^{1 2} Hwecinu yi Yesu totoɔ le Mawuxwe lɔ mɛ ɔ, yi nukplanviwo domɛtɔ ɖeka nu nii be: "Cicagan, kpɔ́ lehanci yí ekpe cɛwo nya kpɔkpɔ dó ɖá!" Eyí Yesu ɖoŋci nii be: "E kpɔkpɔ exɔ gangan cɛwo yɛ a? Ekpe ɖe d'a gbe va kpɔtɔ yi a nɔ ekpe ɖe ji go. Wo a gban wo pleŋ." ³ Yesu nɔ anyinɔnɔ do Olivuci 'kpo ji le Mawuxwe lɔ ŋkɔ. Yi nukplanvi Piyɛ, Ʒaki, Ʒan kodo Anŋdre ɖekɛwo yi le gbɔ. Wo biɔ Yesu se be: ⁴ " Gacimɛ yi enu hɔwo a va jɔ do ɔ? Nyi yi mi a kpɔ yi a sɔ do jeshi ega lɔ mɛ ɔ?" ⁵ Eyi Yesu tɔ nunu nɔ wo be: "Mi kpɔ nyuiɖe nɔ amɛɖe ŋgbe flu mi go. ⁶ Amɛ sugbɔ a vá vá yi a sɔ anyi nyikɔ yi a nunuɔ be yewo yi nyi Kliso yi a flu amɛ sugbɔ. ⁷ Nɔ mi va sese be eju ciwo yi sɔ mi gbɔ le ahwa wa ɔ yi ciwo yi jiji le mi gbɔ le ahwa wa ɔ, mi ŋgbe vɔn go. Ahwa hɔnwo ɖo a jɔ. Vɔ ɔ, d'é nyi xexe lɔ nu wuwu gamɛ yi nyi hɔn go. ⁸ Jukɔn ɖe a va tɔ ahwa wawa kodo jukɔn ɖe yí efiɔɖuxu ɖe a va tɔ ahwa wawa kodo efiɔɖuxu ɖe. Nyigba a va hunhun le ekan vovowo mɛ yi nɛnɛke yi shive a va to nɛ. Enujɔjɔ hɔnwo a va le shigbe veve ŋkɔtɔ ciwo yí nyɔnu senɔ gbɔxwe yi jinɔ evi han ɛnɛ. ⁹ Vɔ míwo ɔ, mí kpɔ nyuiɖe Ɖo amɛwo a va sɔ mi doashi nɔ ehwɛxɔnu 'gawo. Wo a vaxo mi le Mawusɛnxuwo yi a va yɔ ehwɛ mi le ekanjikpɔtɔ kodo efiɔwo gbɔ́́ dó anyí 'ta. Hwehɔnnu ɔ, mi a va ɖe kunu yi a sɔ́ xo nuxu sɔso ŋ nu nɔ́ wo. ¹⁰ Wo ɖó a do eŋɛnyúi lɔ kodo axwa nɔ akɔtawo pleŋ doŋkɔ gbɔxwe. ¹¹ Nɔ wo va le mí kpe ehwɛxɔnu ɔ, mí ŋgbe vɔn nɔ enyɔ ciwo yí mí a vayi nu go. Vɔ enyɔ ci yí Mawu a sɔ ná mí do gahɔnmɛ teŋ yí mí a nu. Ɖo d'é nyi míwoŋtɔwo yi a xo nuxu go. Gbɔngbɔn kɔkɔɛ yi a nu doashi nɔ mí. ¹² Amɛwo a va sa wowo nɔviwo a be wo le wu. Nɛnɛke, edawo a va sa eviwo a be wo le wu nɛ. Eviwo a va tɔ enu kodo wowo 'dawo kodo wowo'nɔwo kaka a sa wo be wo le wu. ¹³ Amɛshamɛ a va gbe eŋua nɔ mí do anyi 'ta. Vɔ amɛ ci yí a do eji kaka sɔ yí vɔvɔnu a kpɔ hwlɛngan." ¹⁴ "Gamɛ gbɔgbɔ yi mí a va tɔ enugbletɔkpotuikpotui kpɔkpɔ le fini ci mí de ɖo a kpɛ le go. (Amɛ ci yi le enu lɔ hlɛn ɔn le mɔŋjemɛ nyuiɖe). Nɔ ega lɔ mɛ va ɖo ɔ, amɛ ciwo yi a le Ʒude 'kan mɛ ɖo a shi jeŋkɔ ekpowo ji agé. ¹⁵ Eyi amɛ ci yi ale exɔ tamɛ ŋgbe ɖyi a va sɔ enuɖe le yi 'xɔ mɛ go. ¹⁶ Amɛ ci yi a le bomɛ ŋgbe gbɔ va axwemɛ a va sɔ yí vuvɔwigo. ¹⁷ Azan vɔin a nyi nɔ nyɔnu ciwo yi anyi efunɔwo kodo ciwo yí a le anɔ naa evi. ¹⁸ Mí wa