¹ Yesu so le ehɔn yí yi Nazalɛti, jugan ci mɛ yí é shin le, yi nukplanviwo kplɔɛ do. ² Le gbɔngbɔngbe ɔ, Yesu va tɔ enu kplankpan amɛwo le mawu sɛnxu. amɛ lɔwo su egbɔ. Ci yi wo se lahanci yí é kplankplan enu lɔ do ɔ, e ji eŋ nɔ wo yí wo biɔbiɔ wowo nɔnɔwo se be : " Fini é se enyɔ hɔnwo so ɔ? Mi yí na ŋnu nyanya hɔn kodo acɛ ci é sɔ wawa jeshidu hɔnwo ɔ? ³ D'é nyi Mali eviɛ, acikpatɔ lɔ yi nyi cɛ ba? D'é nyi Ʒaki, Ʒozé Ʒudi kodo Simɔ fofo lɔ yɔ ba? Nɔviɛ nyɔnuwo de le mì mɛ le elɛ viɛ ba? Énu cɛ nyi afɔklɛnnu nɔ wo yí wo de xɔ Yesu jise go; ⁴ Eyi Yesu nu nɔ wo be "wo ɖo shishi nɔ Mawu 'ŋɛdotɔ le afishiafi. Vɔ ɔ, jumɛtɔwo, yi xowu mɛ lɔwo ko yi xwemɛtɔwo de ɖonɔ shishi nii go." ⁵ Yesu de sɛn eŋ wa jeshidu ɖekpokpoi le ehɔn sɔwu alɔ ci yí é sɔ da do eta nɔ edɔnɔ ɖekawo yí lanmɛ haya nɔ wo go. ⁶ Jimaxɔse Nazalɛtitɔwotɔ ji, eŋ nɔ yesu. Le i goduɔ, trɔdo Nazalɛti jugan mɛ yí kplankplan enu amɛwo. ⁷ É yɔ amɛ wive lɔwo yí tɔ wo dɔdɔ ɖaɖa Mawu 'nyɔ nu gbe eve yí na ŋsɛn wo do gbɔngbɔnvɔnwo ji. ⁸ É do ese nɔ wo be: " Mí ŋgbe hɛn enuɖe gbɔxwe yí́ a zɔn emɔ sɔwu aci ci yí mí a le do alɔnu go. Mí ŋgbe hɛn enuɖuɖu ɖe alo godu alo eho kpetii do akpo mɛ go. ⁹ Ggbe sɔ kpe nɔ eyɛ ɔ, Mí do fɔkpawo. Mí ŋgbe hɛ awu bu ɖe bɔ do ci mí do nu go." ¹⁰ Ŋgbe nu nɔ wo hɛnnɛ be : " Nɔ Mí yi axwe ɖe mɛ yí wo xɔ mí ɔ, mí a nɔ axwe lɔ mɛ kaka a sɔ nanɔ gacimɛ yí mí a va so le ehɔn. ¹¹ Vɔ ɔ, nɔ wo de xɔ mí mɛdru alo wo de ji a se míwo gbe le afiɖe go ɔ, mí xuxu míwo 'fɔ 'kɔ wo do ehɔn a sɔ ɖe kunu nɔ wo be mí wo kodo de gbe le ekacaca ɖe mɛ go yí a so le wo gbɔ." ¹² Eyi wo je emɔ yi do axwa yi nunuɔ nɔ amɛwo be wo le trɔ wowoɖekiwo a ji. ¹³ Wo nyanya gbɔngbɔnvɔnwo tii le amɛwo mɛ yi shishiɛ ami nɔ dɔnɔ sugbɔ yi edɔ mimiɛ nɔ wo. ¹⁴ Gahɔnmɛ ɔ, amɛwo kan Seŋ so Yesu nu nɔ efiɔ elodi Ancipasi. Ɖo ɔ, Yesu nyikɔ gban do étó. Amɛɖekawo nunuɔ be: "Ʒan