1
E yi ŋ gbe se egbe sɛnŋsɛnŋ ɖeka ci yí ɖyí so egbedodoɖaɖatɔxu lɔ mɛ nunuɔ nɔ dɔla amadrɛ lɔwo bé: «Mí sɔ kɔkpu amadrɛ lɔwo ciwo yí nyí Mawu dɔmɛzi yi kɔdo nyigban ji!»
2
Dɔla ŋkɔtɔ yi yi sɔ́ yi kɔkpu kɔdo nyigban ji. Eyi abi vɔn ɖekawo kɔdo gotu nɔ amɛ ciwo yí xɔ ela lɔ jeshidu yí gbe doŋdo nɔ yi nɔ yi nɔnɔmɛtata yí sɔ́ sinsiɛn.
3
Dɔla amɛvetɔ lɔ sɔ́ yi kɔkpu kɔdo axu mɛ. Axweshi lɔ trɔ́ shigbe amɛkuku 'hun nɛnɛ yí enuleagbe ciwo pleŋ yí le axu lɔ mɛ ku.
4
Dɔla amɛtɔntɔ lɔ sɔ́ yi kɔkpu kɔdo etɔsasawo kodo eshijɔxuwo mɛ yí wowo gbe trɔ ehun hɛnnɛ.
5
Eyi ŋ se yí dɔla ci yi ɖó acɛ do eshiwo jí nú bé: « yí nyí amɛjɔjɔɛ, eo ci yí li viɛ yi gbe li sasavayi. Eo, Amɛkɔkɔɛ lɔ, é so kojo cɛ jɔjɔɛɖe shigbe lehanci yí é je do nɛnɛ.
6
Nyɔnɔnui ɔ, wo wu xɔsetɔwo kodo ao 'ŋɛdotɔwo yí eviɛ ɔ, è na ehun wo yí wo a nu. Enu ci yí je kodo wo yí wo xɔ.»
7
Eyi ŋ se yi egbe ɖeka ɖyi so avɔsakpe lɔ gbɔ́ yí nú bé: «Ɛɛ Axwetɔ Mawu ŋsɛnwopleŋtɔ; ao kojoɖoɖowo nyí nyɔnɔnui yí le jɔjɔɛɖe!»
8
Dɔla amɛnɛtɔ lɔ sɔ́ yi kɔkpu kɔdo ewe ji. Eyi ewe xɔ acɛ ci yí á sɔ tɔ́ agbetɔwo bibi shigbe ezo nɛnɛ.
9
Nɛnɛ ɔ, zozu gangan ɖeka tɔ agbetɔwo bibi shigbe ezo nɛnɛ. Eyi wo tɔ́ mawu nyikɔ zuzu, Mawu ci yí ɖó acɛ do enujɔjɔbaɖa hɔn lɔwo jí. Vɔ wo de lɔn yí a trɔ́ wowoɖekiwo yí a ji yí a sɔ́ kanfukanfu ná Mawu go.
10
Dɔla amatɔntɔ lɔ sɔ̀ yi kɔkpu kɔdo elan lɔ fiɔʒinkpin jí yí vivici dó le yi 'fiɔɖuxu lɔ pleŋ mɛ. Amɛwo le aɖukli ɖuɔ, o wo seseɛ vévi taŋ.
11
Wo le amɛzuzu nuxuwo xoɔ nɔ jiŋkushi Mawu dó wowo gbazaviwo kodo wowo 'bi vɔn lɔwo ŋci. Vɔ kpɔ́ wo de mí wowo 'nuvɔnwo wawa go.
12
Dɔla amadɛntɔ lɔ sɔ́ yi kɔkpu kɔdo etɔsasa gangan Eflati mɛ. Eyi etɔ lɔ xú zeɖeka yí a ná emɔ efiɔ ciwo yí só ewezexu nɔ́ wo a vayi.
13
Eyi ŋ kpɔ gbɔngbɔnvɔn amɛtɔn ciwo yí le shigbe ajínwo nɛnɛ tó le edangangan blibaa lɔ, elan lɔ kodo Mawu ŋɛdotɔ ŋsukantɔ lɔ 'glanwo mɛ.
14
Gbɔngbɔnvɔn lɔwo ciwo yí Legba dɔ ɖaɖa yí le jeshidu 'nuwo wagɔ. Wo yinɔ nyigbanjitɔwo 'fiɔwo pleŋ gbɔ́ yí a bɔ wó nɔ́ wo a vá wa ahwa le ŋkeke gangan ci yí Mawu ŋsɛnwopleŋtɔ lɔ ɖó ɖɛ́ j́i.
15
Axwetɔ lɔ nú bé: «Agoo nɔ mí ! Na vá vá le avomɛ shigbe lehanci yí flanfinɔ vanɔ amɛ gbɔ dó nɛnɛ! Enu yí nyɔ́ nɔ́ amɛ ci yí a le zanŋte yí yi 'nudodowo a sɔ́ alɔgbɔ nɔ́. Eyi nɔ́ ŋ va ɔ, amɛ lɔ d'a gbe le Maama yí eŋu a kpiin go.»
16
Gbɔngbɔnvɔn lɔwo bɔ efiɔ lɔ dó texwe kuɖeka ci yí wo yɔnɔ dó Eblegbe mɛ be Hamagedɔnu.
17
Ɖɔla amadrɛtɔ lɔ sɔ́ yí kɔkpu kɔdo ayamɛ. Eyi egbe sɛnŋsɛnŋ ɖeka ɖyi le egbedodoɖaɖatɔxu lɔ mɛ so efiɔʒinkpin lɔ gbɔ́ yí nú bé: «Enyɔ lɔ vɔ!»
18
Eyi ej́i ɖe ezo miamiamia, Ʒigidi tɔ, eji ɖe egbe, nyigban hunhun yí eke ja sɛnŋsɛnŋɖe.
So hwecinu yí agbetɔ je nyigban lɔ ji ɔ, nyigban de hunhun sɛnŋsɛnŋɖe nɛnɛ kpɔ́ go!