezexu yí hɛn mawu agbeagbe lɔ jeshidu do alɔmɛ. É do axwa cicici yí yɔ́ Mawu dɔla amɛnɛ ciwo yí xɔ ŋsɛn yí a wa enubaɖabaɖa kodo nyigban kodo axu lɔ yi nú nɔ́ wo be: ³ «Mí ŋgbe wa enubaɖabaɖa kodo nyigban lɔ alo axu lɔ alo aci lɔwo hɔɖe go. Mi nɔ ete nɔ́ mì a sɔ̀ enutrenu tr̀ ŋgonu nɔ́ mìwo Mawu 'dɔwaviwo gbɔxwe». ⁴ Enyi wo yɔ́ amɛ nɛni ciwo yí wo sɔ enutrenu tre dó ŋgonu nɔ nɔ ŋ. Wo pleŋ nyi amɛ kotokun sanŋdiɖeka tanɛ cinɛ (144000) yí só Israyɛli 'kɔtawo pleŋ mɛ. ⁵ Amɛ kotokun wive (12000) so yuɖa 'kɔta mɛ yí xɔ anutrenu lɔ dó ŋgonu; kotokun wive (12000) so Hlubɛnu 'kɔta mɛ kotokunwive (12000) so gadi 'kɔta mɛ. ⁶ Kotokun wive (12000) so Asɛ kɔta mɛ, kotolun wive (12000) so Nɛfutali 'kɔta mɛ; kotokun wive (12000) so Manase 'kɔta mɛ. ⁷ Kotokun wive (12000) so Simɛyo 'kɔta mɛ, kotokun wive (12000) so Livi 'kɔta mɛ, kotokun wive (12000) so Isaka ' kɔta mɛ. ⁸ Kotokun wive (12000) so Zabulɔn kɔta mɛ, kotokun wive (12000) so Ʒozɛfu 'kɔta mɛ yí kotokun wive (12000) so bɛnʒamɛ 'kɔta mɛ yí xɔ enutrenu lɔ do ŋgonu. ⁹ Le i godu ɔ, ŋ gbe kpɔ yí qmɛwo lɔ ahwa gbigbií kaka yi amɛɖe d'a sɛn eŋ hlɛn wo kpɔ́ go. Amɛ lɔwo so xexemɛ 'juwo pleŋ mɛ akɔtawo pleŋ , 'jukɔwo pleŋ kodo egbewo pleŋ mɛ. Wo va nɔ ete do efiɔzinkpin lɔ kodo lɛngbɔvilɔ ŋkɔ yí le awu eɣi jiji gblɛlɛlɛwo mɛ keŋ hɛn ede 'zanwo do alɔmɛ. ¹⁰ wo le axwa doɔ cicici yí nunuɔgɔ be : «Hlɛngan lɔ só mìwo Mawu ci yí le efiɔʒinkpin lɔ ji kodo lɛngbɔ vilɔ gbɔ!» ¹¹ Mawu dɔlawo pleŋ trɔdo efiɔʒinkpin lɔ kodo mɛgan lɔwo kodo enuleagbe amɛnɛ lɔwo. Wo doŋdo le efiɔʒinkpi, lɔ ŋkɔ yí sɛn Mawu. ¹² Yi nunu be «xoaɖyi! Ɛɛ kanfukanfu, kɔkɔ, ŋununya nya akpe dodo , bubu ŋsɛn kodo hlɔnhlɔn yí nyí mìwo mawu tɔ sɔyi mavɔmavɔ! Xoaɖyi!» ¹³ Eyi mɛgan lɔwo domɛtɔ ɖeka biɔ́ ŋ se be: «Míwo yi nyí amɛ ciwo yí dó awu eɣi lɔwo ɔ? Fini yí wo só ɔ? ¹⁴ Ŋ doŋci nii be: Nyaŋ 'xwetɔ, eo yi nyá .» Eyí é nu nɔ ŋ be: «Amɛ cɛwo nyi amɛ ciwo yi se veve le vevesee gangan lɔ hwenu. Amɛ lɔwo nya wowo 'wuwo le lɛngbɔvilɔ 'hun mɛ kaka yí wo eɣe pépépé. ¹⁵ E yí ná taɖo yí wo le ete le Mawu 'fíɔʒinkpin lɔ ŋkɔ. Wo sɛnnɔ Mawu le yí gbedoaɖa tɔxu ezan kodo kede. Amɛ ci yí nɔ anyinɔnɔ do efiɔʒinkpin lɔ ji yí a jì texwe nɔ́ wo do yo nɔxu lɔ mɛ. ¹⁶ Shive d'a gbe ci wo gbeɖe go. Nyidɔn d'a gbe ɖu wo gbeɖe go yí zozu e can d'a gbe va wlɔ wo go. ¹⁷ Ɖó lɛngbɔvilɔ ci yí le efiɔʒinkpin lɔ dodomɛ a vá nyí wowo kplɔtɔ yí a vá kplɔwo yi agbeshi dotɔmɛ gbɔ́. Eyi Mawu a vá cucu ɖashiwo pleŋ le ŋkuviwo mɛ nɔ wo.»