¹ Le i godu ɔ, jeshi gangan ɖeka zé le jiŋkushi mɛ: ŋ kpɔ nyɔnu ɖeka ci yí ewe sɔ dó awu, wleci le afɔwo gɔnmɛ nii yí é cɔn efiɔkuku ɖeka ci nu yí wlecivi wive le. ² Nyɔnu lɔ fɔ́ efu yi evijiji dɔmɛ ci yí ɖuɖuiɛ na yí gbaza viviɛ yí é le axwa doɔgɔ. ³ Jeshidu gangan bu ɖeka gbe ze le jiŋkushi mɛ: edangangan blibaa ɖeka tó yi le ejɔnɖe xɛxɛxɛ shigbe ezo nɛnɛ. É ɖo eta amadrɛ kodo azotrotro amɛwo yí efiɔkuku ɖeka gbe le eta amadrɛ lɔwo ji nii ɖeka ɖeka. ⁴ Edangangan bliba lɔ sɔ́ yi shike madotɔn le wleciviwo mɛ le jiŋkushi mɛ yí hlɛn wo kɔ ɖaɖa nyigban jí. Edagangan bliba lɔ va je ete do ŋmɛ nɔ nyɔnu ci yí jijiɛ a ji evi lɔ keŋ nɔ́ é ji evi lɔ ɖegbɔ nɛnɛ han ɔ, a sɔɛ ɖu. ⁵ Nyɔnu lɔ ji evi ŋsuvi ɖeka ci yí a va ɖu efiɔ sɛnŋsɛnŋɖe do do jukɔnwo pleŋ jí kodo ega 'cikplɔ. Eyi trololo ci yí é ji evi lɔ ɔ, wo sɔ́ɛ hɛn yí mawu kodo yi 'fiɔʒinkpin lɔ gbɔ́. ⁶ Nyɔnu lɔ ŋtɔ ɔ, yɛ shi yí zogbemɛ le fini ci yí Mawu drado ɖɛ́ nii le Mawu a nana enuɖuɖu yí le é hɔn kaka a sɔna ŋkeke kotokun ɖeka sanŋdive taadrɛn (1260) ⁷ Eyi ahwa ɖeka jɔ le jiŋkushi mɛ. Mishɛli kodo yi Mawu 'dɔlawo wa ahwa kodo edangangan blibaa lɔ . Edangangan lɔ eyɛ cán kodo yi 'dɔlawo wa ahwa kodo wo. ⁸ Vɔ ɔ,edangangan blibaa lɔ de ɖu eji go yí wo de gbe kpɔ afiɖe yi a nɔ le jiŋkushi lɔ mɛ go. ⁹ Wo cucu edangangan blibaa lɔ tii le jiŋkushi lɔ mɛ. É yí nyi edan xoxwitɔ lɔ ci yí wo yɔnɔ be legba kodo santanna ci yí blebleɛ agbetɔwo pleŋ le nyigban lɔ ji. ¹⁰ Eyi ŋ se yí egbe ɖeka ɖyí sɛnŋsɛnŋɖe le jiŋkushi mɛ yí nú be: «Ecɛviɛ ɔ, gacimɛ yí Mawu a xɔ nɔ amɛ dó na ɖó! Míwo Mawu ɖe yi ŋsɛn kodo yi 'fiɔɖudu dansin. Yi Kliso lɔ ɖe yi ŋsɛn dansin. Ɖó ɔ, wo sɔ ehwɛdonɔamɛtɔ ci yí dodoɔ ehwɛ mìwo nɔviwo ezan kodo kede le ŋmɛ nɔ mìwo Mawu sɔ́ danŋkpɛn ɖaɖa nyigban jí. ¹¹ ehwɛdonɔamɛtɔ lɔ jí sɔ́ to lɛngbɔvi lɔ 'hun kodo kunu ci yí nɔvi lɔwo ɖeɖeɛ so nú mɛ. kaka ci yí wo kpɔkpɔ eku nɛnɛhan cán ɔ, wo de tɛdo wowo 'gbe nu go, wo sɔ ke eku. ¹² É yí na taɖo ɔ, jiŋkushi kodo míwo ciwo yí ɖo nɔxu dó mɛ, mí kpɔ jijɔ! Vɔ ɔ, jɔgbevɔin hin yí nyi ecɛ nɔ mí ɔ, nyigban kodo axu! Ɖó ɔ, Legba ɖyiva mí gbɔ yí je axɔ dó ete nɔ ci yí é nya be gamɛ kankin yí kpɔtɔ nɔ eye ŋci.» ¹³ Ci yí edangangan blibaa lɔ kpɔ nya be wo sɔ eye danŋkpɛn ɖaɖa jí ɔ, é tɔ́ nyɔnu lɔ ci yí ji evi ŋsuvi xɔxɔ donu. ¹⁴ Nɛnɛ ɔ wo sɔ haku gangan lɔ 'wa amɛve lɔwo na nyɔnu lɔ yí a zo yi fini ci yí wo drado daɖɛ nii le zogbe lɔ mɛ . É hɔn yí wo a tɔ enuɖuɖu nanii le nɛn kaka sɔna exwe amatɔn yí edan lɔ a ci azɔge nii. ¹⁵ Eyi edan lɔ cú eshi ɖaɖa shigbe etɔsasa nɛnɛ so aglanmɛ yí eshi lɔ sa kplɔ nyɔnu lɔ dó keŋ yí a lii hɛnyi. ¹⁶ Vɔ ɔ, nyigban va do alɔ nyɔnu lɔ yí ke enu yí nu etɔsasa gangan lɔ ci yí edan gangan blibaa lɔ cú tii le aglan mɛ. ¹⁷ Ci yí edangangan blibaa lɔ je axɔ dó nyɔnu lɔ nú ŋci ɔ, e trɔ va tɔ ahwa wawa kodo nyɔnu lɔ jijimɛvi kpɛtɛ ciwo yí wanɔ do Mawu 'gbeɖeɖɛwo jí yí gbe sɔ wowoɖekiwo kunɔ do kunu ci yí Yesu ɖe lɔ nú. ¹⁸ Le i godu ɔ, edangangan blibaa lɔ vayici axutu.