¹ Ci yi Yesu kpɔ ahwakɔn lɔ́wo ɔ, ela eto ɖeka ji yi nɔ anyinɔnɔ yí yi nukplonviwo vá́ gbɔ́. ² Eyi etɔ enukplanmɛnyɔ eɛwo nana wo ³ Yesu nube: "Enu yi nyɔ nɔ amɛ ciwo yi do jeshii le wowoɖekiwomɛ be wamɛnɔ yi yewo nyí le gbɔngbɔnmɛ. Ɖo ɔ, wowotɔ yi nyi jiŋkushi 'ƒiɔ ɖu xu lɔ. ⁴ Enu yi nyɔ nɔ amɛtiwo yi le avi faan, ɖoɔ, Mawu afa akɔn nɔ wo. ⁵ Enu yi nyɔ nɔ amɛtiwo yi fa ecu, ɖo wowotɔ yi a nyi nyigban lɔ. ⁶ Enuyi nyɔ nɔ amɛtiwo yi Mawu 'dró wawa ɖekɛ le susumɛ, ɖo Mawu ana yi edro hɔn ciwi wo ɖo a nyi wawa. ⁷ Enu yi nyɔ nɔ amɛ ciwo yi kunɔ ŋshishi nɔ amɛ, ɖoɔ, Mawu aku ŋshishi nɔ wo. ⁸ Enu yi nyɔ nɔ amɛ ciwo yi ejimɛ kɔ nɔ, ɖo ɔ, wo a kpɔ Mawu. ⁹ Enu yi nyɔ nɔ amɛ ciwo yi jenɔ agbla nɔ faf a lii, ɖóɔ, wo a yɔ wo be Mawu eviɛwo. ¹⁰ Enu yi nyɔ nɔ amɛ ciwo yi wo ci yumɛ nɔ do Mawu 'dro wowptɔ yi nyi jiŋkushi 'fiɔɖuxu lɔ ¹¹ Enu yi nyɔ mí, nɔ amɛwo va le mí zuɔ yi va le yumɛ ciɛ nɔ mí yi va le ŋsu kaan yi le enyɔvɔnwo nuɔ do mi ŋ nɔ ci yi mi xɔ ŋ ji ta. ¹² Eji lé jɔ́ mí, mí vo fɛɛ, ɖó eƒɛncu gangan ɖeka le ete kpɔ mí le jiŋkushi. Nɛnɛhan ke yi wo ci yumɛ nɔ Mawu 'ŋɛdotɔ ciwo yi nii vayisasa nɛ." ¹³ Yesu nube: "Míwo yi nyi eje nɔ xexe lɔ. Vɔ nɔ enu ci yi na yí wo yɔnɔ eje be eje tó le mɛ ɖe, enuɖe li yí wo a doi yi ágbe trɔ eje a? É gbe nyi enuɖewanu go. Eyi wo a sɔ́ɛ kɔŋgbe yi amɛwo atɔ aƒɔ ɖoɖoi ji. ¹⁴ Míwo yi nyi klɛnklɛn nɔ xexe lɔ. Jugan ci yí le eto ji de gbe nyi nɔ enuwlawla go. ¹⁵ Wo de tɔ kaligban yi sɔ tɔka cɔinni vɔ ɔ, wo sɔɛ danɔ do kanligan ci ji nɔ a klɛn nɔ amɛshamɛ le axwe tɔ mɛ. ¹⁶ Mí na nɔ míwo klɛnklɛn a kɔ nɛnɛ nɔ amɛwo a kpɔ́ enunyui ciwo yi mí wawa yi a kanƒu miwo 'da ci yi le jiŋkushi." ¹⁷ Yesu nube: " Mí ŋgbe bubuɔ be ŋ va yí a va ɖe ese ciwo yi Mawu do sɔto mɔ yizi ji kodo Mawu 'ŋɛdotɔwo 'nukplamɛnyɔwo si go. ŋ de va yi a va ɖe wo si go, vɔ ɔ, ŋ va yi a wɛɛ nɔ wo a se wowo gɔnmɛ blebu . ¹⁸ Le nyɔnɔnui mɛ ɔ ŋ nunu nɔ mí be gbɔxwe yi jiŋkushi kodo nyigban d'a gbe va li go ɔ amɛɖe da ɖe wemakui ci yí hwe sɔwu kpɛtɛwo alo eƒin ɖe le ese lɔwo nu si go. ¹⁹ É yi na tado amɛ ci dá wa do ese ci yi hwe sɔwu kpɛtɛwo le ese cɛwo mɛ ji yí a