¹ É kpɔtɔ nyisɔ yí wo a ɖu palsixwe kodo kpɔnnɔ cikemado xwe. Eyi avɔnsatɔwo 'gawo kodo esedɔwatɔwo jijiɛ aye 'mɔ ci yi wo a tó yi a lé Yesu yí a wu. ² Wo nú nɔ́ wowonɔnɔwo be: " Mì da lii le exwe lɔ ɖu gbe go? Nɔ́dényi nɛnɛ go ɔ, jukɔn lɔ a vá tɔ́ hunnyahunnya wawa." ³ Hwecinu yí Yesu le Simɔ ci yí je ekpo sasa 'xwé mɛ le Betani yí wo ɖuɖu nyɔnu ɖeka zɔnva gbɔ́ yí hɛn amihwɛnte ehovevitɔ egu ɖɔɖɔ ɖeka dó alɔmɛ. É ŋɛ́ enu nɔ egu lɔ yi sɔ́ amihwɛnte lɔ kɔdo eta nɔ Yesu. ⁴ Enu lɔ ci yí é wa de jeji nɔ amɛɖekawo eɖeeɖe go. Eyi wo nú le wowonɔnɔwo mɛ be: " Nyi yí jɔ yí nyɔnu cɛ do a hɛn amihwɛnte ehovevitɔ cɛ ahan ɔ? ⁵ Nɔ́ wo hɛn sa ɔ, wo a sa amihwɛte lɔ gajunho sanŋditɔn(3000) yí a sɔ́ eho lɔ má nɔ́ wamɛnɔwo ŋ!" Eyi wo gbé enyɔ nɔ́ nyɔnu lɔ veviɖe. ⁶ Vɔ ɔ, Yesu nu nɔ́ wo bé: " Mí tashi nyɔnu lɔ nɔ́ á gbɔn. Nyi yí jɔ yí mí le aya do ɔ nii nɛnɛ ɔ? Enunyui yí é nɔ ŋ. ⁷ Ɖo enyɛ ɔ, ŋ d'a le mi gbɔ tɛgbɛɛ go. Vɔ ɔ, wamɛnɔwo le mí gbɔ gashagamɛ yi zenɛni ci yí nú dro ɔ, mí a wa enyui nɔ wo. ⁸ Nyɔnu cɛ wa enu ci yí á sɛn eŋ wa. E doŋkɔ dra nyaŋ ŋcilan do kodo amihwɛnte sɔ́ ɖɛ́ nɔ́ nyaŋ ɖyiɖyigbe. ⁹ Le nyɔbɔnui mɛ ɔ, ŋ nunuɔ nɔ mí be afishafi ci yí wo a nú Eŋɛnyui lɔ kodo axwa le xexe lɔ pleŋ mɛ ɔ, wo a lɔ exo so enu ci yí nyɔnu cɛ wa nu yi wo a dodo ɔ eŋui yí." ¹⁰ Yuɖa Ishikaliwɔti ci yí nyí Yesu nukplanvi wive lɔwo domɛtɔ ɖeka vayi kpɔ avɔsatɔwo 'gawo bé ye a sa Yesu nɔ wo. ¹¹ Eyi eji jɔ avɔsatɔwo 'gá lɔwo yí wo ɖó egbe nii bé nɔ́ yi sɛɛ nɔ yewoɔ, yewo a ná eho yí. Gahɔnmɛ yí Yuɖa tɔ fini ci yí á to yí a sa Yesu nɔ wo jiji. ¹² Nɔ́ wo le ŋkeke ŋkɔtɔ ji nɔ́ kpɔnnɔ cikemado 'xwe lɔ ɔ, wo wunɔ pakixwe lɛngbɔviwo. Le ŋkeke hɔn lɔ jí ɔ, Yesu nukplanviwo biɔ́ɛ se bé : " Fini yí é ji bé mì a ɖa enu le nɔ eo le pakixwe lɔ jí nɔ ná va ɖu ɔ?" ¹³ Eyi Yesu dɔ nukplanvi lɔwo domɛtɔ amɛve ɖaɖa jugan mɛ yi nú nɔ́ wo bé: " nɔ́ mí yiyi ɔ, mí a dó ego