¹ Le ŋkeke bu ji ɔ, amɛwo gbe lɔ ahwa yi va Yesu gbɔ. Ci yí enuɖe de li yi wo a ɖu o ɔ, Yesu yɔ yi nukplanviwo yí nú nɔ wo be : ² " Amɛ lɔwo 'nú wa ɖeka nɔ́ ŋ. Ɖo ɔ, so nyisɔke yi wo va ŋgbɔ yi enuɖe de gbe kpɔtɔ nɔ wo ɖɛyɛ yi wo a ɖu go. ³ Nɔ wo de ɖu enuɖe gbɔxwe yí ŋ tashi wo be wo le yí axwe yɛ ɔ, wo d'a sɛn eŋ ayi go. Ɖo ɔ, amɛɖeqo le wo mɛ yi so jijitɔxu." ⁴ Gahɔnmɛ ɔ, Yesu nukplanviwo biɔɛ se be: " Finɔ yi mi akpɔ enu le nɔ wo yi wo a ɖu yi xodu a ɖɔ wo le zogbeji elɛ ɔ?" ⁵ Yesu biɔ wo se be: " kpɔnnɔ nɛni yí le mi shi ɔ?" wo ɖoŋci nii be:"kpɔnnɔ amadrɛ yi le mi shi." ⁶ Eyi Yesu nu nɔ amɛ lɔwo be wo le nɔ anyinɔnɔ do nyigban. E sɔ kpɔnnɔ lɔwo yi dó akpe nɔ mawu yí ŋɛ wo mɛ yí sɔ wo na yi nukplanviwo nɔ wo a na wo nɔ amɛwo. Eyi wo ma wo nɔwo, ⁷ kpavi hwɛhwɛ ɖekawo le nukplanvi lɔwo shi hɛnnɛ. Yesu yra do kpavi lɔwo ji hɛnnɛ yi nu nɔ yí nukplanviwo be wo le gbe xɔ ama nɔ amɛ lɔwo. ⁸ Amɛshamɛ ɖu enu yi xodu ɖɔɛ kaka ékpɔtɔ. Ci yi nukplanviwo lɔɛ ɔ, e sun kishi amadrɛ. ⁹ Wowo hlɛnhlɛnmɛ le shigbe kotokun amɛnɛ (4000) han ɛnɛ. Eyi Yesu klan wo. ¹⁰ Le yi godu zeɖeka ɔ, yi kodo yi nukplanviwo ɖo etɔjihungangan mɛ yí yí Dalimanuta 'kan mɛ. ¹¹ Falisitɔ ɖekawo va ɖo Yesu gbɔ yi tɔ enyɔ dɔndɔn koɖi. Wo ji be yewo a doi kpɔ yi nu nii be yi le wa jeshidu ɖeka nɔ yewo akpɔ yi a nya be mawu yí doɛ ɖaɖa. ¹² Eyi yesu gbɔn fuun yí yi egbɛviwo biɔ wo se be : "Nyí yí jɔ yi egbɛviwo biɔ biɔ be wo le jeshidu ɖeka nɔ yewo a kpɔ ɔ, ? Le nyɔnɔnui mɛ ɔ, ŋ nunuɔ nɔ mi be wo d'a kpɔ jeshidu ɖekpokpoi go!" ¹³ Eyi e só le wo gbɔ yi ɖo etɔjihun mɛ yi jeŋkɔ ago eɖetɔ lɔ jí nɔ́ axu lɔ ¹⁴ Yesu nukplanviwo ŋlɔgbe kpɔnnɔwo ɖɛ gboxwe só. Ɖeka kpaŋ yi le wo shi le etɔjihungangan lɔmɛ. ¹⁵ Eyi Yesu kanxle wo be: "Mi kpɔ nyuiɖe le Falisitɔwo kodo Elodi kpɔnnɔcikewo nu." ¹⁶ Eyi nukplanviwo tɔ nunu nɔ wowonɔnɔwo be yewo de hɛn kpɔnnɔ go. ¹⁷ Yesu nya be wo le enyɔ dɔn le wowonɔnɔwo mɛ. Eyi é biɔ wo se be : " Nyi yí na taɖo yi mi le enyɔ dɔn so kpɔnnɔ mahɛn ŋci ɔ? Susu de le enyɔ ci yi ŋ nu nɔ mí haɖe o ba? Mi de se i gɔnmɛ o ba? Vɔ ɖee ŋta yi mi sɛnsɛn ahan a? ¹⁸ Miwo ŋkuviwo de kpɔkpɔ enu o ba? Miwo 'towo de seseɛ enu o ba? Mi de gbe ɖodo eŋui enu o ba? ¹⁹ Gacimɛ yi ŋ na kpɔnnɔ amatɔn mɛ yi sɔ ma nɔ amɛ kotokun amatɔn (5000) ɖee, kishi ɖɔɖɔ nɛni yi kpɔtɔ yi mi lɔ ɔ?" Wo ɖoŋci nii be : " kishi ɖɔɖɔ wive?" ²⁰ Yesu gbe yi ji be: "Vɔ ci yi ŋ ma kpɔnnɔ amadrɛ yi sɔ ma nɔ ŋsu kotokun amɛnɛ (4000) ɖee, kishi nɛni yi kpɔtɔ yi mi lɔ ɔ? Wo ɖoŋci nii be: " kishi ɖɔɖɔ amadrɛ." ²¹ Eyi Yesu va biɔ wo se be : Mi de se enyɔ ci ŋ nunu gɔnmɛ hade o ba?" ²² Yesu kodo yí nukplanviwo vayi ɖo Bɛtisayida. Amɛɖekawo kplɔ ŋkuvitɔntɔn nɔn ɖeka vá gbɔ́ yi ɖe kuku nii bé yi lé tɔ́ alɔ yi. ²³ Eyí Yesu le alɔ nɔ ŋkuvitɔntɔnnɔn lɔ yi kplɔɛ ti le kɔxwi lɔ mɛ. É dó etan ŋkuviwo nɔ́ ŋsu lɔ yi sɔ́ alɔ dado ji yí biɔ́ɛ se be: " É kpɔkpɔ enuɖe a?" ²⁴ Ŋkuvitɔntɔnnnɔn lɔ hun ŋkuvi yí nú nii bé: " ŋ kpɔkpɔ amɛwo yí wo le shigbe aciwo nɛnɛ, vɔ le zɔnlin gɔ." ²⁵ Eyi Yesu gbe sɔ alɔ dado ŋkuviwo ji nii. Ci yí ŋkuvitɔntɔnnnɔn lɔ gbe hun ŋkuviwo ɔ, edɔ lɔ m nii yí é tɔ enu kpɔkpɔ ceŋceŋ. ²⁶ Gahɔnmɛ ɔ, Yesu yí nú nii bé: " ŋgbè trɔyi kɔxwi lɔ mɛ o. Sòyi axwe." ²⁷ Yesu kodo yi nukplanviwo kpe kɔxwi ciwo yi trɔdo sezale jugan ci yi le Filipu 'kan mɛ. Ci yí wo le emɔ lɔ ji ɔ, Yesu biɔ wo se be: " Mi yi amɛwo nunɔ bé ŋ nyi ɔ?" ²⁸ Nukplanviwo ɖoŋci nii bé: " Amɛɖekawo nunɔn be eo nyi Ʒan 'mɛci yí wanɔn jinjindo tɔmɛ Mawutɔ, amɛɖewo nunɔn bé eo nyi Mawu 'ŋɛdotɔwo domɛtɔ ɖeka." ²⁹ Eyi Yesu va biɔ wo se bé: " vɔ ci míwo kpɔ́ɛ ɖee mide yí ŋ nyi? " Piyɛ ɖoŋci nii bé: " Eo yí nyi kliso." ³⁰ Gahɔnmɛ yi Yesu do ese nɔ́ wo veviɖe le be wo ŋgbe nui nɔ́ amɛɖekpokpoi go. ³¹ Le yi godu ɔ, Yesu tɔ enu kplankplan nukplanviwo be: " kokoko ɔ, Agbetɔvi lɔ a kpe efun sugbɔ yi mɛganwo, a vɔsatɔwo 'gawo kodo esedɔwatɔwo a gbe yí nyɔ gbɔ. Wo awui yi le ŋkeke amɛtɔntɔ lɔ gbe ɔ, a fɔn so ekuwodi." ³² Yesu 'dre enyɔ lɔ mɛ nɔ wo nyuide le yi goduɔ Piyɛ kplɔɛ yi akpa yi vayi ka adyi enyɔ lɔ nii. ³³ Vɔ ɔ, Yesu trɔtɔ yi nukplanviwo júún yi wa adan do Piyɛ be: "Gbo yi ɖaa, Legba! D'è ɖeɖe susu shigbe Mawu nɛnɛ go; e ɖeɖe susu shigbe agbetɔ nɛnɛ." ³⁴ Eyi Yesu yɔ ahwakɔn lɔ kodo yi nukplanviwo yi nú nɔ wo be: " Nɔ amɛɖe ji be ye a kplɔ ŋ do ɔ, é ɖo a ŋlɔbe yiŋtɔ 'drowo yi a dro yi 'cisoga kɛŋ yi a kplɔ ŋ do. ³⁵ Ɖo nɔ amɛde ji be ye a hwlɛn ye 'gbe gan ɔ, á bui. Vɔ ɔ, nɔ amɛɖe bu yi 'gbe do enyɛ kodo E ŋɛ nyui lɔ 'ta ɔ, a gbe yí kpɔɛ. ³⁶ Nɔ xexemɛ dɔkunuwo pleŋ sun amɛ shi gankegan yi e bu yi 'gbe ɖee, ele hin yi a kpɔ le mɛ ɔ? ³⁷ Nyí agbetɔ a sɛn eŋ sɔ ɖɔ eli yi 'gbe ɔ? ³⁸ Egbɛviwo nyi enu vɔnwatɔwo kodo egbejimanɔtɔwo. Nɔ enyɛ kodo anyi 'nyɔ wa ŋkpɛn nɔ amɛɖe le amɛ hɔnwo trɔgbɔ le edalɔ klɛnklɛn mɛ kodo edalɔ dɔla kɔkɔɛ wo ɔ, amɛ lɔ 'nu a va wa ŋkpɛn nii hɛnnɛ.