gbedoɖa nɔ Mawu nɔ enu lɔwo ŋgbe va jɔ do vuvɔhwenu go. ¹⁹ Ɖó ŋkeke hɔnwo ji ɔ, amɛwo a se vevi sugbɔ. Amɛɖe de se vevi hɔn han kpɔ so xexe lɔ gɔnmɛ jeje mɛ, gacimɛ yí Mawu wa enuwo keŋkeŋ ɖegbɔ va sɔnanɔ egbɛ go. Nɛnɛke kpɔ́ amɛ ɖe d'a gbe va seveve hɔn han ɖe o nɛ. ²⁰ Nɔ́ Mawu de ɖélé vevesese ŋkeke hɔnwo kpɔtɔ sasa ɔ amɛɖe d'a gán go. Vɔ é ɖé lé wo jí kpɔtɔ ɖó amɛ ciwo é can nɔ́ wo a nyí yí tɔ ŋci. ²¹ Nɔ́ amɛɖe va nu nɔ mí be: "Kliso lɔ le elɛ!" alo "é le hunɖaa!" ɔ, mí ŋgbe xwɛɛ jise go. ²² Ɖó ɔ, ŋsukantɔwo a va vá yí a nu be yewo yí nyi Kliso lɔ alo yewo yí nyi Mawu 'ŋɛdotɔwo yí a le jeshidu 'nuwo kodo enu enudanŋdowo ɖeɛ tii. Kaka nɔ́ kpeji ɔ, wo a flu amɛ ciwo Mawu can hɛnnɛ. ²³ Eyi ná taɖo ɔ, mí nɔ glagla ji! Ŋ kaxle mí vɔ só enu ciwo yí va jɔ nu. ²⁴ "Hwecinu yí vevesese ŋkeke hɔn lɔwo avayí ɖegbɔ ɔ ewe d'a gbe klɛn go yí wleci d'a gbe ɖyi go. ²⁵ Wleciviwo a hlɛn kotokoto so jeŋkushi yí Jeŋkushi 'cɛkpakpa wo a hunhun. ²⁶ Gahɔnmɛ 'Zɔwo a trɔdii yí a ɖyiɖyiɛ kodo ŋsɛn gangan ɖeka le klɛnklɛn mɛ. ²⁷ Á dɔ́ yi 'dɔlawo ɖaɖa nyigban zogo amɛnɛ lɔwo jí. Nɔ́ wo a bɔ́ amɛ ciwo yí é can to sese lɔ pleŋ mɛ. Só ago cɛ ji yi ago hunɖaa ji." ²⁸ "Mí kplan enu so figici labalu cɛ nu: Nɔ alɔwo kodo makpawo tɔ́ dɔndɔn nɔ́ figici ɔ, mí nyanɔ be hwenu nyui gogo. ²⁹ Nɛnɛke nɔ́ va tɔ enu hɔnwo kpleŋ kpɔkpɔ ɔ, mí a nya be gamɛ tɔ sunsun nɔ agbetɔvi lɔ yí á trɔgbɔ. E le ehɔn ji vɔ. ³⁰ Le nyɔnɔnui mɛ ɔ, ŋ nunuɔ nɔ mí be egbɛviwo d'a ku vɛ gbɔxwe yí enu hɔnwo a va jɔ go. ³¹ Jeŋkushi kodo nyigban a vayí gankegan yí nyaŋ 'nyɔwo a li tɛgbɛɛ. ³² "Amɛɖe de nya ŋkeke alo egaxoxo yí xexe lɔ a vayi do go. Kaka sɔje dɔlawo kodo Mawu eviɛ lɔ ji can ɔ, amɛɖekpokpoi de nyii go. Mawu eda ɖekɛ kpaŋ yí nyii. ³³ Mí nɔ glagla ji , a nɔ́ ŋzɔn ɖó ɔ, mí de nya gacimɛ yí ega lɔ a va xo go. ³⁴ Á le shigbe ŋsu ɖeka ci yí jijiɛ a xɔ emɔ yí na acɛ yi 'dɔwaviwo yí nu nɔ́ wo be: "Mí kpɔkpɔ axwe lɔ ji nɔ ŋ. É ɖó edɔ nɔ́ edɔwavi lɔwo mɛtɔɛmɛtɔɛ yí nu nɔ agbonugla lɔ be yí le nɔ́ ŋzɔn le axwe lɔ nu. ³⁵ Ci é le nɛnɛ ɔ, mí nɔ ŋzɔn. Ɖó ɔ mí de nya hwecinu yí axwe 'ga lɔ a trɔgbɔ go. Ede a nyi fiɛshi o, ezandomɛ o, fɔnfɔnmɛ kloklo ɖe atɔ alo nyidimɛ o, amɛɖe de nyii go. ³⁶ Nɔ́ é vá gbɔ kpata ɔ, mí ŋgble lɔn nɔ́ á va kpɔ mí le alɔn mɛ go. ³⁷ Enyɔ ci yí ŋ nunuɔ cɛ, ŋ nunuɛ nɔ́ amɛshamɛ be: mí nɔ zaŋte!"