¹ Eyi ŋ kpɔ jiŋkushi yoyu ɖeka kodo nyigban yoyu ɖeka kodo. Ɖo jiŋkushi yoyu ŋkɔtɔ kodo nyigban ŋkɔtɔ bu gbijigbiji yí axu de gbe li go. ² Ŋ gbe kpɔ yí jugan kɔkɔɛ lɔ ci yí nyi Ʒeluzalɛmu yoyu lɔ ɖyiɖyiɛ so jiŋkushi le Mawu gbɔ yí é le egbesɔsɔ shigbe nyɔnu yoyu ci yí drado ɖɛ yí wa acɔ nɔ́ asuɔ nɛnɛ. ³ Ŋ si yí egbe ɖeka ɖyi sɛnŋsɛnŋɖe so efiɔʒinkpin lɔ gbɔ yi nunuɔ be «I nɛ! Mawu nɔxu lɔ ɖyi va agbetɔwo domɛ! Á va nɔ kodo wo, wo a nyi jukɔnwo yí yiŋtɔ ci yi nyi Mawu li kodo wo, a nyi wowo Mawu. ⁴ Á cucu ɖashi ɖekpokpoi le ŋkuviwo mɛ nɔ wo. Eku d'a gbe li go. Ecɔmɛnɔnɔ, axwadodo, vevesese dá gbe li go. ⁵ Eyi amɛ ci yí le anyinɔnɔ le efiɔʒinkpin lɔ ji nu be «Ecɛyɛ ɖe ŋ enuwo pleŋ trɔtɔ enu yoyu.» Le i godu ɔ, é gbe nu nɔ ŋ be: «ŋwlɛ̀ enyɔ cɛ ɖaɖɛ. Ɖo ɔ, enyɔ cɛwo nyi enyɔ ciwo yi le dandanmɛ yí gbe nyi nyɔnɔnui» ⁶ Eyí é gbe nu nɔ ŋ be «Eviɛɖe, enyɔ lɔ vɔ! Enyɛ yí Alufa kodo Omega, Gɔnmɛjeje kodo enuwuwu na ná eshi ci yí agbejɔxu 'shi amɛ ci yí shikɔ ciciɛ nɔ́ á nu gbaŋjo. ⁷ Ehɔn yí a nyi akpamama ci yí amɛ ci yí a ɖu eji a xɔ le ŋ gbɔ nɛ. Na nyi yí Mawu yí yɛ a nyi evinyɛ. ⁸ Vɔ ɔ, vɔnvɔntɔnɔwo, egbejimanɔtɔwo, enu wakufiɛwatɔwo, amɛwutɔwo, sakabowo, azetɔnɔwo vojusɛntɔwo kodo ŋsukantɔwo pleŋ tɔxu yí nyi etan ci mɛ yí wemi bibiɛ ezo le lɔ. Éhɔn yí a nyi eku zvetɔ lɔ nɛ.» ⁹ Le i godu ɔ, Mawu dɔla amadrɛ ciwo yí hɛn enujɔjɔbaɖa kɔkpu ɖɔɖɔ amadrɛ vɔvɔnutɔ lɔwo dó alɔmɛ domɛtɔ ɖeka nú nɔ́ ŋ be: «Va nɔ́ ma dansin cugbejɛ ci yí lɛngbɔvi lɔ cán yí a ɖe nɔ eo.» ¹⁰ Mawu dɔla lɔ kɔ́n le Gbɔngbɔnmɛ yí hɛn ŋ yí eto gangan ɖeka tamɛ keŋ yí dansin Ʒeluzalɛmu jugan kɔkɔɛ lɔ ci yi ɖyiɖyiɛ so jiŋkushi le Mawu gbɔ́ nɔ́ ŋ ¹¹ Mawu Klɛnklɛn gangan lɔ na yí é le ezo dagɔ. Yi 'zodada lɔ ci shigbe ekpe ehovevitɔ ci yí wo yɔnɔ be Ʒasipu nɛnɛ yí gbe kɔkɔ ega ŋlɛŋlɛŋlɛ shigbe cugbankɔ nɛnɛ. ¹² Gbogbu gangan ɖeka trɔ doi. Gbogbu lɔ ɖo agbo wive yí Mawu dɔla wive gbe le agbo lɔwo ji. ¹³ Agbo amɛtɔn le ewezexu nɔ́ gbogbu lɔ, amɛtɔn le tagbe nii, amɛtɔn le fɔde nii yí amɛtɔn le eweɖoxɔxu. ¹⁴ Wo sɔ gbogbu do gangan lɔ ɖo anyinɔnɔ do gɔnmɛɖokpe gangan wive ji. wo ŋwlɛ. Lɛngbɔvilɔ 'mɛdɔdɔ wive lɔwo nyikɔwo do gɔnɖomɛɖokpe lɔwo ji. ¹⁵ Mawu dɔla ci