^{1 2} Kliso lɔ donɔ ŋsɛn lanmɛ nɔ mí. Lɔnlɔn ci yi é ɖo nɔ mí donɔ eji exo nɔ mí yi yi gbɔngbɔn nɔnɔ ekacaca ɖeka mɛ kodo mí. E ɖonɔ lɔnlɔn nɔ mí yi gbe na yi na yimí fanɔ xomɛ nɔ míwonɔnɔwo. D'é nyi nɛnɛ yɔ nɛ ba? ² E yi na taɖo ɔ, mí na nɔ anyi jijɔkpɔkpɔ blebu, sese le lanmɛ ɖeka, lɔnlɔn deka, luvɔ ɖeka kodo susu ɖeka. ³ Mi ŋgbe wanɔ enuɖe yi a sɔ dansin be míwo yí byi enu ci yi a jɔ go; nɛnɛke ɔ, mí ŋgbe wanɔ enuɖe kodo amɛɖekitɛntɛn susu go. Vɔ mí sɔnɔ míwoɖekiwo hwe yi a kpɔnɔ amɛ kpɛtɛwo shigbe amɛ ciwo yi le ŋkɔ nɔ mí nɛnɛ. ⁴ Amɛɖe ŋgbe lenɔ ebu nɔ yiŋtɔ 'nuwo ɖekɛ go. Mí lenɔ ebu veviɖe nɔ amɛbuwo 'nuwo. ⁵ Mí nɔ agbe le míwonɔnɔwo mɛ shigbe lehanci yi wo nɔnɔ agbe le Yesu Kliso mɛ do nɛnɛ. ⁶ Ci yi Kliso lɔ ɖo Mawu nɔnɔmɛ can ɔ, d'é ji be ye a sɔ kodo Mawu o. ⁷ Vɔ ɔ e lɔn yi gbe bubutɔxu hɔn ci yi e lé va sɔ yiɖeki trɔ edɔwavi. Wo ji shigbe lehanci yi wo jinɔ agbetɔ do nɛnɛ yi amɛshamɛ xɔɛ do agbetɔ ji. ⁸ E sɔ Yiɖeki hwe yi se etonu nɔ mawu kaka va ku, acisoga ku. ⁹ E yi na taɖo yi Mawu na texwe kɔkɔtɔlɔ yi, yi gbe nii nyikɔ ci yi wuegan nyikɔwo pleŋ. ¹⁰ Be nɔ wo yɔ Yesu nyikɔ ahan ɔ, enuleagbewo pleŋ a je ekloji nii le jeŋkushi mɛ , le nyigban ji el€ kodo le nyigban gɔnmɛ. ¹¹ Eyi amɛshamɛ a hunmɛ be Yesu Kliso yí nyi Axwetɔ sɔ na nɔ Mawu kanfukanfu. ¹² Ci yí é le nɛnɛ han ɔ, nya 'xlɔ veviwo, mí senɔ etonu nɔ Mawu hwecinu yi ŋ le mígbɔ vayi. Egbɛcɛ ci yi ŋ va le azɔge nɔ mí can mí gbe sese etonu nii doji sɔxu nɛnɛ han. Nɛnɛ ɔ, mí sɔ hwlɛnhwlɛn ci yi mawu hwlɛn mí gan lɔ wa edɔ le shishiɖoɖo nɔ Mawu kodo hunhunhun mɛ. ¹³ Ɖo Mawu le edɔ waa le mí mɛ nɔ mí a ji be yewo a wa enu ciwo yi sɔ kodo yi ɖoɖowo yi a gbe wa do wo ji hɛnnɛ. ¹⁴ Mí ŋgbe totoɔ enyɔ do enu ciwo pleŋ mí wawa nu go. yi mí ŋgbe dɔndɔn enyɔ so wo nu hɛnnɛ go. ¹⁵ Gahɔnmɛ ɔ, mí a le xomɛvu yí amɛɖe d'a kpɔ ehwɛ ɖe a do mí go. Mí a nyí Mawu Eviɛ adoduiwo yi a kɔnɔ shigbe xexemɛ klɛnklɛnwo nɛnɛ le jijimɛ amɛbletɔwotɔ kodo amɛvɔnwotɔ domɛ. ¹⁶ Nɛnɛke