¹ Eyi Yesu gbe nu nɔ wo be : " Le nyɔnɔnui mɛ ɔ, ŋ nunuɔ nɔ mí be amɛɖewo le mí mɛ le elɛ yɛ́ yí wowo d'a kú gbɔxwe yi a kpɔ mawu 'fiɔɖuɖu lɔ yí a gbɔgbɔ hii kodo ŋsɛn go." ² Ŋkeke amadɛn godu ɔ, Yesu kplɔ Piyɛ, Ʒaki kodo Ʒan yi wo yí ekpo yijí yijí ɖeka ji wowoɖekɛwo. Le hɔntɔxu ɔ, nɔnɔmɛ trɔ nɔ́ Yesu le ŋmɛ nɔ wo. ³ Yi "wuwo vá ɣe yi va dada ezo ŋlɛŋlɛŋlɛ kak kpɔ amɛɖe de le xexecɛ mɛ yí a nya enu yí a ɣe ahan go. ⁴ Eli kodo Mɔyizi vaze dó wo ji yi le nuxu xoɔ kodo Yesu. ⁵ Gahɔnmɛ yi Piyɛ nu nɔ́ Yesu be: " Cicagan e nyɔ be mí a nɔ elɛ. Mi acu gbadɔ amɛtɔn do elɛ. Ɖeka a nyi aotɔ, ɖeka a nyi Mɔyizi tɔ yí kpɛtɛ a nyi Elitɔ." ⁶ Piyɛ degbe nya enyɔ ci yi a nu go. Ɖo ɔ, e ɖyi vɔnvɔn nɔ yɛ kodo yi kpenawo sugbɔ. ⁷ Jeŋkushi 'zɔ eka cɔ́n wo. Eyi egbe ɖeka ɖyi le azɔ lɔ mɛ be: " Amɛ cɛ yí nyi Evinyɛ vevi; mí ɖo eto yi l!" ⁸ Trololo ɔ, nukplanvi amɛtɔn lɔwo ɖe ekɔ kpɔ axají nɔ́ wowoɖekiwo, vɔ nu sowu yesu ɖekɛ go. ⁹ ci yí wo ɖyidyiɛ le ekpo lɔ ji ɔ, Yesu ɖe egbe nɔ wo be wo ŋgbe nu enu ci yi wo kpɔ nɔ amɛɖe gbɔxwe nɔ́ Agbetɔvi lɔ a fɔn so ekuwodi go. ¹⁰ Wo wa do ese ci yi Yesu do nɔ wo lɔ ji. Gankegan ɔ, wo biɔbiɔ wowonɔnɔ sebe: " Nyi yi taɖo yi e xoxoɔ nuxu so fɔnfɔnsokuwodi nu yɛ ɔ?" ¹¹ Wo biɔ́ Yesu se be: " Nyi ná taɖo yí esedɔwatɔwo nunuɔ be Eli ɖo a va gbɔxwe ɔ? " ¹² Yesu ɖoŋci nɔ wo be: " Eli ɖo a va doŋkɔ keŋ yi a va dra enuwo pleŋ dó ɖɛ. Gankegan ɖee, nyí yi jɔ wo ŋwlɛ do Mawu 'nyɔ wemawo mɛ daɖɛ hɛnnɛ be Agbetɔvi lɔ a va kpe efun sugbɔ yí wo a va gbe yí nyɔ gbɔ ɔ? ¹³ Vɔ ŋ nunuɔ nɔ mi be Eli lɔ va vayi vɔ yi amɛwo ɖe efun nii shigbe lehanci yi e dro wo do kodo lehanci yi wo ŋwlɛ so nu dadɛ do nɛnɛ." ¹⁴ Ci yi Yesu kodo nukplanvi lɔwo va ɖo nukplanvi kpɛtɛwo gbɔ ɔ, wo kpɔ be amɛwo lɔ ahwa cɔnwo yi esedɔwatɔ ɖekawo le enyɔ dɔn kodo wo. ¹⁵ Kaka ahwakɔn lɔ a kpɔ Yesu ɔ, eji eŋ nɔ wo yi wo shi eju yí vayi do egbe nii,. ¹⁶ Eyi Yesu biɔ yí nukplanviwo se be: " Enyɔ ci yi mí dɔndɔn kodo esedɔwatɔ lɔwo ɔ?" ¹⁷ Ŋsu ɖea le ahwakɔn lɔ mɛ yí ɖoŋci nii be: " Cicagan, ŋ kplɔ evinyɛ vɛɛ nɔ eo. Ɖoɔ gbɔngbɔnvɔn ɖeka le mɛ yí d"e sɛn eŋ xoxoɔ nuxu. ¹⁸ Eyi nɔ gbɔngbɔnvɔn lɔ tɔ efun ɖeɖe nɔ ɖevi lɔ le afiɖekpokpoiɔ, e sɔ yanɔ egu do nyigban yi fucukɔ a totoɔ le enu nii gɔɖɔgɔɖɔ yí a le aɖukli ɖuɔ kliɖikliɖi yí a xo eci ɖɛ kacaa. Ŋ ɖe kuku nɔ ao nukplanviwo be wo le nya gbɔngbɔnvɔn lɔ toi le ɖevilɔ mɛ, vɔ wo de sɛn eŋ yi wɛɛ go." ¹⁹ Eyi Yesu nu nɔ wo be: " Miwo egbɛviwo, Mawu ji makandotɔwo! Kaka va sɔnanɔ kacimɛ yi na nɔ mí gbɔ asɔ sɛn ɔ? Kaka va do nɔ gahidemɛ yi na do eji kpɔkpɔ lehanci mí de kando Mawu ji do hɔn ɔ? Mí kplɔ ɖevi lɔ va nɔ ŋ! ²⁰ Eyi wo kplɔ ɖevi lɔ va nii. Zeɖeka ci yí gbɔngbɔnvɔn lɔ kpɔ Yesu ɔ, e hunhun ɖevi lɔ do ji yí juin gloo yí bliblibɔ nyigban. fucukɔ totoɔ le enu nii gɔɖɔgɔɖɔ. ²¹ Yesu biɔ ɖevi lɔ 'dalɔ se be: " so gahindemɛ yi enu lɔ tɔ ɖevi lɔ ɔ?" Eyi e ɖoŋci be: " so ɖevixhwɛmɛ ɖii yi e tɔɛ ji. ²² Kaba kaba ɔ, gbɔngbɔnvɔn lɔ cucuini ɖaɖa ezo alo eshi mɛ be nɔ yi aku. Vɔ nɔ a kpe jí ɔ, kpɔ dɔnusoi nɔ mi keŋ a kpedo mi nu." ²³ Eyi Yesu ɖoŋci nɔ evida lɔ be: " Nu e nunuɔ be enyɛ na kpe jí a? Enuɖe de glonɔ amɛ ci yí xɔ Mawu ji se go." ²⁴ Zeɖeka ɔ, ɖevi lɔ 'dalɔ tɔ axwa dodo be: "Ŋ xɔ mawu ji se. Gankegan ɔ, kpedoŋ nu. Ɖo anyi xɔse de shin go!" ²⁵ Ci Yesu kpɔ be amɛwo tɔ bɔbɔ do yewo gbɔ́ ɔ, e je adan do gbɔngbɔnvɔn lɔ be: " Eo aɖekuku kodo etkuku gbɔngbɔn, ŋ ɖeɖee egbe do eo ji, tó le mɛ kaba. Kplokplokplo, ŋgbe gbe trɔva mɛ go!" ²⁶ Eyi gbɔngbɔnvɔn lɔ do axwa yí hunhun ɖevi lɔ sɛnsinɖe yi to le mɛ. Ɖevi lɔ cuka gbɛɖɛɛ shigbe amɛkuku nɛnɛ kaka amɛ sugbɔ tɔ nunu be yi ku. ²⁷ Vɔ ɔ, Yesu le alɔnu nii yí fɔ́in yi e shi ete. ²⁸ Le yi godu ɔ, Yesu yí axwe mɛ. Ci yí yi kodo yí nukplanviwo ɖekɛ va le eju ɔ nukplanvi lɔwo biɔɛ se be: " Nyi yí na taɖo yí miwo de sɛn eŋ yi nya gbɔngbɔnvɔn hɔn toí miwoŋtɔwo o ɔ?" ²⁹ Eyi Yesu ɖoŋci nɔwo be: " Enuɖe de li yi a sɛn eŋ nya gbɔngbɔnvɔn hɔn gbɛmu toi sowu gbedoɖa kodo ŋcicidɔn go." ³⁰ Wo so le hɔntɔxu lɔ yi to Galile 'kan mɛ yí yikɔ. Yesu de ji be amɛwo le nya fini ci yí ye le go. ³¹ Ɖo ɔ, e kplankplan enu yí nukplanviwo be: " wo a sa Agbetɔvi lɔ nɔ amɛwo yi wo a wui. Vɔ ɔ, yi ŋkeke amɛtɔn lɔ gbe ɔ, á fɔn so ekuwodi." ³² Vɔ ɔ, nukplanvi lɔwo de seseɛ enyɔ ci yí Yesu nunuɔ gɔnmɛ go. Kpɔ wo de gbe edɔn yí a biɔ enyɔ ɖe gɔnmɛ yí se go. ³³ Wo va kapernaum jugan mɛ. Ci yí nukplanviwo se be: "Enyɔhin yí