¹ Yesu gbe vayi tɔ enu kplankplan amɛwo le axu ' tu. Wo lɔ ahwa va cɔin sugbɔ kaka yí é glo é vayi nɔ anyi nɔnɔ do etɔjhungangan ɖeka mɛ le axa lɔ ji yí amɛ lɔwo ɔ wowo le agoji le nyigban. ² É kplan enu sugbɔ wo sɔto labaluwo mɛ yí le yi nukplanmɛnyɔwo mɛ ɔ, é nu nɔ wo be: ³ "Agoo nɔ mí, mí etoa se! Gbeɖeka ɔ jinukuwutɔ ɖeka yi jinuku wú gbe le bomɛ. ⁴ Gacimɛ yí é le jinuku lɔ wugɔ ɔ, jinuku ɖeka wo je emɔtu yí xeviwo cán wo ɖu, ⁵ ɖewo je ekpenyigban ji, fini ci yí ekɔ de su egbɔ le o, yi gbe mi zeɖeka. Ɖo nyigban de tri le hɔntɔxu go. Vɔ ci yí nyidɔn va tɔ́ veve ɔ wo fiɔn yí gbe ku zeɖeka. Ɖo ɔ, eke de yi egu nɔ wo sugbɔ go. ⁶ Vɔ ci yí nyidɔn va tɔ́ veve ɔ wo fiɔn yí gbe ku zeɖeka. Ɖo ɔ, eke de yi egu nɔ wo sugbɔ go. ⁷ Jinuku ɖewo je aŋwakan mɛ yí aŋwakanwo vlu yí cɔ́n wo jí wo de sɛn eku ɖekpokpui go. ⁸ Vɔ, ɖewo je nyigban zozuji yí mi yi sbin yi gbe sɛn eku sugbɔ. le ciwo yi je nyigban zozu ji hɔnwo mɛ ɔ, ɖekawo sɛn eku egban egban, ebuwo sɛn eka howi eka howi yí ebuwo ké gbe sɛn ekave howi ekave howi?" ⁹ Eyi Yesu va nú nɔ́ wo be: "Nɔ́ eto li nɔ amɛɖe ɔ, lé se!" ¹⁰ Ci yi Yesu teyi azɔgbe le amɛwo nú ɔ, amɛdɔdɔ wive lɔwo kodo amɛ kpɛtɛ ciwo yi kplɔɛnido, vá gbɔ́ yi biɔ́ɛ se be nyi yí jɔ yí donɔ labalu ahan mɛ. ¹¹ E ɖoŋci nɔ́ wo be: "Miwo ɔ, Mawu dansin yi 'fiɔɖuxu lɔmɛ 'nuwlawlawo nɔ́ mí. Vɔ amɛ kpɛtɛ wo ɔ, wo xoxoɔ nuxu so ŋú nɔ́ wo to labalu mɛ. ¹² Gahɔnmɛ nɔ́ ŋkuviwo gbe le ete nɔ wo cuaan ahan cán ɔ, nɔ́ wo ŋgbe kpɔ enuɖe go. Eyi nɔ wo gbe sese enu ahan cán ɔ, nɔ́ wo ŋgbe se gɔmɛ nii nyuiɖe go. Ɖo ɔ, nɔ́ wo se yi gɔnmɛ ɔ wo a vá trɔ́ wowoɖekiwo a ji yí wo avásɔ́ wowo 'nuvɔnwo ke wo!" ¹³ Le i godu ɔ, Yesu biɔ amɛ lɔwo sebe : "Mí de se labalu ci yí ŋ do so jinukuwutɔ lɔŋú gɔmɛ o ba? Nɔ́ mí de se yi gɔnmɛ o dee, lé yí mí a wɛɛ do a vá se kpɛtɛwo gɔmɛ ɔ? ¹⁴ Mawu 