ŋsu ɖeka ci yí dró eshi egu ɖɔɖɔ dó eta. Mí kplɔɛ do ¹⁴ yí nɔ́ é vayi axwe ɖémɛ ɔ, mí a nu nɔ́ axwe 'ga lɔ bé: " Cicagan biɔbiɔ eo se bé: Exɔ hinde mɛ yí na nɔ yí a ɖu pakixwe kodo nyaŋ nukplanviwo ɔ?" ¹⁵ Axwetɔ lɔ a dansin exɔ gangan ɖeka ci wo drado ɖɛ́ yí enuwo pleŋ sɔ egbe le mɛ le exɔ lexɔji lɔ mɛ nɔ mí. Ehɔn yí mí a nɔ yí a ɖa enu nɔ́ mì nɛ." ¹⁶ Nukplanvi lɔwo yi jugan lɔ mɛ yí kpɔ enu lɔwo shigbe lehanci Yesu nu enyɔ lɔ nɔ́ wo dó nɛnɛ yí ɖa enu nɔ́ pakixwe lɔ ɖuɖu. ¹⁷ Fiɛshimɛ ɔ, Yesu kodo yi nukplanvi wive lɔwo vayi axwe lɔ mɛ. ¹⁸ Ci yí wo ɖuɖu ɔ enu ɔ, Yesu nu bé: " Le nyɔnɔnuimɛ ɔ, ŋ nunuɔ nɔ́ mí bé amɛɖeka le míwo ciwo yí dodoɔ alɔ agban mɛ kodo ŋ domɛ yí a sa ŋ." ¹⁹ Eyi nukplanviwo gbé vovo yí tɔ́ yesu biɔbiɔ se ɖeka ɖeka bé: " Enyɛ yɔ a?" ²⁰ Yesu ɖoŋci bé : " Míwo wive lɔwo domɛtɔ ɖeka ci yí dodo alɔ agban ɖeka mɛ kod ŋ yɔ. ²¹ Nyɔnɔnuitɔ ɔ, Agbetɔvi lɔ a vá kú shigbe lehanci yí wo ŋwlii do Mawu 'nyɔ wemawo mɛ ɖaɖɛ dó nɛnɛ. Vɔ ɔ, babɛɛ nɔ amɛ ci yí a sɛɛ. Nɔ́ wo de jii sa haan go ɔ, á nyɔ́ nii sɔwu !" ²² Ci yí wo ɖuɖuɔ enu lɔ ɔ, Yesu sɔ kpɔnnɔ ɖeka yí dó akpe nɔ Mawu dó jí yí mii mɛ yí sɔ́ ná yí nukplanviwo bé: " Mí xɔ a ɖu. Ecɛ yí nyi nyaŋ ŋcilan." ²³ Le i godu ɔ Yesu sɔ kɔkpu yí vɛn le mɛ yí é do akpe nɔ́ Mawu dó ji yí sɔ́ ná yí nukplanviwo yí wo pleŋ sɔ́ ɖu. ²⁴ Eyi é nu nɔ́ wo bé: " Ecɛ yi nyí nyaŋ 'hun. É yí mɛ yí Mawu sɔ́ enublabla 'fɔ sɔ ɖoɖoɔ ete le. É kɔdo nyigban do eta nɔ amɛ sugbɔ. ²⁵ Le nyɔnɔ nui mɛ ɔ, ŋ nunuɔ nɔ mí be ŋ d'a gbe va nu vɛn bu ɖé kpɔ́ gbɔxwe yí a va nu vɛn yoyu le Mawu 'fiɔɖuxu lɔ mɛ go." ²⁶ Eyi wo ji pakixwe 'hawo yi kpe olivu 'to jí agé. ²⁷ Yesu nu nɔ yi nukplanviwo bé: " Mí pleŋ a vá klɛn afɔ le emɔ lɔ ji. Ɖó ɔ, wo ŋwlɛ do Mawu 'nyɔ wemawo mɛ daɖɛ bé: Na vá wu lɛngbɔkplɔtɔ lɔ yí lɛngbɔ lɔwo a gban hlɛn. ²⁸ Vɔ ɔ, nɔ́ ŋ va fɔ́n so ekuwodi ɔ na yi Galile 'kan mɛ yí a nɔ ete kpɔ mí le ehɔn." ²⁹ Eyi Piyɛ nu nii bé: " Nɔ́ a nyí afɔklɛnnu nɔ́ amɛwo pleŋ cań ɔ, d'á nyí nɔ́ enyɛ yɛ go." ³⁰ Gahɔnmɛ yí Yesu ɖoŋci nii bé: " Le nyɔnɔnui mɛ ɔ, ŋ nunuɔ nɔ eo be egbɛ cɛ ezanmɛ, gbɔxwe yí koklo a ɖe atɔ zeve ɔ, á gbé zetɔn be ye dejeshi enyɛ ɖɛ go." ³¹ Hwehɔnnu ɔ Piyɛ tɛ egbe do jí gligáan bé: " Gbeɖe, nɔ́ wo nú be wo a a wu ŋ kodo eo can ɔ, ŋ d'a nú kpɔ bé ŋ dejeshi eo ɖɛ go." Eyi nukplanvi kpɛtɛwo gbe nu ahan hɛnnɛ. ³² Yesu kodo yi nukplanvi lɔwo vayi ɖo fini ci yí wo yɔnɔ be Gecemani. É nú nɔ́ wo bé: "Mí nɔ anyinɔnɔ do elɛ. ma yi do egbe ɖaɖa a gbɔ." ³³ Eyi é yɔ Piyɛ, Ʒaki kodo Ʒan yí wo kplɔɛ do. Vɔnvɔn tɔ́ Yesu ɖoɖo yí ŋci lé eɖa nii shinshinshin. ³⁴ É nú nɔ wo bé: " ŋ sese vevi le enyɛɖeki mɛ kaka a kú. Mí nɔ ete kpɔ ŋ le elɛ yí a nɔ zanŋte." ³⁵ Ci yí é teyí ŋkɔ hwɛɖeka ɔ, é cɔn ŋmɛ anyi yí tɔ́ egbe dodo ɖaɖa be nɔ enu yí é nyí a jɔ ɔ, vevesese cɛ lé tó akpa nɔ eye. ³⁶ Eyi é nu bé: " Ada, Edanyɛ, enuɖekpokpoi de gonɔ co go. Ná ń efunkpekpe kɔkpu cɛ a tó akpa nɔ́ ŋ. Ŋgbé nyi ŋ dro yí a jɔ go, vɔ ɔ, ci yí é dro." ³⁷ le i godu ɔ, Yesu gbɔva nukplanvi amɛtɔn lɔwo gbɔ́ yi vá kpɔ́ yí wo

dɔndɔn alɔn. Eyi é nu nɔ́ Piyɛ bé: "Simon alɔn yí é dɔndɔn a? D'é sɛ̀n ̀eŋ a nɔ zanŋte egaxoxo ɖeka kpetii go?

³⁸ Mí nɔ ŋzɔn yí a dodoɔ egbe ɖaɖa nɔ́ mí ŋgbe va je tetekpo mɛ go. Ɖoɔ, agbetɔ gbɔngbɔn jinɔ bé ye a wa enunyui, vɔ yi ŋcilan de kpenɔ ji go." ³⁹ Yesu gbe teyi azɔge ké yí gbe sɔ enyɔ ciwo yí é nu vayi le egbedodoɖaɖa mɛ pɛ́pɛ́pɛ́ gbe sɔ do egbeɖaɖa. ⁴⁰ Keŋ yí gbe trɔgbɔva yi nukplanvi amɛtɔn lɔwo gbɔ́ yí gbe va kpɔ́ yi wo dɔndɔn alɔn. Alɔn wu egan wo. Kpɔ́ wo de nyá enyɔ ci yi wo a nú nɔ́ Yesu go. ⁴¹ Yesu gbete le wo nú zetɔntɔ lɔ yí gbe trɔgbɔva wo gbɔ́ yí biɔ́ wo se bé: "Mi kpɔtɔ dɔndɔn alɔn yí gbe gbɔngbɔn domɛ a? lé nɔ nɛnɛ! gamɛ sun yí wo a sa Agbetɔ vi lɔ nɔ́ enuvɔwatɔwo. ⁴² Mi fɔn a vá mì a yi! Mí kpɔ ɖá, amɛ ci yí sasa ŋ va ɖó!" ⁴³ Enyɔ lɔ nuɔ y Yesu le yi Yuɖa ci yí nyí yí nukplanvi wive lɔwo domɛtɔ ɖeka vá kɔɖɛ. Ahwakɔn ɖeka sɔ́ e wi kodo ekpowo kplɔɛ do. Avɔsatɔwo 'gawo kodo esedɔwatɔwo 'gawo kodo mɛganwo yí dɔ́ wo ɖaɖa. ⁴⁴ Yuɖa, amɛ ci yí sasa Yesu lɔ xo kodo wo dó jeshidu ɖeka ji bé: " Amɛ ci yi na ki eshi nɔ ɔ, é yí yɔ́. Mí lii goguiɖe a kplɔɛ sɔyi." ⁴⁵ Ci yi Yuɖa kodo ahwakɔn lɔ vá kɔɖo Yesu gbɔ zeɖeka vɔ, Yuɖa nu bé: " Cicagan!" Le i godu ɔ, é ki eshi nii. ⁴⁶ Eyi amɛ lɔwo teje Yesu ji yí lii. ⁴⁷ Vɔ ɔ, Yesu nukplanvi ciwo yi le ehɔntɔwu lɔ domɛtɔ ɖeka sɔ́ ewi yi kpa eto nɔ́ avɔsatɔ lɔ 'dɔwavi ɖeka. ⁴⁸ Eyi Yesu xɔ nuxu yí biɔ́ wo se bé: "Sɔ mí sɔ ewi kodo ekpowo yí vá ŋ le gbé shigbe flafinɔ gangan ɖé yí ŋ nyi nɛnɛ a? ⁴⁹ Gashagamɛ ŋ le míwo domɛ yí le enu kplan mí le mawuxwe mɛ. Vɔ ɔ, kpɔ́ mí de lé ŋ go. Nɔ́ enu ciwo yi ŋwlɛ do mawu 'nyɔ wemawo mɛ daɖɛ a kpɔ́ emɔ a jɔ ɔ, é yí ná yí enu lɔwo vayi do nɛnɛ." ⁵⁰ Eyi yi nukplanviwo pleŋ kan le gbɔ gbiin. ⁵¹ Ɖajɛvi ɖeka le eɖo ɖekɛ pkáŋ mɛ yí kplɔ yesu do. Wo je ji bé wo a lii ⁵² Yí é tashi eɖo lɔ yi ci mama yí shi. ⁵³ wo kplɔ Yesu yi avɔsatɔ gangan gbɔ́ yí avɔsatɔwo 'gawo kodo meganwo kodo esedɔwatɔwo vá bɔdo ehɔn. ⁵⁴ Piyɛ nɔ azɔge nɔ́ Yesu, vɔ yi kplɔɛ do kaka vayi ɖo avɔsatɔ gangantɔ lɔ gbogbu mɛ. É nɔ anyinɔnɔ do gbadenu yí le ezo xuɔ kodo avɔsatɔ gangantɔ lɔ dɔkpɛgawo. ⁵⁵ Avɔsatɔ gangantɔ lɔwo kodo sɛnsɛn 'hwɛxɔnu lɔ pleŋ jijiɛ kunuɖeɖe ci ji yí wo a zɔn a sɔ́ so ekuhwɛ nɔ Yesu. Vɔ ɔ, kpɔ́ wo kpɔ́ eɖe go. ⁵⁶ Nyɔnɔnuitɔ ɔ, amɛ sugbɔ kankan ŋsu dó enu nɔ Yesu. Vɔ ɔ, ehwɛ ciwo yi wo kankan ŋsu bé yi wu lɔwo de totoɔ emɔ ɖeka go. ⁵⁷ Amɛɖowo sosoɔ je ete a kan ŋsu dó enu nii bé: ⁵⁸ "Mì se yí é enunuɔ bé: " Na gban Mawuxwe ci yí agbetɔwo cu yi le ŋkeke amɛtɔn mɛ ɔ, na trɔcu ebu ci yí d'a gbe nyi agbetɔwo 'lɔnudɔwawa go"." ⁵⁹ Vɔ kaka vá je ehɔntɔxu cán ɔ, ehwɛ ciwo yí wo kankan ŋsu bé yi wu lɔwo