¹ "Mí kpɔ nyuiɖe nɔ mí ŋgbe wawa enunyui ci yí míwo sɛnsɛn biɔ so mí gbɔ le amɛwo ŋmɛ bé nɔ́ wo a kpɔ́ go. Ɖó nɔ́ mí wɛɛwɛ ahan ɔ, míwo 'da ci yí lé jiŋkushi d'a cu eƒɛn ɖe nɔ mí go. ² Eyi ná taɖo nɔ́ mí nana enu wamɛnɔ ɖe ɔ, mí ŋgbe sɔɛ ɖó ega shigbe lehan ci yí Ayemɛnuwatɔwo wɛɛni do le Mawusɛnxuwe kodo emɔwo ji nɔ nɔ́ amɛwo a kanƒu wo nɛnɛ go. Le nyɔnɔnui mɛ ɔ, ŋ nunuɔ nɔ mí be wowo xɔ wowo 'ƒɛncuwo vɔ. ³ Vɔ ɔ, nɔ́ è na enu wamɛnɔ ɖe kodo ao dushi ɔ, ao 'miɔlɔ ŋgbe nya go. ⁴ Nɛnɛ ɔ, amɛɖe d'a nyá bé eo na enu amɛɖe go yí edao ci yí le wlawla mɛ yí kpɔkpɔ enu ci yí ci yí è wawa le wlawlamɛ a cú yí 'ƒɛn nɔ eo." ⁵ Yesu nu be : " Nɔ́ mí dodoɔ egbe ɖaɖa ɔ, mí ŋgbe wɛɛni shigbe lehan ci yí ayemɛnuwatɔwo wɛɛ ni do nɛnɛ go. Wo nɔnɔ ete le Mawusɛnxuwo kodo emɔgodoxu emɔgodoxuwo nɔ́ amɛwo a kpɔ́ wo. lé nyɔnɔnui mɛ ɔ, ŋ nunuɔ nɔ mi be wowo xɔ wowo 'fɛncu vɔ. ⁶ Vɔ nɔ́ è jijiɛ a dó egbe ɖaɖa ɔ, ɖò ao xɔmɛ yí a cú ehɔn yí a dó egbe ɖaɖa a yɔ́ edao . Eyɛ ci yí le wlawla mɛ yí kpɔkpɔ enu ci yí è wawa le wlawla mɛ a cú yí fɛn nɔ eo. ⁷ Nɔ́ mí dodoɔ egbe ɖaɖa ɔ, mí ŋgbe trɔdo enyɔ ŋmɛɖekawo ji yi a nunuɔ mami mami shigbe lehan ci yí maxɔsetɔwo wɛɛni do nɛnɛ go. Wowo bunɔ be enyɔ sugbɔ yí yewo a nu yí Mawu a se nɔ yewo. ⁸ Mí ŋgbe kpɔ lé wo gbɔ yí a wa go. Ɖo ɔ, míwo 'da Mawu nya enu ci yí wu do mí, gbɔxwe yí miwo a vá biɔɛ. ⁹ Lehanci yí mí a dó egbe ɖaɖa dó ge. "Mìwo 'da ci yi le jiŋkushi, nà nɔ amɛshamɛ a jeshii be ao nyikɔ kɔ. ¹⁰ Nà nɔ́ ao 'fiɔɖuxu a vá, nà nɔ wo a wa ao 'dro le nyigban jí shigbe lehanci yí wo wɛɛni do lé jiŋkushi nɛnɛ. ¹¹ Nà agbe enuɖuɖu mì egbɛ ¹² Sɔ̀ mìwo nuvɔnwo ké mì shigbe lehanci yi mìwo cán, mì sɔ̀ nuvɔnwo kenɔ amɛ ciwo yí wa nuvɔn dó mì nɛnɛ. ¹³ Ŋhbè lɔn nɔ́ mì a jé tetekpɔ mɛ go. Vɔ, ɔ 'xɔ̀ mì lé amɛvɔn lɔ shi mɛ. [ Ɖó tɔo yí nyí efiɔ ɖuɖu lɔ kodo ŋsɛn lɔ kodo kanfukanfu kaka sɔyi mavɔmavɔ. Xoaɖyi] ¹⁴ Nɔ́ mí sɔ́ enu kenɔ amɛ ciwo yí wanɔ enuvɔndo mí ɔ, míwo 'da ci yí le jiŋkushi can a sɔ̀ enu ke mí. ¹⁵ Vɔ nɔ́ mí sɔ́ nuvɔn kenɔ amɛ go ɔ, míwo 'da can d'a sɔ́ nuvɔn ci yí mí wa sɔ ke mí go." ¹⁶ " Nɔ́ mí bla enu ɔ, ŋgbe wanɔ shigbe mí le ŋshishi mɛ lehanci yí Ayemɛnuwatɔwo wɛɛni do nɛnɛ go. Wo ɖonɔ eli ŋmɛ nɔ́ amɛwo a kpɔyí a nyá bé wo blabla enu. Lé nyɔnɔnui mɛ ɔ, ŋ nunuɔ nɔ mí be wowo xɔ́ wowo 'fɛncu vɔ. ¹⁷ Vɔ nɔ́ ɔ́ bla enu ɔ, dránɔ ŋmɛ do yí a shinɔ amihwɛnte. ¹⁸ Nɔ́ amɛwo ŋgbe nya be ɔ́ bla enu go. Edao ci yí le ehɔn lɔ lé wlawla