¹ Yesu kodo yi 'nukplanviwo va ɖo ago dyitɔ lɔ ji nɔ Galile 'xu lɔ le Ʒelaza 'kan mɛ. ² Yesu dyi le etɔjihun gangan ci wo zɔn lɔ mɛ. Eyi ŋsu ɖeka ci yí gbɔngbɔnvɔn ɖekɖeɛ efun nɔ so le amɛdyixu yí vá dó ego wo yi zeɖeka. ³ Amɛdyixu lɔ yi é nɔnɔ. É wanɔ cukaɖa kaka kpɔ amɛɖekpokpoi de gbe sɛ́n eŋ a blɛɛ kodo awlɛga can kpetii go. ⁴ Ɖó ejieji ɔ wo donɔ awlɛga alɔwo kodo afɔwo nii yí é soini. Kpɔ́ amɛɖe de sɛn eŋ yí a lii do texwe ɖeka yí á nɔ xwii go. ⁵ Gashagamɛ, ezan kodo kede, amɛdyi xuwo kodo ekpowo ji é nɔnɔ yí adodo axwa, a sɔ́ ekpewo drɛndrɛn yiɖeki ⁶ ci yí é kpɔ Yesu le azɔge gbɔgbɔ ɖaa ɔ, é shi eju yí vayi doŋdo nii ⁷ Keŋ yí do axwa cicici yɔɛ be: "Nyi é jijiɛ a wa kodo ŋ ɔ, Yesu, Mawu ci yí le eji boo eviɛ? Ŋ ɖe kuku nɔ eo le Mawu nyikɔ mɛ be: ŋgbè do gbazavi nɔ ŋ go!" ⁸ Ɖó ɔ, Yesu nu nii be: "Gbɔngbɔnvɔn, tó le ŋsu cɛ mɛ" ⁹ Eyi Yesu biɔ Gbɔngbɔnvɔn lɔ se be: " Lé wo yɔnɔ eo ɔ?" É ɖoŋci nii be: "wo yɔnɔ ŋ be ahwakɔn ɖó ɔ, mì sugbɔ gbígbígbí." ¹⁰ Le i godu ɔ, é ɖe kuku nɔ Yesu veviɖe be yi ŋgbe nya yewo toi le ekan lɔ mɛ go. ¹¹ Ehɔntɔ, le ekpo lɔ gɔnmɛ ɔ, eha sugbɔ ɖekawa le ehɔntɔxu yí le enu ɖuɔ. ¹² Gbɔngbɔnvɔn lɔwo ɖé kuku nɔ Yesu be yi le nya yewo ɖaɖa eha lɔwo mɛ! ¹³ Eyi Yesu ɖe emɔ nɔ́ wo yí wo to lé ŋsu lɔ mɛ yí ɖó eha ciwo yí sugbɔ shigbe kotokun amɛve (2000) haannɛ mɛ. Ci yí gbɔngbɔnvɔn lɔwo ɖó wo mɛ vɔ wo shi eju so ekpo lɔ balimɛ hwlihwlihwli yí je axu lɔ mɛ yí nu eshi yí ku. ¹⁴ Amɛ ciwo yí kplɔ eha lɔwo va ɖugbumɛ shi eju vayi kankan enyɔ lɔ nɔ́ amɛwo le jugan lɔ kodo kɔxwiwo mɛ. Yí amɛwo to yí va kpɔ́ enu ci yi jɔ. ¹⁵ Wo va ɖó Yesu gbɔ yí kpɔ́ ŋsu ci mɛ yi gbɔngbɔnvɔnwo le sasa. É vá le yiɖeki mɛ yí do enuwo yí nɔ anyinɔnɔ yí voŋ. Eyi wo vɔn. ¹⁶ Amɛ ciwo yí kpɔ enu ciwo yí jɔ dó gbɔngbɔnvɔnwo ŋsu lɔ kodo ahawo jí yí nú lehanci wo jɔ do nɔ amɛ kpɛtɛwo. ¹⁷ Eyi wo tɔ kuku ɖeɖe nɔ yesu be yí le só le yewo nyigban ji. ¹⁸ Ci yí Yesu ɖo etɔjihungangan mɛ yí a só ɔ, ŋsu ci mɛ yí é nya gbɔngbɔnvɔnwo le lɔ va ɖe kuku nii be ye a kplɔɛ do. ¹⁹ Yesu dr xɔ egbe nii go. Vɔ ɔ, é nu nii be: " yì axwe le tɔowo gbɔ́ yí a nu enu ciwo pleŋ yí Mawu wanɔ eo nɔ wo, lehanci é ku ŋshishi nɔ́ eo do" ²⁰ ŋsu lɔ yi nyao vayi tɔ enu á yí Yesu wa nii nunu nɔ amɛwo kodo axwa le Jugan Amɛwo lɔwo 'kan mɛ. Eyi enu lɔ jí eŋ nɔ amɛshamɛ. ²¹ Yesu zɔn etɔjihungangan mɛ yí gbɔ so ago hunɖaa ji nɔ axu lɔ yi le etu nii. Eyi amɛwo lɔ́ ahwa hoo yí va cɔin. ²² Mawusɛnxu ci yí le hɔn tɔxu lɔ 'gawo domɛtoɔ ɖeka va ɖo. Wo yɔɛni be ʒayilɔsi. Ci yí é kpɔ Yesu ɔ, é