'nyɔ yí nyí jinukuci yí wo wú ¹⁵ yí amɛɖewo le shigbe emɔtu fini ci yi Mawu 'nyɔ lɔ je nɛnɛ. Vɔ ɔ, fini ci yi wo seseɛ Mawu nyɔ lɔ lé ɔ, ehɔntɔxu lɔ ké legba gbe va xɔɛni le wowo shi le nɛ. ¹⁶ Amɛ buwo gbe li yi le shigbe ekpenyigban nɛnɛ, fini ci jinuku lɔ je; nɔ́ wowo se Mawu 'nyɔ ɔ, wowo xɔɛni zeɖeka kodo jijo. ¹⁷ Vɔ ɔ, kpɔ́ d'é donɔ eke le wo mɛ go. Eyi sabaaɖe ɔ á gbe bu le susu mɛ nɔ wo. Ɖó nɔ́ nɛnɛmunɔwo tɔ́ aya ɖuɖu alo nɔ wo tɔ́ efun ɖeɖe nɔwo dó Mawu 'nyɔ lɔ ŋci zeɖekaɔ, é nyinɔ afɔklɛnnu nɔ́ wo. ¹⁸ Amɛ buwo gbe li hɛnɛ yi le shigbe ŋja, fini ci yi jinuku lɔ je nɛnɛ. Nɔ́ amɛ hɔnwo se Mawu 'nyɔ lɔ ɔ, ¹⁹ xexe cɛmɛ xaxawo kodo dɔkunu fluamɛ fluamɛwo gbe sɔ kpé nɔ enudroamɛ vovovowo vá fɔnnɔ nɔ́ wo yi cinɔ adan nɔ Mawu 'nyɔ lɔ yi d'é gbe sɛnnɔ eku go. ²⁰ Kpɛtɛkpɛtɛ lɔ ɔ, amɛɖewo li yi nyi nyigban zuzu ci yi jinuku lɔ je; nɔ́ amɛ hɔnwo se mawu 'nyɔ lɔ ɔ, wo xɔɛni yi sɔ wanɔ edɔ yi é sɛnnɔ eku le wo mɛ. Amɛɖekawotɔ sɛnnɔ eku gban, ɖewo sɛnnɔ eka howi yi eɖewotɔgbe sɛnnɔ ekave howi." ²¹ Yesu gbe do labalu nɔ́ wo ké be: "ameɖe de tɔ́ kaligban yí sɔ́ tɔka cɔinni alo yí sɔ́ɛ donɔ baci gɔmɛ go. Vɔ ɔ, sɔ wo sɔɛni dado kaligbanci jí. ²² Ɖɔ́ ɔ; enju ciwo pleŋ yí wo wlá a tó je dandanŋgbe yí enyɔ ciwo pleŋ wo wlá á tó je agogbe . ²³ Nɔ́ eto linɔ amɛɖe ɔ, lé se!" ²⁴ Yesu gbe nu nɔ́ wo ké be: "Mí le ebe nɔ enyɔ ciwo mi seseɛ nyuiɖe be; enudrenu ci yí mí sɔ dré enu nɔ amɛɔ, é yí ké wo a sɔ drii yi a gbe do ji nɔ́ mí. ²⁵ Ɖó amɛ ci shi yí enu le ɔ , wo a gbe nii dó ji. Vɔ nɔ́ enuɖe de le amɛɖe shí go ɔ, kankin cin yi a le shi cán ɔ, wo a gbe xɔɛ le shi ." ²⁶ Yesu gbe nu nɔ́ wo be: "Nɔ́ wo a sɔ́ xo nuxu so Mawu 'fiɖuxunu ɔ, wo hɛn wo a nu be: "jinukuwutɔ ɖeka wú jinuku dó nyigban le yi bomɛ. ²⁷ Nɔ́ ezan do ɔ, é mlɔnɔ anyi yí nɔ́ eŋ keɔ, é fɔnnɔ. Vɔ kpɔ́ d'é nyá lehanci yí