¹ Le i godu ɔ ŋ gbe kpɔ yi lɛngbɔvi lɔ le ete le siyɔn 'kpo ji. E le hɔn kodo amɛ kotokun sanŋdiɖeka tanɛ cinɛ (144000) ciwo yi wo ŋwlɛ yi nyikɔ kodo Edalɔ nyikɔ do ŋgonu nɔ. ² Eyi ŋ se yi egbe ɖuka ɖyi so jiŋkushimɛ. Egbe lɔ le axwa doɔ shigbe etɔsasa alo ejiɖegbe ganganwo nɛnɛ.

E nya sese shigbe ekahunwo yi ekahunxotɔwo xoxo nɛnɛ.

³ Amɛ kotokun sandi ɖeka tanɛ cinɛ (144000)) hɔn lɔwo jijiɛ eha yoyu ɖeka le ŋmɛ nɔ efiɔɛinkpin lɔ enuleagbe amɛnɛ lɔwo kodo mɛgan lɔwo. Amɛɖekpokpoi de sɛn eŋ kplan eha lɔ go, amɛ kotokun sanŋdiɖeka tanɛ cinɛ hɔn lɔwo ɖekɛ ciwo yi wo xwle vovo nɔ le nyigban lɔ ji yí jiini. ⁴ Amɛ ciwo yi d'e xo edyi wowoɖekiwo kodo nyɔnu lɔ go yi wo nyi. Wo le alɔji. wo kplɔnɔ lɛngbɔvilɔ do le fini ciwo pleŋ yi e yinɔ. Wo xwle vovo nɔ wo le agbetɔwo domɛ keŋ a sɔ wo wa amɛ ciwo yí nyi agbetɔwo 'taɖeɖe han nɔ mawu kodo lɛngbɔvilɔ. ⁵ ŋsukankan de tonɔ le aglan mɛ nɔ nenɛ 'mɛwo go yi wo de kpɔnɔ afɛn ɖe yi agbe nɔ wo go. ⁶ Eyi ŋgbe kpɔ dɔla bu ɖeka yi e zozoɔto ejixomɛ ɖaa. Eŋɛbyui mavɔmavɔ ɖeka le shi yi é jijiɛ a do nɔ nyigbanjitɔwo pleŋ, ejuwo pleŋ akɔtawo pleŋ, egbedodowo pleŋ kodo hukɔnwo pleŋ. ⁷ E do axwa yí nunu be: «Mí ɖo shishi nɔ Mawu yi a sɔ ka,fukanfu nii. Ɖo ɔ, gamɛ sun yí a ɖo kojo kodo agbetɔwo. Mi doŋdo yi a sɔ sɛn Amă ci yi wa jikushi, nyigban, axu kodo etɔsasawo. ⁸ Eyi dɔla evetɔ bu ɖeka kplɔ ŋkɔtɔ do yi nunuɔ be: «E juin! E juin Babilɔnu jugan gangan lɔ juin jakaa! E dɔn amɛwo so jukɔnwo pleŋ mɛ do yi sakawawa ci yi nyi aha han yi muimui mɛ!» ⁹ Dɔla bu amɛtɔntɔ ɖeka ci yi kplɔ amɛwo ŋkɔtɔ lɔwo do do axwa yi nunuɔ be: «Nɔ amɛde doŋdo yi sɔ sɛn elan lɔ kodo yi nɔnɔmɛtata lɔ yi gbe xɔ jeshidu do ŋgonu alo do alɔ ɔ, ¹⁰ a va nu vevevsese shigbe aha nɛnɛ le Mawu 'lɔ mɛ. Mawu a va ku vevesese akuaku do kɔkpumɛ nii kaka a ɖɔɛ. Eyi a va se gbazavi le ezo kodo wemi mɛ le dɔla kɔkɔɛwo kodo lɛngbɔvi