¹ Le i godu ɔ, ŋ kpɔ yi lɛngbɔvilɔ fo enutrenu ŋkɔtɔ sii le enutrenu amadrɛ lɔwonu. Eyi ŋ se yi enuleagbe amɛnɛ lɔwo domɛtɔ ɖeka do axwa shigbe ejiɖegbe nɛnɛ yi nu be: «Va!» ² Eyi vɔ ŋ kpɔ esɔ eɣi ɖeka. Amɛ ci yi le esɔ lɔ ji hɛn anŋgu ɖeka do alɔmɛ. Wo sɔ efiɔkuku ɖeka jo nii. E ɖedo shigbe ejiɖutɔ nɛnɛ yi a gbe ɖu eji ke. ³ Ci yi lɛngbɔvi lɔ fo enutrenu amɛvetɔ lɔ soi ɔ, ŋ se yi enuleagbe maɛvetɔ lɔ nu hɛnnɛ be :«va elɛ!» ⁴ Eyi ŋ kpɔ yi esɔ ejun xɛxɛxɛ ɖeka to. wo na ŋsɛn amɛ ci yí le esɔ lɔ ji nɔ a ɖe fafa soi le nyigban lɔ ji nɔ amɛwo a wu wowonɔnɔwo. Wo na dekpui gangan ɖeka yi. ⁵ Ci yi lɛngbɔvi lɔ fo enutrenu amɛtɔntɔ lɔ soi ɔ, ŋ se yi enuleagbe amɛtɔntɔ lɔ nu be: «va!» Eyi ŋ kpɔ esɔ yi bɔ ciɖiciɖi ɖeka. Amɛ ci yi le esɔ lɔ ji hɛn egodanu ɖeka do alɔmɛ. ⁶ Ŋ se enuɖeka shigbe agbetɔ 'gbemɛ nɛnɛ le enuleagbe amɛnɛ lɔwo domɛ yi nunuɔ be: «Jinuku eliku kiloŋ ɖeka kplaŋ yi wo sɔ gajunho ci yi nyi gbeɖeka 'dɔho blebu lɔ sɔ xwle. jinuku ɔ ʒi kiloŋ amɛtɔn yi wo sɔ gbeɖeka 'dɔho blebu lɔ sɔ xwle. Vɔ ami kodo vɛn wowo ɔ, ŋgbe tɔ alɔ wo go. ⁷ Ci yí lɛngbɔvi lɔ fo enutrenu amɛnɛtɔ lɔ soi ɔ, ŋ se yi enuleagbe amɛnɛtɔ lɔ nu be: «va!» ⁸ Eyi ŋ kpɔ esɔ makpafan ɖeka . Amɛ ci yi le esɔ lɔ ji nyikɔ nyi «Eku» yi ekuwodi kplɔɛdo. Wo na ŋsɛn wo be wo le wu agbetɔ ciwo yi le nyigban lɔ ji 'kpa mamadomɛ, sɔ to dekpui, ejutotoi, edɔxɔleamɛnuwo kodo elanwadanwo ji. ⁹ Ci yi Lɛngbɔvi lɔ fo enutrenu amatɔtɔ lɔ sii ɔ, ŋ kpɔ amɛ ciwo yi wo wu do Mawu 'nyɔ lɔ kodo kunu ci yi wo ɖe so nu ŋci sewo le avɔsakpe lɔ gɔnmɛ. ¹⁰ Wo do axwa sɛnsin le yi nu be: «Mawu kɔkɔɛ, Mawu adodui, kaka je gbin yi a nɔ ete sɛn yi a va ɖo kojo kodo amɛ ciwo yi wu mi le nyigban lɔ ji yí agbe ɖe ehlɔn nɔ mi ɔ?» ¹¹ Eyi wo sɔ awu eɣi jinjin gblɛlɛlɛ ɖeka na wowo domɛtɔ ɖeka ɖekayi nu nɔ wo be wo le gbe nɔ ete yi a gbe gbɔgbɔ domɛ hwɛɖeka kaka a sɔ je hwecinu yi amɛ ciwo yi bɔ wa edɔ nɔ Mawu kodo wo ' fɔn a sɔ egbe. Wo ɖo yi a gbenɔnɔ ete kpɔ wowo nɔvi ciwo yi amɛwo a gbe wu hɛnnɛ shigbe wowo nɛnɛ gbɔwe. ¹² Ci yi lɛngbɔvi lɔ fo enutrenu amadɛntɔ lɔ sii ɔ, ŋ kpɔ nyigban hunhun ginnyaginnya. Ewe va yibɔ shigbe avɔ yibɔ ci yí wo sɔ wanɔ lucu nɛnɛ yi wleci ŋmɛ plɛŋ va bia hun shigbe ehun nɛnɛ. ¹³ Wleciviwo juin soso jiŋkushimɛ do nyigban ji shigbe lehanci yi figici kusɛnsɛnwo juinni so aci ji do nɔ aya gangan xo nɛnɛ. ¹⁴ Jiŋkushi ŋwla sii shigbe lehanci yi wo ŋwlanɔ wema sii do nɛnɛ. Wo hun ekowo pleŋ kodo etɔdomɛjuwo sii le wowo tɔxuwo. ¹⁵ Nyigban ji 'fiɔwo, sɛnsɛnŋkɔnɔtɔwo, sɔjawo 'gawo, dɔkunɔwo,ŋsɛntɔnɔwo, kodo amɛ kpɛtɛwo plɛŋ, hwashiwo can amɛmanyi hwashiwo can wo pleŋ shi yí bedo ekpegbaja 'duwo mɛ kodo ekpewo 'kan mɛ. ¹⁶ Wo nu nɔ ekpowo kodo ekpegbaja 'duwo be: «Mi nu je mi ji yi a wla mi do amɛ ci yi nɔ anyinɔnɔ do efiɔɛinkpin lɔ ji yi a gbe wla mi do dɔmɛzi ci yi le lɛngbɔvi lɔ ji. ¹⁷ Ɖo ŋkeke gangan ci ji yi amɛ ci yi nɔ anynɔnɔ do efiɔʒinkpin ji kodo lɛngbɔvi dɔmɛzi a gban enu do va do. Mi yi a sɛn eŋ nɔ ete le ŋmɛ nɔ wo ɔ?»