¹ Ci yi Yesu so le ehɔn ɔ, é yi Ʒyde 'kan mɛ le ago eɖetɔ lɔ ji nɔ́ Ʒuludɛn 'tɔsasa lɔ. Eyi amɛwo gbe lɔ ahwa va cɔin yi é gbe tɔ enu kplankplan wo shigbe lehanci yí é wɛɛni do tɛgbɛɛ nɛnɛ. ² Falistɔ ɖekawo tegogoi keŋ a doi kpɔ́. Wo biɔ́ɛ se be: "Ɖee, ese ɖe emɔ nɔ́ ŋsu be yi lénya ashiɛ a? ³ Yesu biɔ wo se be: "Ese hin yi Mɔyizi do nɔ́ mi so nú ɔ?" ⁴ Eyi wo doŋci nii bé: "Mɔyizi na egbe ŋsu be nɔ́ yi jijiɛ a nya ashiɛ ɔ, yi le ŋwlɛ nyɔnu gbegbewema nii keŋ a sɔ́ dansin be eye kodo eyɛ de gbe le enyɔ ɖe mɛ go. ⁵ Gahɔnmɛ ɔ, Yesu nu nɔ́ wo bé: "Eto yí tri nɔ mi taɖo yí Mɔyizi na egbe hɔn mi. ⁶ Vɔ le xexe lɔ gɔnmɛjeje mɛ shigbe lehanci yí wo ŋwlii daɖɛ do nɛnɛ ɔ, Mawu wa ŋsu kodo nyɔnu. ⁷ É yi ná taɖo yí ŋsu a sogbe edalɔ kodo enɔlɔ ɖɛ yi a vayi wa ɖeka kodo ashiɛ ⁸ yi wo amɛve lɔ a trɔ amɛ kuɖeka. Nɛnɛhan ɔ, wo de gbe nyi amɛ amɛve go, vɔ ɔ, kuɖeka. ⁹ Enu ci yi mawu cá ɔ, agbetɔ ŋgbe ma mɛ go." ¹⁰ Hwecinu yi Yesu kodo yi nukplavi lɔwo gbe biɔ enyɔ yi se so enyɔ lɔ nú. ¹¹ Eyi Yesu ɖoŋci nɔ wo be : " Nɔ amɛɖe nya ashiɛ yí gbe vayi ɖe ebu ɔ, é xɔ amɛ bu 'shi yí je agɔ do nyɔnu ŋkɔtɔ lɔ. ¹² Nɛnɛke nɔ́ nyɔnu ɖe gbé asɔ yí gbe vayi ɖe ebu ɔ, é wa hashi nɛ." ¹³ Amɛ ɖekawo kplɔ ɖevi ɖekawo vá Yesu gbɔ be nɔ yi a sɔ alɔ dado wo ji. Vɔ ɔ, yi nukplanviwo gbé nɔ́ amɛ lɔwo. ¹⁴ Ci yi Yesu kpɔ enu ci yi yi nukplanviwowwa ɔ, é vé nu yi é nu nɔ wo bé: "Mí tashi ɖeviwo nɔ́ wo a va ŋ gbɔ ɖaa! Mí ŋgbe gbe xe emɔ nɔ́ wo go. Ɖo mawu 'fiɔɖuxu lɔ nyí amɛ ciwo yí le shigbe ɖeviwo nɛnɛ han. ¹⁵ le nyɔnɔnui mɛ ɔ, ŋ nunuɔ nɔ mí be nɔ amɛɖe de xɔ Mawu 'fiɔɖuxu lɔ shigbe ɖevihwɛ nɛnɛ go ɔ, d'á sɛ́n eŋ yi mɛ gbeɖe go." ¹⁶ Le i godu ɔ, é kpla ashi ekɔ nɔ ɖevi lɔwo ɖeka ɖeka yí sɔ alɔ dado wo ji keŋ yi yra wo. ¹⁷ Hwecinu yí yesu so ɖedo ɔ, ŋsu ɖeka xi eju yí vá je ekloji do akɔnmɛ nii yí biɔ́ɛ se be: " Cica nyui, nyi ŋ ɖo a wa nɔ́ mawu a ná agbemavɔ ŋ ɔ? ¹⁸ Eyi Yesu nu nii bé: "Nyi yí ná taɖo yí è yɔyɔ ŋ be amɛ nyui ɔ? Amɛɖe nyi amɛ nyui tó évo nɔ Mawu go. ¹⁹ É nya be mawu do ese bé: " ŋgbè wu amɛ go, ŋgbè dɔn nyɔnu ci yí de nyi ashio gbɔ go, ŋgbe fi efi go, ŋgbè ɖe kunu agɔ go, ŋgbè xo ahiʒi go, bú edao kodo enɔo"" ²⁰ ŋsu lɔ nù nɔ́ Yesu be: "Mɛgan, ŋ wa do ese hɔnwo pleŋ ji so ɖevihwɛmɛ ɖii." ²¹ Yesu trɔkpɔɛ júun. É ɖo