^{1 3} Nyidin kucukucu ɔ, avɔtɔwo gangantɔwo dó ego kodo mɛganwo, esedɔwatɔwo kodo sɛnsɛn 'hwexɔnunɔtɔ kpɛtɛwo yi a lé ŋkuvi dó enu ci yi wo a wa kodo Yesu nu. Wo dɔ́ yi wo blɛɛ yi kplɔɛ yi nɔ Pilati. ² Eyi Pilati biɔ Yesu se be : ''E o yi nyi Yudatɔwo 'fiɔ a ?'' Yesu ɖoŋci nii bé : ''E o yi núi.'' Avɔsatɔwo 'gawo dó ehwe sugbɔ nɔ Yesu. ⁴ Eyi Pilati gbe biɔ Yesu se be : ''È bɔ enu a ? D'é se ehwe sugbɔ ciwo yi wo dodoɔ nɔ eo ba ?'' ⁵ Kpɔ Yesu de gbe ɖo enyo ɖe nii go. É jì eŋ nɔ Pilati sugbɔ. ⁶ Exwekpekpe ɖeka dúdú, nɔ́ wo le Atadodoamɛxwe ɖuɔ, Pilati jonɔ gakpamɛtɔ deka. Gakpamɛtɔ ci yi ahwakɔn lɔ jí bé yi lé jó ɔ, eyi é jonɔ. ⁷ Ehɔntɔ ɔ, ŋsu ci yí wo yɔnɔ bé Balabasi kodo aglajetɔ buwo sɛsɛn ega. Ðó ɔ, wo wu ameɖeka hwecinu yi hunnyahunnya ɖeka jɔ. ⁸ Amewo lɔ́ ahwa vayi kodo Pilati gbɔ yi nú nii bé yi lé jó gakpamɛtɔ ɖeka nɔ́ yewo shigbe lehanci yí yi wɛɛni do ɛnɛ. ⁹ Pilati biɔ wo se be : ''Mi ji bé enyɛ lé jo Yudatɔwo fiɔ a ?'' ¹⁰ Ðó ɔ, é nyá bé avɔsatɔ gangantɔwo hwanhwan eŋ kodo Yesu. É yi ná tado yi wo kplɔɛ wɛɛ nɔ́ eye. ¹¹ Vɔ ɔ, avɔsatɔ gangantɔ lɔwo be yi dɔdɔ ahwakon lɔ bé yi lé nú nɔ́ Pilati be Balabasi yí yi a jó nɔ́ yewo. ^{12 13} Eyi Pilati gbe trɔ biɔ́ ahwakɔn lɔ se be : «Nɔ́ ŋ jo Balabasi ɖee, nyi mi ji bé enyɛ lé wa kodo amɛ ci yi yɔyɔ be Yudatɔwo 'fiɔ lɔ ɔ ?» Wo dó axwa yí sɔ́ doŋci nìibé : «Kíin dó acisoga ji !» ¹⁴ Pilati biɔ wo se be : «Ehwe ci yi é wu do mi nɛnɛ ɔ ?» Hɔnnɔ gbɔxwe yí wo gbe do axwa dó jì ke be : «Kìin dó acisoga ji !» ¹⁵ Pilati sɔ gbeta be ye awa do enu ci yi ahwakɔn lɔ dró jí yí jó Balabasi nɔ wo. É dɔ́ bé wo lé dó sɔvobayɛ nɔ́ Yesu keŋ yi sɔ́ doashi nɔ́ sɔjawo nɔ́ wo a kíin dó acisoga ji. ¹⁶ Sɔjawo kplɔ Yesu va gbadenu le ekanjikpɔtɔ Pilati 'xwe mɛ yí wo yɔ́ ahwakɔn lɔ pleŋ. ¹⁷ Wo sɔ awu ejin wlaya ɖeka dó nii yí sɔ́ ŋja lɔn efiɔkuku yi sɔ́ cɔ́n nii. ¹⁸ Keŋ yi tɔ egbe