¹ Ci yi gbɔngbɔngbe ŋkeke lɔ vayi vɔ, Mali Magidalatɔ koda mali Ci yí nyi Ʒaki 'nɔlɔ kodo salomɛ xwl amihwɛnte keŋ asɔ yi wu nɔ́ Yesu 'cɔ lɔ. ² Eyi kuɛshilagbe nyindin kucukucu ɔ, wo ɖedo Yesu yɔdu lɔ gbɔ. ³ Nyɔnu lɔwo biɔbiɔ wowo nɔnɔwoɔ se be: " mi yi a lte ekpe ci yí wo sɔ ʒin enu nɔ yɔdu lɔ nɔ́ mì ɔ? ⁴ Vɔ kaka wo a ɖe ekɔ yí a kpɔ ɖaɖa ɔ, wo kpɔ be wo bli ekpe gangan zɛgɛɛ lɔ so yɔdu lɔ nu. ⁵ Eyi wo ɖo yɔdu lɔ mɛ yí kpɔ ɖajɛvi ɖeka yí é le anyinɔnɔ le ɖushimɛ. Kaka nyɔnu lɔwo a kpɔɛ ahan vɔ, vɔnvɔn le wo. ⁶ Vɔ ɔ, ɖajɛvi lɔ nu nɔ wo be : " Mí gbe vɔn go. yesu Nazalɛtitɔ ci yí wo kan do acisoga ji jiɛ mí le. É fun so ekuwodi. D'é gbe le yɔdu lɔ mɛ go. Mí kpɔ fi ci yí wo sɔ mlɛn sasa ɖá! ⁷ Ecɛyɛ ɔ, mí va yi nu nɔ yi nukplanviwo kodo Piyɛ can be Yesu le ete kpɔ mí le Galole 'kan mɛ. Ehɔntexu yí mí a vayi kpɔɛ le nɛ, shigbe le hanci yí é nui nɔ mí daɖɛ do sasa." ⁸ Eyi nyɔnu lɔwo to le yɔdu lɔ mɛ yí shi. Wo caka le susu mɛ. Wo hunhunhuɔn. Kpɔ wo de nu enyɔɖe nɔ amɛɖe go. Ɖó ɔ, wo vɔnvɔn. ⁹ Ci yi Yesu fun so ekuwodi kwɛshilagbe nyidin ɖegbɔ ɔ, mali Magidalatɔ ci mɛ yí é nyan gbɔngbɔn amadrɛ to le sasa yí é dansin yiɖeki nɔ do ŋkɔ. ¹⁰ Eyi yɛ, yi vayi nu nɔ amɛ ciwo yí kplɔnɔ Yesu do be yi fɔn so ekuwodi. Gbɔhwe yí a va do eŋɛ lɔ nɔ wo ɔ, wo le ŋshishi mɛ yi le avin faan. ¹¹ Vɔ ci yí wo se be yí le agbe yí mali kpɔɛ ɔ, wo de xɔɛ ji se go. ¹² Le yí godu ɔ, Yesu dansin yiɖeki to alɔkpɔ bu mɛ nɔ nukplanvi amɛve ɖeka ci yí zɔn emɔ yi gɔ kɔxwi ɖeka mɛ ¹³ Wo gbɔ so ehɔntexu lɔ yi va nui nɔ wowo kpenawo. Gankegan ɔ, wo de xɔ enyɔ ci yí nukplanvi amɛve lɔwo nú jí se hɛnnɛ go. ¹⁴ Kpɛtɛkpɛtɛ ɔ, Yesu dansin yiɖeki nɔ nukplanvi wiɖeka lɔwo gacimɛ wo le enu ɖuɔ. É gbe enyɔ nɔ wo be ci yi ye fɔn so ekuwodi yí amɛwo kpɔ eye yi va nu nɔ wo ɖee, nyi yí jɔ yi wo de kan ji keɛŋ yí tri eto mɛ. ¹⁵ Le yi godu ɔ, é nu nɔ wo be: " Mí yi xexe lɔ pleŋ mɛ a yi dra Eŋɛnyui kodo axwa nɔ amɛshiamɛ. ¹⁶ Nɔ amɛɖe xɔ Eŋɛnyui lɔ ji se yí wo wa ʒinʒindotɔmɛ mawutɔ nii ɔ, Mawu a hwliin gan. Vɔ nɔ amɛɖe xɔ Eŋɛnyui lɔ ji se go ɔ, wo a do ehwɛ nii. ¹⁷ Enu ciwo yi wo a sɔ di jeshi amɛ ciwo yi xɔ Eŋɛnyui lɔ ji se yí nyi be: Amɛ lɔwo a nya nɔ gbɔngbɔnvɔnwo tii le amɛwo mɛ le nyaŋ nyikɔ mɛ yí a gbe donɔ aɖe yoyuo. ¹⁸ Nɔ wo le edan alo nɔ wo nu aɖyi ɖe can ɔ, d'à wa enuɖe nɔ wo go. Nɔ wo sɔ alɔ dado eta nɔ edɔnɔwo ɔn wo a ha ya. ¹⁹ Ci yí Axwetɔ Yesu nu enyɔ hɔnwo nɔ wo ɖegbɔ ɔ, Mawu kuɛ yi jiŋkushi yí a vayi nɔ anyinɔnɔ do yi ɖushimɛ. ²⁰ Eyí Yesu nukplanvi lɔwo so yi tɔ́ Eŋɛ nyui lɔ dodo le afishiafi kodo axwo. Axwetɔ kpenɔ do wo nu le edɔlɔ mɛ yi gbe ɖoɖo ekpe enyɔ lɔ ci yí wo nunuɔ ji sɔto enujin ciwo yí wo wawa mɛ. Nɛnɛ yi Axwetɔ dansin nɔ Amɛwo be enyɔ ciwo yi nukplanvi lɔwo nunuɔ nyi nyɔnɔnui do nɛ.