lɔnlɔn nii yí nú nii be: "Enu ɖeka kpɔtɔ nɔ eo yi à wa: yì sa ao dɔkunuwo xloŋ keŋ a sɔ́ eho lɔ ma nɔ wamɛnɔwo. Hwehɔnnu ɔ, dɔkunuwo a le jiŋkushi nɔ eo. Nɔ́ è wɛɛ ahan ɖegbɔ ɔ, na so a kplɔ ŋ do." ²² Vɔ ci yi ŋsu lɔ se enyɔ lɔ ɔ, é só yi ɖedo le ŋshishimɛ. Ɖo é wa dɔkunuwo ɖɛ̀ sugbɔ. ²³ Eyi Yesu trɔkpɔ yi nukplanvi ciwo yi trɔdoi yi nu nɔ́ wo bé: " Á sɛ́n eŋ nɔ amɛ ciwo shi dɔkunnuwo le be wo a yi Mawu 'fiɔɖuxu lɔ mɛ." ²⁴ Enyɔ ci Yesu nu lɔwo kpaca yi nukplnviwo. Vɔ ɔ, Yesu gbe trɔ nú nɔ wo bé: " Evinyɛwo, Mawu 'fiɔduxu lɔ mɛ yiyi sɛn eŋ ké! ²⁵ Tɔnnyi 'tu mɛ toto a le bɔbɔɛɖe nɔ́ esɔkpotɔnɔ sɔwu bé nɔ ehotɔnɔ a yi Mawu 'fiɔɖuxu lɔ mɛ. " ²⁶ Eynɔ ci Yesu gbe nu gbe kpaca wo dó ji wo tɔ wowonɔ nɔwo biɔbiɔ se be: " Ci é le ahan ɖee, mi yí a sɛ́n eŋ a kpɔ́ hwlɛngan ɔ? ²⁷ Eyi Yesu glo wo kpɔ júún yi nú nɔ́ wo bé : " Á gló agbetɔwo. Vɔ d'a glo Mawu go. Ɖo ɔ, enuɖekpokpoi de glonɔ Mawu yɛ go." ²⁸ Eyi Piyɛ tɔ nunu nɔ́ Yesu be: "kpɔ ɖá, miwo ɔ, mi taxhi enu ciwo pleŋ yí nyi mìwotɔ ɖɛ yí kplo eo do" ²⁹ Yesu ɖoŋci nii bé: " Le nyɔnɔnui mɛ ɔ, ŋ nunuɔ nɔ mí be nɔ́ amɛɖesogbe axwe, fofowo alo nyigbanwo ɖɛ́ dó enyɛ kodo Eŋɛnyui lɔ 'ta ɔ, ³⁰ Mawu a vá nii axwewo, fofowo, nɔviwo, enɔwo, eviwo, nyigbanwo texwe ekave howi eviɛ trololo le xexe cɛ mɛ. Nɛnɛke yi amɛ lɔ a gbe va kpé efun do eta nɔ ŋ nɛ. Eyi esɔgodumɛ ɔ, Mawu a va nii agbemavɔ. ³¹ Amɛ sugbɔ le ŋkɔtɔwo mɛ viɛ a vá trɔ́ godutɔwo. Nɛnɛke amɛ godutɔwo a vá trɔ́ ŋkɔtɔwo nɛ." ³² Yesu kodo amɛ ciwo yí kplɔɛ do fán ekpo yí yigɔ Ʒeluzalɛmu. E le ŋkɔ nɔ wo. Nukplanviwo dán eta nɔ enyɔ lɔ. Amɛ ciwo yi kplɔ wo dó vɔnvɔn. Eyi Yesu gbe yɔ yi nukplanvi wive lɔwo. Yi ekpa yí tɔ́ enu ci yi jijiɛ a jɔ do ji nunu nɔ́ wo. ³³ Bé: " Mì yigɔ Ʒeuzalɛmu, fini ci yi wo a sɔ́ Agbetɔvi lɔ doashi nɔ́ avɔsatɔwo 'gawo kodo ese dɔwatɔwo yí wo a nú bé yi wu ehwɛ, yi je nɔ eku yí a sɔ doa shi nɔ́ amɛmanyi Yuɖatɔwo. ³⁴ Wowo a gbali Agbetɔvi lɔ yi a cú etan do ŋmɛ nii yí a dó sɔvobayɛ nii. Le i godu ɔ, wo a wui. Vɔ i ŋkeke amɛtɔntɔ lɔ gbe ɔ, a fɔn so ekuwodi". ³⁵ Le i godu ɔ, Ʒaki kodo Ʒan, Zebede eviɛ amɛve lɔwo vá Yesu gbɔ yi nú nii bé: " Mɛgan, mi jijiɛ a biɔ enuɖeka eo. Mì jí be eo a wɛɛ nɔ mì." ³⁶ Eyi Yesu biɔ wo se be: "Nyi yí mí jí bé na wa nɔ mí ɔ?" ³⁷ Wo ɖoŋci nɔ́ Yesu