¹ Yesu ɖo etɔjihugangan lɔ mɛ yí to axu lɔ jí yí trɔgbɔ vayi jugan mɛ. ² Amɛ ɖekawo kɔ ŋsu xokplɛ ɖeka kodo eba ci ji yí é mlɛ vɛɛ nɔ̀ Yesu. Ci yí Yesu kpɔ́ wowo xɔse ɔ, " nú nɔ́ ŋsu xokplɛ lɔ be : "evionyɛ, dò eji! Wo sɔ́ ao 'nuvɔnwo sɔ́ ke eo!" ³ Eyi esedɔwatɔ ɖekawo nú le wowoɖekiwo mɛ be: "ŋsu hɔn zuzuɔ Mawu!" ⁴ Yesu nya susu ci yí esedɔwatɔ lɔwo ɖeɖeɛ yi biɔ wo se be: "Nyi yí jɔ mí ɖeɖeɛ susu dɔndɔnwo ɔ? ⁵ Nɔ́ wo a nú nɔ amɛ be: " wo sɔ́ ao 'nuvɔnwo sɔ ke eo" ali "shi te keŋ a tɔ́ zɔnli zɔnzɔn" ɖee, ci yí bɔbɔ sɔwu ɔ? ⁶ Vɔ, ŋ ji be mí a nya be Agbetɔvi lɔ ɖó acɛ yí a sɔ́ 'nuvɔnwo ke amɛ le nyigban jí." Ci yí é nú nɛnɛ ɔ, é nú nɔ́ ŋsu xokplɛ lɔ be: "shi te, sɔ ao 'ba a yi axwe!" ⁷ Eyi ŋsu lɔ shi te yí kpe axwe. ⁸ Ci yi ahwakɔn lɔwo kpɔ́ enu lɔ nɛnɛ ɔ, wo vɔn yi kanfu mawu ci yí na acɛ hɔn agbetɔwo. ⁹ Ci yí Yesu sɔ́ le hɔn yí yi ɔ, é kpɔ́ ŋsu ɖeka lé anyinɔnɔ le taga jɔxu. Wonɔ ŋsu lɔ be Matiye. Yesu nu nii be "kplɔ ŋ do!" é só yí kplɔɛ dó́ ¹⁰ Boo hwecini yi Yesu ɖuɖu ɔ enu le axwe mɛ ɔ, tagajɔtɔ sugbɔ kodo enuvɔnwatɔ buwo vayi vá tɔ enu ɖuɖu kodo Yesu kodo yi nukplanviwo. ¹¹ Ci yí Falisitɔwo kpɔ́ yi Yesu ɖuɖu ɔ enu kodo amɛ hɔnwo ɔ, wo biɔ yi nukplanviwo se be: " nyi yi jɔ mìwo cicagan ɖuɖuɔ enu kodo tagajɔtɔwo kodo enuvɔnwatɔ buwo ɔ?" ¹² Ci yi Yesu se enyɔ ci yí wo biɔbiɔ yi nukplanviwo se ɔ, é ɖoŋci nɔ́ wo be: "Amɛ ciwo le nyuiɖe de hián doto go, voɔ, edɔnɔwo yí hiin. ¹³ Mí yí a yi kplan enu só enyɔ ci yí Mawu nú be: "ŋshishikukunɔamɛ yí ŋ jijiɛ. D'é nyi avɔsa yɔ go". Ɖo ɔ, ŋ de va amɛ ciwo yí bubu be yewo nyi amɛjɔjɔɛwo yɔ́ gbé go, vɔ, enuvɔnwatɔwo yɔ́." ¹⁴ Eyi Ʒan amɛ ci yí ʒinɔ amɛ do étɔ mɛ 'nukplanviwo tegogo Yesu yi biɔɛ se be: "Nyi yí na taɖo kaba kaba ɔ,míwo kodo Falisitɔwo blanɔ enu yí ao 'nukplanviwo de blanɔ enu oɔ?" ¹⁵ Vɔ ɔ Yesu ɖoŋci nɔ wo be: "Nɔ́ wo jijiɛ a ɖe nyɔnu yí amɛwo va ɖe, amɛ ciwo yi va lɔ wo a sen eŋ nɔ ŋshishi mɛ gacimɛ yí nyɔnuɖetɔ lɔ kpɔtɔ lé wo gbɔ a? Gamɛ li gbɔgbɔ yí wo a vá kplɔ́ nyɔnuɖetɔ lɔ tii le wo mɛ. Gahɔnmɛ yi wo a vá tɔ́ enu blabla nɛ. ¹⁶ Amɛɖe de sɔnɔ avɔ yɔyu sɔtanɔ avɔ xoxwui go. Nɔ́ wo wɛɛ nɛnɛ ɔ, yoyutɔ lɔ gbe nanɔ yí xoxwuitɔ lɔ gbe drɛnnɔn do ji sɔwu lehanci yí é le do sasa. ¹⁷ Nɛnɛke yí A mɛɖe de ɖɔnɔ vɛn ci yí tɔ́ shinshin do gbaza godu xoxwiwo mɛ go nɛ. Nɔ́ wo wɛɛ nɛnɛ ɔ, vɛn shinnɔ kak yí a wo godu xoxwi lɔwo poo. Eyi godu lɔ fin, vɛn lɔ fin, wo a gú amɛ. Vɔ ɔ, vɛn ci yí tɔ́ shinshin ɔ, gbaza godu yoyu mɛ wo kɔɛni do yí vɛn lɔ kodo godu lɔwo d'a gú amɛ go." ¹⁸ Gacimɛ yi Yesu le enyɔ hɔnwo nuɔ nɔ wo ɔ, yuɖatɔwo 'ga ɖeka va va doŋdo nii yí nu bé: "Evinyɛ nyɔnuvi kú sabaaɖe viɛ. Vɔ, và yí a va sɔ́ alɔ dado eta ji nii nɔ́ á fɔn". ¹⁹ Eyi Yesu so yí kplɔɛ do kodo yi nukplanviwo. ²⁰ Ci yí wo yigɔ ɔ, nyɔnu ɖeka ci nu yí ehun ŋɛŋɛ do so exwe wive ge to godu nɔ Yesu yí tɔ alɔ yi 'wu vlaya 'tuga. ²¹ Ɖó é nunuɔ lé yiɖeki mɛ bé: "Nɔ́ ŋ sɛ́n eŋ yí tɔ́ alɔ Yesu 'wu kpoŋ vɔ, na gán". ²² Ci yí Yesu trɔkpɔ godu yí kpɔɛ ɔ, é nu nii be: "Evinyɛ, dó eji; ao xɔse xɔ nɔ eo." Eyi edɔ lɔ mi nɔ nyɔnu lɔ zeɖeka. ²³ Gacimɛ yí Yesu vayi ɖo Yuɖatɔwo 'ga lɔ 'xomɛ yí kpɔ bé wo le enu xoɔ yí le ejin nagɔ ɔ, ²⁴ é nu bé: "Mí to só elɛ. Ɖó ɔ, nyɔnuvihwɛ lɔ de ku go. Alɔn yi é dɔndɔn." Eyi amɛwo koi. ²⁵ Ci yí wo nyá a hwakɔn lɔ yí tii ɖegbɔ ɔ, Yesu ɖo exɔ lɔ mɛ yí lé alɔnu nɔ nyɔnuvihwɛ lɔ yí é fɔn yí shí ete. ²⁶ Eyi enu lɔ ci yí jɔ ɖyi yí gban do ekan hɔn lɔ pleŋ mɛ. ²⁷ Ci yí Yesu so le ehɔntɔxu ɔ, ŋkuvitɔntɔntɔnɔ amɛve ɖekawo kplɔɛ do yí le axwa doɔ bé: "kpɔ́ ŋshishi nɔ́ mì, Davidi eviɛ!" ²⁸ Gacimɛ Yesu va ɖo a xwe mɛ ɔ, ŋkuvitɔntɔntɔnɔ lɔwo tegogoi yí é biɔ wo se be: "Mí kandoji be na sɛn eŋ da edɔ nɔ mí a?" Wo ɖoŋci nii be: "ɛɛ, Axwetɔ." ²⁹ Eyi Yesu sɔ alɔ tɔ ŋkuviwo nɔ́ wo yí nu nɔ́ wo bé: "Lé vá mɛ nɔ mí shigbe lehanci yí mí xɔɛjise do nɛnɛ!" ³⁰ Eyi ŋkuviwo hun nɔ́ wo. Eyi Yesu nu nɔ́wo sɛnŋsɛnŋɖebe: "Mí ɖo eto yí a se nyuiɖe. Amɛɖe ŋgbe se go." ³¹ Vɔ ci yí wo só ɔ, wo vayi to enu ci yí Yesu wa lɔ nɔ amɛwo lé ekan hɔn lɔ pleŋ mɛ. ³² Gacimɛ yí ŋkuvitɔntɔntɔnɔ lɔwo totoɔ lé axwe lɔ mɛ ɔ, wo kplɔ ŋsu ɖeka va Yesu gbɔ. Aɖe ku nɔ ŋsu lɔ; ɖó ɔ, gbɔbgbɔnvɔn le eji mɛ nii. ³³ Ci yi Yesu nya gbɔngbɔnvɔn lɔ tii le éji mɛ nɔ aɖekukutɔnɔ lɔ ɔ, aɖekukutɔnɔ lɔ tɔ́ nuxu xoxo. É kpaca amɛ ciwo pleŋ yí va ehɔntɔxu lɔ yí wo tɔ́ nunu bé "Amɛɖe de kpɔ enu cɛ han ɖe le Israyɛli kpɔ go:" ³⁴ Vɔ Falisitɔwo nunuɔ bé: " Gbɔngbɔnvɔnwo 'ga yí ná ŋsɛn yi yí é sɔ nyanya gbɔngbɔnvɔn hɔnwo!" ³⁵ Yesu ɖyiɖyiɛ esa tó juganwo kodo kɔxwiwo mɛ yí le enu kpla le Mawusɛnxuwo. É le axwa doɔ yi sɔ le eŋɛ 'nyui lɔ doɔ nɔ amɛwo so mawu 'fiɔ ɖuɖu lɔ nu yí gbe lé edɔ kodo ekplɛxoxo vovovowo pleŋ dagɔ nɔ amɛwo. ³⁶ Nɔ́ Yesu kpɔ amɛ lɛwo 'nu wanɔ ŋshishi nii. Ɖó ɔ, lanwɛ gbɔjɔ nɔ́ wo yí enu gbe cí ekɔ nɔ wo shigbe lɛngbɔ ciwo yí de ɖó kplɔtɔ nɛnɛ. ³⁷ Eyi Yesu nu nɔ yi nukplanviwo be: "Jinuku ci yí wo a ɖe sú egbɔ, vɔ ɔ, edɔwatɔ kankin yí li. ³⁸ Ci yí é le nɛnɛ ɔ, mí ɖe kuku nɔ ebotɔ lɔ nɔ́ á dɔ edɔwatɔwo ɖaɖa ebo lɔ mɛ."