dodo nii be : «Mi dó egbe nɔ eo, Yudatɔwo 'fiɔ !» ¹⁹ Sɔja lɔwo sɔ́ klogbuci ɖeka xoxoɔ eta nii, cucuɔ etan dó ŋmɛ nii yi jejeɛ eklo keŋ yi doŋdo nii. ²⁰ Ci yi wo gbali Yesu nyuiɖe ɖegbɔ, wo ɖe awu ejin vlaya lɔ le nu yi gbe sɔ yintɔ 'wuwo dó nii keŋ yi kplɔɛ a yi kan do acisoga ji. ²¹ Silɛnutɔ ɖeka ci yi wo yɔnɔ be Simɔ yí eviɛwo nyi Alɛshandru kodo Hlufusu vayiyiɛ jugan mɛ. É tó fini ci yi wo kplɔ Yesu toi dó yí sɔja bwo ʒii jí bé yi lé dró acisoga ci ji yi wo jijiɛ a kán Yesu do lɔ. ²² Wo kplɔ Yesu yi afi ci yi wo yɔnɔ be Gɔlugota ci gɔnmɛ yi nyí bé : «Texwe ci yí ɖo nɔnɔmɛ shigbe agbetɔ 'taxu han nɛnɛ.» ²³ Wo j̀i bé yewo a kpé aha ɖeka nɔ́ Yesu. Vɛn kodo enumuamɛ ci yi wo yɔnɔ be milu yí wo sɔ́ cá aha lɔ dado ehɔ ɖɛ́. Vɔ ɔ, é gbe be ye d'a nui go. ²⁴ Eyi wo kiin do acisoga jí yí vá trɔ́ enu kpɔ so yí 'wuwo nú, kpɔ́ be hin yí amɛɖeka a xɔ mɛ yí sɔ́ wo má. ²⁵ Nyidin gashiɖekɛ mɛ yi wo kán Yesu. ²⁶ Wo ŋwlɛ enu ci taɖo yi wo so ekuhwɛ nii dó kpakovi ɖeka jí le tamɛ nii be : «Amɛ cɛ nyi Yuɖatɔwo 'fiɔ». ²⁷ Sɔja lɔwo gbe kan flanfinɔ gangan amɛve ɖekawo ɖó acisoga ji do axa nɔ Yesu. Ðeka le yi ɖushimɛ yi amɛvetɔ le yi 'miɔlɔmɛ. ²⁸ Nɛnɛhan yi enyɔ ci yí wo ŋwlɛ so Yesu nu dó Mawu 'nyo wemawo mɛ daɖɛ be wo sɔ́ ɖo edanuwatɔwo 'gbɛ́ mɛ va jɔ do nɛ. ²⁹ Amɛ ciwo yí tó ehɔtɔxu lɔ yí vayigo hunhunhuɔ eta yí sɔ zuzuɔ Yesu be : «Hóò, è nu be a gban Mawuxwo lɔ yí a gbe cu ebu le ŋkeke amɛtɔn mɛ. ³⁰ Hwlɛ̀n eoɖeki gán yí a ɖyso acisoga ji !» ³¹ Nɛnɛ lɔ ke yi avɔsatɔ gangantɔwo kodo esedɔwatɔwo gbaligbaliɛ Yesu nɛ. Wo nunuɔ nɔ wowonɔnɔwo be : «É hwlɛn amɛwo gan; vɔ kpɔ d'é sɛ́n eŋ a hwlɛn yiɖeki gán go ! ³² Klisolɔ, Israyɛli 'fiɔ, le dyi le acisoga lɔ ji eviɛ trololo nɔ́ mì a kpɔ́ yi a xɔɛ ji se.» Amɛ ciwo yí wo kan do acisoga ji le axajiwo nɔ́ Yesu can zuizuiɛ. ^{33 35} So gawive kaka va kɔdo gatɔn mɛ ɔ, vivici dó le cju lɔ pleŋ mɛ. ³⁴ Eyi le gatɔn mɛ vɔ, Yesu do axwa cícící yí nú bé : «Eloyi, Eloyi, lama sabakitani ?» Ci gɔnmɛ yi nyi bé : «Nyaŋ Mawu, nyaŋ Mawu, nyí yí è gbe ŋ dɛ ɔ ?» Ci yí amɛ ciwo yi le ehɔn lɔ domɛtɔ ɖekawo se enyɔ ci yi é nu lɔ, wo nú bé : «Mí se lehanci é yɔyɔ Eli do ɖá !» ^{36 38} Eyi amɛɖeka xi eju yi vayi sɔ kocan ʒin dó vɛn shila mɛ yí sɔ́ trɔn klogbu ci nú yí doi ɖaɖa Yesu gbɔ be yi lé nu keŋ yí nú be : «Mi nɔ ete ! Mì a kpɔ́ be Eli a vá dii le acisoga lɔ ji mɛ !» ³⁷ Vɔ ɔ, Yesu do axwa cicici yí fá. Eyi avɔ gangan ci yí wo sɔ so Mawuxwe lɔ mɛ drɛn do eve so eji kaka kɔdo gɔnmɛ. ³⁹ Ci yi sɔjakavehowiga ci yi le ete le ŋkɔ nɔ Yesu kpɔ lehanci yí é ku dó ɔ, é nú be : «Mawu Eviɛ yí ŋsu cɛ nyi nyɔnɔnui a !» ⁴⁰ Nyɔnu ɖekawo le azɔge le ehɔn lɔ hɛnnɛ yí kpɔkpɔ Yesu ɖaɖa. Mali Magidalatɔ kodo Mali ci yí nyí Ʒaki hwehwɛtɔ kodo Ʒoze 'nɔlɔ sɔ kpenɔ Salomɛ le nyɔnu lɔwo mɛ hɛnnɛ. ⁴¹ Nyɔnu lɔwo kplɔ Yesu do so gacimɛ yí é le Galile 'kan mɛ yí kpekpeɛ do nú le yi 'zianwo mɛ. Nyɔnu buwo cán gbe kplɔɛ do vá Ʒeluzalɛmu lɔ hɛnnɛ yí le ehɔn. ⁴² Ezan do vɔ. Hwecinu yí wo tɔnɔ ezan drɔdrɔ nɔ́ gbɔngbɔngbe yɔ. ⁴³ Ʒozefu ci yí só Alimate jugan mɛ yí nyí bubu mɛ le sɛnsɛn 'hwɛxɔnu lɔ vá kɔ ɖɛ. Eyɛ cán nɔnɔ ete kpɔ Mawu 'fiɔɖuxu lɔ. E dó eji yi vayi biɔ so Pilati gbɔ bé yi le tashi Yesu 'cɔ nɔ́ eye. ⁴⁴ Vɔ ɔ, e ji eŋ nɔ́ Pilati be Yesu ku vɔ. Eyi é nu be wo lé yɔ́ sɔjakavehowiga ci yí kpɔkpɔ ehɔn lɔ ji vɛɛ nɔ eye. Ci yi wo yɔɛ yi é va ɔ, Pilati biɔɛ se be Yesu ku xóxóxó mɛ. ⁴⁵ Sɔjakavehowiga lɔ ɖoŋci nii be ɛɛ. Eyi pilati ɖe emɔ nɔ Ʒosɛfu be yi le xayi sɔ Yesu 'cɔ lɔ. ⁴⁶ Gahɔnmɛ yi Ʒosɛfu vayi xwle gagayi gangan ɖeka yi vayi ɖe Yesu le acisoga ji yí sɔ́ doi yí vá sɔyi dyi do yɔdu ɖeka ci yi wo ku do ekpe mɛ ɖɛ mɛ keŋ yi bli ekpe gangan ɖeka sɔ cú enu nɔ yɔdu lɔ. ⁴⁷ Mali Magidalatɔ kodo Mali ci yí nyí Ʒoze 'nɔlɔ kpɔ Yesu ɖyixu.