¹ Wema cɛ xo nuxu so enu ciwo yí Mawu ɖe dansin nɔ Yesu Kliso nu. Mawu ɖe wo dansin nii nɔ dansin enu ciwo yí ɖó a vá jɔ le majijiɖe mɛ nɔ yi 'dɔwaniwo. Kliso lɔ dɔ yi Mawu dɔla ɖaɖa yi 'dɔwavi Ʒan vayi nɔ́ a jeshi enu hɔn lɔwo. ² Eyi Ʒan ɖe kunu be enu ciwo pleŋ yí ye kpɔ nyi Mawu 'nyɔ yí Yesu Kliso ɖe dansin. ³ Enu yí nyɔ nɔ amɛ ci yí hlɛnhlɛn enyɔ cɛwo le amɛwo ŋmɛ. Enu yí gbe nyɔ nɔ ciwo yí ɖoɖo eto eŋɛnyui cɛ yí gbe wawa do wo ji. Ɖo ɔ, gacimɛ yí enu cɛwo a va jɔ do de gbe jiji go. ⁴ Enyɛ Ʒan yí ŋwlɛŋwlɛ wema cɛ ɖaɖa Mawu 'ha amadrɛ ciwo yí le Azi 'kan mɛ. Mawu ci yí viɛ yí li sasa yí a gbe li le esɔmɛ lé wa xomɛvu nó mí yí a ná fafa mí. Gbɔngbɔn amadrɛ ciwo yí ŋkɔ nɔ Mawu 'fiɔʒinkpin lɔ can lé wa xomɛvu nɔ mí a gbe na fafa mí hɛnnɛ. ⁵ Yesu Kliso ci yí nyi kunuɖetɔ egbejinɔtɔ lɔ cán le wa xomɛvu nɔ́ mí yí a gbe na fafa mí. É yí amɛ ŋkɔtɔ ci yí fɔn so ekuwodi yí gbe nyi ega nɔ nyigban ji 'fiɔwo pleŋ . Yesu Kliso yí lɔn mì yí hwlɛn mì gan le mìwo 'nuvɔnwo mɛ sɔ to yi hun mɛ. ⁶ É sɔ mì wa avɔsatɔwo 'fiɔɖuxumɛtɔwo nɔ mì a wawa edɔ nɔ Mawu ci yí nyi Edalɔ. Yitɔ yí a nyi kɔkɔ kodo acɛkpakpa sɔyi mavɔmavɔ xoaɖyi ⁷ Mí kpɔ ɖa, é gbɔgbɔ le jiŋkushi 'zɔwo mɛ. Amɛshamɛ a kpɔɛ kaka amɛ ciwo yí tɔ́ ehwhan yi can a kpɔɛ. Eyi nyigbanji 'kɔtawo pleŋ a va fanfan egbɛkui do eta nii. Ɛe xoaɖyi! ⁸ Yehowa Mawu Ŋsɛnwopleŋtɔ ci yí li viɛ yí li sasa yí a gbe va li le esɔmɛ nu be: « Enye yí nyi Alufa kodo Omɛga. Ŋkɔtɔ kodo Docutɔ.» ⁹ Enyɛ Ʒan, ŋ nyi míwo nɔvi kodo mí bɔdonutɔ ci yí bɔ senɔ vevi kodo mí, ci yí le Mawu 'fiɔɖuxu lɔ mɛ kodo mí kodo ci yí dodo vevi enu le Yesu mɛ. Wo kplɔ ŋ hɛnyi etɔdomɛju ci yi wo yɔnɔ be Patimosu mɛ do Mawu 'nyɔ lɔ ci yí ŋ nunuɔ kodo dó kunu ci yí ŋ ɖeɖeɛ so Yesu nu ŋci. ¹⁰ Le Axwetɔ lɔ 'zangbe ɔ, Gbɔngbɔn kɔkɔɛ va ŋ ji kpata. Eyi ŋ se yí egbe gangan ɖeka ɖyi le godu nɔ ŋ shigbe ekpɛn 'gbeɖyiɖyi nɛnɛ. ¹¹ Egbeɖyiɖyi lɔ nunuɔ be: « Ŋwlɛ enu ci yí è kpɔkpɔ do wema mɛ yí a sɔɛ ɖaɖa Mawu 'ha amadrɛ cɛwo ciwo yí le : Efɛzi jugan, Simini jugan, Pɛlugamu jugan, Tiyati jugan, Sadɛsu jugan, Filadɛfi jugan kodo Lawodise jugan mɛ ¹² Eyi ŋ trɔŋgbe yí a kpɔ amɛ ci yí xoxo nuxu nɔ́ ŋ. Nɛnɛ ɔ, ŋ kpɔ kaligbanhɛnnu amadrɛ ci yí wo sɔ shika sɔ́ mɛ. ¹³ Le kaligbanhɛnnu lɔwo dodomɛ ɔ, ŋ gbe kpɔ agbetɔ han ɖeka. É dó awu jiji gblɛlɛ ɖeka yí gbe sɔ shika kpablanu ɖeka ta do akɔnnu. ¹⁴ Eta, kodo eɖa ciwo le eta nii ɣé pepepe shigbe gbankpan eɣi nɛnɛ. Yi ŋkuviwo dada ezo shigbe ezo ci yí xɔ xɛ́xɛ́xɛ́́ nɛnɛ. ¹⁵ Yi 'fɔwo klɛnklɛn shigbe egajɔn ci yí xɔ akan nɛnɛ. Yi 'gbemɛ ɖyiɖyi shigbe etɔ ganganwo 'gbemɛ nɛnɛ. ¹⁶ Wlecivi amadrɛ le ɖushimɛ nii. Dekpi enuvenɔ ɖaɖa ɖeka totoɔ le aglan mɛ nii. Yi ŋmɛ dada ezo shigbe lehanci yí ewe danɔ ezo kodo ŋsɛn dó le ewezenya nɛnɛ. ¹⁷ Ci yí ŋ kpɔɛ ahan ɔ, ŋ je anyi do akɔnmɛ nii shigbe amɛkuku nɛnɛ. Vɔ ɔ, é sɔ́ yi ɖushimɛ 'lɔ dado ŋ ji yí nú nɔ ŋ be: « Ŋgbe vɔn go, enyɛ yí ŋkɔtɔ, enyɛ yí gbe nyi docutɔ. ¹⁸ Enyɛ yí nyi amɛ agbeagbe lɔ. Ŋ ku vayi sasa, vɔ ŋ gbe fɔ́n so ekuwodi yí le agbe tɛgbɛɛ. Eku kodo ekuwodi safliwo le alɔmɛ nɔ ŋ. ¹⁹ É yí na taɖo ɔ, ŋwlɛ̀ enu ciwo yí è kpɔ . Ŋwlɛ̀ enu ciwo yí viɛ kodo enu ciwo yí gbɔgbɔ a va jɔ le esɔgodumɛ. ²⁰ Kuso enuwlawla ci yí le wlecivi amadrɛ ciwo yí è kpɔ le nyaŋ ɖushimɛ kodo shika kaligbanhɛnnu amadrɛ lɔwo nú ɔ, wlecivi amadrɛ lɔwo nyi Mawu dɔla ciwo yí kplɔnɔ Mawu 'ha amadrɛ lɔwo ji. Kaligbanhɛnnu amadrɛ lɔwo nyi Mawu 'ha amadrɛ lɔwo.»