¹ Yesu kodo yi nukplanviwo gogogoɔ Ʒeluzalɛmu. É kpɔtɔ hweɖeka yí wo a ɖó Bɛtifaʒe kodo Betani kɔxwiwo sɔ kpe ɖaɖa Olivuci 'taojí age gbɔ́. Eyi Yesu dɔ edɔ yi nukplanvi amɛve ɖekawo ² bé: " Mí yí kɔxwi ci yi le ŋkɔ nɔ, mí hɔn mɛ. Nɔ mí vayi ɖó ɔ, mí a kpɔ esɔkɛtɛ hwɛvi ɖeka ci ji yí amɛɖe de laji hɔɖe go yí wo a dó eka yi do enuŋ ɖɛ. Mí cui yí a kplɔɛ va nɔ ŋ. ³ Nɔ́ amɛɖe biɔ́ mi se be: "Nyi yí jɔ yí mi cucuɔ esɔkɛtɛ lɔ mɛ" ɔ, mí a ɖoŋci nɔ amɛ lɔ be axwetɔ lɔ hiin. Vɔ nɔ́ yi wa ɖegbɔ ɔ, yi a gbe trɔɛ ɖaɖa wo zeɖeka." ⁴ Eyi nukplanvi amɛve lɔwo yi kɔxwi lɔ mɛ yí vayi kpɔ esɔkɛtɛ hwɛvi ɖeka ci wo shi eka do ehɔn ɖeka nú le gbadonu le emɔtu. Eyi nukplanvi amɛve lɔwo cui. ⁵ Amɛ ciwo yí le hɔntɔxu lɔwo domɛtɔ ɖekawo biɔ wo se be " Nyi wa mí le? Nyi jɔ mí le esɔkɛtɛ hwɛvi lɔ cuɔ?" ⁶ Nukplanvi amɛve lɔwo ɖoŋci nɔ́ wo shigbe lehanci Yesu nui nɔ́ wo dó nɛnɛ. Eyi amɛ lɔwo tashi wo yí wo yí. ⁷ Wo kplɔ esɔkɛtɛ lɔ vá nɔ́ Yesu yí sɔ́ wowo vuvɔwowo ɖó dó jì nii yí é la jí. ⁸ Amɛ sugbɔ sɔ wowo vuvɔwuwo ɖó do emɔ jí nɔ́ Yesu yí amɛ buwo gbe sɔ edezanwo le enukanwo mɛ yi sɔ ɖó dó emɔ jí nii. ⁹ Amɛ ciwo yí le ŋkɔ kodo gadu nɔ Yesu le axwa doɔ be: " kanfukanfu nɔ́ mawu yayra nɔ amɛ ci yí gbɔgbɔ le Yehowa nyikɔ mɛ! ¹⁰ Yayra nɔ efiɔɖuɖu ci yi gbɔgbɔ, mìwo tɔgbi Davidi fiɔɖuxu lɔ kanfukanfu nɔ́ Mawu le jiŋkushi boo!" ¹¹ Ci yí Yesu va ɖó Ʒeluzalɛmu jugan mɛ ɔ, é yi Mawuxwe mɛ yí vayi le ŋkuvi do enu ciwo yí le hɔntɔxu nú. Ci ezan tɔ dodo ɔ, é só kodo yi nukplanvi wive lɔwo yí yi Betani kɔxwimɛ. ¹² Le i ŋ kegbu ci wo só le Betani kɔxwi lɔ mɛ yí ɖedo ɔ, shive ciciɛ Yesu. ¹³ Eyi é ɖe ekɔ yí kpɔ figici ɖeka ɖaɖa. Aci lɔ dó ama Yesu ɖedo kpe gbɔ kpɔ́ be ye a kpɔ enuɖe le ji mɛ. Vɔ ci yí é vayi ɖo gbɔ́ɔ, amawo ɖekɛ yí é kpɔ le ji Ɖó ɔ d'é nyi figisɛnsɛn hwenu yɔ go. ¹⁴ Eyi é nu aci lɔ be: " Amɛɖe d'a gbe tɔ enu ao sɛnsɛn kpɔ́ o. " Ci é nu nɛnɛ nɔ aci lɔ ɔ, yi nukplanviwo sii. ¹⁵ Yesu kodo yi nukplanviwo va ɖo Ʒeluzalɛmu. Ci yí é yi mawuxwe mɛ ɔ, é kpɔ́ enusatɔwo kodo enuxwletɔwo le hɔntɔxu yí tɔ́ wo nyanya. É fli ekplɔnwo cɔ́n nɔ́ ehowoɖɔlitɔwo yí gbe fli ʒinkpinwo cɔ́n nɔ́ hwanlinsa tɔwo hɛnnɛ. ¹⁶ Yí do ese be amɛɖekpokpoi ŋgbe dro enuɖe 'gban tó mawuxwe lɔ mɛ go. ¹⁷ É tɔ enu kplankplan wo be: " Mí