yi mí a nɔ yí a le agbe 'nyɔ lɔ nuɔgɔ nɔ amɛwo nɛ. Gahɔnmɛ ɔ, nɔ́ Kliso va trɔva ɔ, eji a jɔ ŋ so mí nu. Ɖo edɔ ci yí ŋ wa kodo aya a ŋ ɖu de nyi enugbali ¹⁷ Nɔ wo gbe wu n can ɔ, nyaŋ 'hun ci yi a kɔdo nyigban a nyi avɔsa ci wo a sɔ́ bɔdo avɔsa ci mí wawagɔ nu nɔ Mawu nú. Míwo 'vɔsa ci wo hɔnwo yí nyi edɔ ciwo yí xsɔe na yí mí wawagɔ. Nɔ é nyi nɛnɛ han ɔ eji a jɔ ŋ yí na kpɔ jijɔ kodo mí pleŋ. ¹⁸ Míwo can mí kpɔ jijɔ yí a kpɔ jijɔ kodo ŋ. ¹⁹ Ŋ kandoji be Axwetɔ Yesu a lɔn yi na dɔ Timɔte ɖaɖa mí sabaaɖe yɛ. Nɛnɛ han ɔ enyɔ ciwo yi a se le mí gbɔ yi agbe va nu nɔ ŋ a do ŋsɛn lanmɛ nɔ ŋ. ²⁰ To evo nɔ Timɔte ɔ, ŋ de gbe wa amɛɖe ɖɛ ci yi míwo 'nu wawa edɔ le lanmɛ nɔ nyuiɖe enyɛ nɛnɛ go. ²¹ Amɛ kpɛtɛwo pleŋ le wowo ɖekɛwoto jiɛ yí gbe Yesu Kliso tɔ daɖɛ. ²² Míwoŋtɔwo nyá be Timɔte yɛ ɔ, yɛ dansin be ye nyi amɛnyui. E wa edɔ kodo ŋ le Eŋɛnyui lɔ dodo mɛ shigbe lehanci evi wanɔ edɔ kodo eda nɛnɛ. ²³ Ŋ jijiɛ a va dɔɛ ɖaɖa mí gbɔ nɔ ŋ va se eta nɔ nya 'nyɔwo ɖegbɔ. ²⁴ Ŋ kandoji be Axwetɔ a ɖe emɔ nɔ ŋ yí enyɛŋtɔ a va gbɔ hɛnnɛ sabaaɖe yɛ. ²⁵ Ŋ kpɔ be e ʒian be na tashi Epfloditi ci yí nyi nɔvinyɛ kodo nyaŋ kpedoŋtɔ nɔ a trɔgbɔva mí gbɔ. Eyɛ, amɛdɔdɔ ci yi mí dɔ ɖaɖa ŋ yí é va kpedo ŋ nu le eʒian mɛ. Enyɛ kodo eyɛ wa edɔ yi gbe wa ahwa nɔ Eŋɛnyui lɔ dodo. ²⁶ Vɔ ecɛviɛ ɔ, míwo kpɔkpɔ druidrui sugbɔ yí míwo 'nu gbe wawa edɔ le lanmɛ nii veviɖe nɔ ci mí se be yi lédɔ. ²⁷ E lédɔ nyao kaka hwɛɖeka yi kpɔtɔ yí a ku. Vɔ ɔ, Mawu ku ŋshishi nii. D'é nyi Yiɖekɛ yí e ku ŋshishi lɔ nɔ go. E ku ŋshishi nɔ enyɛ can nɔ vevesese bu ŋgbe va je esɛ ji nɔ ŋ go. ²⁸ E yí na taɖo yí ŋ ji veviɖe be na tashi nɔ a gbɔ va mí gbɔ. gahɔnmɛ ɔ nɔ míwo kpɔɛ ɔ, eji a jɔ mí yí enyɛ can ma vo. ²⁹ Nɔ egbɔ va mí gbɔ ɔ, mí xɔɛ kodo jijɔ gangan ɖeka shigbe nɔvi le Axwetɔ mɛ nɛnɛ. Amɛ shigbe eyɛ nɛnɛ ɔ, mí ɖonɔ bubu yi nu. ³⁰ Ɖo hwɛɖeka yi kpɔtɔ yi a ku do edɔwawa mɛ nɔ Kliso sasa. Eyi 'gbe ke eku yi kpedo ŋ nu. kpekpedonu hɔn ɔ, míwoŋtɔwo d'a sɛn eŋ wɛɛ sasa go.