¹ Yesu yɔ yi nukplanvi wive lɔwo bɔ yí ná ŋsɛn wo nɔ wo a nya gbɔngbɔnvɔnwo yí a da edɔ wo pleŋ yí a gbe na yi vevesese vovovowo pleŋ a mí ² Amɛdɔdɔ wive lɔwo nyikɔwo ge: jeŋkɔ, Simɔ ci yi wo na nyiko be piyɛ kodo nɔviɛ Andre; Ʒaki kodo nɔviɛ Ʒan ciwo yi nyi Zebede eviɛwo ; ³ Filipu kodo Batelemi, Toma kodo Matiye ci nyi tagajɔtɔ; Ʒaki, Alufe eviɛ kodo taɖe; ⁴ Simɔ ci yí nyí ejunyikɔhwlɛngantɔ kodo yuɖa Ishikaliwɔti ci sa Yesu ⁵ CI yi Yesu dɔ amɛdɔdɔ wive lɔwo ɖaɖa eju l mɛ ɔ, é nú lé wo a wa do nɔ́ wo bé : Mi gbe yi ekan ciwo mɛ yi amɛmanyi yuɖatɔwo le go yi mí gbe yi jugan ciwo yi le Samali 'kan mɛ mɛ go. ⁶ Vɔ ɔ mí yi Israyɛlivi ciwo yí tran so Mawu 'mɔ́ jí yí va le shigbe lɛngbɔ bubuwo nɛnɛ gbɔ́ ⁷ Nɔ́ mí yigɔ ɔ, mi dó axwa yí a sɔ́ dó eŋɛnyui lɔ nɔ amɛwo be: "Jeŋkushi 'fiɔɖuxu lɔ gogo." ⁸ Mí da edɔ nɔ amɛwo yí fɔ́n amɛkukuwo dó agbe. Mi da edɔ nɔ ekponɔwo yí a nyá gbɔngbɔnvɔnwo. Wo ná enu mí gbali, Miwo can mí gbe na amɛwo gbali. ⁹ Mí ŋgbe hɛn shika alo ehokɔ alo Gajɔn do akpo mɛn go. ¹⁰ Mí ŋgbe hɛn godu nɔ emɔ ci yí mí jijiɛ a zɔn go. Mí ŋgbe hɛn awu bu ɖe bɔdo ci yí mí do nu go. Mí ŋgbe hɛn afɔkpawo alo aci ci yí wo lenɔ dó alɔnu go. Ɖó ɔ, edɔwatɔ ɖó a xɔ yi ' nuɖuɖu ¹¹ Nɔ́ mí ɖo jugan ɖe alo kɔxwi ɖe mɛ ɔ, a biɔ amɛ ci yí le egbesɔsɔ yí a xɔ mɛdru mí 'ta se yí a nɔ gbɔ kaka a sɔnanɔ gacimɛ yí mí a so lé ehɔntexu. ¹² Nɔ́ mi ɖo axwe ɖe mɛ ɔ, mi a dó egbe nɔ axwe lɔ mɛtɔwo bé: "Fafa mí a kpɔ!" ¹³ Nɔ́ axwe lɔ mɛtɔwo xɔ mí mɛdru ɔ, fafa ci yí mí biɔ wo a nɔ́ wo jí. Vɔ nɔ́ wo da xɔ mí mɛdru o ɔ, fafa lɔ a trɔva mí gbɔ. ¹⁴ Vɔ ɔ, nɔ́ wo de xu mí mɛdru go alo wo de jí a se míwo 'gbe le axwe ɖe alo jugan ɖe mɛ ɔ, mí a so lé ehɔntɔxu yí a xuxu míwo 'fɔ́kuwo. ¹⁵ Le nyɔnɔnui mɛ ɔ, ŋ nunuɔ nɔ, mí bé: "kojoɖogbe ɔ, wo a dɔn eto nɔ́ jugan hɔn mɛtɔwo sɔwu Dodomu kodo Gomɔ juganmɛtɔwo." ¹⁶ Agoo nɔ mí! Mí le shigbe lɛngbɔwo han nɛnɛ yí ŋ dɔdɔ ɖaɖa ehlawo dodom. É yi dɔ taɖo ɔ, mí a je aye shigbe lehanci edanwo jenɔ aye do nɛnɛ yí fá xomɛ shigbe lehanci yí hwanlinwo fanɔ xomɛ do nɛnɛ. ¹⁷ Mí kpɔ nyuiɖe, ɖo amɛwo a va sɔ mi doashi nɔ́ Sɛnsɛn 'hwɛxɔnu 'gawo yi wo a va nya mí lewowo Mawusɛnxuwo. ¹⁸ Wo a va yɔ ehwɛ mí le ekan jikpɔtɔ kodo efiɔwo gbɔ do nyaŋ 'ta. Enu hɔn a va nyi kunu han yí mí a ɖe so ŋ nu nɔ ekanjikpɔtɔ kodo efiɔ lɔwo amɛmanyi yuɖatɔwo. ¹⁹ Nɔ́ wó vá lé mí kpe ehwɛhɔnu ɔ, mí ŋgbe vɔn nɔ enyɔ ciwo yí mí a va yí nu alo lehanci yi mí a nui do go. Enyɔ ci yí mi a nu gahɔn mɛ a va susu mɛ nɔ mí. ²⁰ Ɖo d'é nyi ́ míwo ŋtɔwo a to enyɔ go. Vɔ ɔ, miwo 'da gbɔngbɔn yí a to enyɔdo enu nɔ mí. ²¹ Amɛwo a va sa wowo nɔn viwo nɔ wo a wu. Nɛnɛke, edawo a va sa eviwo a be wo le wu nɛ. Eviwo a va tɔ enu kodo wowo 'dawo kodo wowo 'nɔnwo kaka a sa wo be wo le wu. ²² Amɛshiamɛ a va gbe eŋva nɔ́ mí do nyaŋ 'ta. Vɔ ɔ, amɛ ci yí a do eji kaka a sɔyi vɔvɔnu ɔ, Mawu a xɔɛ gan. ²³ Nɔ wo cí yumɛ nɔ mí le jugan ɖe mɛ ɔ, mí le jugan ɖe mɛ ɔ, mí shi yi ebu mɛ. Le nyɔnɔnui mɛ ɔ, ŋ nunuɔ nɔ mí d'a ɖyi esa sɔto Israyɛli juganwo pleŋ mɛ gbɔxwe yí Agbetɔvi lɔ a va go. ²⁴ Sukuluvi ɖe de nyanɔ enu sɔwu yi cica go yí edɔwavi ɖe de nyanɔ enu sɔwu yí 'ga go. ²⁵ Nɔ sukuluviɖe nya enu sɔ kodo yí cica ɔ, e sun nii yí nɔ edɔwaviɖe nya enu sɔ kodo yi 'ga ɔ, e sun nii. Nɔ wo yɔ ega ci yi le enu nɔ axwe lɔ bé Bɛlizebuli ɖee, nyikɔ vɔn hin yí a wu egan hɔn eyi wo a nu axwe lɔ mɛtɔwo ɔ!' ²⁶ "Ci yi e le nɛnɛ ɔ, mí ŋgbe vɔnnɔ agbetɔ go. Ɖo enu ciwo pleŋ wo sɔ enu cɔn ɔ; wo a ɖe wo tii yí enu ciwo pleŋ yí wo sɔ wlá ɔ, wo a kpɔ́ wo. ²⁷ Enyɔ ci yí ŋ nu nɔ mí ezamɛ ɔ, mí nui kede. Enyɔ ci yi ŋ ɖe ekpa yí nu nɔ mí ɔ, mí do axwa yí a nui lé exɔwotamɛ nɔ amɛshiamɛ a sii. ²⁸ Mí ŋgbe vɔn