¹ Le i godu ɔ, ŋ kpɔ enu ɖeka ŋtegantɔ: ŋ kpɔ yí ehɔ̀n ɖeka le hunhun ɖɛ le jiŋkushimɛ. Eyi amɛ ci yi xo nuxu kodo ŋ vayi yí yi 'gbemɛ ɖyiɖyiɛ shigbe ekpɛn nɛnɛ gbe nu nɔ́ n be: «Là eji yí a vá elɛ nɔ ma dansin enu ci yi a vá jɔ le ecɛ godu lɔ nɔ eo.» ² Trololo ɔ,Gbɔngbɔn lɔ vá ŋ ji kpataa. Eyi ŋ kpɔ yi amɛɖeka le efiɔ ʒinkpin ɖeka jí le jiŋkushimɛ. ³ Amɛ lɔ nɔnɔmɛ dada ezo shigbe ehovevi 'kpe ciwo yí wo yɔnɔ be Ʒasipu kodo saduwanu nɛnɛ. Anyiɖohɛɖo ɖeka trɔdo efiɔ ʒinkpin lɔ godoglo yi le ezo daa shigbe ehovevi 'kpe emɛlodi nɛnɛ. ⁴ Efiɔʒinkpin wivɔnnɛ bu trɔdo efiɔʒinkpin hɔn lɔ . Mɛgan wivɔnnɛ ɖekawo nɔ anyinɔnɔ do efiɔʒinkpin hɔn lɔwo ji. Wo enu eɣiwo yí gbe cɔn efiɔkuku ciwo yí wo sɔ́ shika sɔ́ wa. ⁵ Eji ɖe ezo le efiɔʒinkpin lɔ jí miamiamia, axwa ɖyi yi eji ɖe egbe. Kaligban amadrɛ ciwo yi nyi Mawu gbɔngbɔn amadrɛ lɔwo jeje€ le efiɔʒinkpin lɔ ŋkɔ. ⁶ Enuɖeka le ŋkɔ nɔ efiɔʒinkpin lɔ shigbe cukpankɔ 'xushi ci mɛ yí wo kpɔkpɔ enu to nɛne. Enu lɔ nɔnɔmɛ le shigbe ehovevi 'kpe ci yí wo yɔnɔ be klishitali nɛnɛ. Enuleagbe amɛnɛ ɖekawo ciwo nú yí ŋkuviwo le ŋkɔ kodo godu nɔ́ le efiɔʒinkpin lɔ dodomɛ yí gbe trɔdii. Enuleagbe lɔwo ɖo ŋkuvi sugbɔ le ŋkɔ kodo godu. ⁷ Enuleagbe ŋkutɔ lɔ nɔnɔmɛ ɖyi janŋtan, amɛvetɔ lɔ nɔnɔmɛ ɖyi xwenyisuvi, amɛtɔntɔ lɔ ɖó ŋmɛ shigbe agbetɔ ŋmɛ yí amɛnɛtɔ lɔ le shigbe haku ci yí zoʒo nɛnɛ. ⁸ Enuleagbe amɛnɛ lɔwo domɛtɔ ɖekaɖeka ɖo awa amadɛn. Ŋkuvi sugbɔ le awawo nú nɔ́ wo le agogbe kodo xomɛ. Wo jinɔ eha ezan kodo kede madrɔmadrɔ yí nunuɔ be: «Kɔkɔɛ , kɔkɔɛ yí nyi Axwetɔ Mawu ŋsɛnwopleŋtɔ, ci yí le sasa , yi li viɛ yi a gbe li le esɔmɛ.» ⁹ Eyi gaɖekpokpoi mɛ ci yí enuleagbe amɛnɛ hɔn lɔwo jinɔ eha yí kannɔfu Mawu, donɔ bubu yi nu yi gbe donɔ akpe nɔ eyɛ, amɛ ci yí nɔ anyinɔnɔ do efiɔʒinkpin lɔ jí yi gbe le agbe sɔyio tɛgbɛɛ ɔ, ¹⁰ Mɛgan wivɔnnɛ lɔwo jenɔ ekloji dó akɔnmɛ nɔ amɛ ci yi nɔ anyinɔnɔ do efiɔʒinkpin lɔ jí . Wo donɔ ŋdo ŋdo nɔ amɛ ci yí le agbe sɔyi tɛgbɛɛ keŋ yí ɖenɔ wowo 'fiɔkukuwo yí sɔ donɔ ɖaɖa efiɔʒinkpin lɔ ŋkɔ yí nunuɔ be: ¹¹ «Axwetɔ mìwo Mawu, eo yí je yí a xɔ kanfukanfu, bubu kodo ŋsɛn. Ɖó eo yí wa enuwo pleŋ . Ao 'dró mɛ yí enuwo pleŋ li le yí enuwo pleŋ nyíwawa.»