¹ Yesu tɔ nuxu xoxo nɔ wo to labalu mɛ be: " Ŋsu ɖeka ɖo vɛncikan ɖeka. E cu ekpa trɔdoi yi ku vɛnfiɔnnu 'du ganganɖeka do ekpe mɛ do mɛ. Ŋsu lɔ cu botakpɔtɔxɔ ɖeka do ebo lɔ ji. ² Ci yi e wa enu lɔwo ahan ɖegbɔ ɔ, e sɔ vɛncikan lɔ haya nɔ vɛngbledematɔwo yi so. Ci yi nukucancan gamɛ va ɖo ɔ, ebotɔ lɔ dɔ yi 'dɔwavi ɖeka ɖaɖa vɛngbledematɔ lɔwo gbɔ nɔ a vayi xɔ vɛnsɛnsɛn ci yi wo ma nii gbɛ. ³ Vɔ ɔ, vɛngbldematɔ lɔwo le edɔwavi lɔ yi xoi yí nyii ashigba alɔgba. ⁴ Ganhɔnmɛ yí ebotɔ lɔ gbe dɔ edɔwavi bu ɖaɖa, yí vɛngble dematɔ lɔwo xo ekpe eta nɔ eyɛ yi zui. ⁵ Eyi ŋsu lɔ gbe dɔ edɔwavi bu ɖaɖa wo gbɔ ke yi wo sɔwu. le i godu, ŋsu lɔ gbe dɔ edɔwavi sugbɔ buwo ɖaɖa. Dematɔ lɔwo xo ɖewo yi wu ɖewo le wo mɛ. ⁶ Amɛ ci yi kpɔtɔ yi ŋsu lɔ a gbe dɔ ɖaɖa ɔ, e yí nyi eviɛ vevi. Ŋsu lɔ dɔɛ ɖaɖa kpɛtɛkpɛtɛ lɔ lɔ yí bubuɔ be ci yí yi nyi yeviye ɔ, vɛngbledematɔ lɔwo a do bubu yi nu. ⁷ Vɔ ɔ, vɛngbledematɔ cɛwo nu nɔ wowonɔnɔwo be: amɛ ci yi a va ɖu ci nɔ nɔ agble lɔ esɔgodumɛ ge. Mina nɔ mi awui nɔ agbe lɔ a trɔ miwotɔ. ⁸ Eyi wo lii yí wui sɔ danŋkpɛn to vɛncikan lɔ 'kpa ta mɛ." ⁹ Yesu va biɔ se be: " Le vɛncikan 'ga lɔ a wɛɛ do ɔ?" Va a va wu vɛngbledematɔ lɔwo pleŋ keŋ a sɔ agble lɔ jo nɔ́ vɛngbledematɔ buwo. ¹⁰ "Ŋ nya be mí hlɛn enu ci yi wo ŋwlɛ do Mawu 'nyɔ wemawo mɛ kpɔ be: " Ekpe ci yi exɔcutɔwo gbe ɔ, e yí va trɔ zogoji 'kpe. ¹¹ Ahwetɔ lɔ yi wɛɛ ahan. Enujiŋ yi e nyi nɔ míwo agbetɔwo!"" ¹² Eyi yuɖatɔwo 'gawo tɔ́ lehanci wo a wɛɛ do yi a le Yesu jiji. Ɖó ɔ wo nya be yewo nu yí yi do labalu lɔbalu lɔ do. Vɔ ɔ, wo vɔ́n nɔ́ ahwakɔn lɔ yi tashii yi so ɖedo. ¹³ Yuɖatɔwo 'gawo dɔ Falisitɔ ɖekawo kodo Elodi 'gbɛvi ɖekawo ɖaɖa Yesu gbɔ nɔ wo a vayi do aɖemɛ kpɔ nii. ¹⁴ Ci yí wo va ɖo Yesu gbɔ ɔ, wo nu nii be: " Cicagan mì nya be è nunɔ nyɔnɔnui yí d'è vɔnnɔ nɔ amɛɖe go. Nɛnɛke ɔ, d'è kpɔnɔ ŋmɛ nɔ amɛ yi sɔ xonɔ nuxu go. Vɔ ɔ, è nanɔ ekplan nyui amɛ so lehanci yi Mawu dró dó be wo le nɔ agbe do nu. Ɖee, mìwo 'sé ɖe emɔ be wo le ná tago Hlɔmutɔwo fiɔgangan a? Mì a cui alo mì a gbe cucui?" ¹⁵ Vɔ ɔ, Yesu nya be ayemɛnu waa yi wo le. Eyi é nu nɔ wo be: " Nyi yí jɔ yí mí nu be yewo a do ŋ kpɔ ɔ? Mí ɖe Hlɔmutɔwo gajunho gangan ɖeka toi nɔ ma kpɔ?" ¹⁶ Eyi wo sɔ ganjunho gangan lɔ ɖeka vɛɛ nii yí é biɔ wo se be: " Mi 'takpu yí nyí ecɛ yi wo tá dó gajunho lɔ ji ɔ yí mi nyikɔ yí nyi ecɛ yí wo ŋwlɛ do gɔnmɛ nii ɔ? " Wo ɖoŋci nii be: "Hlɔmutɔwo 'fiɔgangan tɔ yɔ." ¹⁷ Eyi Yesu nu nɔ wo be: "Mí sɔ enu ci yi nyi Hlɔmutɔwo 'fiɔgangantɔ na Hlɔmutɔwo 'fiɔgangan yi a sɔ enu ci yí nyi Mawu tɔ na Mawu." Lehanci yi Yesu ɖó enyɔbiɔse lɔ nu do kpaca wo sugbɔ. ¹⁸ Sadukitɔ ɖekawo va Yesu gbɔ. Wowo yí nunɔ be amɛɖe da sɛn eŋ fɔ́n só ekuwodi kpɔ. Wo biɔ enyɔ Yesu se be: ¹⁹ " Cicagan, Mɔyizi ŋwlɛ do ese wemawo mɛ nɔ mì be: " Nɔ amɛɖe ɖe nyɔnu yí ku evi maji ɔ, nɔviɛ ɖó a sɔ ekpo nyɔnu lɔ yí a jí evi le xomɛ nii a sɔ ɖó ekan nɔ fofoɔ ci yí ku". ²⁰ Sasa lɔ ɔ, nɔvi amadrɛ ɖekawo li vayi. Ŋkɔtɔ ɖe nyɔnu; kpɔ́ de ji evi ɖe gbɔhwe yí ku go. ²¹ Evetɔ lɔ sɔ ekpo nyɔ nu lɔ yí ku evi maji hɛnnɛ. Etɔntɔ lɔ can nɛnɛ yɔ nɛ, ²² kaka evy maji lɔ va je amadrɛtɔ lɔ jí. Le wo amadrɛ lɔwo 'kuwo goduɔ, nyɔnu lɔ can gbe vá ku. ²³ Le ŋkeke ci ji yí agbetɔwo a fɔ́n ekuwodi ɖee, mi tɔ yí a va nyi nyɔnu lɔ le wo mɛ ɔ? Ɖó ɔ, nɔvinɔ amadrɛ lɔwo ge ɖii kpɔ pleŋ! ²⁴ Eyi Yesu ɖoŋci nɔ wo be: "Bu mí bubuɔ. Ɖó ɔ, mí de nya Mawu 'nyɔ go yí mí de jeshi Mawu ŋsɛn ɖɛ go. ²⁵ Ci gɔnmɛ yí nyi be gacimɛ yí wo a fɔ́n só ekuwodiɔ, asu kodo ashi 'nyɔ ɖe d'a gbe li go. Vɔ ɔ, wo a nɔ agbe shigbe Mawu dɔlawo le jiŋkushi nɛnɛ. ²⁶ Sɔ só fɔnfɔnsokuwodi nu ɔ, mí de hlɛn enuɖeka ci yi wo ŋwlɛ do Mɔyizi wema mɛ só ave cuii ci yí le ezo biɛ nu ba? Mawu nú nɔ Mɔyizi le ehɔntɔxu be: "Enyɛ yí Ablahamu, Izaki kodo Ʒakɔbu Mawu. ²⁷ Yesu vayi ji be Mawu de nyi amɛkukuwo Mawu go. Amɛleagbewo Mawu yí é nyi. Mí bu emɔ gbijigbiji:" ²⁸ Esedɔwatɔ ɖeka se enyɔ ciwo yí Yesu kodo Sadukitɔ lɔwo dɔn le wowonɔnɔwo mɛ. E kpɔ be Yesu ɖoŋci nɔ wo nyuiɖe. Eyi e tegogo Yesu yi biɔɛ se be: "Ese ci yí le ŋkɔ nɔ ese lɔwo pleŋ ɔ?" ²⁹ Yesu ɖoŋci nii be: " Ese ci yi le ŋkɔ nɔ esewo pleŋ yi nyi kpɔ be: "Israyɛli, ɖò eto a se! Axwetɔ miwo Mawu ɖekɛ yi nyi Axwetɔ. ³⁰ E ɖo egbe a lɔn Axwetɔ ao Mawu kodo ao 'ji blebu, ao 'se blebu, ao susu blebu kodo ao ŋsɛn kɛŋkɛŋ." ³¹ Ese