¹ Amɛ lɔ gbe nu nɔ́ ŋ be: «Ŋwlɛ enyɔ cɛwoɖaɖa mawu 'ha ci yí le Efɛzi jugan mɛ ji be: Enyɔ ci yí amɛ ci yí wlecivi ama drɛ le ɖushimɛ nɔ yí é gbe le zɔnlinzɔn lz shika kaɖigbanhɛnne amadrɛ lɔwo dodomɛ nunuɔ ke: ² Ŋ jeshi ao 'dɔwawawo ao 'dɔ́ kodo ao vevidonu . Ŋ nya nyuiɖe be d'è lɔn enu nɔ́ xomɛvetɔwo eɖeeɖe go. È wa dodokpɔ nɔ́ amɛ ciwo yí nunɔ be yewo nyi Mawu 'mɛdɔdɔwo vɔ yí wo de nyí amɛdɔdɔwo go. yí kpɔ́ be ŋsukantɔwo yí wo nyi. ³ È do vevi enu, è ɖu aya do nyaŋ nyikɔ ŋci gankegan kpɔ enu de ci ekɔ nɔ eo go. ⁴ Vɔ ɔ, enyɔ cɛ le ŋ shi do eo nu. ényi kpɔ be de gbe lɔnlɔn ŋ shigbe lehanci yí yí è lɔn ŋ dole gɔnmɛjeje mɛ do nɛnɛ go. ⁵ Ɖó eŋui fini ci yí é je anyi do kpɔ́. trɔ eoɖeki a ji blebu yi a gbe trɔ yí a tɔ enu ciwo yí è wanɔ le gɔnmɛjeje lɔ mɛ wawa. Nɔ de nyi nɛnɛ go ɔ, na va eo gbɔ yí a vá ɖe ao kaɖigbanhennu lɔ só le yi tɔxu. ⁶ Gankegan è wanɔ enu cɛ yɛ yí yɛ nyɔ nɔ́ eo. Dé lɔnnɔ enu nɔ́ Nikola 'gbɛvi wo 'dɔwawawo eɖeede go shigbe enyɛŋtɔ nɛnɛ. ⁷ Nɔ́ eto li nɔ amɛɖe ɔ, lé se enyɔ ci yí gbɔngbɔn kɔkɔɛ nunuɔ nɔ Mawu 'ha lɔwo! Amɛ ci yí a ɖu eji ɔ, na va nii agbeci ci yí le Mawu vovonyigban lɔ ji yí a ɖu» ⁸ Amɛ lɔ gbe nu nɔ ŋ be: «Ŋwlɛ̀ enyɔ cɛwo ɖaɖa Mawu dɔla ci yí kpɔkpɔ mawu 'ha ci yí le Simini jugan mɛ ji be: Enyɔ ci yí amɛ ci yí nyi ŋkɔtɔ yí gbe nyi vɔvɔtɔ, ci yí ku yí gbe trɔ fɔ́n do agbe mɛ nunuɔ ke: ⁹ Ŋ jeshi ao vevesese kodo ao wamɛnɔnyinyi. Vɔ le mɛ ɔ, dɔkunɔ yí è nyi. Ŋ eshivɔn ciwo amɛ ciwo yí yí nunɔ be yewo nyi yuɖatɔwo, vɔ kpɔ́ wo de nyi yuɖatɔ go lekɔ nɔ eo. Legba bɔbɔmɛtɔwo yí wo nyi. ¹⁰ Ŋgbè vɔn nɔ aya ci yí a va ɖu go. Ɖo eto yí a se: Legba a vá do míwo domɛtɔ ɖewo kpɔ yí a le amɛ ɖewo do gakpamɛ. Mí a vá se veve sɔnanɔ ŋkeke amɛwo. Nɔ́ egbeji nɔ́ ŋ kaka sɔyí ekumɛ. Nɛnɛ ɔ, na vá sɔ agbemavɔ 'fiɔkuku ná eo. ¹¹ Nɔ́ eto li nɔ amɛɖe ɔ, lé se enyɔ ci yí gbɔngbɔn kɔkɔɛ nunuɔ nɔ Mawu 'ha lɔwo! Amɛ ciwo yí ɖu eji d'a gbe va vɔnnɔ nɔ́ eku zevztɔ lɔ go. » ¹² Amɛ lɔ gbe nu nɔ ŋ be: «Ŋwlɛ̀ enyɔ cɛwo ɖaɖa Mawu dɔla ci yí kpɔnɔ Mawu 'ha ci yí le Pɛligamu jugan mɛ ji be "Enyɔ ci nunuɔ yí amɛ ci shi dekpui enuvenɔ ɖaɖa ɖeka le ge: ¹³ Ŋ jeshi fini ci yí è nɔnɔ. Ehɔn yí Legba ɖó yi 'fiɔɖuxu dó nɛ. È kpɔtɔ ca kodo nyaŋ nyikɔ yí d'è gbé enu so xɔse lɔ gbɔ go. kaka hwecinu yí wo wu Antipasi, nyaŋ kunuɖetɔ egbejinɔtɔ le míwo 'xwé fini ci yí Legba nɔnɔ can, è le do ŋ nu. ¹⁴ Vɔ ɔ, enyɔ ɖekawo le ŋ shi dó nu: amɛɖɛkawo le ao 'xwé mɛ yí kplɔkplɔ Balamu 'nukplanmɛnyɔwo dó. Balamu hɔn lɔ nu nɔ́ Balaki be lé dɔn Israyɛliviwo dó enuvɔn mɛ. É ble wo be wo le ɖu elan ciwo yí wo wu nɔ vojuwo yí a gbe tɔ heteliwo wawa hɛnnɛ. ¹⁵ Nɛnɛke ɔ, amɛɖekawo gbe le ao xwé mɛ hɛnnɛ yí kplɔkplɔ Nikola 'gbɛviwo nukplanmɛnyɔwo dó. ¹⁶ Eyi ná taɖoɔ trɔ́ eoɖeko a ji blebu, nɔ de nyi nɛnɛ ɔ, na va eo gbɔ le majijiɖe mɛ viɛ mɛ yí a vá wa ahwa kodo nɛnɛ 'mɛwo kodo dekpui ci totoɔ le nyaŋ glamɛ . ¹⁷ Nɔ eto li nɔ amɛɖe ɔ, lé se enyɔ ci yí Gbɔngbɔn kɔkɔɛ nunuɔ nɔ Mawu 'ha lɔwo! Amɛ ci yí a ɖu eji ɔ na vá ná mana wawa lɔ yi y'a gbe na kpekui eɣi ɖeka yi. Wo ŋwlɛ nyikɔ yoyu ɖeka ci yí amɛɖe de jeshi ɖɛ go do kpekui lɔ ji. Amɛ ci yí xɔɛ ɖekɛ yí jesi ɖɛ» ¹⁸ Amɛ lɔ gbe nu nɔ ŋ be: «Ŋwlɛ enyɔ cɛwo ɖaɖa Mawu dɔla ci yí kpɔnɔ 'ha ci yí le Tiyati jugan mɛ ji be: Enyɔ ciwo yí Mawu Eviɛ nu ge; yi ŋkuviwo dada ezo shigbe ezo ci yí xɔ akan nɛnɛ yí yi 'fɔwo klɛnklɛn shigbe egajɔn adodui nɛnɛ. ¹⁹ Ŋ jeshi ao dɔwawawo , ao lɔnlɔn, ao xɔse, ao 'dɔ́ kodo ao vevidonu. Ŋ nya nyuiɖe be ao 'nuwawa cudotɔwo su egbɔ sɔwu ŋkɔtɔwo. ²⁰ Vɔ ɔ, enyɔ ɖeka le ŋ shi dó eo nu: è nanɔ emɔ Ʒezabɛli, nyɔnu ci yí nunuɔ be ye nyi Mawu 'ŋɛdotɔ. É le nyaŋ 'dɔwaviwo kankan so emɔ nyui lɔ ji le enu kplan wo be wo le tɔ heteliwo wawa yí a gbe ɖu elan ciwo yí wo wu nɔ vojuwo. ²¹ Ŋ na gamɛ yi nɔ́ a trɔ yiɖeki a ji blebu, Vɔ d'é ji be ye a trɔ so hetelilɔ wawa yumɛ go. ²² E yí ná taɖo ɔ, na ná yí á ci vevesese gangan ɖeka 'ba ji. Na ná yí amɛ ciwo yí wanɔ asu kodoi a se veve sugbɔ hɛnnɛ. A nyi ké nɔ wo mí enudɔndɔn ciwo yí é dɔdɔ wo wawa yí á tó le mɛ nɛ wo go. ²³ Na ná yí eviɛwo a ku hɛnnɛ. Nɛnɛ mawu 'hawo pleŋ a nya be eny€ yi donɔ jeshi susu kodo edro ciwo yí le agbetɔ shi na cú efɛn nɔ míwo domɛtɔ ɖeka ɖeka dó edɔ ci yí é wa nu. ²⁴ Vɔ míwo kpetɛ ciwo yí le Tiyati jugan lɔ mɛ ɔ, mí de kplɔ enukplanmɛnyɔ gblegble hɔnwo dó go. ḿ de ji be yewo a jeshi enu ci yí wo yɔyɔ be "enu wlawla citocito ciwo yí le le ɛegba mɛ" go. Ŋ nunuɔ nɔ mí be ŋ d'a gbe do agban buɖe do ekɔji nɔ mí go: ²⁵ "Kpoŋ ɔ, mí le enu ci yí le mí shi dó alɔmɛ gogoiɖe kaka a sɔyi hwecinu yí na vá. ²⁶ Amɛ ci yí aɖu eji& yí a gbe wa do nyaŋ 'dro ji kaka sɔyi enuwuwu ɔ, na ná acɛkpakpa yi do akɔtawo ji . ²⁷ Nɛnɛ 'mɛ a sɔ ega 'cikplɔ a sɔ kplɔ wo yí a gbe sɔ glan wo shigbe agban ciwo yí wo sɔ́ esu mɛ nɛnɛ. ²⁸ Enyɛŋtɔ ɔ, edanyɛ gbɔ yí ŋ xɔ lɔ só. Na gbe ná fɔnfɔnmɛ wlecivi amɛ lɔ. ²⁹ Nɔ́ eto li nɔ amɛɖeɔ, le se enyɔ ci yí gbɔngbɔn kɔkɔɛ nunuɔ nɔ Mawu 'ha lɔwo!"»