nɔ amɛ ciwo yí wunɔ ŋcilan vɔ yi wo de sɛn eŋ wunɔ ese go. Mawu ci yi a sɛn eŋ sɔ ŋcilan kodo ese danŋkpɛn do ezomavɔ mɛ yí mi ɖo a vɔn nɔ. ²⁹ Wo de sanɔ hwiʒihwiʒi amɛve do eju gankegan yi eho lɔ d'a nyi enuɖe go baa? É le nɛnɛ gankagan eɖe de kunɔ míwo 'da Mawu manya go. ³⁰ Míwo yɛ ɔ, kaka sɔ je mí wo ɖakuiwo jí cán ɔ, Mawu nya nɛni ci yí wo nyi yí le eta nɔ mí. ³¹ Eyi na taɖo ɔ, mí ŋgbe vɔn go. Ɖo ɔ, mí xɔ ashi nɔ nɔ Mawu sɔwu hwiʒihwiʒi sugbɔ!" ³² "Nɔ amɛɖe humɛ le amɛshiamɛ ŋmɛ bé ye nyi nyaŋ nukplanvi ɔ, enyɛ can na hunmɛ le Edanyɛ ci yi le jiŋkushi ŋmɛ be yi nyi nyaŋ 'mɛ. ³³ Vɔ nɔ amɛɖe gbe e amɛshiamɛ ŋmɛ be ye de jeshi ŋ go ɔ, Enyɛ can na gbe le edanyɛ ci yí le jiŋkushi ŋmɛ be ŋ de jeshii go." ³⁴ "Mi ŋgbe bubuɔ be fafa yi ŋ hɛn va nyigban lɔ ji go. ŋ de hɛn fafa va go, ahwa yi ŋ hɛn va ³⁵ ŋ va yí a vá má evi ŋsuvi kodo edalɔ domɛ yi a má evi nyɔnuvi kodo enɔlɔ domɛ yi a gbe má evishi kodo asuɔnɔ domɛ. ³⁶ Ketɔwo aso amɛŋtɔ xomu mɛ nu amɛ. ³⁷ Nɔ amɛɖe lɔn edalɔ alo enɔlɔ sɔwu ŋ ɔ, amɛ lɔ de je yí a nyi nyaŋ 'mɛdɔdɔ go. Nɔ amɛɖe lɔn eviɛ ŋsu alo eviɛ nyɔnu sɔwu ŋ ɔ, amɛ lɔ de je yi a nyi nyaŋ 'mɛdɔdɔ go. ³⁸ Nɔ amɛɖe de sɔ yi cisoga yi kplɔ ŋ do go ɔ, amɛ lɔ de je yi a nyi nyaŋ nukplavi go. ³⁹ Nɔ amɛɖe ji bé ye a wlɛn ye 'gbe gan ɔ, a bui. vɔ nɔ amɛɖe bu yi 'gbe do nyaŋ 'ta ɔ, a gbe yi kpɔɛ." ⁴⁰ " Nɔ amɛɖe xɔ mí ɔ, enye yi é xɔ yi nɔ amɛɖe xɔ ŋ ɔ, amɛ ci yi dɔ ŋ ɖaɖa yi é xɔ. ⁴¹ Nɔ amɛɖe xɔ Mawu 'ŋɛdotɔ ɖe nɔ ci yi e nyi Mawu 'ŋɛdotɔ taɖo ɔ, amɛ lɔ a xɔ efɛcu ci han yi Mawu 'ŋdotɔ a xɔ. Nɔ amɛɖe xɔ amɛjɔjɔɛ nɔ ci yi e nyi amɛjɔjɔɛ taɖo ɔ, amɛ lɔ a xɔ efɛncu ci han yí amɛjɔjɔɛa xɔ. ⁴² Le nyɔnɔnui mɛ ɔ, ŋ nunuɔ nɔ mí bé nɔ amɛɖe na eshi fafa kɔkpu ɖeka pɛɛ amɛ manyi enuɖe hɔnwo domɛ ɖeka nɔ ci yi é nyi nyaŋ nukplanvi taɖo ɔ, amɛ lɔ a xɔ edɔ ci yi e wa 'fɛncu."