¹ Enyɛ Pɔlu kodo Timɔte, Yesu Kliso 'dɔwaviwo, ŋwlɛŋwlɛ wema cɛ ɖaɖa amɛ ciwo yí nyi xɔsetɔwo sɔto Yesu Kliso ji le Filipi jugan mɛ. Mi ŋwliiŋwlii ɖaɖa wowo kodo Mawu 'há lɔ kplɔtɔwo kodo ehamɛmɛganwo hɛnnɛ. ² Mawu, miwa 'da kodo Axwetɔ Yesu Kliso lé wa xomɛvunu nɔ mí yí a gbe na fafa mí. ³ Ŋ do akpe nɔ́ nyaŋ Mawu tɛgbɛ nɔ míwo nu va etamɛ nɔ ŋ. ⁴ Gashagamɛ nɔ ŋ wawa egbedodoɖaɖa do eta nɔ mí pleŋ ɔ, ŋ wanɔ egbedodoɖaɖa lɔ kodo jijɔ. ⁵ Ɖó ɔ, mí do alɔ ŋ le Eŋɛnyui lɔ dodo mɛ so hwecinu yí mí tɔ Eŋɛnyui lɔ sese kaka va sɔnanɔ egbɛ. ⁶ Ŋ kandoji be Mawu ci yi tɔ edɔnyui wawa le mímɛ a yi edɔ lɔ ji kaka yi a vɔɛ le gbecigbe yi Yesu Kliso a trɔva. ⁷ E nyɔ be na ɖo susu hɔnwo do mí pleŋ nu. Ɖó ɔ, míwo 'nu le etamɛ nɔ ŋ. Nyao ɔ, le nya ŋ 'gakpamɛnɔtɔ nɔnɔmɛ, le gacimɛ yiŋ le eta hwlɛɛn nɔ Eŋɛnyui lɔ yi gbe le egbe tɛɛ do ji ɔ, Xomɛvu cihan yí Mawu wa nɔ enyɛ ke yi é wa nɔ míwo hɛnnɛ. ⁸ Mawu a sɛn eŋ ɖe kuknu nɔ́ ŋ be ŋ lɔn mí pleŋ veviiɖe kodo xomɛfafa ci yi Yesu Kliso gbɔ. ⁹ Enu ci yi ŋ biɔnɔ Mawu le nyaŋ gbedoɖawomɛ yí nyi be míwo lɔnlɔn le su egbɔ do ji kaka enunyanya a sun mɛ yí enumɛmɔmɔŋje can a sɔ egbe le mɛ. ¹⁰ Nɛnɛ ɔ, mí a sɛn eŋ a donɔ jeshi enu ci yí nyi enu xɔashi gahɔmɛ ɔ, mí a nyi nyɔnɔnuitotɔwo yi wo da kpɔ enyɔ ɖe a nú so mí nú gbecigbe yí Kliso lɔ a trɔwa o. ¹¹ Yesu Kliso ana yí mí a sɛ́n jɔjɔɛnyinyi 'kusɛnsɛnwo sayaa kaka nɔ́ amɛɖe kpɔ́ ɔ, yɛ a do bubu Mawu nu yi a gbe kanfuí. ¹² Nɔvinyɛwo, ŋ ji be míwo le nya be nɔ wo a nu teŋ ɔ, enu ci yí jɔ do ŋ ji na be Enɛnyui lɔ gbankpedo eto. ¹³ Enu hɔn yí na taɖo yí le kojoɖotɔlɔ́ xwé pleŋ mɛ kodo le afishafi ɔ, amɛwo nya bé edɔ ci yí ŋ wawa nɔ Kliso lɔ yi na yí ŋ le gakpa mɛ. ¹⁴ Eyi ci yí xɔsetɔ sugbɔwwo kpɔkpɔ ŋ le gakpa mɛ ɔ, é na kankandoji wo do Axwetɔ ji. edɔngbegbe gbe ɖo lanmɛ nɔ wo dó jí yí wo le Mawu 'nyɔ lɔ nuɔn nɔ amɛwo le mavɔnmavɔn mɛ. ¹⁵ Le nyɔnɔnui mɛ ɔ, xɔsetɔ ɖekawo le axwa doɔgɔ yi le Kliso 'nyɔ nuɔgɔ nɔ amɛwo do enuciŋmɛnɔamɛtɔ ji kodo enyɔjileamɛnutɔ ji. Vɔ amɛɖewo wɛwɛ kodo susu nyuiwo. ¹⁶ Nɛnɛ "mɛ wowo wɛwɛ kodo lɔnlɔn ɖo wo nyá be Eŋɛnyui lɔ yí ŋ va yi a va hwlɛn eta nɔ. ¹⁷ Vɔ ɔ amɛ eɖetɔ wowo le Kliso 'nyɔ lɔ nuɔgɔ do lehanci yí é dro wowo le lanmɛ do ji. Susu ciwo yí wo ɖo yi sɔ le enu lɔ wagɔ nɛnɛ de mɛ́ go. Wo bubuɔ be yewo a do vevesese nɔ enyɛ do ji le gakpa mɛ. ¹⁸ Wo nunu enyɔ lɔ kodo xomɛ fin, wo gbe manui nui kodo xomɛ fin, enyɔ hɔnwo de nyi enyɔ ɖe go. Ɖekpokpoiɖe ŋmɛ ci a nyi ɔ, amɛwo sese Kliso lɔ nyɔ yɛ. Na gbe kpɔtɔ a kpɔkpɔ jijɔ so nu. ¹⁹ Ɖo ɔ, ŋ nya be míwo gbedoɖawo kodo kpekpedonu ci yí a so Yesu Kliso Gbɔngbɔn gbɔ nɔ́ ŋ a na yi na gan le enyɔ cɛ mɛ. ²⁰ Enu ci yi ŋ nɔnɔ ete kpɔ xaxaxa, enu ci yí ŋ kpɔkpɔ emɔ nɔ́ ɔ, é yi nyí kpɔ be enyɛ ŋgbe va ɖu ŋkpɛn o. Ŋ ɖo kankandoji blebu be trololoviɛ alo hweɖekpokpoi nu ɔ, Kliso lɔ a nyi kanfukanfu le nyaŋ gbazamɛ, soto agbe ci yi ŋ le alo soto eku ci yi na ku mɛ. ²¹ Ɖo le enyɛ yɛ gbɔ ɔ, agbe ɔ, Kliso lɔ yɔ́ yí eku nyí ele nɔ ŋ. ²² Gankegan nɔ é nyi kpɔ be be ci ŋ le agbe yi le edɔ waa le gbaza mɛ ɔ, nyaŋ 'dɔwawa lɔ a ɖo ele ɖee, nunya ci yi na sɔ le eku kodo agbe domɛ ba. ²³ A sɔ le enu amɛve hɔnwomɛ nyi enyɔ yí le ŋ jí. É drodro ŋ sugbɔ be ma so yi a vayi nɔ kodo Kliso lɔ. Ehɔn yɛ nyɔ sɔwu bōo. ²⁴ Vɔ do míwo ta ɔ, é ɛian sugbɔ be ma nɔ mí gbɔ le gbza mɛ nɛnɛ. ²⁵ Kankandoji le ŋ shi, ŋ nya nyuiɖe be na ci agbe yi a nɔ mí pleŋ gbɔ yi a gbe nɔ mí gbɔ ké nɔ míwo shinshindoki kodo míwo jijɔkpɔkpɔ le xɔse mɛ. ²⁶ Gahɔnmɛ nɔ ŋ va trɔgbɔva mí gbɔ ɔ, enu ci yi Yesu Kliso wa le nyaŋ 'gbe mɛ a na yí yi 'nu a gbe do jijɔ nɔ mi do ji. ²⁷ Kpoŋɖe, mí nɔ agbe lehanci Kliso 'ŋɛnyui lɔ nú be wo lé nɔ agbe do nɛnɛ. Gahɔnmɛ nɔ ŋ va mí gbɔ can, ŋ le azɔge nɔ mí can ɔ, ma sese be susu le kuɖeka nɔ mí yí mí gbe le agbla jeɛ do eju nɔ xɔse ci yi Eŋɛnyui lɔ nanɔ amɛ. ²⁸ Mí ŋgbe tashi míwoɖekiwo ɖɛ nɔ míwo ketɔnɔwo a do vɔnvɔn nɔ mí go. Nɔ mí de vɔnvɔn nɔ ketɔ lɔwo go ɔ, é yi a nyi jeshidu ci yi a dodo ɔ asɛn be wo yiyi trɔntrɔnmɛ. Nɔ míwo yɛ ɔ, a trɔ a nyi jeshidu nɔ míwo xɔsetɔwo kpɔ hwlɛngan. ²⁹ Ɖo Mawu wa xomɛvunu nɔ mì sɔto Kliso lɔ ji nɔ mí a xsɔɛ ji se yi a gbe ɖu aya do eta nii hɛnnɛ. ³⁰ Míwo can mí gbe le ahwa lɔ ci yi ŋ wanɔ, yi gbe wawa viɛ. Ecɛ yɛ can ɔ mí gbe se yí wo nunuɔ lehanci yi ŋ gbe le ahwa lɔ ji do.