jinuku lɔ mi yí shinshin do go. ²⁸ Ɖoŋkɔ ɔ, nyigban lɔ ŋtɔ yí nanɔ yí eliku lɔwo donɔ donɔ, evetɔ lɔɔ, é yí nanɔ yí wodonɔ ese yí kpɛtɛkpɛtɛ lɔ ɔ, wo vá sɛnnɔ eku. ²⁹ Kaka sɛnsɛn lɔwo shin ahan ɔ agbledetɔ lɔ sɔnɔ yi 'dɔwanuwo yí atɔ́ edɔ ji. Ɖó ɔ, jinuku lɔwo cancan gamɛ ɖo." ³⁰ Yesu gbe nu ké bé: "Nyi hanci nú yí mi a dréMawu 'fiɔɖuxu lɔ dó viɛ ɔ? Labalu hinde mí a dó a sɔ́ xo nuxu so nú viɛ? ³¹ Mawu 'fiɔɖuxu lɔ le shigbe aciku whliwli ɖeka nɛnɛ. Nɔ́ woa doi ɔ, é wli sɔwo nyigbanji jinukuwo pleŋ. ³² Vɔ nɔ́wo doi ɔ, é minɔ yí shinnɔ yí vá gangannɔ sɔwu xɔkpagble 'ciwo pleŋ yí yi lɔviwo gbanɔ, ɖɔnɔ fafɛ kaka xeviwo sɛ́ eŋ ɖonɔ atɔwo dó mɛ." ³³ Labalu hɔn han ciwo amɛwo a sɛn eŋ le enu kplaan wo. ³⁴ D'é gbenɔ labalu mado nɔ amɛwo gbeɖe, nɔ́ é le enu kplaan wo go. Vɔ nɔ́ yi koɖo yi nukplanviwo dekɛ vá le afiɖe ɔ, é ɖenɔ labalu lɔwo pleŋ gɔnmɛ nɔ wo. ³⁵ Gbehɔngbe lɔ ké ɔ le fiɛshimɛ ɔ, Yesu nu nɔ́ yí nukplanviwo bé: "Mí na nɔ́ mì a yi ago hunɖaa jí." ³⁶ Eyi wo só le amɛwo gbɔ́ yi ku etɔjihun ci mɛ yí Yesu le yí ɖedo. Etɔjihungangan buwo le axa nɔ ci mɛ yí Yesu le sasa. ³⁷ I ge loo, aya gangan ɖeka vá tɔ́ xoxo yí axushi ciwo yi blabla va gbangban ɖaɖa etɔjihungangan lɔ mɛ kaka yi jijiɛ a sɔ daŋkpɛn . ³⁸ Yesu le etɔjihungangan lɔ mɛ le godu yi sɔ́ kɔɖonu ɖeka ɖó ekɔ yi le alɔn dɔɔn fɛɛ. Eyi yí nukplanviwo tɔ́ axwa dodo yɔ́ɛ bé: "Cicagan, ci yí mì ji jiɛ avɔ ɖee, d'é dyi eɖe do nu nɔ eo lo?" ³⁹ Ci yí yesu fɔn ɔ, é wa adan do ayaxoxo gangan lɔ yí nú nɔ́ axushi lɔ bé : "kaba eɖa lé ɖó!" Eyi aya gangan lɔ mí xoxo zeɖeka yí eɖa ɖo kleɖeɖe. ⁴⁰ Le i godu ɔ, Yesu biɔ yi nukplanviwo se be: "Nyi yí ná taɖo yí mí vɔnvɔn ɔ? Mí de kando Mawu jí hɔ de o ba?" ⁴¹ Nukplanvi lɔwo vɔ́n sugbɔ yí biɔbiɔ wowonɔwo se be: " Mi yí nyi amɛ cɛ yɛ yí ayaxoxo gangan kodo axushi seseɛ egbe nii ɔ?"