¹ Ecɛyɛ ɖe, nɔvinyɛwo, eji le jɔ mí le Axwetɔ mɛ. Nagbe ŋwlɛ wema ɖaɖa mí yí a gbé enyɔ cɛwo ke nɔ mí do mɛ. D'é cicì ekɔ nɔ ŋ go. A kpedo mí nu sɔwu nɛnɛ. ² Mí kpɔ nyuiɖe le evɔnwatɔ, avu hɔnwo nu. Mí kpɔ nyuiɖe le amɛ ciwo cucuɔ cuɔ mí do evososo 'nyɔ mɛ nu. ³ Míwo xɔsetɔwo yi nyí amɛ ciwo yí wo so evo nɔ adoduitɔ. Ɖo míwo le mawu sɛn le yi Gbɔngbɔn mɛ. Mí cucuɔ eglo be mí nyí Yesu Kliso tɔ. Míwo de kannɔ do agbetɔwo 'kɔnuwo ji go. ⁴ Enyɛ yi e le nɔ be na kando akɔnu hɔnwo ji gbɔxwe. Nɔ amɛɖe kpɔ be eye can ye a wɛɛ dru ɔ, enyɛ, ŋ le ŋkɔ nɔ amɛ lɔ boo. ⁵ Enu ci yí na yi ŋ nunu nɛnɛ han ge. Ŋ keke amɛnyitɔ lɔ ji yí wo so evo nɔ ŋ le. Israyɛlivi jiji ŋ nyí yí so Bɛnʒamɛ kɔta mɛ. Tɔgbuinyɛwo pleŋ nyi Yuɖatɔ. Ŋ wanɔ do ese ci yí Mawu do nɔ mì sɔto Mɔyizi ji shigbe lehanci Falisitɔ wanɔ do ese ji do nɛnɛ. ⁶ Mìwo Yuɖatɔwo 'kɔnuwo wawa nɔnɔ veviɖe nɔ ŋ kaka ŋ va tɔ yumɛ cici nɔ mawu 'ha lɔ. Kuso esejiwawado jɔjɔɛnyinyi nuɔ, amɛɖe d'a kpɔ ehwɛ ɖe a do nɔ ŋ go. ⁷ Ŋ bubu be enu hɔnwo a do ŋ ji sasa. Vɔ ecɛviɛ ɔ , ŋ va sɔ wo be enuguamɛwo keŋ a sɛn eŋ a kudo Kliso nu. ⁸ Nyɔnɔnɔnuitɔ ɔ, ŋ sɔ enu hɔnwo pleŋ be gbaliwo. Ɖo nɔ ŋ jeshi nyaŋ 'xwetɔ Yesu Kliso ɖɛ ɔ, e nyɔ nɔ ŋ sɔwu enu hɔnwo pleŋ. Ŋ xado nu yí tashi enu wo pleŋ enuwo pleŋ yi sɔ wo be enugbaliwo (enuguamɛwo) yí a sɛn eŋ kpɔ Kliso. ⁹ Yi a nyi yitɔ blebu. Ŋ degbe kpɔnɔ do jɔjɔɛnyinyi ci yi le esejiwawado mɛ nɔ ŋ nu yí nunɔ viɛ be ŋ nyí amɛjɔjɔɛ le Mawu ŋmɛ o. Enu ci yi sɔ ŋ trɔ amɛjɔjɔɛ le Mawu ŋmɛ yí nyí kpɔ be ŋ kando Kliso ji jɔjɔɛnyinyi hɔn so Mawu gbɔ yí nɔ anyinɔnɔ do Klisojixɔxɔse ji. ¹⁰ Enu ci jiɛ ŋ le pleŋ yí nyí kpɔ be na jeshi Kliso yí a gbe nya ŋsɛn ci yí fɔin so ekuwodi. Ŋ gbe jijiɛ hɛnnɛ be na ɖu aya yu a ku eku ŋmɛɖeka kodii. ¹¹ Yí a le emɔkpɔkpɔ mɛ be Mawu a va fɔn enyɛ can so ekuwodi ¹² Ŋ de nunuɔ be ŋ xotɔ enu ci yí ŋ nyanya lɔ go. Kpɔ ŋ de nunuɔ be ŋ sɔ egbe go. Vɔ ŋ le egbla ji be nɔ a je alɔmɛ nɔ ŋ. Ɖo ŋ je alɔmɛ nɔ Yesu Kliso vɔ. ¹³ Nɔvinyɛwo, ŋ de bu nɔ be nyaŋ 'lɔwo sun ji hɔɖe go. Vɔ ɔ, ŋ ŋlɔbe enu ciwo yí le godu nɔ ŋ keŋ yi nyanya rnu ciwo yí le ŋkɔ. Enu ci ɖekɛ yí ŋ wawa nɛ. ¹⁴ Nɛnɛ ɔ ŋ le eju ji kplɔ efin ci yí Mawu jijiɛ a va cu nɔ mì do. Mawu yɔyɔ mì so jeŋkushi be mìwo le va xɔse so to Yesu Kliso ji. ¹⁵ Míwo ciwo pleŋ yí shin vɛ le xɔse mɛ ɔ, susu hɔn yi ɖo a le tamɛ nɔ mí nɛ. Vɔ nɔ susu bù ɖè gbe le tamɛ nɔ míwo domɛtɔ d'é ɔ, Mawu a ɖe enu ci yí je dansin nɔ mí gbajɛ́ɛ. ¹⁶ Nɔ é gbe nyi eɖe can ɔ, mí na nɔ mi a yí emɔzɔnzɔn lɔ ji shigbz lehanci mí wɛwɛ do sasa kaka va sɔɖonɔ egbɛ viɛ nenɛ. ¹⁷ Nɔvinyɛwo mí to nyaŋ 'fɔ ji yí a wa enu shigbe enyɛ nɛnɛ. Mí le ŋkuvido amɛ ciwo yí totoɔ nyaŋ 'fɔ ji nu yi a wa enu shigbe wowo han nɛnɛ. ¹⁸ Ŋ nuinui nɔ mí sasa. Ŋgbe nuinuiɛ nɔ mí egbɛ kodo ɖashi le ŋmɛ sugbɔtɔ le agbe nɔɔ shigbe eku ci yí Kliso ku do acisoga ji de ɖyi enuɖe do enu nɔ wowo o nɛnɛ. ¹⁹ Le vɔvɔnu ɔ, wo a yi trɔntrɔnmɛ. Xodu yí nyí enu ci yí wowo sɛnsɛn. Enu ci yí a wa ŋkpɛn nɔ amɛ mɛ yi wo xɔnɔ kɔkɔ le.Xexecɛ mɛ 'nuwo ɖekɛ yí le etamɛ nɔ wowo. ²⁰ Míwo yɛ ɔ, míwo 'ju yi nyi Ʒeluzalɛmu. Míwo yɛ ɔ, míwo nɔnɔ ete kpɔ Hwlɛngantɔ, míwo 'xwetɔ Yesu Kliso be yí a so ehɔn yí a va. ²¹ Ŋsɛn le shi. Ŋsɛn lɔ na yí e xo eta nɔ enuwo pleŋ. Nɔ é va trɔva ɔ, a sɔ ŋsɛn lɔ trɔ ashi so míwo lankpu klekliwo nu yí lankpu lɔwo a va klɛnklɛn shigbe yitɔ han nɛnɛ.