¹ Le i godu ɔ, ŋ kpɔ yí Mawu dɔla bu ɖeka ɖyiɖyiɛ so jiŋkushimɛ. acɛ gangan ɖeka le shi yí klɛnklɛn gbando nyigban lɔ pleŋ ji. ² É do axwa kodo ŋsɛn yí nu be: « É juin é juin Babilɔnu jugan gangan lɔ juin jakaaa! Ɖɛviɛ ɔ, jugan gangan lɔ va trɔ axwe nɔ gbɔngbɔnvɔnwo, é va trɔ nɔxu nɔ gbɔngbɔn makɔmakɔ hamɛhamɛwo, nɔxevi kodo elan makɔmakɔwo kodo nɔ elan ciwo yí agbetɔwo gbe eha nɔ. ³ É dɔn amɛ ciwo yí le jukɔnwo pleŋ mɛ do sakawawa ci yí le shigbe aha nɛnɛ yí é na yi wo nu sunsuinɖe mɛ. Efiɔ ciwo yí le nyigban lɔ ji wa saka kodoi yí ajɔtɔ ciwo yí le nyigban lɔ ji can trɔ dɔkunɔ sɔ to eho manumanu ci yí é wa ɖɛ mɛ. ⁴ Eyi ŋ gbe se egbe bu ɖeka ci yí dyi so jiŋkushimɛ yí nunuɔ be; « Míwo ciwo yí nyi nyaŋ jukɔn, mí to le jugan lɔ mɛ nɔ yi 'nuvɔnwo ŋgbe va ba mí o. ⁵ Ɖó ɔ, yi 'nuvɔnwo to daɖɛ do nɔnɔji kaka xotɔ jiŋkushi yí Mawu ɖo eŋui yi 'nu manyɔmanyɔ ji. ⁶ Mí do aya nii shigbe lehanci yi é do aya nɔ amɛwo do nɛnɛ. Mí do aya nii shigbe lehanci yi é do aya nɔ amɛwo do nɛnɛ, dó yitɔ han nu donu amɛve. mí sɔ kɔkpu ci yi ́ é sɔ kui nɔ amɛwo kui nii do zeve ji. ⁷ Shigbe lehanci yí é ɖu agbe do le kɔkɔ kodo nyɔna gbogbo mɛ do nɛnɛ ɔ, mí sɔ gbazavi kodo ecɔmɛnɔnɔ ʒin ekɔ ji nii. É nunɔ le yiɖekimɛ be: " Ŋ nɔ anyinɔnɔ do elɛ shigbe efiɔ nyɔnu nɛnɛ . Ŋ de nyi kposhi go yí ecɔ ɖe d'a ku ŋ go." ⁸ Enu ci yí na taɖo le ŋkeke kuɖeka ji ɔ, enujɔjɔbaɖa ci yí nyi eku, ecɔmɛnɔnɔ, shivetoto a bɔ a va ji yí wo sɔ danŋkpɛn do ezomɛ nɛ. Ɖó ɔ, ŋsɛntɔnɔ yí Mawu ci yi ɖo kojo kodoi.» ⁹ Nyigban ji 'fiɔ ciwo yí wa laga kodoi yí gbe ɖu agbe kodoi a va fan avi yí a gbe fan ekui do eta nii le hwenu ci yí wo a va kpɔ jugan lɔ a le ezo biɛ yí a le azɔ cuɔ. ¹⁰ Wo a vayi ci azɔge yí a vɔnvɔn nɔ gbazavi ci yí a va ji ŋci yí a nunuɔ be: « Jɔgbevɔin hin yí nyi ecɛ ɔ! Jɔgbevɔin hin yí nyi ecɛ ɔ! Babilɔnu, jugan gangan lɔ, jugan ŋsɛntɔnɔ lɔ! Egaxoxo ɖeka kpaŋ yí wo sɔ so ao gbangban kojo!» ¹¹ Ajɔtɔ ciwo yí le anyigban ji le avi faan yi fanfan yɔɛ. Ɖo amɛɖe de gbe xwlexwle wowo 'nusasa 'gbanwo go: ¹² Enusasa 'gban lɔwo nyi shika, ehokɔ, ehovevi 'kpewo, ekɔjenuwo, lɛn 'vɔ cigantɔ, cigan 'vɔ ejin kodo ejin xɛxɛxɛwo, avɔ fɛɖɛfɛɖɛ ɖeka ci yí venɔ eho, aci ciwo yí wo sɔ wanɔ enuhwɛntewo, enu ciwo pleŋ wo sɔ gɛnḷi 'ɖu wa, enu ciwo pleŋ wo sɔ ehovevi 'ciwo kpa, egajɔn, ega ŋtɔ kodo ehovevi 'kpegbaja. ¹³ Wo gbe sanɔ enuhwɛnte ehovevitɔ ciwo ý wo yɔnɔ be kaneli kodo ahlomati: amihwɛntewo,milu, lifi, vɛn 'ha, ami, ewɔ, jinuku ci yí wo yɔnɔ be eliku, xwenyiwo, lɛngbɔwo, esɔwo, ahwahunwo, hwashiwo kodo agbetɔ ciwo yí wo le lé ahwagbejiwo. ¹⁴ Wo gbe nunuɔ nɔ jugan lɔ be : « Enu ciwo pleŋ yí le shigbe acikusɛnsɛn ɖyiɖyi nɛnɛ yí jɔnɔ eji nɔ eo bu vii le eo gbɔ; dɔkunuwo kodo agbeɖuɖunuwo pleŋ vɔ nɔ eo . Wod'a gbe va kpɔ wo gbeɖe go!» ¹⁵ Ajɔtɔ ciwo yí kpɔ eho sɔ to jugan lɔ ji a vayi ci azɔge do vɔnvɔn nɔ gbazavi ci yí va ji ŋci. Wo a le avi faan yí a fanfan ecɔ ' vin ¹⁶ be: « Jɔgbevɔin hin yí nyi ecɛ ɔ! Jɔgbevɔin hin yí nyi ecɛ yí va jugan gangan lɔ jí ɔ! I nɛ do ehovevi 'nuwo nɛ, lɛn 'vɔ, avɔ ejin, ganijɛ 'vɔ kodo avɔ ejin xɛxɛxɛwo. I nɛ sɔ shika, ekpe ehovevitɔwo, ekɔjenuwo sɔ ɖo acɔ. ¹⁷ Vɔ ɖee, kaka dɔkunu hɔnwo va vɔ le egaxoxo kuɖeka mɛ!» Etɔjihungangan kutɔwo kodo etɔjihungangan 'dɔwatɔwo pleŋ, axunuwatɔwo kodo amɛ ciwo pleŋ yí wanɔ edɔ le axu ji vayi ci azɔge. ¹⁸ Ci yí wo kpɔkpɔ lehanci yí jugan lɔ bibiɛ ezo do kodo azɔ ci cuɔ yí é le ɔ, wo do axwa be: « jugan ɖe li yí gangan shigbe jugan cɛ nɛnɛ sasa a?» ¹⁹ Wo lɔlɔɔ ekɔ do eta yí tɔ avin fanfan yí fanfan ecɔ 'vin kodo axwa be: « Jɔgbevɔin hin yí nyi ecɛ ɔ! Jɔgbevɔin hin yí nyi ecɛ yí va jugan gangan lɔ ci yí do ́ dɔku amɛ ciwo yí wa etɔjihunganganwo ɖɛ do axu jí ɔ! Kaka dɔkun hɔn va vɔ pleŋ le gaxoxo kuɖeka mɛ yí é trɔ axwetugbe!» ²⁰ Jiŋkushi, kpɔ̀ jijɔ so jugan gangan lɔ juinjuin nu! míwo xɔsetɔwo, amɛdɔdɔwo kodo Mawu 'ŋɛdotɔwo, míwo can mí kpɔ jijɔ! Ɖo Mawu nɖo kojo kodo jugan lɔ yí dɔn eto nii nɔ enuvɔn ci yí é wa kodo mí! ²¹ Eyi Mawu dɔla ŋsɛntɔnɔ ɖeka sɔ ekpe gangan ɖeka ci yí lé shigbe ekpe ci ji wo cunɔ ewɔ lé nɛnɛ yí sɔ da ɖaɖa axu mɛ yí nu be: « Nɛnɛke yí wo a va sɔ Babilɔnu jugan gangan lɔ da ɖaɖa kodo ŋsɛn nɛ yí wo d'a gbe va kpɔɛ kpɔ go. ²² Wo d'a gbe se yí ekahunxotɔwo kodo enuxotɔwo a le enu xoɔ le míwo 'xwé go. Wo d'a gbe va se ehajitɔwo, ekpinxutɔwo alo ekpinxuxu ɖé go. Wo d'a gbe va kpɔ alɔnudɔwatɔ ehatamu ɖekpokpoi ɖe le eo gbɔ gbeɖe go. Wo d'a gbe se yí amɛɖe a cucuɔ ewɔ le eo gbɔ le ètè ji go. ²³ Kaligban 'zo d'a gbe je le eo gbɔ gbeɖe go. Wo d'a gbe se axwa nɔ nyɔnu yoyu asuɔ kodo nyɔnu yoyu ɖé le ao 'xwé mɛ go. Ao 'jɔtɔwo nyi amɛ kpɛnkpɛnwo le xexe lɔ pleŋ mɛ. Jukɔn lɔ pleŋ bu emɔ to ao maʒikinuwawawo mɛ.» ²⁴ Babilɔnu jugan lɔ mɛ yí wo wu Mawu 'ŋɛdotɔwo, xɔsetɔwo kodo amɛ ciwo pleŋ yí wo wu le nyigban lɔ ji le, yí wowo 'hun kodo nyigban le.