d totoɔ emɔ ɖeka nɔ́ wo go. ⁶⁰ Eyi a vɔsatɔ gangantɔ lɔ vá só je ete le anyinɔxu lɔ ŋmɛ yí biɔ́ Yesu se bé: " D'à nu dó ehwɛ ci yí wo dodoɔ nɔ eo lɔ nú bá?" ⁶¹ Yesu bɔ enu kplii, enyɔ ɖe maɖoŋci nii. Eyi avɔsatɔ gangan lɔ gbe biɔɛ se bé: " Eo yí nyi klisolɔ, Mawu ci kanfunɔ Eviɛ a?" ⁶² Gahɔnmɛ yí Yesu va ɖoŋci bé: " ɛɛ, enyɛ yɔ. Mí pleŋ a vá kpɔ́ Agbetɔvi lɔ yí á nɔ anyinɔnɔ do ɖushimɛ nɔ ŋsɛnwopleŋtɔ lɔ yí a gbɔgbɔ le jiŋkushimɛzɔwo mɛ." ⁶³ Gahɔmɛ yí avɔsatɔ gangantɔ lɔ drɛn awu le ekɔ yí nú bé: " Mí gbe Ʒan kunuɖetɔ ba! ⁶⁴ Mi de se lehanci yí é zu Mawu dó bá! Lé mí kpɔɛ dó ɔ?" Eyi amɛshamɛ nu bé yi wu ehwɛ, eku yí je nii. ⁶⁵ Wowo domɛtɔ ɖekawo tɔ́ etan cucu do ŋmɛ nɔ Yesu. Wo sɔ́ enu blá ŋmɛ nii yí tɔ́ ekɔn tɔtɔɛ keŋ yi biɔ́ɛ se be: Míwo yí tɔtɔ ekɔn eo ɔ? amɛ lɔwo nyikɔ wo nɔ́ mì." Eyi edɔwavilɔwo le Yesu yí tɔ tomɛ xoxo nii. ⁶⁶ Piyɛ gbe kpɔtɔ le gbadenu le axwe lɔ mɛ gbɔxwe yí avɔsatɔ gangantɔ lɔ 'dɔwavi nyɔnuwo domɛtɔ ɖeka ɖyiva. ⁶⁷ É kpɔ Piyɛ yí é le ezo xuɔ. Eyi é gloi kpɔ júun yí nú nii bé: " Eo can zɔnnɔ kodo Yesu, Nazalɛtitɔ lɔ." ⁶⁸ Vɔ ɔ, Piyɛ mɔ enyɔ lɔ yí nú bé: "ŋ de nyá enyɔ ci nuɔ yí é le go. kpɔ́ ŋ de mɔŋjemɛ go. Eyi é to le axwe lɔ mɛ yí je agboji. [Eyi koklo ɖeka ɖe atɔ]. ⁶⁹ Ci yi edɔwavi nyɔnu lɔ gbe kpɔ Piyɛ ɔ, é gbe tɔ nunu nɔ́ amɛ ciwo yi le ehɔn tɔxu lɔ bé: " Yesu nukplanviwo domɛtɔ ɖeka yí nyí amɛ cɛ!" ⁷⁰ Vɔ ɔ, Piyɛ gbe mɔ ké. Sabaɖe ɔ, amɛ ciwo yí le ehɔntɔxu lɔ vá nú nɔ́ Piyɛ bé: " Yesu nukplanviuwo domɛtɔ ɖeka è nyi nyao. Ɖo ɔ, Galiletɔ yí eo can nyí." ⁷¹ Eyi Piyɛ ta enu yí nú bé : " Mawu le dɔn eto nɔ́ ŋ nɔ́ ŋ kankan ŋsu! Ŋ ta Mawu nɔ́ mí be ŋ de jeshi amɛ hɔn ci nu yí mí xoxoɔ nuxu so go." ⁷² Kaka Piyɛ a nú nɛnɛ vɔ, koklo ɖeka ɖe atɔ zevetɔ lɔ. Eyi Piyɛ ɖo eŋui enyɔ ci yí Yesu nu nii sasa ji bé: " Gbɔxwe yí koklo a ɖe atɔ zeve ɔ à gbé zetɔn be ye de jeshi ŋ ɖɛ go." Eyi é bui kpɔ yí tɔ́ avin fanfan.