¹ Nɔvunyɛ veviwo, enu ci yí na taɖo yí míwo kpɔkpɔ drodro ŋ veviɖe nɛ Míwo yi na yi ŋ kpɔkpɔ jijɔ yi gbe na yí wo dodoɔ bubu ŋ nu. Nya 'xlɔ vevewo, e yi na taɖo ɔ, mí nɔ ekacaca ɖeka mɛ kodo Yesu Kliso goŋgoŋ. ² Evodi, ŋ ɖe kuku nɔ eo. Sɛntishi, ŋ ɖe kuku nɔ eo. Mí sɔ egbe ɖo eju. Ɖo Axwetɔ yí mí nyí. ³ Eo amɛ ci yi wanɔ edɔ jodo ŋ adoduimɛtɔ, ŋ biɔbiɔ so eo gbɔ be eo le kpedo nyɔnu amɛve cɛwo nú Ɖo wo wa edɔ kodo ŋ le Eŋɛnyui lɔ dodo mɛ. Enyɛ kodo Klema kodo nyɔnu lɔwo kodo kedonutɔ buwo wa edɔ do eju. Mawu ŋwlɛ wo pleŋ nyikɔ do agbe wema lɔ mɛ. ⁴ Gashia gamɛ ɔ, eji le jɔnɔ mí le Axwetɔ lɔ mɛ. Ŋ tɛṭɛ egbe doji nɔ mí be eji le jɔnɔ mí. ⁵ Mí nyɔdɔmɛ nɔ amɛshiamɛ. Axwetɔ lɔ a trɔva majinjinɖe yɛ. ⁶ Mí ŋgbe so jika nɔ enuɖe go. Le nɔnɔmɛ ɖekpokpoi mɛ ɔ, mí wa gbedoɖa yí a biɔ enu ci yí ʒian mí Mawu yí a gbe do akpe nii. ⁷ Eyi Mawu a na mí fafa ci yí wu egan enu ciwo pleŋ yí agbetɔ a sɛn eŋ mɔnmɛ nɔ. Fafa lɔ a na yi míwo 'jiwo kodo míwo susuwo mɛ a va le Yesu Kliso mɛ. ⁸ Nɔvinyɛwo , enyɔ kpɛtɛkpɛtɛ ci yí na nú nɔ mí ge: mí na nɔ enu ci yí nyí nyɔnɔnui kodo enu ciwo yi amɛwo lɔnnɔ ɖekɛwo a nɔ etamɛ nɔ mí. Enu lɔwo yi nyí enu adodui ciwo ni yí wo ɖonɔ bubu: enujɔjɔɛwo kodo enumɛmɛwo; enu ciwo yí nyɔ́ nyuiɖe kodo enu ci wo yí nanɔ kɔkɔ amɛ. ⁹ Mí nya enu ciwo yí ŋkplan mí. Mí gbe se enyɔ ciwo yí ŋ nu nɔ mí yí gbe kpɔ enu ciwo yí ŋ wa le mí gbɔ. Mí sɔ wo do edɔwawa mɛ. Mawu a yí nanɔ fafa amɛ a nɔ kodo mí. ¹⁰ Eji jɔ ŋ sugbɔ le agbe ci yí ŋ le le Axwetɔ mɛ mɛ. Ɖo mí gbe va dansin míwo lɔnlɔn be nya 'nu le susu mɛ nɔ Yewa. Ŋ nya be ŋ le susu mɛ nɔ mí, vɔ mí de kpɔ emɔ ci yí mí a to yí a ɖii dansin nɔ ŋ sasa go. ¹¹ Ɖ'é nyi kpɔ be eʒian mɛ ŋ le taɖo yí nunuɔ nɛnɛ han go. Ɖo ŋ kplan enyɛɖeki lehanci yí enu ci yí le amɛ shi sunnɔ amɛ do. ¹² Ŋ nya lehanci yí wo zannɔ wamɛnɔ 'gbe kodo dɔkunɔ 'gbe do. Le afishafi, le nɔnɔmɛ ɖekpokpoi mɛ ɔ, ŋ kplan lehanci yi xodu ɖɔnɔ amɛ, shive cinɔ amɛ, enu nɔnɔ shi kodo lehanci yí enu hwenɔ do amɛ do. ¹³ Ŋ sen eŋ wanɔ enu hɔnwo pleŋ nɔ ŋsɛn ci yí Yesu Kliso nanɔ ŋ ŋci. ¹⁴ Gankegan ci mí kpedo ŋ nu le vevesese cɛ mɛ ɔ, é nyɔ. ¹⁵ Nɔvinyɛ Filipitɔwo, míwoŋtɔwo nya nyuiɖe be ci yi ŋ tɔ edɔ ji le gɔmɛjeje nɔ Eŋɛnyui lɔ dodo ɔ, ŋ va so le Maseduwanu nutu mɛ. Gahɔnmɛ ɔ, Mawu 'ha ɖé de va ɖe nɔviwawa 'fɔ yí na enuɖe ŋ ɖada sɔ zeto miwotɔ nu go. ¹⁶ Ci yí ŋ le Tɛsaloniki jugan mɛ, nɔ enuɖe ʒian ŋ ɔ, mí sɔɛni ɖaɖa ŋ zenɛniɖe. ¹⁷ D'é nyi ji ŋ jijiɛ be wo le na enu ŋ go. Vɔ ɔ ele ci mí a kpɔ le enunana lɔ mɛ jiɛ ŋ le. ¹⁸ Ŋ xɔ enu ciwo yí mí sɔ ɖaɖa ŋ. Epafloditi hɛn míwi 'nunanawo vɛ nɔ ŋ. Ecɛyɛ ɔ ŋ wa enuwo ɖɛ sugbɔ. Enuɖe de li yí gbe ʒian ŋ yiɛ go. Míwo 'nunana lɔwo nyi avɔsanu ci yi le ete hwɛn lililili yí Mawu xɔ kodo eŋjeje. ¹⁹ Enu ciwo pleŋ yi ʒian míwo ɔ, nya Mawu a sɔ wo le yi dɔkunu sugbɔ sugbɔwo mɛ yí a sɔ wo ji nɔ mí sɔ to Yesu Kliso ji. ²⁰ Kanfukanfu lé nyí Mawu mìwo 'da tɔ so eviɛcɛyɛ kaka a sɔyi mavɔmavɔ. Xoaɖyi! ²¹ Le Yesu Kliso nyikɔ mɛ ɔ, ŋ dodoɔ egbe ɖaɖa xɔsetɔwo pleŋ. Xɔsetɔ ciwo yí le ŋ gbɔ le elɛ can do egbe ɖaɖa mí. ²² Xɔsetɔwo pleŋ, veviɖe ciwo yí le Seza, Efiɔgangan Hlɔmutɔ 'xwemɛ can do egbe ɖaɖa mí. ²³ Axwetɔ Yesu Kliso xomɛnu le nɔ kodo míwo gbɔngbɔn.