amɛ ci yi wanɔ ʒinʒindotɔmɛ mawutɔ nɔ amɛ yí fɔ so ekuwodi. Eyi na taɖo yí ɖo ŋsɛn yí le jeshiduwo waa. ¹⁵ Vɔ ɔ, amɛɖewo nunuɔ be: "mawu 'ŋɛdotɔ Eli yɔ" yí amɛ buwo gbe nunuɔ be domɛtɔ ɖeka yɔ nɛnɛ." ¹⁶ Ci yi efiɔ elodi se enyɔ ciwo pleŋ yí wo nunuɔ ɔ, é nu be : "Ʒan, amɛ ci wana ʒinʒindotɔmɛ Mawutɔ nɔ amɛ ci yi ŋ dɔ yi wo so eta nɔ yɔ! É fɔ so ekuwodi!" ¹⁷ Elodi dɔ yí wo le Ʒan yi do ega yi yí sɔ cu do gakpa mɛ do Elodiyadi ci yi yiŋtɔ xɔ yí sɔ ɖe ŋci. Elodiyadi lɔ trɔ nyi Elodi nɔviɛ filipu ashiɛ. ¹⁸ Le mɛ ɔ, Ʒan nu nɔ Elodi vayi be: "Ese de ɖe emɔ nɔ eo be eo le xɔ nɔvio 'shi go." ¹⁹ Ʒan nu veveɛ Elodiyadi nu yi é jijiɛ be ye a wui, vɔ kpɔ de sɛn eŋ kpɔnɔ emɔ le nu go. ²⁰ Ɖo ɔ, Elodi nya be amɛjɔjɔɛ kodo xɔsetɔ yí nyi Ʒan yí vɔnvɔn nii yí gbe cɔnnɔ alɔ yí ji. Nɔ éeseseɛ Ʒan 'nyɔwo ɔ, é dan eta nɔ yiɖo ki. Gankegan ɔ, enyɔ lɔwo vivinɔ sese nii. ²¹ Vɔ gbeɖeka ɔ, mɔnu ci yí Elodiyadi a to va ze nii le gbecigbe yi Elodi ɖuɖuɔ yi jigbezan. Ggehɔngbe lɔ ɔ, Elodi na yí wo ɖa enu Sugbɔ yi é yɔ yi can miwo , yi 'hwagawo kodo amɛ ŋkuvileji ciwo le Galile 'kan mɛ. ²² Elodiyadi eviɛ nyɔnuvi va ɖo exɔ lɔ yí tɔ ewe ɖuɖu. Lehanci yí é ɖu ewe lɔ do jɔ eji nɔ Elodi kodo amɛ ciwo yí va aʒanduxu lɔ. Eyi efiɔ lɔ nu nɔ nyɔnu vi lɔ be: "Enu ci yí dro eo ɔ, biɔ ŋ nɔ ma ná eo. ²³ Eyi é ɖo egbe nii le amɛ wo ŋmɛ be: "Enuɖekpokpoi ci yi a biɔ ŋ ɔ, na ná eo; nɔ egbe nyi nyaŋ 'fiɔɖuxu mamamɛ yɔ can." ²⁴ Eyi nyɔnuvi lɔ tó yi vayi biɔ enɔlɔ se be: "Nyi yí na biɔ ɔ,?" Enɔlɔ ɖo ŋci nii be: "Nu be ye a xɔ Ʒan amɛ ci yi wanɔ ʒinʒin dotɔmɛ Mawutɔ 'ta." ²⁵ Eyi é ɖe eblɛ yí trɔ yi efɔ lɔ gbɔ yí nu nii be: "ŋ ji be a na Ʒan amɛ ci yi wawa Ʒinʒin dotɔmɛ Mawutɔ 'ta ŋ do kpanutasɛ ɖeka mɛ eviɛ trololo yiɛ!" ²⁶ Enyɔ lɔ waɖeka nɔ efiɔ yí é ci ŋshishi mɛ. Vɔ kpɔ d'é ji be ye a gbe enu ci yí nyɔnuvi lɔ biɔ na nii go.