je eklɔji do akɔmɛ nii ²³ yi ɖe kuku nii be: "Evinyɛ nyɔnuvi le baɖaxo, và sɔ alɔ dadɔ eta nii nɔ à gan a cí aggbe!" ²⁴ Eyi Yesu kplɔɛ do yí wo ɖedo. Amɛwo lɔ́ ahwa kplɔ Yesu do yí xɛxɛ giji giji. ²⁵ Ehɔn ɔ, nyɔnu ɖeka le ahwakɔn lɔ mɛ. So exwe wive ge yí ehun ŋɛŋɛ do nu. É yi be ye a vayi da edɔ lɔ le doto sugbɔ sasa yí wo sɛn eŋ yí dɛɛ nii go. ²⁶ É se vevi sugbɔ yí zan yi 'howo pleŋ do edɔ lɔ dada mɛ. Vɔ ɔ, edɔ lɔ gbe sɛn eŋ nii do ji. ²⁷ Wo xo nuxu nɔ nyɔnulɔ so Yesu nu vayi. Eyi é va ɖó amɛ ciwo yí lɔ ahwa yi kplɔ Yesu do mɛ kaka va tɔ alɔ awu nii. ²⁸ Ɖó ɔ, nyɔnu lɔ nunuɔ le yíɖeki mɛ be: " Nɔ na sɛn eŋ tɔ alɔ awu nɔ Yesu kpɔŋ vɔ, na gan." ²⁹ Zeɖeka vɔ, ehun ci yí ŋɛŋɛ dó nu ɖó ete nii. Eyi é nya le yiɖeki mɛ be: edɔ lɔ mi nɔ eye. ³⁰ Gahɔnmɛ cucucuɔ, Yesu can nya le yiɖeki mɛ be ŋsɛn ɖeka tó le eye mɛ. Eyi é trɔ yí kpɔ ahwa ci yí kplɔɛ dó lɔ yí biɔ́ se be: " Mi yi ́tɔ alɔ awu nɔ ŋ ɔ? ³¹ Eyi yi nukplanviwo biɔ́ɛ se be: " Ci yí amɛwo xaxa eo giji giji ahan ɖee, à gbe va biɔbiɔ se be mi yi ́tɔ alɔ awu nɔ eye mɛ a?" ³² Gankegan ɔ, Yesu gbe ɖeɖeɛ ekɔ yí jijiɛ amɛ ci yi tɔ alɔ awu nii kpɔ. ³³ Vɔnvɔn ɖó nyɔnu lɔ yí é hunhunhúɔ. Ɖó ɔ é nya enu ci yí jɔ. Eyi é va je ekloji dóakɔnmɛ nɔ yesu yi nú le enu lɔ jɔ dó nii nyɔnɔnuitɔ. ³⁴ Eyi yesu nú nii be: " Evinyɛ ao xɔse ɖe eo. Shi ete a yi le ŋcifafa mɛ. Edɔ lɔ le mi nɔ eo." ³⁵ Gacimɛ yí Yesu le enyɔ hɔnwo nuɔ nɔ nyɔnu lɔ ɔ, junugbi só axwe mɛ va nɔ mawusɛnxu 'ga lɔ yí va nú nii be: " Evio nyɔnuivi lɔ ku. Ŋgbe gbe do aya nɔ cicagan lɔ go." ³⁶ Ci yí eto nɔ enyɔ lɔ mɛ nɔ Yesu ɔ, é nu nɔ mawusɛnxu 'ga lɔ be: "jika ŋgbe so eo go; xɔ́ɛse kpɔŋ." ³⁷ Eyi va nú nɔ ahwakɔn amɛɖekpokpoi ŋgbe kplɔ eye do sɔwu Piyɛ kodo Ʒaki gbe sɔ kpe nɔ Ʒan ci yí nyi Ʒaki nɔviɛ go. ³⁸ Wo va ɖo mawusɛnxu 'ga lɔ xwe. Yesu kpɔ yí amɛwo le eʒin nagɔ, le avi fangɔ yí gbe le axwa doɔ cicici. ³⁹ Gahɔnmɛ ɔ, Yesu ɖó axwe yí biɔ wo se be : " nyi yí jɔ yí mí le eʒin nagɔ yí le avi fangɔ ɔ? Ɖevi lɔ de ku go. Alɔn yi é dɔn." ⁴⁰ Wo tɔ kokoi. Vɔ ɔ, é nya wo toi le axwe lɔ mɛ keŋ yi gbe ɖevi lɔ edalɔ kodo enɔlɔ gbe sɔ kpé nɔ́ yi nukplanvi amɛtɔn lɔwo ɖɛ yí wo ɖó exɔ ci mɛ yi ɖevi lɔ le. ⁴¹ Yesu le alɔnu nɔ ɖevi lɔ yí nu be: " Talita kumi" Ci gɔnmɛ yí nyi kpɔ́ be: " Nyɔnuvihwɛ, sò je ete!" ⁴² Eyi nyɔnuvihwe lɔ só je ete zeɖeka yí tɔ́ zɔnlin zɔnzɔn. Exwe wive 've yí é nyi. É ji eŋ sugbɔ nɔ tɔxu. ⁴³ Vɔ ɔ, Yesu dó ese nɔ́ wo veviɖe be amɛɖekpokpoi ŋgbe vayi nu enu ci yí jɔ nɔ amɛɖe go. Le i godu ɔ, é nu nɔ wo be: " Mí na enu ɖevi lɔ nɔ́ à ɖu."