be: " Nɔ́ è vayi nɔ anyinɔnɔ do ao 'fiɔʒinkpin ji le ao klɛnklɛn mɛ ɔ, na egbe nɔ mì axawo ji nɔ́ eo, amɛɖeka a nɔ emiɔmɛ nɔ eo." ³⁸ Vɔ ɔ, Yesu nu nɔ́ wo be: " Mí de nyá enu ci yi mí biɔ biɔ go. Vɔ ɖee, mí a kpé efunkpekpe kɔkpu ci nu gbe ŋ gbɔgbɔ ji a nu a? Vevesese 'shi ci wo a le nɔ ŋ ɖee, mí a kpe ji a le a?" ³⁹ Ʒaki kodo Ʒan ɖoŋci nii bé: " Ɛɛ, mì a kpé ji." Eyi Yesu nu nɔ wo be: " Mí a nu efunkpekpe kɔkpu lɔ shigbe enyɛ nɛnɛ yi a le vevesese 'shi lɔ shigbe enyɛ nɛnɛ nyao. ⁴⁰ Vɔ nɔ́ wo a nɔ anyinɔnɔ do ɖushimɛ alo emiɔmɛ ɔ, d'e nyi enyɛ yi a ná yɛ amɛ go. Texwe lɔwo li ɖɛ nɔ́ amɛ ciwo yí Mawu dra wo dó daɖɛ nɔ́." ⁴¹ cí yí nukplanvi amɛwo kpɛtɛwo se be nɛnɛ yí Ʒaki kodo Ʒan vayi kpɔ Yesu do nɛ ɔ, de jeji nɔ wo eɖeeɖe go. ⁴² Gahɔnmɛ, Yesu va yɔ wo pleŋ bɔ yí nu nɔ́ wo be: " Mí nya be amɛ ciwo yí nyí akɔtawo kplɔtɔwo ʒinnɔ wo jí shigbe egawo han ɛnɛ yi amɛŋkuleji can gbe ʒinnɔ wo ji. ⁴³ Vɔ, ŋgbé nyi nɛnɛ nɔ́ miwo go.. Nɔ́ míwo domɛtɔ ɖe ji be ye a nyí mɛgan ɔ, lé nyí edɔwavi nɔ́ amɛ kpɛtɛwo kpleŋ. ⁴⁴ Eyi nɔ́ amɛɖe ji be ye a nyi ŋkɔnɔtɔ le mí mɛ ɔ, é ɖo a nyi hwashi nɔ amɛshamɛ. ⁴⁵ Ɖó ɔ, agbetɔvi nɔ d'e va be amɛwo a nyi edɔwavi nɔ eye go. Vɔ ɔ, é va be ye a nyi edɔwavi nɔ́ amɛwo yí qa sɔ́ ye 'gbe cu efɛn eta nɔ amɛ sugbɔ nɔ́ wo a vo." ⁴⁶ wo a va ́ ɖo Ʒeliko 'jugan mɛ. Hwecinu yi Yesu so le ehɔntexu yí je emɔ kodo yi 'nukplanvi lɔwo, amɛwo lɔ ahwa kplɔɛ do. ŋkuvitɔntɔntɔnɔ, enubiɔtɔ ɖeka ci yí wo yɔnɔ be Batimɛ yí é nyi timɛ eviɛ nɔ anyinɔnɔ do emɔ tu. ⁴⁷ Ci yi é se be Yesu Nazalɛtitɔ́ lɔ yi vayigɔ ɔ, é tɔ axwa dodo be: " Yesu Dvidi eviɛ, kú ŋ shishi nɔ ŋ." ⁴⁸ Eyi Amɛ sugbɔ kaka aɖyi nii be yi le bɔ́ enu. Gankegan ɔ, ŋkuvitɔntɔn tɔnɔ lɔ gbe kpɔtɔ le axwa doɔ doji be " Dvidi eviɛ, kù ŋshishi nɔ ŋ." ⁴⁹ Yesu ci ete yi nu be: " Mí yɔɛ va." Eyi amɛwo yɔ ŋkuvitɔntɔntɔnɔ lɔ yi nu nii be : " gbè edɔn. so je ete, é yɔyɔ eo." ⁵⁰ Gahɔnmɛ ŋkuvitɔntɔntɔnɔ lɔ ɖe vuvɔwu ci mɛ yí é le danŋkpen yí so je ete kplaa yí va Yesu gbɔ. ⁵¹ Eyi Yesu biɔɛse: " Nyi yí é ji be na wa nɔ eo ɔ? " Ŋkuvitɔntɔntɔnɔ lɔ ɖoŋci nii be: " Hlabuni! Wɛɛ nɔ ma gbe tɔ enu kpɔkpɔ." ⁵² Gahɔnmɛ ɔ, Yesu va nu nii be: " sè yi, ao xɔse hwlɛn eo gan. " Zeɖekatɔntɔn ɔ, ŋkuvitɔntɔntɔntɔnɔ lɔ gbe tɔ enu kpɔkpɔ yí kplɔ́ yesu do le emɔ lɔ ji.