Ɖo ɔ é ta enu do ji le mɛdruwo ŋmɛ. ²⁷ Zeɖeka ɔ é dɔ yí sɔja ɖeka be yí le vayi so Ʒan 'ta vɛ nɔ eye. Eyi yɛ va yi so eta nɔ Ʒan le gakpamlɔ mɛ. ²⁸ Yí sɔ do kpanutasɛ ɖeka mɛ yí sɔɛ vɛ nɔ nyɔnuvi lɔ. Eyi yɛ sɔɛ na enɔlɔ. ²⁹ Ci yí Ʒan nukplanviwo se enyɔ lɔ ɔ, wo va sɔ yi 'cɔ lɔ yi ɖyi. ³⁰ Amɛdɔdɔ lɔwo trɔgbɔ va Yesu gbɔ yí va nu enu ciwo yí wo wa kodo lehanci yí wo kplan enu amɛwo wo do nii. ³¹ Eyi Yesu nu nɔ wo be: " Mí na nɔ mì a te yi azɔge le amɛwo nu nɔ mí a gbɔndomɛ hwɛɖeka." Ɖo amɛwo va wo gbɔ yí so ɔ, e buwo gbe vanɔ kaka kpɔ wo de kpɔ vovo a ɖu enu kpetii go. ³² Gahɔnmɛ yí wo ɖo etɔjihungangan mɛ wowo ɖekɛwo yí te yi azɔge le amɛwo nu. ³³ Vɔ ci yi amɛ sugbɔ kpɔ wo yiyiɛ ɖaa ɔ, wo nya fini ci yí wo yiyiɛ yí lɔ awa so jugan juganwo mɛ. Yi to afɔ kaka yí vayi ɖo ehɔn lɔ do ŋkɔ nɔ wo. ³⁴ Ci yi Yesu dyi le etɔjihun lɔ mɛ yí kpɔ ahwakɔn gangan lɔ ɔ, amɛ lɔwo nu wa ɖeka nii. Ɖo ɔ, wo le nii shigbe legbɔ ciwo yi de ɖo kplɔtɔ go nɛnɛ. Eyi é tɔ enu kplankpaln wo so enu sugbɔ nu. ³⁵ Gamɛ yi bóo. Eyi nukplanvi lɔwo tegogo Yesu yi nu nii be: "Gamɛ yi yí fini ci yi mì le gbe jiji le axwe gbɔ. ³⁶ Eyi na taɖo ɔ, tàshi amɛ lɔwo nɔ wo a yi ji enuɖe a ɖu le nukan kado kɔxwi ciwo yí gogo elɛ lɔ mɛ." ³⁷ Eyi Yesu ɖoŋci nɔ wo be : "Miwoŋtɔwo mí na enu wo nɔ wo a ɖu a?" Nukplanvi lɔwo biɔ́ɛ se be : " Vɔ ɖee, nu è nunuɔ be miwo lé sɔ gajunho sanŋdive(200) a yi xwle enu nɔ́ ahwakɔn lɔ a ɖu a?" ³⁸ Yesu biɔ wo se be : "kpɔnnɔ nɛni yí le mí shí ɔ? Mi yi kpɔɛ kpɔ." Ci yi wo vayi kankan enuwo mɛ kpɔ ɖegbɔ ɔ, wo ɖoŋci nii bé amɛve yi le mì shí." ³⁹ Eyi Yesu nu nɔ́ wo be wo lé ná nɔ́ amɛ lɔwo a má yi a bɔdo texwe vovovo yi a nɔ anyinɔnɔ do egbewo ji. ⁴⁰ Wo bɔdo texwe vovovo. Amɛɖekawo nyi ekave howi ekave howi yi amɛ buwo gbe nyi eka howo eka howo. ⁴¹ Gahɔnmɛ yi Yesu sɔkpɔnnɔ amatɔn kodo kpavi amɛve lɔwo yí ɖe ekɔ kpɔ jiŋkuxhi yi do akpe nɔ mawu. le i godu ɔ, é ma kpɔnnɔ lɔwo mɛ yi sɔ̀ ná yi nukplanviwo be wo le má wo nɔ amɛ lɔwo nɔ wo a ɖu. Nɛnɛke yi é gbe ma kpavi lɔwo nɔ amɛ lɔwo pleŋ dó nɛ. ⁴² Amɛshamɛ ɖu enu yi xodu ɖɔɛ ⁴³ kaka kpɛtɛ kpɔtɔ. Ci yi wo lɔ kpɔnnɔ kodo kpavi kankan kpɛtɛ lɔwo ɔ, wo ɖɔ kishi wive. ⁴⁴ Ŋsu ciwo yi ɖu enu lɔ hlɛhlɛmɛ nyi agbetɔ kotokun amatɔn (5000). ⁴⁵ Le i godu zeɖeka ɔ, yesu nu nɔ́ yi nukplanviwo be wo le ɖo etɔjihungangan mɛ yi a jeŋkɔ nɔ eye a yi ago eɖetɔ lɔ ji nɔ axu lɔ le Bɛtisayida jugan mɛ agé. Gahɔnmɛ ɔ, yiŋtɔ a klanklan ahwakɔn lɔ. ⁴⁶ Ci yi é kliin ɖegbɔ ɔ, e yi eto ɖeka ji yi a vayi tɔ egbedodoɖa wawa. ⁴⁷ Ezan do. Etɔjihungangan ci mɛ yi Yesu nukplanvi lɔwo le lɔ ɖo axu lɔ dodomɛ yí é kpɔtɔ Yesu ɖekɛ le agoji . ⁴⁸ Yesu kpɔ be etɔjihun lɔ kuku ɖeɖeɛ efun nɔ ye nukplanvi lɔwo. Ɖo ɔ, jihɔn xo yí ́dodoɔ ego wo. Ezanmɛ do gatɔnmɛ nu ɔ, é zɔn zɔnlin to axu 'shi lɔ ji yi kpé wo gbɔ kaka jijiɛ a zeto wo nú. ⁴⁹ Ci yí nukplanviwo kpɔ́ɛ yi é zɔn eshi ji yí gbɔgbɔ wo gbɔ ɔ, wo bubuɔ be ŋɔlin yɔ yí tɔ axwa dodo. ⁵⁰ Ɖo ɔ, wo pleŋ kpɔkpɔɛ yí é ɖyi vɔnvɔn nɔ́ wo. Zeɖeka vɔ, Yesu xo nuxu dó wo ji be: " Mí do eji. Enyɛ yɔ. Mí ŋgbe vɔn go!" ⁵¹ Le i godu ɔ é ɖo etɔjihungangan lɔ mɛ le wo gbɔ́ yí jihɔn lɔ mi xoxo. É kpaca nukplanvi lɔwo sugbɔ. ⁵² Ɖo ɔ, wo de se enuɖekpokpoi gɔnmɛ le jeshidu ci yi Yesu wa so kpɔnnɔ nú mɛ go. Ɖo ɔ susu de sɛ́n eŋ lii nɔ́ wo hwehɔnnu go. ⁵³ Ci yi Yesu kodo yi nukplanviwo so etɔ lɔ ɖegbɔ ɔ, wo vayi dre do Ʒenɛzalɛti 'kan mɛ. ⁵⁴ Trololo ci yi wo ɖyi le etɔjihungangan lɔ mɛ vɔ, amɛwo jeshi Yesu. ⁵⁵ Eyi amɛwo le eju ji le ekan lɔ pleŋ mɛ yí vayi kɔkɔ edɔnɔwo kodo wowo 'bawo hɛnvayigɔ afiɖekpokpoi ci wo se be Yesu le. ⁵⁶ Afishafi ci yí Yesu le kɔxwiwo, juganwo kodo enukanwo mɛ ɔ, amɛwo kɔkɔ edɔnɔwo vá egodoxuwo yi ɖeɖeɛ kuku nii be yi lé lɔn nɔ wo a tɔ́ alɔ awu toga nii kpoŋ. Eyi amɛ ciwo pleŋ yi tɔ́ alɔ awu nii ɔ, eɔ mi nɔ wo.