¹ Eyi ŋ kpɔ yí ela ɖeka totoɔ le axu mɛ. É mí azo amɛwo yí ɖó eta amadrɛ. Efiɔkuku ɖeka gbe le azo amɛwo domɛtɔ ɖeka ɖeka jí nii yí wo ŋwlɛ nyikɔ ciwo yí nyí Mawu zuzu nyikɔwo dó eta lɔwo jí nii ɖeka ɖeka. ² Elan lɔ ci yí ŋ kpɔ ci shigbe ekpɔ han nɛnɛ. Yí 'fiɔwo le shigbe ejanwadan ci yí wo yɔnɔ nɛnɛ. Aglan le nii shigbe jaŋtan 'glan nɛnɛ. Edagangan blibaa lɔ sɔ́ yí ŋsɛn, yi 'fiɔʒinkpin kodo yí 'cɛ sɔ nii. ³ Eta ɖeka le nɔ elan lɔ shigbe wo dó akpa yi nu sugbɔ kaka á ku nɛnɛ. Vɔ ɔ, akpa vevi lɔ kú nii. Elan lɔ 'nú jí eŋ nɔ́ amɛshamɛ le nyigban lɔ jí yí yí wo kplɔɛdo. ⁴ Amɛshamɛ tɔ ŋdo dodo nɔ́ edangangan blibaa lɔ yí sinsiɛn ɖó é sɔ́ yi 'cɛ sɔ ná elan eɖitɔ lɔ. Wo doŋdo nɔ ela lɔ yí nunuɔ be: «Mi yí le shigbe elan lɔ nɛnɛ ɔ? Mi yí a sɛ̀n eŋ a wa ahwa kodi ɔ?» ⁵ Wo ná egbe yi yí é tɔ enyɔwo kankan yi gbe xoxoɔ zuzu nuxuwo nɔ́ Mawu. Wo ná acɛ yi nɔ́ a wawa nɛnɛ kaka a sɔnanɔ wleci eka hove. ⁶ Eyi elan lɔ tɔ́ nuxuwo xoxo yí sɔ́ tɔ Mawu zuzu yí tɔ́ eshivɔn lele nɔ Mawu nyikɔ kodo yi nuxu lɔ. nɛnɛke yí é gbe leleɛ eshivɔn nɔ́ amɛ ciwo yí ɖó nɔxu dó jiŋkushi nɛ. ⁷ Wo ná emɔ yi be yi lé wa ahwa kodo xɔsetɔwo kaka yí a ɖu wo jí. Wo ná acɛ yí do akɔtawo pleŋ jí, jukɔwo pleŋ ji, egbedodowo pleŋ jí kodo ejuwo pleŋ ji. ⁸ Amɛ ciwo pleŋ yi le nyigban lɔ ji, amɛ ciwo nyikɔwo yí wo de ŋwlɛ do lɛngbɔvi lɔ 'gbe wema lɔ mɛ so hwecinu yí wo ɖó xexe lɔ nyiɖu anyi ɖii o a vayi donɔ ŋdo nɔ elan lɔ yí sɔ́ sinsiiɛn. ⁹ Nɔ́ amɛɖe ɖó yí a vá nɔ gakpamɛ ɔ, amɛ lɔ a vayi gakpamɛ nyɔnɔnui. ¹⁰ Nɔ́ amɛɖe ɖó yí a kú dó dekpui nu ɔ, á gbe va cí dekpui nu . Elɛtɔxu yí wo a kpɔ́ vevidonu kodo xɔse nɔ xɔsetɔwo le ge.» ¹¹ Eyi ŋ gbe kpɔ yí elan bu ɖeka totoɔ le nyigban mɛ. É mi azo amɛve shigbe lɛngbɔvi zowo nɛnɛ yí xoxoɔ nuxu shigbe edangangan blibaa lɔ nɛnɛ. ¹² É zanzan acɛ ci pleŋ yí elan ŋkɔtɔ lɔ ɖó le ŋmɛ nɔ yi ŋkɔ. É ná yí nyigban kodo nyigbanjinɔtɔwo doŋdo yí sɔ́ sɛnsɛn ela ŋkɔtɔ ci yí xɔ akpa gangan ɖeka ci yí é gbe mi nii lɔ . ¹³ Elan amɛvetɔ hɔn lɔ le jeshidu 'nú ganganwo waa. É ná yí ezo ɖyiɖyiɛ so jiŋkushi yí kɔkɔ do nyigban jí ŋtɔkpu le agbetɔwo pleŋ ŋmɛ. ¹⁴ E sɔto jeshidu 'nú ciwo yí wo ná acɛ yi yí é wawa le elan lɔ ŋmɛ ji yí sɔ́ le amɛwo kplɔɔ yi trɔntrɔnmɛ le nyigban lɔ jí. E nunuɔ nɔ wo be wo le sɔ́ elan lɔ ci yí wo xú dekpui yí é gbe fɔn a sɔ́ wa nɔnɔmɛtata ɖeka. ¹⁵ Wo ná ŋsɛn yi ń á do agbe elan ŋkɔtɔ lɔ nɔnɔmɛtata lɔ mɛ, keŋ nɔ́ nɔnɔmɛtata lɔ a tɔ́ nuxu xoxo yí a gbe tɔ amɛ ciwo yí de sinsiɛn go wuwu. ¹⁶ Elan lɔ ná yi wo ʒinʒiɛn amɛwo pleŋ jí, ɖevihwɛwo kodo mɛgan xoxuwo, ehotɔwo kodo wamɛnɔwo, hwashiwo kodo amɛjeyiɖekishinuwo, nɔ́ wo a xɔ jeshidu ɖeka dó ɖushilɔ nu alo dó ŋgonu. ¹⁷ Amɛɖekpokpoi d'a sɛ́n eŋ xwle enu alo sa enuɖe nɔ́ d'é ɖó jeshidu hɔn lɔ ci yí nyí elan lɔ nyikɔ alo kɔŋtawemakui ciwo yí sɔ kodo nyikɔ lɔ go. ¹⁸ Elɛtɔxu yí ŋununyanya a wa edɔ le ge. Amɛ ci yí nyá ŋunu ɖɛ̀ lé dó jeshi enu ci yí le godu nɔ́ elan lɔ kɔnŋtawemakui lɔwo yí a nyá. Ɖo ɔ, elan lɔ kɔnŋtawemakui lɔwo sɔ kodo agbetɔ ɖeka nyikɔ. Yi kɔnŋtawemakui lɔwo nyi sanŋdi amadrɛ taadɛn ciadɛn (666).