amɛvetɔ lɔ yí nyí kpɔ be: "E ɖo egbe a lɔn nɔviwo shigbe eoŋtɔ ɛnɛ." Ese ɖé de gbe le ŋkɔ nɔ ese hɔnwo go." ³² Eyi esedɔwatɔ nunɔ Yesu be: "Cicagan, e ɖoŋci nɔ ŋ nyuiɖe! Nyɔnɔnui yi e to: Axwetɔ Mawu ɖekɛ kpaŋ yí nyi Mawu, ebu ɖe de gbe li sɔwu eyɛ go. ³³ E yi na taɖo ɔ, wo ɖo alɔn Mawu kodo eji blebu susu blebu kodo amɛ ŋsɛn keŋkeŋ yi agbe lɔ amɛ kpena shigbe amɛŋtɔ ɛnɛ. E nyɔ sɔwu ezodovɔsawo kodo avɔsa kpɛtɛwo pleŋ." ³⁴ Yesu kpɔ be esedɔwatɔ lɔ ɖo enyɔ lɔ nu kodo susu. Eyi e nu nii be: "E jiji le Mawu 'fiɔɖuxu lɔ gbɔ go." Le i godu ɔ amɛɖe de gbe gbe edɔn yi a biɔ enyɔ ɖe Yesu se go. ³⁵ Gacimɛ yi Yesu le enu kplaan amɛwo le Mawuxwe mɛ ɔ, e biɔ wo se be: "Lé é nyí yi esedɔwatɔwo a nunuɔ be Klisolɔ nyi Davidi eviɛ ɔ? ³⁶ Gankegan yi Davidi hɔn, le hwecinu yi gbɔngbɔn kɔkɔɛ kplɔkplɛ ɔ, nu be: "Axwetɔ nu nɔ anyi 'xwetɔ be: va nɔ anyinɔnɔ do ɖushimɛ nɔ ŋ, kaka a sɔnanɔ hwecinu yi na sɔ ketɔwo wa afɔɖojinuwo nɔ eo." ³⁷ Davidi hɔn ke yɔyɔ kliso lɔ be ye 'xwetɔ yɛ́ ke, le kliso lɔ agbe nyi eviɛ do ɔ?" Eji jɔjɔ ahwakɔn lɔ so enyɔ ciwo yi Yesu nunuɔ nu. ³⁸ Yesu nunuɔ nɔ ahwakɔn lɔ le yi 'nukplanmɛnyɔwo mɛ be: "Mi kpɔ nyiɖe le esedɔwatɔwo nu. Ɖo wo lɔnnɔ esaɖyiɖyi le awu jiji lɛgbɛɛwo mɛ yí gbe jinɔ be amɛwo le do egbe nɔ Yewo kodo bubu le egodoxuwo. ³⁹ Wo jinɔ bubu tɔxuwo a nɔ le Mawusɛnxuwo yi gbe jinɔ mɛganwo tɔxuwo a nɔ le azanɖuxuwo. ⁴⁰ Wo xɔnɔ kposhiwo pleŋ le wo shi gankegan le egaxoxo lɔwo ke mɛ ɔ, wo a gbe le jiji gbɛlɛwo waa nɔ, a nyi kpɔ be wowo yi nyi amɛ nyuiwo. Enu hɔnwo ŋci yí Mawu a va dɔn eto nɔ wo do sɔwu amɛ kpɛtɛwo nɛ!" ⁴¹ Le i godu ɔ, Yesu vayi nɔ anyinɔnɔ do ŋkɔ nɔ enujɔjɔgban ci mɛ yi wo jɔnɔ eho do nɔ Mawu le Mawuxwe mɛ yi le wo gloɔ kpɔ, Ehotɔnɔ sugbɔ le eho sugbɔ naa. ⁴² Eyi kposhi wamɛnɔ ɖeka va ɖo yi sɔ gajɔnho ci yi hwe sɔwu kpɛtɛwo amɛve do agban lɔ mɛ. ⁴³ Eyi Yesu yɔ yi nukplanviwo yi nu nɔ wo be: "Le nyɔnɔnui mɛ ɔ, ŋ nunuɔ nɔ mí be enu Ci yi kposhi wamɛnɔ cɛ na do enujɔjɔgban mɛ wu egan amɛwo pleŋ tɔ. ⁴⁴ Ɖo amɛ eɖe lɔwo ɔ, enu ci sun wo kpɔtɔ yi wowo va na. Vɔ kposhi wamɛnɔ lɔ yɛ ɔ, yɛ sɔ enu ciwo yi le shi pleŋ yí a sɔ yí a sɔ nyí yiɖeki, na Mawu."