¹ Eyi Mawu dɔla amadrɛ lɔwo ciwo hɛn kɔkpu amadrɛ lɔwo domɛtɔ ɖeka va nu nɔ ŋ be: « Và nɔ ma dansin lehanci Mawu a vá ɖó kojo kodo sakabo gangantɔ lɔ ci yí nɔ anyinɔnɔ do etɔ ganganwo jí dó nó eo. ² Nyigbanji 'fiɔwo wa laganu kodoi yí yi lagadodo lɔ nyi aha han yí mú nyigbanjitɔwo pleŋ.» ³ Gbɔngbɔn kɔkɔɛ va ŋ ji yí Mawu dɔla lɔ kokɔ ŋ sɔyi zogbe ɖeka mɛ. Eyi ehɔntɔxu ɔ, ŋ kpɔ nyɔnu ɖeka ci yí le anyinɔnɔ le ela ejɔn xɛ́xɛ́xɛ́ ɖeka ji. Elan lɔ ɖo eta amadrɛ yí mi azo amɛwo. Wo ŋwlɛ Mawu zuzu nyikɔwo dó kotu nii kpedo. ⁴ Nyɔnu lɔ dó awu ehovevitɔ ejɔn xɛ́xɛ́xɛ́ ɖeka yí sɔ shika gaviwo, ekpe xɔashiwo kodo ekɔjenuwo ɖó acɔ nɔ yiɖeki. É hɛn shika kɔkpu ɖeka ci yí ɖɔ kodo yi 'nu wakufiɛwo kodo heteliwawa ciwo waa yí é le lé sakawawa lɔ mɛ do alɔmɛ. ⁵ Wo ŋwlɛ nyikɔ ɖeka ci yí nyí enuwlawla ɖeka dó ŋgonu nii be: « Babilɔnu, jugan gangan. sakabowo 'nɔlɔ kodo nyigbanji 'nú wakufiɛwo watɔwo 'nɔlɔ.» ⁶ Ŋ kpɔ be nyɔnu lɔ nu xɔsetɔwo kodo amɛ ciwo yí nɔ egbeji nɔ Yesu yí ɖeɖeɛ kunu nii ' hun kaka yí mú. Ci yi ŋ kpɔ nyɔnu lɔ nɛnɛ ɔ, é kpaca ŋ sugbɔ. ⁷ Eyi Mawu dɔla lɔ nu nɔ be: « Nyi yí jɔ taɖo yí é kpaca eo ɔ? Enyɛ ɔ, na nú enuwlawla ci yí kuso nyɔnu lɔ kodo elan lɔ ci ji yí é nɔ anyinɔnɔ do lɔ nɔ eo; elan lɔ yí ɖo eta amadrɛ yí gbe mi azo amɛwo. ⁸ Elan lɔ ci yí è kpɔ le agbe vayisasa. Vɔ ɔ, d'é gbe le agbe ɖɛ viɛ go. É tó so edugangan citocito lɔ mɛ keŋ a yi trɔntrɔn mɛ. Nɔ́ nyigbanjinɔtɔwo, amɛ ciwo nyikɔwo yí wo de ŋwlɛ do agbe wema lɔ mɛ so gacimɛ yí wo ɖo xexe lɔ 'nyiɖu anyinɔnɔ ɖii va kpɔ elan lɔ ɔ, á kpaca wo. Ɖo ɔ, elan lɔ li vayisasa, vɔ d'é gbe le agbe viɛ go. Gankegan ɔ, á gbe va trɔ́ a tó.» ⁹ É gbe nu nɔ ŋ be ɛlɛtɔxu yí ŋɖɛnyanya ci yí hwɛnhwɛɛn ŋnunyanya ʒián le ge. Elan lɔ 'ta amadrɛ lɔwo nyi ekpo amɛdrɛ ciwo jí yí nyɔnu lɔ nɔ anyinɔnɔ do. Wo gbe nyi efiɔ amadrɛ hɛnnɛ: ¹⁰ efiɔ amatɔn je anyi. amadɛntɔ lɔ kpɔtɔ yí gbe le efiɔ ɖuɔ yí amadrɛtɔ lɔ yɛ de vá ɖó hɔɖe go. nɔ́ é vá ɖó ɔ, azan kleŋ ɖe kpoŋ yí a wa le efiɔ ʒinkpin lɔ jí. ¹¹ Elan lɔ ci yí li vayisasa yí d'é gbe li viɛ go nyi efiɔ amɛnyitɔ lɔ. É gbe nyi efiɔ amadrɛtɔ lɔwo domɛtɔ ɖeka yí é yigɔ trɔntrɔnmɛ. ¹² Elanzo amɛwo ciwo yí è kpɔ nyi efiɔ amɛwo ciwo yí de tɔ efiɔ ɖuɖu hɔɖe o. Vɔ ɔ, wo a na acɛ wo yí wo a vá ɖu efiɔ sɔna egaxoxo ɖeka kodo efiɔ elan lɔ. ¹³ Efiɔ amɛwo lɔwo bɔ wa totomɛ kuɖeka yí a sɔ wowo ŋsɛn kodo wowo 'cɛ wa edɔ kodo elan lɔ. ¹⁴ Wo a wa ahwa kodo lɛngbɔvi lɔ. Vɔ lɛngbɔvi lɔ a ɖu wo jí, ɖó é yí nyi axwetɔwo 'xwetɔ yí gbe nyi Efiɔwo 'fiɔ. Amɛ ciwo yí le kodoi, wowo ciwo yí é yɔ yí cán yí wo gbe le egbeji nii cán a ɖu eji kodoi hɛnnɛ. ¹⁵ Mawu dɔla lɔ gbe nu nɔ ŋ be: « Etɔsasa ciwo yí è kpɔ yí sakabo lɔ nɔ anyinɔnɔ do wo ji ɔ, wowo yí jukɔnwo, ahwakɔnwo, ejuwo mɛnɔtɔwo kodo egbe ɖekaɖeka dotɔwo. ¹⁶ Elanzo amɛwo ciwo yí è kpɔ kodo elan lɔ ŋtɔ a vá tɔ sakabo lɔ 'nyɔ gbɔ gbegbe.Wo a va xɔ enu ciwo pleŋ yí le shi yí a va ɖii do maama dɛngbui. wo a vá tɔ́ yi lanciwo ɖuɖu yí á va tɔ́ ezo yi ŋcilan lɔ pleŋ. ¹⁷ Ɖó ɔ, Mawu sɔ ɖo eji ji nɔ wo be wo le wa do ye totomɛ ji. É na yí efiɔ amɛwo lɔwo ɖó gbeju yí sɔ wowo 'fiɔɖuxu jó nɔ elan lɔ kaka va ɖo gacimɛ yí nuxu ciwo yí Mawu xo ɖɛ a nyi wawa vɛ. ¹⁸ Nyɔnu hɔn ci yí è kpɔ o, é yí nyi jugan gangan ci yí le efiɔ ɖuɔ do nyigbanji 'fiwo jí.»