de nyá bé Mawu núi yí wo ŋwlii do afiɖeka le yi 'nyɔ wemawo mɛ daɖɛ be: gbedoɖa tɔxu yi nyaŋ 'xwe anyi nɔ jukɔn ɖekpokpoi ba? Vɔ ɔ, mí va sɔ trɔ flanfinɔ ganganwo gují!" ¹⁸ Ci yí avɔsatɔwo 'gawo kodo esedɔwatɔwo va se enyɔ ci yí Yesu nu ɔ, wo vɔn yí tɔ fini ci yí wo tó yí awui jiji. Ɖo ɔ, yi nukplanmɛ 'nyɔwo ji eŋ nɔ ahwakɔn lɔ pleŋ. ¹⁹ Fiɛshimɛ ɔ, Yesu kodo yi nukplanviwo tó le jugan lɔ mɛ. ²⁰ Le i ŋkegbu fɔnfɔnmɛ ci Yesu kodo yi nukplanviwo tó emɔ lɔ vayigɔ ɔ, wo kpɔ be figici ci yí yi xo efin do lɔ xu do ete kaka xotɔ ekewo ji. ²¹ Piyɛ ɖo eŋui enu ci yí jɔ vayi yí nu nɔ Yesu be : " Cica gan, kpɔɖà! Figici ci yi è xo efin do vayi lɔ xu do ete!" ²² Eyi Yesu nu nɔ yi nukplanviwo be: " Mí xɔ mawu jí se. ²³ Le nyɔnɔnyui mɛ ɔ, ŋ nunuɔ nɔ mí be nɔ amɛɖe nu nɔ eto cɛ be " Hò a yi je axu mɛ" yí d'é xoi kpɔ le yi 'ji mɛ go yi xɔɛ jise be enyɔ ci yí ye nunuɔ a cɛ ɔ, á cɛ. ²⁴ É yí ná taɖo yí ŋ nunuɔ be enu ciwo pleŋ yí mi a do egbe ɖaɖa a biɔ ɔ, mí a kandoji be mí xɔ wo. Ahan ɔ mawu a gbe sɔ wo na mí nyawo. ²⁵ Nɔ mí le gbe doɖa waɔ yí ɖó eŋui be enyɔ ɖe le mí kodp amɛɖe gblamɛ ɔ, mí sɔ kii, nɔ míwo 'da ci yí le jiŋkushi a gbe sɔ míwo 'gɔjejewo ke mí hɛnnɛ." ²⁶ Vɔ ɔ, nɔ miwo de sɔ amɛwo 'gɔjejewo ke wo o ɔ, míwo 'da ci yi le jiŋkushi can da sɔ ke mí hɛnnɛ go. ²⁷ Yesu kodo yi nukplanviwo gbe trɔgbɔva Ʒeluzalɛmu. Ci yí Yesu le esa ɖyiɛ le mawuxwe lɔ mɛ ɔ, avɔsatɔwo 'gawo, esedɔwatɔwo kodo mɛganwo va gbɔ ²⁸ yí biɔ́ɛ se be: "Acɛ hinde yi è sɔ le enu hɔnwo waɔ ɔ? Mi yi na acɛ lɔ eo ɔ?" ²⁹ Eyi Yesu ɖoŋci nɔ wo be: "Na biɔ enyɔ ɖeka kpaŋ mí se. Nɔ mí ɖoŋci nɔ́ ŋ ɔ, na nú acɛ ci yí ŋ sɔ le enu hɔnwo waa nɔ mí." ³⁰ É biɔ wo se be agbetɔwo ge Mawu ge mí yí dɔ Ʒan ci yi wanɔ ʒinʒindotɔmɛ Mawutɔ ɖaɖa ɔ? Mí ɖoŋci nɔ ŋ." ³¹ Wo tɔ drɔdrɔɛ kpɔ le wowo nɔnɔwo mɛ be: "Nɔ mì ɖoŋci nii be "Mawu yí dɔ Ʒan ɖaɖa viɛ" ɔ, a va biɔ mì se be: "Nyi yi jɔ mì de xɔ Ʒan 'nyɔwo ji se go ɔ? ³² Vɔ ɖee, mì a sɛn eŋ ɖoŋci nii be: "Agbetɔwo yí dɔ Ʒan ɖaɖa viɛ" a?" Wo vɔnvɔn nɔ ahwakɔn ci yí le hɔntɔxu lɔ. Ɖo ɔ, amɛshiamɛ sɔ Ʒan do mawu 'ŋɛdotɔ adodui jí. ³³ Ci é le nɛnɛ ɔ, wo ɖoŋci nɔ Yesu be: " Mí de nya mɛ ci yí dɔ Ʒan ɖaɖa go." Eyi Yesu nu nɔ wo be: " Enyɛ can ŋ da nu acɛ ci yí ŋ sɔ wawa enu hɔnwo waa nɔ mí go.