mɛ yí kpɔnɔ enu lé wlawla mɛ ɖekɛ yí a nyá yí a cú yi 'fɛn nɔ eo" ¹⁹ Mí ŋgbe bɔ dɔkunuwo ɖɛ nɔ́ míwo ɖekiwo dó nyigban cɛ ji fini ci yí ekɔsubabawo ɖuɖuɔ enu le yí enuwo jenɔ ehawe le yí ƒlanfinɔwo gbannɔ ehɔnwo yí finnɔ enuwo le go. ²⁰ Vɔ ɔ, mí bɔ dɔkunnuwo ɖɛ́ dó jiŋkushi. Fini ci yí ekɔsubabawo de gblenɔ enu le go yí enuwo de jenɔ ehwe le go yí flanfinɔwo de gbannɔ ehɔnwo le yi finnɔ enu le go. ²¹ Ɖó fini ci yí ao dɔkunnuwo le ɔ, ehɔn ke yi ao 'jí a le nɛ." ²² "Ŋkuvi yí nyí kaligban nɔ́ ŋcilan. Nɔ́ ao ŋkuviwo lé nyuiɖe ɔ, ao ŋcilan lɔ pleŋ a le klɛnklɛn mɛ. ²³ Vɔ nɔ́ ao ŋkuviwo de lé nyuiɖe go ɔ, ao ŋcilan lɔ pleŋ a me vivicimɛ. Ci yí é le eo mɛnɛhan ɔ, nɔ́ klɛnklɛn ci yí le eo mɛ trɔ́ vivici ɔ, vivici ci mɛ à le a gbe va ɖado jí!" ²⁴ "Amɛɖe de li yí a sɛ́n eŋ yi a sɛ́n axwetɔ amɛve go. . Á lɔ́n ɖeka yí a gbé ɖeka alo á sé etonu nɔ́ ɖeka yí a gbali ɖeka. Mí d'a sɛ́n eŋ sɛ́n Mawu kodo eho dó eju go." ²⁵ "Eyi ná taɖo yi ŋ nnunuɔ nɔ mí be mí ŋgbe lonɔ nɔ enu ci yí mí a ɖu alo ci yí mí a nu yí a nɔ́ agbe go. Nɛnɛke mí ŋgbe lonɔ nɔ enu ci yí mí a do dó go kpetii. Agbe de xɔ ashi sɔwu enuɖuɖu yí gotu de xɔ́ ashi sɔwu enudodowo go bá? ²⁶ Mí kpɔ xeviwo ɖa. Wo de donɔ jinuku ɖe go yí wo de ɖe nɔ jinuku ɖe bɔdo ava mɛ go. Vɔ míwo 'da ci yí le jiŋkushi nanɔ enuɖuɖa wo. Míwo de xɔ́ ashi sugbɔ suwu xeviwo bá? ²⁷ Nɔ́ amɛɖe le mí mɛ yí xixiɛ eju do yi ɖekiki nu kakaka ca ɖee, á sɛ́n eŋ dá egaxoxo kankin kpetii do yi 'gbezan jí a? ²⁸ Nyí mí vɔnvɔn do enudodowo nú nɔ ɔ,? Mí kpɔ lehanci yi egbewo danɔ sese do le avemɛ do ɖa. Wo de wanɔ edɔ ɖe go kpɔ́ wo de lɔnnɔ avɔn go. ²⁹ Gankegan ɔ, ŋ nunuɔ nɔ mí be efiɔ salumɔ le yi dɔkunjeje mɛ de wa enu dodo ci yi nyá kpɔkpɔ sɔ́ kodo sese hɔnwo ɖe ɖɛ go. ³⁰ Nɔ́ é nyí bé Mawu 'dodoɔ awu nɔ egbe ciwo yí le ete egbɛ yí esɔ wo a sɔ́ wo danŋkpɛn dó Ezomɛ nɛnɛ ɖee, d'á ná enudodo míwo sugbɔ sɔwu go ba? Mì gbe Mawu jí Mawu ma kando ge a! ³¹ Eyi na taɖo ɔ, mí ŋgbe vɔnnɔ yí a biɔbiɔ se go be : "Nyi yí mí a ɖu ɔ, alo nyi yí mí a nu ɔ? Alo nyi yí mí a do ɔ?" ³² Maxɔsetɔwo pleŋ yí jinɔ enu hɔnwo pleŋ mami mami. Vɔ ɔ, míwo 'da ci yi ́ le jiŋkushi nya bé enu hɔnwo wú do mí. ³³ Míwo susu le nɔ́ jiŋkushi 'ƒiɔɖuxu lɔ kodo Mawu 'dro wawa jí doŋkɔ. Gahɔnmɛ ɔ, Mawu a sɔ enu hɔnwo na mí kpii. ³⁴ Eyi na taɖo ɔ, mí ŋgbe vɔn dó esɔ ci yí a ke nu go. Ɖó ɔ, esɔ lɔ ɖo a vá gbɔxwe yí mí a tɔ́ agbla jeje dii. Cukaɖa ŋkeke ɖeka tɔ, sun nɔ ŋkeke lɔ."