yí xoxo nuxu nɔ ŋ hɛn enudrekaci ɖeka , shigbe wo sɔ́ mɛ klogbuci han yí sɔ́ enudrekaci keŋ nɔ́ a sɔ dré jugan lɔ, yí 'gbowo kodo yí gbogbu gangan lɔ kpɔ́. ¹⁶ Jugan lɔ ɖo akpaxwe amɛnɛ ciwo yí bɔ sɔ. Yi jijijimɛ kodo yi kekekemɛ nyi enuɖekɛ. Mawu dɔla lɔ dre jugan lɔ kpɔ kodo yí 'nudrekaci klogbu ci lɔ: jijijimɛ lɔ nyi enudrekaci sanŋdieka donu kotokun wive (12000) jijijimɛ lɔ cán ejiyiyimɛ lɔ cán kodo kekeke mɛ lɔ nyi enuɖekɛ. ¹⁷ É dre gbogbu gangan lɔ can kpɔ́ yí yi jiyiyi mɛ nyi abɔgba sanŋdieka tanɛ cinɛ shigbe enudrekaci ci yí Mawu dɔla lɔ sɔ́ dredreɛ enu kpɔ́ hwehɔnnu nɛnɛ. ¹⁸ Ehovevitɔ 'kpe ci yí wo yɔnɔ be Ʒasipu yí wo sɔ cu gbogbu gangan lɔ, shika akuaku yí wo sɔ́ cu jugan lɔ ŋtɔ yí é dada ezo ŋlɛ̀ŋlɛ̀ŋléɛ shigbe cugban nɛnɛ. ¹⁹ Wo sɔ ehovevi 'kpe hamɛhamɛ sɔ dó acan nɔ jugan lɔ gbogbu lɔ 'nyiɖuwo: wo sɔ́ ekpe ci yí wo yɔnɔ be ʒasipu sɔ wa anyiɖu ŋkɔtɔ yí sɔ Safiwa amɛvetɔ lɔ wo sɔ́ agati wa amɛtɔntɔ lɔ yí sɔ́ emɛlodi wa amɛnɛtɔ lɔ. ²⁰ Wo sɔ́ Onisi wa amatɔntɔ lɔ yí sɔ́ Saduwanu wa amadrɛtɔ lɔ . Wo sɔ́ klizoliti wa amadrɛtɔ lɔ yí sɔ belilu wa amɛnyitɔ lɔ. Wo sɔ́ topazi wa amashiɖekɛtɔ lɔ. yí sɔ klizoplaei wa amɛwotɔ lɔ. Wo sɔ yasɛnŋti wa wiɖekatɔ yí sɔ́ amɛtishi wa wivetɔ lɔ. ²¹ Agbo wive lɔwo nyi jenu wive. Wo sɔ́ ekɔjenu kuɖeka. Ŋmɛ wa agbɔ ɖeka ɖeka shika akuaku yí sɔ wa jugan lɔ 'godoxu yí é klɛnklen shigbe cugbankɔ ci mɛ yí wo kpɔkpɔ enu to nɛ. ²² Ŋ de kpɔ gbedoaɖa tɔxu ɖéle jugan hɔn lɔ mɛ go. Ɖo ɔ, yehawo Mawu ŋsɛnwopleŋtɔ kodo lɛngbɔvi lɔ yí yí nyí gbedoaɖatɔxu nɔ jugan lɔ. ²³ Jugan lɔ de hian ewe alo wleci gbɔxwe yí i mɛ a kɔ go. Ɖo ɔ, Mawu klɛnklɛn gangan lɔ kɔkɔ yí lɛngbɔvilɔ yí nyi kadigban ci yí le jugan lɔ mɛ. ²⁴ Jukɔnwo a zɔn zɔnlin le yi klɛnklɛn lɔ mɛ yi nyigbanji 'fiɔwo a hen wowo dɔkunuwo vá jugan lɔ mɛ. ²⁵ Jugan lɔ 'gbowo dá nɔ cucu le kede mɛ gbeɖe go. Hɛnnɛ can ɔ, kpɔ́ ezandodo 'nyɔ ɖe dá gbe va le hɔn go. ²⁶ Wo a hɛnnɔ jukɔnwo pleŋ dɔkunuwo kodo wowo bubu 'nu gangan va jugan lɔ mɛ. ²⁷ Enu xoɖyixoɖyi ɖekpokpoi d'a ɖó jugan lɔ mɛ gbeɖe go yi enuwakufiɛwatɔ ɖe alo ŋsukantɔ ɖe dá ɖo mɛ go. Vɔ ɔ, amɛ ciwo nyikɔwo yí wo ŋwlɛ do agbe wema ci yi nyi lɛngbɔvi lɔ 'gbe tɔ mɛ ɖekɛwo yí a ɖo mɛ.