¹ Eyi ŋ kpɔ wema mlimli ɖeka le ɖushimɛ nɔ amɛ ci yí le nyinɔnɔ le efiɔʒinkpin lɔ jí. Wo ŋwlɛ enu do xomɛ kodo kpota nɔ wema lɔ yí sɔ enutrenu amadrɛ sɔ tri. ² Ŋ gbe kpɔ Mawu dɔla ŋsɛntɔnɔ ɖeka ci yí dodoɔ axwa sɛnŋsɛnŋɖe yí nunuɔ be: «Mi yí je yi a ɖe enutrenu lɔwo sii yí a hun wema lɔ ?» ³ Vɔ ɔ, wo de kpɔ amɛɖe le jiŋkushi mɛ alo nyigban ji alo nyigban gɔnmɛ ci yí je a hun wema alo yi a kpɔ́ mɛ go. ⁴ Ŋ fan avin sugbɔ ɖó wo de kpɔ amɛ ci yí a hun wema lɔ alo a kpɔ́ mɛ go. ⁵ Vɔ ɔ, mɛgan lɔwo domɛtɔ ɖeka nu nɔ ŋ be: «Ŋgbè fan avin go. Kpɔ́ a: janŋtan ci yí so Yuɖa 'kɔta mɛ , efiɔ Davidi jijimɛvi lɔ ɖu eji. Nɛnɛ ɔ, á sɛ́n eŋ ɖe enutrenu amadrɛ lɔwo sii yí a hun wema lɔ.» ⁶ Eyi ŋ kpɔ lɛngbɔvi yí é le ete le efiɔʒinkpin lɔ dodomɛ yí enuleagba amɛnɛ lɔwo kodo mɛgan lɔwo trɔdii. E le shigbe wo wu lɛngbɔvi lɔ han nɛnɛ. É mi azo amadrɛ do eta yí gbe ɖo ŋkuvi amadrɛ. Ŋkuvi amadrɛ hɔn lɔwo nyi Mawi gbɔngbɔn amadrɛ ciwo yí Mawu dɔ́ ɖaɖa nyigban lɔ ji pleŋ. ⁷ Lɛngbɔvi lɔ teyi ŋkɔ yi xɔ wema lɔ le ɖushimɛ nɔ amɛ ci yí le nyinɔnɔ le efiɔʒinkpin lɔ jí. ⁸ Trololo ci yí lɛngbɔvi lɔ xɔ wema lɔ ɔ, enuleagbe amɛnɛ lɔwo kodo mɛgan wivɔnnɛ lɔwo doŋdo nii. Wowo domɛtɔ ɖeka hɛn ekahun kodo shika kɔkpu ciwo yi ɖɔ́ kodo lifi. Anŋsan lɔ yí nyi egbedoɖa ci yí xɔsetɔwo wanɔ ɖaɖa Mawu . ⁹ Wo le eha yoyu ɖeka jiɛ yí nunuɔ be: « Eo yí je a xɔ wema lɔ yí a ɖe enutrenu lɔwo sii. Ɖo ɔ, wo wu eo yí sɔto ao vɔsɔ mɛ ɔ, é xwle amɛwo nɔ Mawu le akɔtawo pleŋ mɛ, le egbedodowo pleŋ mɛ, le jukɔnwo pleŋ mɛ́. ¹⁰ É gbe sɔwo wa efiɔɖuxu 'mɛwo avɔsatɔwo nɔ mawu; eyi amɛ lɔwo a ɖu efiɔ do nyigban ji. ¹¹ Enu lɔwo kpɔɔ yi ŋ le yí se mawu dɔla sugbɔ ɖeka 'gbe. Wo su egbɔ kaka yí do mahlɛn kotokun amɛwo nɛniɖe donu nɛniɖe yí trɔdo efiɔʒinkpin lɔ kodo enuleagbe lɔwo kodo mɛgan lɔwo. ¹² Wo le axwa doɔ yi le eha jiɛ yí nunuɔ be: «Lɛngbɔvi ci yí wo wu je yí a xɔ ŋsɛn, dɔku, ŋununyanya, hlɔnhɔn bubu, kɔkɔ kodo kanfukanfu!» ¹³ Eyi ŋsɛn mawu 'nuɖodo ciwo pleŋ yí le jiŋkushi mɛ, le nyigban jí, le nyigban gɔnmɛ kodo le axu mɛ le eha jiɛ hennɛ yí nunuɔ be: «Amɛ ci yí nɔ anyinɔnɔ do efiɔʒinkpin lɔ jí kodo Lɛngbɔvi lɔ tɔ yí nyi shicu, bubu kɔkɔ kodo acɛkpakpa sɔyi mavɔmavɔ!» ¹⁴ Eyi enuleagbe amɛnɛ lɔwo ɖoŋci be: «Xoaɖyi!» Nɛnɛ ɔ, mɛgan lɔwo je kloji yí doŋdo nɔ amɛ ci yi le efiɔʒinkpin lɔ jí kodo nɔ́ lɛngbɔvi lɔ.»