lɔ ŋmɛ. ¹¹ Ezo ci mɛ yi wo a seseɛ gbazavi lɔ le a kpɔtɔ a yinɔ eji tɛgbɛɛ. Wowo ci wo yi dodoɔ ŋdo nɔ elan lɔ kodo yi nɔnɔmɛtata yi sɔ siinsiin kodo amɛ ciwo yi gbe yi nyikɔ jeshidu ɔ, gbɔngbɔndomɛ bu ɖé de gbe li nɔ wo, ezan kodo kede go. Nɛnɛke yi a nɔ nɔ amɛ ci yi a xɔ yi nyikɔ jeshidu di nɛ.» ¹² Elɛtɔxu yi wo a kpɔ vevodonu kodo xɔse ɖodo do Yesu ji nɔ xɔsetɔ ciwo yi wanɔ do mawu 'gebɖeɖewo ji le nɛ. ¹³ E yi ŋ va se yi egbe ɖeka ɖyi so jiŋkushimɛ yi nunuɔ be: «ŋwlɛ enyɔ cɛ : "Enu yi nyɔ nɔ amɛ ciwo yi a ku hwecɛnu le Axwetɔ 'dɔwawa mɛ" Ɛɛ, gbɔngbɔn kɔkɔɛ nunuɔ be : "Enu yi nyɔ nɔ nɛnɛ 'mɛwo. Wo le vayi gbɔbdomɛ le wowo 'gbagbajejewo mɛ. Ɖo ɔ,wowo 'dowawa a kplɔ wo do!"» ¹⁴ Le i godu ɔ, ŋ kpɔ jiŋkushimɛzɔ eɣi ɖeka yi enu leagbu ɖeka le anyinɔnɔ le azɔ lɔ ji shika 'fiɔkuku ɖeka do eta yi hɛn ehɛ enuvenɔ ɖaɖa ɖeka do alɔmɛ. ¹⁵ Dɔla bu ɖeka to le egbedodoɖaɖatɔxu lɔ mɛ yi do axwa gangan ɖeka ɖaɖa amɛ ci yi nɔ anyinɔnɔ do jiŋkushimɛzɔ lɔ ji be: «Ɖo ao 'hɛ ɖaɖa yi a ɖe jinukuwo. «Do ɔ jinuku lɔ shin le nyigban lo ji yi gacimɛ yi wo a ciin do va ɖo!» ¹⁶ Eyi amɛ ci yi nɔ anyinɔnɔ do jiŋkushimɛzɔ lɔ ji do yi 'hɛ ɖaɖa nyigban lɔ ji yi ɖe jinuku lɔ. ¹⁷ Dɔla bu ɖeka to so Mawu xwe mɛ le jiŋkushimɛ . Eyɛ can hɛn ehɛ enuvenɔ ɖeka do alɔmɛ. ¹⁸ Dɔla bu ɖeka ci yi ɖo acɛ do ezo ji to so avɔsakpe lɔ texu keŋ yi do axwa ɖaɖa amɛ ci yi hɛn ehɛ ɖaɖa lɔ do alɔmɛ yi nu nii be: «Do ao 'hɛ enuvenɔ ɖaɖa lɔ ɖaɖa keŋ yi a so vɛncikusɛnsɛn 'kpuwo le vɛbcikanwo mɛ le nyigban ji. Ɖo ɔ, yí 'kusɛnsɛnwo shin vɔ.» ¹⁹ Eyi Dɔla lɔ do yi 'hɛ ɖaɖa nyigban lɔ ji yi gbɛn vɛncikusɛnsɛn lɔwo le nyigban ji. E sɔ wo kɔ ɖaɖa mawu dɔmɛzi vɛnfiɔnnu gangan mɛ. ²⁰ Wo bya vɛncikusɛnsɛn lɔwo le afɔ nu do edu gangan lɔ mɛ le azɔge nɔ jugan lɔ. Eyi ehun totoɔ le edu lɔ mɛ kaka yi jijiɛ a xotɔ ekɔkuci ci yi le ekɔmɛ nɔ esɔ lɔwo. E sasa kaka yi kpeci sanŋditɔn han bonu.