kplán amɛ lɔ a nyi amɛ hwɛhwɛtɔ le jiŋkushí 'ƒiɔɖuxu. Lɔ mɛ. Vɔ ɔ, amɛ ci yi a wa do wo ji yi a gbe kplan amɛ kpɛtɛwo be wo le wa yetɔ han a nyi amɛ gangan le jiŋkushi 'ƒiɔɖuxu lɔ mɛ. ²⁰ Ŋ tɛtɛɛ egbe do ji nɔ mí be nɔ mí de wa do Mawu drowo ji sɔwu esedɔwatɔ kodo falisitɔ go ɔ, mí d'a yi jiŋkushi 'ƒiɔɖuxu lɔ mɛ go." ²¹ Yesu nu bé: "Mí se bé wo nú nɔ́ míwo tɔgbuiwo vayisasa bé: "ŋgbe wu amɛ go. Nɔ́ amɛɖe wu amɛ ɔ, kojoɖotɔwo a ɖó́ kojo kodi". ²² Vɔ enyɛ yɛ ɔ, ŋ nunuɔ nɔ mí bé nɔ́ amɛɖe do dɔmɛzi do nɔviɛ ɔ, kojoɖotɔwo a ɖo kojo kodi. Nɔ amɛɖe yɔ nɔviɛ be exlunɔ ɔ, kojoɖotɔwo 'gawo a ɖo kojo kodi yí nɔ amɛɖe yɔ́ nɔviɛ be sukunɔ ɔ, ezomavɔ yi je nii. ²³ Én yí na taɖo nɔ́ è va avɔsakpe gbɔ́ yi jijiɛ a na enuɖe Mawu yi va ɖo eŋui be ye je agɔ do yenɔviye ɖe ɔ, ²⁴ tashi ao 'nunanna lɔ dó́ avɔsakpe lɔ ŋkɔ yi a vayi dra eo kodo nɔvio lɔ gbanmɛ do gbɔxwe yí a trɔgbɔva ná enu lɔ Mawu. ²⁵ Nɔ́ enu le eo kodo amɛɖe gbamɛ yí eo kodo amɛ lɔ zɔn yigɔ ehwexɔnu ɔ, tèkpɔ kaba nɔ́ mí a se enugɔnmɛ nɔ míwonɔnɔwo gbɔ́. Nɔ́ d'é nyi nɛnɛ ɔ, amɛ lɔ a kplɔ eo yi kojoɖotɔ gbɔ yí kojoɖotɔa sɔ́ eo doashi nɔ gakpajikpɔtɔwo yi wowo a cú eo do gakpamɛ. ²⁶ Ŋ nunuɔ nɔ eo le nyɔnɔnui mɛ be nɔ́ d'é cu efɛn ci yí è ɖu vɛ go ɔ, d'a to le gakpa lɔ mɛ go" ²⁷ Yesu nu be be " Mí se be wo nú be : "ŋgbè dɔn nyɔnu ci yi de nyi ashio o gbɔ go. ²⁸ " Vɔ enyɛ yɛ ɔ, nunuɔ nɔ mí be: amɛɖekpokpoi ci yi a kpɔ amɛbushi yi ádroi ɔ, amɛ lɔ dɔ́n amɛbushi gbɔxoxoxo le yi 'ji mɛ. ²⁹ É yí na taɖo nɔ́ ao ɖushimɛ ŋkuvi dɔndɔn eo do enuvɔn mɛ ɔ, ɖìi yí a sɔ́ daŋkpɛɖaɖa jijitɔxu. A nyɔ́ éo be akpa ɖeka a kán nɔ ao ŋcilan sɔwu ci yí awo ŋcilan a le blebu yí wo a sɔ awo daŋkpɛn do ezomavɔ mɛ. ³⁰ Nɔ awo ɖushímɛ 'lɔ dɔndɔn ewo do znuvɔn mɛ ɔ, sòi yí a sɔ daŋkɛn dada jijitɔhu. A nyɔ nɔ ewo be alɔ ɖeka a kan le awo ŋcilan nu sɔwu ci yi awo ŋtilan a le blebu yí wo a sɔ́ ewo daŋkpɛn do ezomavɔ mɛ." ³¹ Yesu nube : "wo gbe nu hɛnnɛ be "nɔ amɛde jijiɛ agbe ashiɛ ɔ, lé ná nyɔnugbegbewema yi yí a gbii." ³² Vɔ enyɛ yɛ ɔ, ŋ nunuɔ nɔ mí be: ŋsu ɖekpokpoi ci yí a nya ashoɛ yí d'é nyi be aƒɔ yí nyɔnu lɔdo egbe go yi nyɔnu lɔ va yi ɖe amɛ bu ɔ, á nyi ŋsu lɔ dɔ nyɔnu lɔ do hashiwawa 'nuvɔ mɛ. Aɛɖɛke amɛɖekpokpoi ci yi a ɖe nyɔnu ci yi wo gbé ɔ, amɛ lɔ cán je amɛbushigbɔdɔndɔ 'nuvɔ mɛ nɛ." ³³ Yesu nube: " Mí nya be wo nú nɔ́ mìwo tɔgbiwo vayisasabe: "ŋgbe ɖo egbe yí a ta Mawu do ji yi a gɔn mawa do ji go. Vɔ ɔ, na 'do ae 'gbeɖu ci ji yí e ta Mawu do jí" ³⁴ Vɔ enyɛ yɛ ɔ ŋ nunuɔ nɔ mí be mi ŋgbe ta enu cococo go. Mi ŋgbe ta jiŋkushi go. Ɖó ɔ é yí nyí Mawu ƒiɔʒinkpin. ³⁵ Mí ŋgbe ta nyigban go. Ɖo ɔ, e yi nyi aƒɔ ɖojinu nɔ Mawu. Mí ŋgbe ta Ʒeluzalɛmu go. Ɖo ɔ e yi nyi eƒiɔ gangan lɔ jugan. ³⁶ Ŋgbè ta ao 'ta go. Ɖo ɔ, dà sɛ́n eŋ ná yí ao 'ta 'ɖakui kuɖeka a trɔ́ exi alo yi yibɔ go. ³⁷ Nɔ́ é nyi ɛɛ ɔ, awo 'nyɔ lé nyí ɛɛ. Nɔ́ é nyí oo ɔ, awo 'nyɔ té nyí oo. Enyɔ bu ɖe cí yí à nú bɔdo cɛ nu ɔ, Legba gbɔ́ yí yɛ so." ³⁸ Yesu nube : " Mí se yi wo nu be : "Nɔ amɛɖe tɔn ŋkuvi nɔ eo, na tɔn ŋkuvi nii hɛnɛ yí nɔ amɛɖe ŋɛ́ aɖu nɔ eo ɔ, na ŋɛ́ aɖu nii hɛnɛ" ³⁹ Vɔ enyɛ yɛ ɔ, ŋ nunuɔ nɔ mí be, mí ŋgbe wa wadonu go. Nɔ́ amɛɖe xo etomɛ nɔ eo ɖushimɛ ɔ, trɔ́ emiɔlɔmɛ 'kpaxwe nii. ⁴⁰ Nɔ́ amɛde sanma eo do ehwɛxɔnu yi a xɔ wao 'wuvlaya le eo shi ɔ, sɔ wao 'wu ci yi gangan sɔwu hɔn jó nii dó́ jí. ⁴¹ Nɔ amɛɖe ʒin eo ji be eo lé hɛn ye 'gban yi a zɔn afɔ yi kpeci ɖeka han bonu ɔ, hinn a zɔnsɔyi kpeci amɛve han bonu. ⁴² Na enu amɛ ci yí biɔ enu eo. Ŋgbe gbe enudodo nɔ amɛ ci yi biɔ enudodo eo go." ⁴³ Yesu yi enyɔ lɔ ji nɔ wo be: "Mí se be wo nu be:"È ɖo a lɔ nɔvio yi a xa wawo ketɔ ⁴⁴ Vɔ enyɛ yɛ ɔ, ŋ nunuɔ mí be : mí lɔn míwo ketɔwo yí a do egbe ɖaɖa dó eta nɔ amɛ ciwo yí ci yumɛ nɔ mí. ⁴⁵ Ɖɛdɛ ɔ, mí a nyí míwo 'da ci yí le jiŋkushi eviɛwo nyao. Ɖo ɔ é ná yí yí 'we tonɔ dó amɛvɔnwo kodo amɛnyuiwo jí yi na yí eshi janɔ nɔ amɛjɔjɔɛwo kodo amɛmajɔmajɔɛwo. ⁴⁶ Nyɔnɔnui ɔ, nɔ enyi be amɛ ciwo yi lɔnnɔ mí ɖekɛ yi mí lɔnnɔ ɖee, efɛncu hin yi mí a xɔ ɔ? Tagajɔtɔwo cán lɔnnɔ amɛ ciwo lɔnnɔwo! ⁴⁷ Nɔ e nyi be míwo nɔviwo ɖekɛ yi mí donɔ egbe nɔ ɖe, enu gangan hin yí mí wa viɛ ɔ! Jimaxɔsetɔwo cán donɔ egbe nɔ wowo nɔviwo! ⁴⁸ Ci yi e le nɛnɛ ɔ, mí mɛ vɛ shigbe lehanci yí míwo 'da ci yí le jiŋkushi mɛ vɛ do nɛnɛ."