mì hxwlɛhwlɛ le emɔ ji gbɛsasa ɔ?" ³⁴ Vɔ ɔ, kpɔ wo de ɖoŋci nii go. Ɖó ɔ, ci wo le emɔ ji yí gbɔgbɔ ɔ, amɛ ci yí nyi amɛgan le wo mɛ hwlɛn wo le. ³⁵ Eyi Yesu nɔ anyinɔnɔ yí yɔ́ wowo wive lɔwo pleŋ yí nu nɔ wo be: " Nɔ amɛɖe jijiɛ be ye a nyi amɛganɔ, eɖo a sɔ yiɖeki hwe yi a nyí edɔwavi nɔ amɛshamɛ." ³⁷ Le i godu ɔ e kplɔ ɖeviwɛ ɖeka va wo mɛ. E kla ashi ekɔ nii yi nu nɔ wo be: ³⁶ "Nɔ amɛɖe kpɔ do ŋ nu yi xɔ ɖevi cɛwo domɛtɔ ɖeka ɔ, enyɛŋtɔ yi exɔ. Eyi nɔ amɛɖe xɔ ŋ ɔ, d'e nyi enyɛ ɖekɛ yi e xɔ go; e xɔ Edanyɛ ci yi dɔ ŋ ɖaɖa hɛnnɛ." ³⁸ Ʒan nu nɔ Yesu be: " Mɛgan, mì kpɔ amɛɖeka yi e le gbɔngbɔnvɔnwo nya le ao nyikɔ mɛ yi mì ji be mì agbe nii. Ɖo ɔ d'é le mìwo bɔbɔ mɛ go." ³⁹ Vɔ ɔ Yesu ɖoŋci nii be "Mí ŋgbe gbe nii go. Ɖó ɔ amɛɖe d'a sɛn eŋ wa enuiŋ ɖe le anyi nyikɔ mɛ yi le i godu trololo ɔ a gbe tɔ enyɔvɔn ɖe nunu so ŋ nu go. ⁴⁰ Nyao ɔ, nɔ amɛɖe de gbe mìwo 'nyɔ go ɔ, mìwo 'mɛ yi e nyi. ⁴¹ Le nyɔnɔnui mɛ ɔ, ŋ nunuɔ nɔ mí be nɔ amɛɖe na shi kɔkpu ɖeka mi, nɔ ci mi nyi kliso 'mɛwo taɖoɔ, Mawu d'a gbe efɛn macu nɔ amɛ lɔ gbeɖe go." ⁴² Yesu nu be: " Nɔ amɛɖe nyi afɔklɛnnu nɔ devihwɛ cɛwo ciwo yi xɔ ŋ ji se domɛtɔ ɖe ɔ, nɔ wo sa ekpe gangan do ekɔ nii yi sɔ da ɖaɖa axu mɛ ɔ, anyɔ nii sɔwu. ⁴³ Nɔ ao 'lɔ nyi afɔklɛnnu nɔ eo ɔ, sei soi si. A nyɔ nɔ eo be ayi agbemavɔ mɛ kodo alɔ ɖeka sɔwu be ci a yi ezomavɔ mɛ kodo alɔ eve. ⁴⁴ [ Hɔntɔxu yi eye ciwo yí trenɔ amɛ de kunɔ le go yi ezo lɔ de cinɔ le gbeɖe go nɛ.] ⁴⁵ Nɔ ao 'fɔ nyi afɔklɛnnu nɔ eo ɔ, soi si. A nyɔ nɔ eo be a yi agbemavɔ mɛ kodoafɔ ɖeka sɔwu be ci afɔ eve ale o shi yí wo sɔ eo dankpɛ do ezomavɔ mɛ. ⁴⁶ [ Hɔntɔnxu yi eye ciwo yi trenɔ amɛ de kunɔ le go yi ezo lɔ de cinɔ le gbeɖe go nɛ.] ⁴⁷ Nɔ ao ŋkuvi nyí afɔklɛnnu nɔ eo ɔ, ɖii soi. A nyɔ nɔ eo be a yí Mawu fiɔɖuxu lɔ mɛ kodo ŋkuvi ɖeka sɔwu be ci ŋkuvi amɛve a le eo shi yí wo asɔ eo dankpɛn do ezomavɔ mɛ. ⁴⁸ Hɔntɔxu yí eye ciwo yi trenɔ amɛ de kunɔ le go, yí ezo de cinɔ le gbeɖe go nɛ. ⁴⁹ Ɖó ɔ, ezo yí nyi eje ci wo a do amɛshamɛ. ⁵⁰ Eje ɔ enunyui yi e nyi. Vɔ nɔ enu cí yi na yí wo yɔ yɔɛ be éje to le mɛ ɖee, enuɖe gbe li yiwo a doi yi a gbe trɔ eje a ? Mi na éje a nɔ mí mɛ yi mi a nɔagbe kodo míwonɔnɔwo le fafa mɛ."